यर्मिया
४० राजाका पहरेदारहरूका कप्तान नबुजरदानले+ यर्मियालाई रामामा बन्धनमुक्त गरेर जान दिएपछि यर्मियाकहाँ यहोवाको वचन आयो। नबुजरदानले तिनलाई हतकडी लगाएर रामा+ लगेका थिए। यरुसलेम र यहुदाबाट कैदी बनाएर बेबिलोन लगिँदै गरेकाहरूमध्ये यर्मिया पनि थिए। २ अनि पहरेदारहरूका कप्तानले यर्मियालाई अलग्गै लगेर यसो भने: “यहोवा तिम्रा परमेश्वरले नै यस ठाउँमा यस्तो विपत्ति ल्याउनेछु भन्नुभएको थियो। ३ अनि यहोवाले जसो भन्नुभएको थियो, त्यसै गर्नुभयो। किनकि तिमीहरूले यहोवाविरुद्ध पाप गऱ्यौ; उहाँको आज्ञा पालन गरेनौ। त्यसैले तिमीहरूले यस्तो विपत्ति भोग्नुपरेको हो।+ ४ तर आज म तिम्रो हतकडी फुकाउँदै छु। तिमीलाई बेबिलोन जान ठीक लाग्छ भने मसित आऊ, म तिम्रो हेरविचार गर्नेछु। तर यदि तिमी मसित बेबिलोन आउन चाहँदैनौ भने नआऊ। हेर, सारा देश तिमीसामु छ। तिमीलाई जहाँ जान मन पर्छ, त्यहीँ जाऊ।”+
५ यर्मियाले अलमल गरिरहेको देखेर नबुजरदानले यसो भने: “सापानका+ नाति, अहिकामका+ छोरा गदल्याहकहाँ+ फर्केर जाऊ। तिनलाई बेबिलोनका राजाले यहुदाका सहरहरूको रेखदेख गर्न नियुक्त गरेका छन्। तिनी भएकै ठाउँमा मानिसहरूसँग बस। नभए तिमीलाई जहाँ मन पर्छ, त्यहीँ जाऊ।”
त्यसपछि पहरेदारहरूका कप्तानले यर्मियालाई खानेकुरा र कोसेली दिएर बिदा गरे। ६ त्यसैले यर्मिया मिस्पामा+ अहिकामका छोरा गदल्याहकहाँ गए र यहुदामा छोडिएका मानिसहरूसँगै बसे।
७ बेबिलोनका राजाले अहिकामका छोरा गदल्याहलाई यहुदाको र यहुदामा छोडिएका गरिब पुरुष, स्त्री र केटाकेटीको रेखदेख गर्न खटाएका छन् भनेर जब यहुदावरपर आ-आफ्नो सेनासहित बसिरहेका सेनापतिहरूले सुने+ ८ तब तिनीहरू आफ्ना मानिसहरू लिएर मिस्पामा गदल्याहकहाँ आए।+ तिनीहरू नेथन्याहका छोरा इस्माएल,+ कारेहका छोराहरू योहानान+ र जोनाथन, तन्हुमेथका छोरा सिरायाह, नेतोफाहवासी एपेका छोराहरू र माकाथवासीका छोरा यजन्याह+ थिए। ९ सापानका नाति, अहिकामका छोरा गदल्याहले शपथ खाँदै तिनीहरूलाई र तिनीहरूका मानिसहरूलाई यसो भने: “कल्दियालीहरूको सेवा गर्न नडराओ। यहीँ यहुदामा बस र बेबिलोनका राजाको सेवा गर। त्यसो गऱ्यौ भने तिमीहरूको भलो हुनेछ।+ १० अनि मचाहिँ हामीकहाँ आउने कल्दियालीहरूसामु तिमीहरूको प्रतिनिधि बनेर मिस्पामा बस्नेछु। तर तिमीहरूले भने दाखमद्य,* ग्रीष्म ऋतुका फलहरू* र तेल थुपारेर ती सब भण्डार गर्नू। अनि तिमीहरूले रोजेको सहरमै बसोबास गर्नू।”+
११ बेबिलोनका राजाले यहुदामा बाँकी रहेकाहरूलाई त्यहीँ बस्न दिएका छन् र सापानका नाति, अहिकामका छोरा गदल्याहलाई सहरको रेखदेख गर्न नियुक्त गरेका छन् भनेर मोआब, अम्मोन, एदोम र अन्य ठाउँमा बसिरहेका यहुदीहरूले पनि सुने। १२ अनि यत्रतत्र छरिएका सबै यहुदी आफ्नो देश फर्कन थाले। तिनीहरू मिस्पामा गदल्याहकहाँ आए। अनि तिनीहरूले पनि दाखमद्य र ग्रीष्म ऋतुका फलहरू प्रशस्त मात्रामा बटुल्न थाले।
१३ कारेहका छोरा योहानान र यहुदावरपरका सबै सेनापति मिस्पामा गदल्याहकहाँ आए। १४ तिनीहरूले गदल्याहलाई यसो भने: “अम्मोनका राजा बालिसले+ तपाईँलाई मार्न नथेन्याहका छोरा इस्माएललाई पठाएका हुन् भनेर के तपाईँलाई थाह छैन?”+ तर अहिकामका छोरा गदल्याहले तिनीहरूको कुरा पत्याउँदै पत्याएनन्।
१५ त्यसपछि कारेहका छोरा योहानानले मिस्पामा गदल्याहलाई सुटुक्क यसो भने: “नेथन्याहका छोरा इस्माएललाई मार्न मलाई अनुमति दिनुहोस्। यो कुराको सुइँको कसैले पाउनेछैन। त्यसले तपाईँलाई मार्न नपाओस्। तपाईँकहाँ आएका यहुदीहरू तितरबितर हुन नपरोस्। अनि यहुदामा बाँकी रहेकाहरू नाश हुन नपरोस्।” १६ तर अहिकामका छोरा गदल्याहले+ कारेहका छोरा योहानानलाई यसो भने: “त्यसो नगर। इस्माएलबारे तिमी झूटो बोल्दै छौ।”