दोस्रो इतिहास
७ सुलेमानले प्रार्थना गरेर सिद्ध्याउनेबित्तिकै+ स्वर्गबाट आगोको मुस्लो झऱ्यो+ अनि अग्निभेटी र बलिलाई भस्म गऱ्यो। अनि पूरै भवन यहोवा परमेश्वरको महिमाले भरियो।+ २ यहोवा परमेश्वरको भवन यहोवाको महिमाले भरिएकोले पुजारीहरू यहोवाको भवनमा पस्न सकेनन्।+ ३ स्वर्गबाट आगोको मुस्लो आउँदा र यहोवाको महिमाले भवन भरिँदा सबै इस्राएलीले हेरिरहेका थिए। त्यसपछि तिनीहरू भुईँसम्मै घोप्टो परेर पेटीमा लम्पसार परे र यसो भन्दै यहोवा परमेश्वरलाई धन्यवाद चढाए: “किनकि उहाँ भला हुनुहुन्छ। उहाँको अटल प्रेम कहिल्यै टल्दैन।”
४ त्यसपछि राजा र सबै मानिसले यहोवा परमेश्वरसामु थुप्रै बलि चढाए।+ ५ राजा सुलेमानले २२ हजार वस्तुभाउ र १ लाख २० हजार भेडा चढाए। यसरी राजा र सबै मानिसले परमेश्वरको भवनको उद्घाटन गरे।+ ६ पुजारीहरू आफूलाई खटाइएको ठाउँमा उभिएका थिए। लेवीहरूचाहिँ यहोवाको स्तुतिगान गाइँदा बजाइने बाजाहरूसहित उभिएका थिए।+ (राजा दाउदले यहोवा परमेश्वरलाई धन्यवाद चढाउन ती बाजाहरू बनाएका थिए। तिनी उनीहरूसँगै* मिलेर यसो भन्दै परमेश्वरको प्रशंसा गर्थे: “किनकि उहाँको अटल प्रेम कहिल्यै टल्दैन।”) अनि लेवीहरूको अगाडि उभिरहेका पुजारीहरूले ठूलो आवाजमा बिगुल फुकिरहेका थिए।+ सबै इस्राएली पनि उभिरहेका थिए।
७ सुलेमानले बनाएको तामाको वेदीमा+ धेरै अग्निभेटी,+ अन्नभेटी+ र बोसो चढाउन सम्भव नभएकोले तिनले अरू अग्निभेटी र मेलबलिको बोसो चढाउन+ यहोवा परमेश्वरको भवनअगाडि भएको चोकको बीचको भागलाई पवित्र पारे। ८ त्यतिबेला सुलेमानले सारा इस्राएलीसित मिलेर सात दिनसम्म चाड मनाए।+ त्यस चाडमा लेबो-हमाथदेखि* मिश्रको वादीसम्मका* मानिसहरू थिए।+ ९ वेदीको समर्पण* सात दिनसम्म चल्यो अनि तिनीहरूले सात दिनसम्म चाड मनाए। आठौँ दिनमा* तिनीहरूले पवित्र सभा+ गरे। १० सातौँ महिनाको २३ औँ दिनमा राजाले मानिसहरूलाई त्यहाँबाट पठाए।+ यहोवा परमेश्वरले दाउद, सुलेमान र आफ्नो प्रजा इस्राएलीहरूको लागि गर्नुभएको भलाइको कामबारे सोचेर आनन्दित हुँदै र रमाउँदै तिनीहरू आ-आफ्नो घर फर्के।+
११ यसरी सुलेमानले यहोवा परमेश्वरको भवन अनि राजमहल बनाउन सिद्ध्याए।+ तिनले यहोवाको भवन र आफ्नो महल बनाउन जे-जस्तो योजना बनाएका थिए, ती सबै सफलतापूर्वक पूरा गरे।+ १२ त्यसपछि यहोवा परमेश्वर राती सुलेमानकहाँ प्रकट हुनुभयो+ र यसो भन्नुभयो: “मैले तिम्रो प्रार्थना सुनेँ। मैले यस ठाउँलाई आफ्नो निम्ति बलिदान चढाइने भवनको रूपमा रोजेको छु।+ १३ यदि मैले पानी नपरोस् भनेर आकाश बन्द गरेँ अनि देशको बालीनाली सखाप पार्न फट्याङ्ग्राहरूलाई आदेश दिएँ र मेरा मानिसहरूमाझ महामारी फैलाएँ भने १४ अनि मेरो नामसित जोडिएका मेरा मानिसहरूले+ त्यतिखेर आफूलाई नम्र तुल्याए,+ मलाई पुकारे, मेरो खोजी गरे र खराब कामहरू त्यागे+ भने म स्वर्गबाट तिनीहरूको प्रार्थना सुन्नेछु अनि तिनीहरूको पाप क्षमा गरिदिनेछु र तिनीहरूको भूमिलाई फेरि उर्वर बनाइदिनेछु।+ १५ अबदेखि यस ठाउँमा मेरो नजर रहनेछ र यस ठाउँमा गरिएको बिन्ती म सुन्नेछु।+ १६ मेरो नाम सधैँभरि यस भवनसित जोडियोस् भनेर मैले यस भवनलाई रोजेको छु र यसलाई पवित्र पारेको छु।+ मेरो नजर र मेरो हृदय यहाँ सधैँभरि रहनेछ।+
१७ “यदि तिमीले आफ्नो बुबा दाउदले जस्तै मैले दिएको हरेक आज्ञा मान्यौ अनि मेरा नीतिनियम र फैसलाहरू पालन गऱ्यौ भने+ १८ म तिम्रो सिंहासन स्थिर पार्नेछु+ र तिम्रो बुबा दाउदसित गरेको यो करार पूरा गर्नेछु:+ ‘इस्राएलमा शासन गर्नलाई तिम्रो उत्तराधिकारीको* कहिल्यै कमी हुनेछैन।’+ १९ तर यदि तिमी मबाट तर्केर गयौ, मैले तिमीसामु राखिदिएको मेरा आज्ञाहरू र विधिविधान पालन नगरी अरू देवीदेवताको उपासना गऱ्यौ अनि तिनीहरूलाई दण्डवत् गऱ्यौ भने+ २० मैले इस्राएलीहरूलाई जुन देश दिएको थिएँ,+ त्यस देशबाट म तिनीहरूलाई जरैसमेत उखेलिदिनेछु अनि मैले आफ्नो नामको निम्ति पवित्र पारेको यस भवनलाई म आफ्नो नजरबाट हटाइदिनेछु। अनि यसलाई सबै जातिका मानिसहरूमाझ हाँसोको पात्र बनाउनेछु र सबै जनाले यसलाई हाँसोमा उडाउनेछन्।+ २१ यो भवन तहसनहस हुनेछ। यसको छेउबाट भएर जानेजति सबैले तीनछक परेर यसलाई हेर्नेछन्+ र यसो भन्नेछन्, ‘यहोवा परमेश्वरले यो देश र यस भवनको किन यस्तो हालत बनाउनुभयो?’+ २२ अनि उनीहरूले भन्नेछन्, ‘तिनीहरूले आफ्ना पितापुर्खालाई मिश्रबाट छुटाएर ल्याउनुहुने+ परमेश्वर यहोवालाई त्यागे+ अनि अरू देवीदेवताको पछि लागेर उनीहरूलाई दण्डवत् गरे र पुजे।+ त्यसैले उहाँले यी सबै विपत्ति तिनीहरूमाथि ल्याउनुभयो।’”+