इजकिएल
७ यहोवाको वचन फेरि मकहाँ आयो। उहाँले भन्नुभयो: २ “हे मानिसको छोरा, ब्रह्माण्डका मालिक यहोवा इस्राएल राष्ट्रलाई यसो भन्नुहुन्छ: ‘अन्त आउँदै छ! देशको चारैतिर विनाश आउनै लागेको छ। ३ तँमाथि अन्त आउनै लागेको छ र म तँमाथि मेरो रिस पोख्नेछु। तेरो कामअनुसार म तेरो न्याय गर्नेछु र तैँले गरेका घिनलाग्दा कामहरूको लेखा लिनेछु। ४ म तँलाई पटक्कै दयामाया देखाउनेछैनँ र म अफसोस पनि मान्नेछैनँ।+ किनभने तैँले आफ्नो कामअनुसारको फल पाउनेछस् र तैँले आफ्ना घिनलाग्दा कामहरूको नतिजा भोग्नेछस्।+ तब म नै यहोवा हुँ भनेर तैँले जान्नेछस्।’+
५ “ब्रह्माण्डका मालिक यहोवा यसो भन्नुहुन्छ: ‘हेर्, तँमाथि विपत्ति आउनेछ, तैँले पहिला कहिल्यै नभोगेको विपत्ति।+ ६ अन्त आउँदै छ; त्यो पक्कै आउनेछ। त्यो तँमाथि आउनेछ।* हेर्! अन्त आउँदै छ। ७ तिमीहरू जो यस देशका बासिन्दाहरू हौ, तिमीहरूको पालो आएको छ। बेला आउँदै छ, दिन नजिकै छ।+ पहाडहरूमा खैलाबैला मच्चिएको छ, त्यहाँ खुसीयालीको आवाज सुनिँदैन।
८ “‘अब चाँडै म आफ्नो क्रोध तँमाथि दन्काउनेछु+ र तँमाथि मेरो भएभरको रिस पोख्नेछु।+ तेरो कामअनुसार म तेरो न्याय गर्नेछु र तैँले गरेका घिनलाग्दा कामहरूको लेखा लिनेछु। ९ म तँलाई पटक्कै दयामाया देखाउनेछैनँ र म अफसोस मान्नेछैनँ।+ तैँले आफ्नो कामअनुसारको फल पाउनेछस् र तैँले आफ्ना घिनलाग्दा कामहरूको नतिजा भोग्नेछस्। तब तँलाई सजाय दिने म यहोवा नै हुँ भनेर तैँले जान्नेछस्।+
१० “‘हेर्, त्यो दिन! हेर्, त्यो आउँदै छ!+ तेरो पालो आएको छ। सजाय दिने लौरो तयार भएको छ र शत्रुको घमन्ड बढेको छ। ११ हिंसा बढेर दुष्ट्याइँको लौरो बनेको छ।+ अब तिनीहरू, तिनीहरूका धनसम्पत्ति, तिनीहरूका मानिसहरूको भीड, तिनीहरूको मानसम्मान केही पनि बाँकी रहनेछैन। १२ बेला आउँदै छ, त्यो दिन आउँदै छ। किन्नेले खुसी नमनाओस् र बेच्नेले पनि दुःख नमानोस् किनभने सबै मानिसमाथि मेरो क्रोध दन्कँदै छ।*+ १३ बेच्नेले आफ्नो ज्यान जोगाए पनि आफूले बेचेको कुरा फिर्ता लिन जानेछैन किनभने यो दर्शनमा* देखिएको कुरा सबै मानिसले भोग्नेछन्। कोही पनि फर्कनेछैन र गल्ती गरेको हुनाले कोही पनि बच्नेछैन।
१४ “‘तिनीहरूले बिगुल फुकेका छन्+ र सबै तयार भएका छन् तर युद्धभूमिमा कोही जानेछैन किनभने सबै मानिसमाथि म आफ्नो क्रोध खन्याउनेछु।+ १५ तरबार बाहिर ढुकिबसेको छ+ अनि भित्र महामारी र अनिकाल ढुकिबसेको छ। बाहिर खेतमा हुनेजति तरबारले काटिनेछन् र भित्र सहरमा भएकाहरूलाई चाहिँ अनिकाल र महामारीले निल्नेछन्।+ १६ अनि यी सबैबाट उम्कन सफल हुनेहरूचाहिँ पहाडहरूतिर भाग्नेछन् र बेँसीका ढुकुरहरूले जस्तै तिनीहरू प्रत्येकले आफ्नो गल्तीको लागि शोक गर्नेछन्।+ १७ तिनीहरूका हात लुला हुनेछन् र तिनीहरूका घुँडा भिज्नेछन्।*+ १८ तिनीहरूले कम्मरमा भाङ्ग्रा बेरेका छन्+ र तिनीहरू डरले लगलग काँपिरहेका छन्। तिनीहरू सबै लाजमा पर्नेछन् र सबैले कपाल खौरनेछन्।*+
१९ “‘तिनीहरूले आफूसित भएको चाँदी सडकमा फाल्नेछन् र आफूसित भएको सुन देखेर तिनीहरूलाई घिन लाग्नेछ। यहोवाको रिसको दिनमा तिनीहरूको सुनचाँदीले तिनीहरूलाई बचाउन सक्नेछैन।+ तिनीहरू तृप्त हुनेछैनन् र तिनीहरूको पेट पनि भरिनेछैन किनभने तिनीहरूको सुनचाँदी नै तिनीहरूको लागि ठेस लाग्ने ढुङ्गो बनेको छ। २० तिनीहरू आफ्नो सुन्दर-सुन्दर गहनामा घमन्ड गर्थे र तिनीहरूले त्यसबाट* घिनलाग्दा मूर्ति अनि देवताहरू बनाए।+ त्यसैले म त्यो तिनीहरूकै लागि घिनलाग्दो कुरा बनाउनेछु। २१ त्यो* म विदेशीहरूलाई लुट्न दिनेछु र दुष्टहरूलाई ती खोस्न दिनेछु अनि उनीहरूले त्यसलाई बिटुलो पार्नेछन्।
२२ “‘तिनीहरूबाट म आफ्नो अनुहार फर्काउनेछु+ र उनीहरूले* मेरो गोप्य ठाउँ* बिटुलो पार्नेछन्; डाँकुहरू भित्र पसेर त्यसलाई बिटुलो पार्नेछन्।+
२३ “‘साङ्ला* बनाऊ+ किनभने अन्यायले गर्दा देशभरि रक्तपात मच्चिएको छ+ र सहर हिंसाले भरिएको छ।+ २४ म संसारकै सबैभन्दा क्रूर जातिलाई ल्याउनेछु+ र ती मानिसहरूले तिनीहरूको घर कब्जा गर्नेछन्।+ अनि म शक्तिशालीहरूको घमन्ड चकनाचुर पारिदिन्छु र तिनीहरूका पवित्र स्थानहरू* बिटुलो पारिनेछन्।+ २५ सङ्कष्टले गर्दा छटपटी भएपछि तिनीहरू शान्तिको लागि भौँतारिनेछन् तर शान्ति पाउनेछैनन्।+ २६ विपत्तिमाथि विपत्ति आउनेछ र एकपछि अर्को नराम्रा समाचार सुनिनेछन्। मानिसहरूले भविष्यवक्ताबाट दर्शन खोज्नेछन्+ तर पुजारीले निर्देशन* दिन सक्नेछैनन्, मुखियाहरूले सल्लाह दिन सक्नेछैनन्।+ २७ राजाले शोक गर्नेछन्+ र कुलनायक निराशामा डुब्नेछन् अनि मानिसहरूको हात डरले थरथर काँप्नेछ। तिनीहरूको कामअनुसार म तिनीहरूसित व्यवहार गर्नेछु। तिनीहरूले जसरी अरूको न्याय गरेका थिए, म पनि त्यसरी नै तिनीहरूको न्याय गर्नेछु। तब म नै यहोवा हुँ भनेर तिनीहरूले जान्नेछन्।’”+