दोस्रो इतिहास
१४ अबियाह आफ्ना पितृहरूसितै सुते र तिनलाई दाउदनगरमा+ गाडियो। त्यसपछि तिनका छोरा आसा राजा भए। आसाको शासनकालमा देशमा १० वर्षसम्म शान्ति छायो।
२ आसाले आफ्ना परमेश्वर यहोवाको नजरमा जे असल र सही छ, त्यही गरे। ३ उनले विदेशी देवीदेवताका वेदीहरू र अग्ला थानहरू* हटाए।+ अनि पवित्र थामहरू* टुक्राटुक्रा पारिदिए+ र पवित्र खामाहरू* पनि ढालिदिए।+ ४ साथै उनले यहुदाका मानिसहरूलाई आफ्ना पितापुर्खाका परमेश्वर यहोवाको खोजी गर्न अनि उहाँको व्यवस्था र आज्ञा पालन गर्न अह्राए। ५ उनले यहुदाका सबै सहरमा भएका अग्ला थानहरू र धूपदानीहरू हटाए।+ उनको शासनकालमा देशमा शान्ति छाएको थियो। ६ यहोवा परमेश्वरले उनलाई विश्राम दिनुभएको थियो। उनको शासनका ती वर्षहरूमा कोही पनि उनीसित लडाइँ गर्न आएनन्; देशमा शान्ति छायो।+ त्यसैले उनले यहुदामा पर्खालले घेरिएका सहरहरू बनाए।+ ७ उनले यहुदाका मानिसहरूलाई यसो भने: “आओ, हामी यी सहरहरू बनाऔँ अनि सहरहरूको वरिपरि पर्खाल र किल्लाहरू+ खडा गरौँ; मूलढोकाहरू र गजबारहरू पनि बनाऔँ। हामीले हाम्रा परमेश्वर यहोवाको खोजी गरेको हुनाले उहाँले यो देश हामीलाई अधिकार गर्न दिनुभएको छ। हामीले उहाँलाई खोज्यौँ र उहाँले हामीलाई चारैतिरबाट शान्ति दिनुभएको छ।” त्यसैले तिनीहरू ती सहरहरू बनाउन सफल भए।+
८ आसाको सेनामा यहुदाका ३ लाख मानिस थिए, जो ठूला ढाल र भालाले सुसज्जित थिए। अनि बिन्यामिनको कुलबाट २ लाख ८० हजार वीर योद्धा थिए, जो साना ढाल* अनि धनुले सुसज्जित थिए।+
९ पछि इथियोपियाली जेरह आफ्ना १० लाख सिपाही र ३ सय रथका साथ आसासित युद्ध गर्न आए।+ जब तिनी मारेसाह+ पुगे, १० तब आसा पनि तिनीसित युद्ध गर्न गए। उनीहरू मारेसाहको जेफ्थाह बेँसीमा दल बाँधेर तैनाथ भए। ११ त्यसपछि आसाले आफ्ना परमेश्वर यहोवालाई पुकार्दै यसो भने:+ “हे यहोवा, तपाईँ जसलाई मदत गर्न चाहनुहुन्छ, तिनीहरूलाई अवश्य मदत गर्न सक्नुहुन्छ, चाहे तिनीहरू सङ्ख्यामा धेरै होऊन् वा चाहे तिनीहरूसित कुनै शक्ति नहोस्।+ हे हाम्रा परमेश्वर यहोवा, हामीलाई मदत गर्नुहोस् किनकि हामी तपाईँमै भर परेका छौँ।+ अनि तपाईँको नाममा हामी यो विशाल सेनासित लड्न आएका छौँ।+ हे यहोवा, तपाईँ हाम्रा परमेश्वर हुनुहुन्छ। मरणशील मानिसलाई तपाईँमाथि विजयी हुन नदिनुहोस्।”+
१२ त्यसैले यहोवा परमेश्वरले आसा र यहुदाका मानिसहरूसामु इथियोपियाली सेनालाई हराउनुभयो अनि तिनीहरू त्यहाँबाट भागे।+ १३ आसा र उनका मानिसहरूले इथियोपियाली सेनालाई गेरारसम्मै लखेटे।+ उनीहरूले एक जना पनि बाँकी नरहनेगरि तिनीहरू सबैलाई मारे। किनकि यहोवा परमेश्वरले आफ्नो सेना चलाएर तिनीहरूलाई कुल्चीमिल्ची गर्नुभयो। त्यसपछि आसा र उनका मानिसहरूले थुप्रै सरसामान लुटेर लगे। १४ साथै उनीहरूले गेरारवरपरका सबै सहर नाश गरे किनकि ती सहरहरूका मानिसहरूमाझ यहोवा परमेश्वरको त्रास फैलिएको थियो। उनीहरूले ती सबै सहर लुटे किनकि त्यहाँ लुट्नको लागि प्रशस्तै सरसामान थिए। १५ उनीहरूले वस्तुभाउ भएका मानिसहरूको पालहरूमा पनि आक्रमण गरे अनि थुप्रै गाईवस्तु र उँटहरू लगे। त्यसपछि उनीहरू यरुसलेम फर्के।