यर्मिया
५ यरुसलेमका बाटोहरूमा डुलिहेर।
चारैतिर राम्ररी नियालेर हेर।
त्यसका चोकहरूमा खोजिहेर।
न्यायको मार्गमा हिँड्ने+
र वफादार भई चल्न खोज्ने एक जना मात्रै भेट्टाउन सक्यौ भने पनि
म त्यस सहरलाई क्षमा गर्नेछु।
२ भन्न त तिनीहरू “जीवित परमेश्वर यहोवाको कसम” भन्छन्।
तर झूटो कसम खान्छन्।+
३ हे यहोवा, तपाईँका आँखाले वफादार मानिसहरूलाई खोजिरहन्छन्।+
तपाईँले आफ्ना मानिसहरूलाई हिर्काउनुभयो तर तिनीहरूलाई केही फरक परेन।*
तपाईँले तिनीहरूलाई पराजित गर्नुभयो, तैपनि तिनीहरूले तपाईँको अनुशासन स्विकारेनन्।+
तिनीहरूले आफ्नो हृदय* ढुङ्गाभन्दा कठोर बनाए।+
तिनीहरू तपाईँतिर फर्कन मानेनन्।+
४ मैले मनमनै सोचेँ: “तिनीहरू पक्कै पनि तुच्छ मानिसहरू हुनुपर्छ।
यहोवाको मार्ग र उहाँको स्तरबारे थाह नभएकोले
तिनीहरू मूर्ख काम गर्छन्।
५ म गण्यमान्य मानिसहरूकहाँ जान्छु र तिनीहरूसित कुरा गर्छु
किनभने तिनीहरूलाई त यहोवाको मार्ग
र उहाँको स्तरबारे पक्कै थाह होला।+
तर तिनीहरू सबैले आफ्नो जुवा* भाँचेका रहेछन्
र आफ्नो बन्धन छिनाएका रहेछन्।”
६ त्यसैले जङ्गलको सिंहले तिनीहरूलाई आक्रमण गर्छ,
मरुभूमिको ब्वाँसोले तिनीहरूलाई लुछ्छ,
तिनीहरूको सहरमा चितुवाले तिनीहरूलाई ढुकिरहन्छ।
त्यहाँबाट बाहिर निस्कने जोसुकै पनि च्यातचुत पारिन्छ
किनकि तिनीहरूले अनगिन्ती पाप गरेका छन्;
तिनीहरूले बारम्बार विश्वासघात गरेका छन्।+
७ म तिमीलाई कसरी क्षमा दिऊँ?
तिम्रा छोराहरूले मलाई त्यागेका छन्।
जो ईश्वर नै होइन, त्यसको नाममा तिनीहरूले शपथ खाएका छन्।+
मैले तिनीहरूलाई चाहिने सबै कुरा दिएँ
तर तिनीहरूले व्यभिचार* गर्न छोडेनन्,
वेश्यालयमा तिनीहरूको ओइरो लागेको छ।
८ तिनीहरू मात्तिएका* घोडाहरूजस्ता छन्,
घोडाजस्तै हिनहिनाउँदै तिनीहरू अर्काकी स्वास्नीको पछिपछि लाग्छन्।+
९ यहोवा घोषणा गर्नुहुन्छ, “तिनीहरूको यस्तो कुकर्मको लागि के म तिनीहरूलाई दोषी नठहराऊँ?
यस्तो घिनलाग्दो काम गर्ने राष्ट्रसित के म बदला नलिऊँ?”+
१० “अङ्गुर बगान लगाइएका त्यसका गराहरूमाथि आक्रमण गरेर तिनलाई नष्ट गर+
तर नामोनिसानै मेटिनेगरि त होइन।
फैलिरहेका त्यसका हाँगाहरूलाई काटिदेऊ
किनभने ती यहोवाका होइनन्।
११ किनकि इस्राएल र यहुदाको घरानाले
मसित ठूलो विश्वासघात गरेको छ,” यहोवा घोषणा गर्नुहुन्छ।+
१२ “तिनीहरूले यहोवालाई त्यागेका छन्। तिनीहरू यसो भन्न छोड्दैनन्,
‘उहाँले हामीलाई केही गर्नुहुनेछैन।*+
हामीमाथि कुनै विपत्ति आइलाग्नेछैन;
हामीले तरबार वा अनिकालको सामना गर्नुपर्नेछैन।’+
१३ भविष्यवक्ताहरू खोक्रा कुरा गर्छन्,
तिनीहरूसित परमेश्वरको वचन छैन।
तिनीहरूको कुराजस्तै तिनीहरू पनि बिलाएर जाऊन्!”
१४ त्यसैले सेनाहरूका परमेश्वर यहोवा यसो भन्नुहुन्छ:
“तिनीहरूले त्यसो भनेको हुनाले
म मेरो वचनलाई तिम्रो मुखमा आगोझैँ तुल्याउनेछु+
र ती मानिसहरूलाई दाउराझैँ तुल्याउनेछु।
अनि त्यस आगोले तिनीहरूलाई भस्म पार्नेछ।”+
१५ यहोवा घोषणा गर्नुहुन्छ, “ए इस्राएलको घराना, म तिमीहरूमाथि आक्रमण गर्न टाढाबाट एउटा जातिलाई बोलाउँदै छु।+
त्यो जाति धेरै पहिलादेखि नै अस्तित्वमा थियो।
त्यो धेरै पुरानो जाति हो,
जसको भाषा तिमीहरू जान्दैनौ
अनि जसको बोली तिमीहरू बुझ्दैनौ।+
१६ तिनीहरूका काँडहरू राख्ने ठोक्रो खुला चिहानजस्तै छ;
तिनीहरू सबै शूरवीर लडाकुहरू हुन्।
१७ तिनीहरूले तिमीहरूको फसल र खानेकुरा खानेछन्,+
तिमीहरूका छोराछोरी,
तिमीहरूका गाईवस्तु र भेडाबाख्रा,
तिमीहरूका अङ्गुर बगान र अन्जिरका रूखहरू सबै सखाप पार्नेछन्।
तिमीहरूका पर्खालले घेरिएका सहरहरू, जसमा तिमीहरू भरोसा गर्छौ, ती सबलाई तिनीहरूले आफ्नो तरबारले नाश गर्नेछन्।”
१८ यहोवा घोषणा गर्नुहुन्छ, “तर ती दिनहरूमा पनि म तिनीहरूलाई पूर्ण रूपमा नाश गर्नेछैनँ।+ १९ अनि तिनीहरूले तिमीलाई ‘यहोवा हाम्रा परमेश्वरले हामीलाई किन यस्तो गर्नुभएको’ भनेर सोधे भने यसो भन्नू, ‘तिमीहरूले आफ्नै देशमा विदेशी देवतालाई पुज्न मलाई त्याग्यौ। त्यसैले अब तिमीहरूले अर्काको देशमा गएर विदेशीहरूको सेवा गर्नुपर्नेछ।’”+
२० याकुबको घरानालाई यसो भन्नू
अनि यहुदामा यस्तो घोषणा गर्नू:
२१ “ए मूर्ख अनि बेसमझ मानिसहरू हो, सुन:+
तिमीहरूका आँखा त छन् तर देख्दैनौ;+
कान त छन् तर सुन्दैनौ।+
२२ यहोवा घोषणा गर्नुहुन्छ, ‘के तिमीहरूलाई मेरो डर छैन?
तिमीहरू मसामु थरथर काँप्नुपर्ने होइन र?
मैले नै बालुवालाई समुद्रको सिमाना बनाएँ।
समुद्रले बालुवालाई कहिल्यै ननाघोस् भनेर मैले परिवर्तन नहुने एउटा नियम ठहराएँ।
समुद्रका छालहरू जति नै उर्ले पनि बालुवामाथि विजयी हुन सक्दैनन्।
ती जति नै गर्जे पनि बालुवालाई पार गर्न सक्दैनन्।+
२३ तर यी मानिसहरू कठोर हृदयका अनि विद्रोही स्वभावका छन्;
तिनीहरूले मलाई पिठिउँ फर्काएका छन् र आफ्नो बाटो लागेका छन्।+
२४ अनि तिनीहरू यो सोच्दैनन्:
“हामीलाई ऋतु-ऋतुमा वर्षा दिनुहुने,
शरद्को र वसन्तको झरी बर्साउनुहुने
र हाम्रो लागि कटनीको समय* तोकिदिनुहुने+
यहोवा हाम्रा परमेश्वरको अब हामी भय मानौँ।”
२५ तिमीहरूकै गल्तीले गर्दा तिमीहरूले यी कुराहरू पाएका छैनौ;
तिमीहरूकै पापले गर्दा तिमीहरू असल कुराहरूबाट वञ्चित भयौ।+
२६ किनभने मेरा मानिसहरूमाझ दुष्टहरू पनि छन्।
तिनीहरू चरालाई पासोमा पार्न ढुकिबस्ने सिकारीहरू जस्तै छन्।
तिनीहरू डरलाग्दो पासो थाप्छन्
अनि मानिसहरूलाई आफ्नो सिकार बनाउँछन्।
२७ चराहरूले भरिएको पिँजडाजस्तै
तिनीहरूको घर छलकपटले भरिएको छ।+
त्यसैले तिनीहरू शक्तिशाली र धनी भएका छन्।
२८ तिनीहरू मोटाएर चिल्ला-चिल्ला भएका छन्;
तिनीहरूको दुष्ट्याइँ भरिएर पोखिएको छ।
तिनीहरू मुद्दामामिलामा अनाथहरूको* पक्ष लिँदैनन्+
बरु आफ्नै सफलता खोज्छन्।
अनि गरिबहरूलाई तिनीहरू न्याय दिँदैनन्।’”+
२९ यहोवा घोषणा गर्नुहुन्छ, “तिनीहरूको यस्तो कुकर्मको लागि के म तिनीहरूलाई दोषी नठहराऊँ?
यस्तो घिनलाग्दो काम गर्ने राष्ट्रसित के म बदला नलिऊँ?
३० यस देशमा डरलाग्दो र भयानक कुरा भएको छ:
३१ भविष्यवक्ताहरू झूटो भविष्यवाणी गर्छन्,+
पुजारीहरू आफ्नो अधिकारको दुरुपयोग गरेर अरूलाई शोषण गर्छन्।
अनि मेरा आफ्नै मानिसहरूसमेत त्यो कुरा मन पराउँछन्।+
तर अन्त आउँदा तिमीहरू के गर्छौ?”