इजकिएल
२८ यहोवाको वचन फेरि मकहाँ आयो। उहाँले मलाई भन्नुभयो: २ “हे मानिसको छोरा, टायरका अगुवालाई भन, ‘ब्रह्माण्डका मालिक यहोवा यसो भन्नुहुन्छ:
“तँ घमन्डले फुलेको छस्।+ त्यसैले तँ यसो भनिरहन्छस्, ‘म ईश्वर हुँ।
समुद्रबीच म ईश्वरको सिंहासनमा विराजमान छु।’+
तँ आफूलाई ईश्वर सम्झन्छस्
तर तँ मानिस मात्र होस्, ईश्वर होइनस्।
३ तँ आफूलाई दानिएलभन्दा बुद्धिमान् सम्झन्छस्।+
कुनै रहस्य आफूबाट लुकेको छैन भनेर तँ सोच्छस्।
४ तेरो बुद्धि र तेरो विवेक चलाएर तँ धनी भइस्।
तँ आफ्नो ढुकुटीमा प्रशस्त सुनचाँदी थुपारिरहन्छस्।+
५ व्यापार गर्न सिपालु भएकोले तैँले प्रशस्त धनसम्पत्ति कमाइस्।+
तेरो धनसम्पत्तिले गर्दा तँ घमन्डले फुलिस्।”’
६ “‘त्यसैले ब्रह्माण्डका मालिक यहोवा यसो भन्नुहुन्छ:
“तैँले आफैलाई ईश्वर सम्झेको हुनाले
७ म विदेशीहरूलाई तेरो विरुद्धमा उठाउनेछु, जो जातिहरूमध्ये सबैभन्दा निष्ठुर र क्रूर छन्।+
तैँले आफ्नो बुद्धिको कारण हासिल गरेको सबै कुरामाथि तिनीहरूले तरबारले प्रहार गर्नेछन्
र तेरो गौरव नष्ट गरेर तँलाई बिटुलो पारिदिनेछन्।+
८ तिनीहरूले तँलाई चिहानमा पुऱ्याउनेछन्।
समुद्रको बीचमा तँ भयानक तरिकाले मर्नेछस्।+
९ तब के तेरो हत्या गर्न आउनेलाई तँ अझै यसो भन्न सक्छस्: ‘म त ईश्वर हुँ’?
तँलाई बिटुलो पार्नेहरूको हातमा तँ ईश्वर होइन, एउटा मामुली मानिस हुनेछस्।”’
१० ‘विदेशीहरूले तँलाई मार्नेछन्; तँ बेखतनेको* रूपमा मर्नेछस्।
म आफैले नै यसो भनेको हुँ,’ ब्रह्माण्डका मालिक यहोवा घोषणा गर्नुहुन्छ।”
११ यहोवाको वचन फेरि मकहाँ आयो। उहाँले मलाई भन्नुभयो: १२ “हे मानिसको छोरा, टायरका राजाबारे यसो भनेर एउटा शोकगीत गाऊ, ‘ब्रह्माण्डका मालिक यहोवा यसो भन्नुहुन्छ:
“तँ परिपूर्णताको आदर्श थिइस्
किनकि तँ बुद्धिले भरिपूर्ण+ अनि बिछट्टै सुन्दर+ थिइस्।
१३ तँ परमेश्वरको बगैँचा अदनमा थिइस्।
अनमोल रत्नहरूले तँ सिँगारिएको थिइस्
—माणिक, पुष्पराज र यशवमणि;
क्रिसोलाइट, ओनिक्स* र हरितमणि; नीलम, फिरोजा+ र पन्ना;
ती सबै सुनमा जडिएका थिए।
तँ सृजिएको दिनमै ती तयार पारिएका थिए।
१४ मैले तँलाई अभिषेक गरेर पहरा दिने करूबको रूपमा नियुक्त गरेँ।
तँ परमेश्वरको पवित्र डाँडामा थिइस्+ र बलिरहेको पत्थरमा हिँड्ने गर्थिस्।
१५ सृष्टि गरिएको दिनदेखि जबसम्म तँमा दुष्टता फेला परेको थिएन,+
तबसम्म तेरो चालचलन खोटरहित थियो।
१६ तेरो व्यापार ज्यादै फस्टाएकोले+
तैँले ज्यादै अत्याचार गरिस् र पाप गर्न थालिस्।+
तँ अशुद्ध ठहरिएकोले म तँलाई परमेश्वरको पर्वतबाट निकालिदिनेछु र तँलाई नाश गर्नेछु।+
ए पहरा दिने करूब, तँ अब बलिरहेको पत्थरमा हिँड्नेछैनस्।
१७ आफ्नो सुन्दरताले गर्दा तँ घमन्डले फुलिस्।+
तँ आफ्नो गौरवमै डुबेर बसिस् र तेरो बुद्धि भ्रष्ट भयो।+
म तँलाई पृथ्वीमा फ्याँकिदिनेछु।+
अनि राजाहरूसामु तँ तमासा हुनेछस्।
१८ व्यापारमा ठगी गरेर अनि ठूलठूला अपराध गरेर तैँले आफ्ना पवित्र स्थानहरूलाई बिटुलो पारिस्।
म तेरो भूमिमा आगो सल्काउनेछु र तँ जलेर भस्म हुनेछस्;+
तँलाई हेर्नेहरू सबैसामु तँ खरानी हुनेछस्।
१९ देश-विदेशमा तँलाई चिन्नेहरू सबैले अक्क न बक्क भएर तँलाई हेर्नेछन्।+
तेरो विनाश अचानक अनि भयानक तरिकाले हुनेछ।
तँ कहिल्यै देखा नपर्नेगरि सदाको लागि नाश हुनेछस्।”’”+
२० यहोवाको वचन फेरि मकहाँ आयो। उहाँले मलाई भन्नुभयो: २१ “हे मानिसको छोरा, सिदोनतिर हेर+ र त्यसविरुद्ध भविष्यवाणी गर। २२ यसो भन, ‘ब्रह्माण्डका मालिक यहोवा भन्नुहुन्छ:
“ए सिदोन, म तँविरुद्ध उठेको छु र तँमाझ मेरो महिमा हुनेछ।
जब म तँलाई सजाय दिनेछु र तँसामु आफूलाई पवित्र तुल्याउनेछु, तब म नै यहोवा हुँ भनेर मानिसहरूले जान्नेछन्।
२३ म सिदोनमा महामारी फैलाउनेछु; त्यसका सडकहरूमा रगतको खोलो बग्नेछ।
त्यसको चारैतिर तरबार चल्नेछ र तरबारले काटिएकाहरू सबै मर्नेछन्।
तब म नै यहोवा हुँ भनेर तिनीहरूले जान्नेछन्।+
२४ “‘“त्यसपछि इस्राएलको घराना फेरि कहिल्यै त्यस्ता मानिसहरूले घेरिनेछैन, जसले तिनीहरूलाई काँडाको झाडीले जस्तै घोचपेच र खिसी गर्छन्।+ तब म नै ब्रह्माण्डका मालिक यहोवा हुँ भनेर मानिसहरूले जान्नेछन्।”’
२५ “‘ब्रह्माण्डका मालिक यहोवा यसो भन्नुहुन्छ: “जब म इस्राएलको घरानालाई तिनीहरू तितरबितर भएका सबै देशबाट फेरि जम्मा गर्नेछु,+ तब इस्राएलीहरूसामु म आफूलाई पवित्र तुल्याउनेछु र जातिजातिले त्यो देख्नेछन्।+ तब मैले मेरो दास याकुबलाई दिएको+ देशमा इस्राएलीहरू आएर बस्नेछन्।+ २६ तिनीहरू त्यहाँ ढुक्कले बस्नेछन्।+ तिनीहरूले घर बनाउनेछन् र अङ्गुर बगान लगाउनेछन्।+ तिनीहरूसित तुच्छ व्यवहार गर्ने सबै जातिलाई मैले सजाय दिएपछि+ तिनीहरू निर्धक्क भएर बस्नेछन्। तब म नै तिनीहरूका परमेश्वर यहोवा हुँ भनेर तिनीहरूले जान्नेछन्।”’”