गन्ती
३१ अनि यहोवा परमेश्वरले मोसालाई भन्नुभयो: २ “इस्राएलीहरूको खातिर मिद्यानीहरूसित बदला लेऊ।+ त्यसपछि तिमी पनि आफ्ना पितापुर्खाजस्तै माटोमा मिल्नेछौ।”+
३ मोसाले मानिसहरूलाई भने: “मिद्यानीहरूसित युद्ध गर्न र यहोवा परमेश्वरको तर्फबाट उनीहरूसित बदला लिन तिमीहरूमाझ भएका मानिसहरूलाई हतियार भिर्न लगाएर तम्तयार पार। ४ इस्राएलको हरेक कुलबाट एक-एक हजार मानिसलाई युद्धमा पठाउनू।” ५ त्यसकारण लाखौँको सङ्ख्यामा रहेका+ इस्राएलीहरूको हरेक कुलबाट एक-एक हजारको हिसाबले १२ हजार मानिसले हातहतियार भिरे र युद्ध गर्न तम्तयार भए।
६ त्यसपछि मोसाले हरेक कुलबाट एक-एक हजारलाई युद्धमा पठाए। पुजारी एलियाजारका छोरा पिनहास पनि तिनीहरूसँगै गए।+ तिनले पवित्र भाँडाकुँडा र युद्धको सङ्केत दिने बिगुलहरू पनि आफूसितै लगे।+ ७ यहोवा परमेश्वरले मोसालाई आज्ञा गर्नुभएबमोजिमै इस्राएलीहरूले मिद्यानीहरूसित युद्ध गरे अनि पुरुषहरूजति सबैलाई मारे। ८ त्यसबाहेक तिनीहरूले मिद्यानका पाँचै जना राजा अर्थात् एबि, रेकेम, जुर, हुर र रेबालाई मारे। बेअरका छोरा बालामलाई पनि तिनीहरूले तरबारले मारे।+ ९ तिनीहरूले मिद्यानी स्त्रीहरू र बालबच्चाहरूलाई चाहिँ बन्दी बनाएर लगे। साथै मिद्यानीहरूका घरपालुवा जनावर, अरू वस्तुभाउ र उनीहरूका सबै धनसम्पत्ति लिए। १० अनि तिनीहरूले मिद्यानीहरू बसोबास गरेका सबै सहर र छाउनीहरू* जलाइदिए। ११ तिनीहरूले मानिस, वस्तुभाउ र मिद्यानीहरूबाट लुटेका सारा माल लिए। १२ अनि तिनीहरूले ती मिद्यानी कैदीहरू, उनीहरूका वस्तुभाउ र लुटको माल मोसा, पुजारी एलियाजार र इस्राएलीहरूको समुदायसामु ल्याए। त्यसबेला तिनीहरू यरिहो सहरको वारिपट्टि अर्थात् यर्दन नदीको किनारमा पर्ने मोआबको मरुभूमिमा+ थिए।
१३ त्यसपछि मोसा, पुजारी एलियाजार र इस्राएलीहरूको समुदायका कुलनायकहरू तिनीहरूलाई भेट्न छाउनीबाहिर आए। १४ तर युद्धबाट फर्केका सेनाका नाइकेहरू अर्थात् हजार-हजार र सय-सय सैनिकका चुनिएका नाइकेहरूसित मोसा रिसाए। १५ मोसाले तिनीहरूलाई सोधे: “के तिमीहरूले सबै स्त्रीलाई जिउँदै छोड्यौ? १६ बालामको सल्लाह सुनेर पोअरमा+ इस्राएलीहरूलाई यहोवा परमेश्वरसित विश्वासघात गर्न लगाउने स्त्रीहरू तिनीहरू नै होइनन् र?+ तिनीहरूले गर्दा नै यहोवा परमेश्वरको समुदायमाथि विपत्ति आएको थियो।+ १७ अब बालबच्चामध्ये छोराजतिलाई मार अनि पुरुषसित सहवास गरेका स्त्रीहरूलाई पनि मार। १८ तर पुरुषसित सहवास नगरेका कन्ये केटीहरूलाई चाहिँ जीवितै छोड।+ १९ अनि तिमीहरू सात दिनसम्म छाउनीबाहिर पाल टाँगेर बस्नू। तिमीहरूमध्ये ज-जसले कसैलाई मारेका छौ वा कसैको लास छोएका छौ,+ तिनीहरूले तेस्रो र सातौँ दिनमा आफैलाई शुद्ध पारून्+ र तिमीहरूले बन्दी बनाएकाहरूले पनि आफैलाई शुद्ध पारून्। २० साथै तिमीहरूले सबै लुगाफाटालाई र छाला, बाख्राको भुत्ला वा काठबाट बनाइएका सबै कुरालाई शुद्ध पार्नू।”
२१ त्यसपछि पुजारी एलियाजारले युद्धमा गएका मानिसहरूलाई यसो भने: “यहोवा परमेश्वरले मोसालाई दिनुभएको आज्ञामा यस्तो भनिएको छ, २२ ‘सुन, चाँदी, तामा, फलाम, टिन र सिसा २३ अथवा आगोले नष्ट नहुने सबै कुरालाई आगोमा हालेर शुद्ध पार्नू। अनि त्यसलाई चोख्याउने पानीले पनि शुद्ध गर्नू।+ आगोले नष्ट हुने कुराहरूलाई चाहिँ पानीले शुद्ध पार्नू। २४ अनि तिमीहरूले सातौँ दिनमा आफ्नो लुगा धुनू र तिमीहरू शुद्ध हुनेछौ। त्यसपछि तिमीहरू छाउनीमा आउन सक्छौ।’”+
२५ अनि यहोवा परमेश्वरले मोसालाई भन्नुभयो: २६ “तिमी, पुजारी एलियाजार र बुबापट्टिको घरानाअनुसार छानिएका नाइकेहरू मिलेर युद्धबाट ल्याएका सबै कुराको सूचि तयार पार्नू; तिमीहरूले बन्दी बनाएर ल्याएका मानिसहरू र जनावरहरूको गन्ती गर्नू। २७ युद्धबाट ल्याएका सबै कुरालाई दुई भाग लगाउनू। एउटा भाग युद्ध लडेका मानिसहरूको लागि अनि अर्को भाग बाँकी समुदायको लागि।+ २८ युद्धमा भाग लिएका सिपाहीहरूबाट तिमीहरूले यहोवा परमेश्वरको लागि कर उठाउनू। तिनीहरूलाई परेको भागबाट हरेक ५०० मानिस, गाईवस्तु, गधा र भेडाबाख्रामध्ये एउटा-एउटाचाहिँ परमेश्वरको लागि छुट्ट्याउनू। २९ अनि सिपाहीहरूलाई दिइने आधा भागबाट उठेको कर यहोवा परमेश्वरलाई चढाइने भेटीको रूपमा पुजारी एलियाजारलाई दिनू।+ ३० इस्राएलीहरूको बाँकी समुदायलाई दिइएको आधा भागबाट चाहिँ हरेक ५० मानिस, गाईवस्तु, गधा, भेडाबाख्रा र अन्य घरपालुवा जनावरमध्ये एउटा-एउटा छुट्ट्याएर यहोवा परमेश्वरको वासस्थानको* हेरविचार गर्ने+ लेवीहरूलाई दिनू।”+
३१ तब मोसा र पुजारी एलियाजारले यहोवा परमेश्वरले मोसालाई आज्ञा गर्नुभएबमोजिमै गरे। ३२ सिपाहीहरूले युद्धमा लुटेका धनमालबाट बाँकी रहेका कुराहरू यी थिए: ६ लाख ७५ हजार भेडाबाख्रा, ३३ ७२ हजार गाईवस्तु, ३४ र ६१ हजार गधा। ३५ कुनै पुरुषसित सहवास नगरेका स्त्रीहरूको+ सङ्ख्या ३२ हजार थियो। ३६ युद्धमा लडेका सिपाहीहरूलाई लुटको मालबाट आधा हिस्सा दिइयो र तिनीहरूको भागमा ३ लाख ३७ हजार ५ सय भेडाबाख्रा पऱ्यो। ३७ ती भेडाबाख्राबाट ६७५ वटालाई यहोवा परमेश्वरको निम्ति करस्वरूप छुट्ट्याइयो। ३८ अनि तिनीहरूको भागमा ३६ हजार गाईवस्तु पऱ्यो र त्यसबाट ७२ वटालाई यहोवा परमेश्वरको निम्ति करस्वरूप छुट्ट्याइयो। ३९ तिनीहरूको भागमा ३० हजार ५ सय गधा पऱ्यो र त्यसबाट ६१ वटालाई यहोवा परमेश्वरको निम्ति करस्वरूप छुट्ट्याइयो। ४० साथै तिनीहरूको भागमा १६ हजार मानिस परे र तिनीहरूबाट ३२ जनालाई यहोवा परमेश्वरको निम्ति करस्वरूप छुट्ट्याइयो। ४१ अनि यहोवा परमेश्वरले आज्ञा गर्नुभएबमोजिमै मोसाले यी सबै कर यहोवा परमेश्वरको निम्ति भेटीस्वरूप पुजारी एलियाजारलाई दिए।+
४२ मोसाले युद्ध लडेका पुरुषहरूलाई तिनीहरूको भाग दिएपछि बाँकी इस्राएलीहरूलाई लुटको मालबाट दिएको आधा भाग यी थिए: ४३ ३ लाख ३७ हजार ५ सय भेडाबाख्रा, ४४ ३६ हजार गाईवस्तु, ४५ ३० हजार ५ सय गधा ४६ र १६ हजार मानिस। ४७ अनि यहोवा परमेश्वरले मोसालाई आज्ञा गर्नुभएबमोजिमै तिनले इस्राएलीहरूको बाँकी समुदायलाई दिइएको आधा भागबाट हरेक ५० मानिस तथा जनावरमध्ये एउटा-एउटा छुट्ट्याएर यहोवा परमेश्वरको वासस्थानको हेरविचार गर्ने+ लेवीहरूलाई दिए।+
४८ अनि सेनाका नाइकेहरू अर्थात् हजार-हजार र सय-सय सैनिकका चुनिएका नाइकेहरू मोसाकहाँ आए+ ४९ र तिनीहरूले मोसालाई भने: “मालिक, हामीले हाम्रो अधीनमा भएका सिपाहीहरूको गन्ती गऱ्यौँ। हाम्रो एउटा मान्छे पनि कम भएको छैन।+ ५० त्यसैले हामी सबै जना आ-आफूले ल्याएका सुनका गहनाहरू यहोवा परमेश्वरलाई भेटीको रूपमा चढाउन चाहन्छौँ। पाउजु, चुरा, छापऔँठी, कुण्डल र अरू गहना भेटीस्वरूप चढाएर हामी यहोवा परमेश्वरसामु प्रायश्चित गर्न चाहन्छौँ।”
५१ त्यसैले मोसा र पुजारी एलियाजारले तिनीहरूले दिएका सुनका सबै गरगहना स्वीकार गरे। ५२ हजार-हजार र सय-सय सैनिकका नाइकेहरूले यहोवा परमेश्वरलाई चढाएका सबै सुनको तौल १६ हजार ७ सय ५० शेकेल* थियो। ५३ युद्धमा भाग लिएका प्रत्येक सिपाहीले युद्धबाट केही न केही सामान ल्याएका थिए। ५४ मोसा र पुजारी एलियाजारले हजार-हजार र सय-सय सैनिकका नाइकेहरूले दिएका सबै सुन लिए र त्यसलाई यहोवा परमेश्वरसामु इस्राएलीहरूको निम्ति सम्झनाको चिन्ह होस् भनेर भेट हुने पालमा* ल्याए।