गन्ती
१० त्यसपछि यहोवा परमेश्वरले मोसालाई भन्नुभयो: २ “तिमीले दुई वटा बिगुल बनाउनू।+ ती बिगुलहरू चाँदीलाई घनले पिटेर बनाउनू। मानिसहरूलाई एक ठाउँमा भेला गराउन र छाउनी अर्को ठाउँमा सार्ने सङ्केत दिन बिगुल फुक्नू। ३ दुवै बिगुल फुक्दा सारा समुदाय भेट हुने पालको* प्रवेशद्वारअगाडि तिमीकहाँ भेला होऊन्।+ ४ एउटा मात्र बिगुल फुक्दा इस्राएलका कुलनायकहरू अर्थात् हजार-हजारका नाइकेहरू मात्र तिमीकहाँ भेला होऊन्।+
५ “सानो-ठूलो आवाज निस्कनेगरि बिगुल फुक्दा पूर्वपट्टिको छाउनीमा भएकाहरूले+ आफ्नो यात्रा थालून्। ६ अनि दोस्रो चोटि सानो-ठूलो आवाज निस्कनेगरि बिगुल फुक्दा दक्षिणपट्टिको छाउनीमा भएकाहरूले+ आफ्नो यात्रा थालून्। प्रत्येक दललाई यात्रा थाल्ने सङ्केत दिन हरेक चोटि यसरी नै बिगुल फुक्नू।
७ “सारा समुदायलाई एक ठाउँमा भेला गराउन बिगुलहरू फुक्नू+ तर आवाज सानो-ठूलो निस्कनेगरि नफुक्नू। ८ हारुनका छोराहरू अर्थात् पुजारीहरूले बिगुल फुकून्।+ बिगुल फुक्ने यो नियम तिम्रो लागि र तिम्रो पुस्तौँपुस्तासम्मको लागि रहोस्।
९ “आफ्नै देशमा शत्रुहरूले थिचोमिचो गरेकोले तिनीहरूसित लडाइँ गर्नुपऱ्यो भने युद्धको बिगुल फुक्नू।+ अनि यहोवा परमेश्वरले तिमीहरूलाई सम्झनुहुनेछ र तिमीहरूलाई शत्रुहरूको हातबाट बचाउनुहुनेछ।
१० “साथै तिमीहरूले रमाहट गर्ने समयमा+ अर्थात् चाडपर्वमा+ र हरेक महिनाको सुरुमा जब तिमीहरू अग्निभेटी+ र मेलबलि+ चढाउँछौ, त्यतिखेर बिगुल फुक्नू। यसो गर्दा परमेश्वरले तिमीहरूलाई सम्झनुहुनेछ। म तिमीहरूका परमेश्वर यहोवा हुँ।”+
११ दोस्रो वर्षको दोस्रो महिनाको २० औँ दिन+ साक्षीपाटी* राखिएको वासस्थानमाथिबाट* बादल उठ्यो।+ १२ यो देखेपछि इस्राएलीहरू सिनै निर्जनभूमिबाट प्रस्थान गरे; उनीहरूले जुन क्रमअनुसार यात्रा थाल्नुपर्थ्यो,+ त्यसैअनुसार थाले र पारान भनिने निर्जनभूमिमा बादल नअडिएसम्म आफ्नो यात्रा रोकेनन्।+ १३ यहोवा परमेश्वरले मोसामार्फत दिनुभएको आज्ञा मानेर उनीहरूले गरेको पहिलो यात्रा यही थियो।+
१४ तीन-तीन कुलको दलअनुसार सबैभन्दा पहिला यहुदाको दलले यात्रा थाल्यो; यसको नेतृत्व अम्मिनादाबका छोरा नहसोनले गरे।+ १५ इस्साकारको कुलको नेतृत्व जुआरका छोरा नेथनेलले गरे।+ १६ जबुलुनको कुलको नेतृत्व हेलोनका छोरा एलिआबले गरे।+
१७ वासस्थानलाई खोलखाल गरिसकेपछि+ गेर्सोनका सन्तान+ र मरारिका सन्तानले+ वासस्थानका सरसामान बोकेर यात्रा थाले।
१८ त्यसपछि तीन-तीन कुलको दलअनुसार रुबेनको दलले यात्रा थाल्यो; यसको नेतृत्व सेदेउरका छोरा एलिसुरले गरे।+ १९ सिमियोनको कुलको नेतृत्व जुरिसद्दैका छोरा सेलुमिएलले गरे।+ २० गादको कुलको नेतृत्व दुएलका छोरा एलियासापले गरे।+
२१ त्यसपछि पवित्र स्थानको* सरसामान बोकेर कोहातीहरूले आफ्नो यात्रा थाले।+ तिनीहरू पुगुन्जेलसम्म वासस्थान खडा गरिसकेको हुनुपर्थ्यो।
२२ त्यसपछि तीन-तीन कुलको दलअनुसार एप्रैमको दलले यात्रा थाल्यो; यसको नेतृत्व अम्मिहुदका छोरा एलिसामाले गरे।+ २३ मनस्सेको कुलको नेतृत्व पदाजुरका छोरा गमलिएलले गरे।+ २४ बिन्यामिनको कुलको नेतृत्व गिदोनिका छोरा अबिदानले गरे।+
२५ अन्तमा तीन-तीन कुलको दलअनुसार दानको दलले यात्रा थाल्यो; तिनीहरू आफूअगाडिका सबै दलको रक्षा गर्न सबैभन्दा पछाडि थिए। यसको नेतृत्व अम्मिसद्दैका छोरा अहिएजेरले गरे।+ २६ असेरको कुलको नेतृत्व ओक्रानका छोरा पागिएलले गरे।+ २७ नप्तालिको कुलको नेतृत्व एनानका छोरा अहिराले गरे।+ २८ इस्राएलीहरू र तिनीहरूको दलले यही क्रमअनुसार यात्रा गर्थे।+
२९ तब मोसाले आफ्नो ससुरा मिद्यानी रुएलको*+ छोरा होबाबलाई यसो भने: “‘म यो ठाउँ तिमीहरूलाई दिन्छु’ भनेर यहोवा परमेश्वरले भन्नुभएको ठाउँमा हामी जाँदै छौँ।+ हामीसँगै आउनुहोस्+ र हामी तपाईँको भलो गर्नेछौँ किनभने यहोवा परमेश्वरले इस्राएलीहरूको निम्ति असल-असल कुरा गरिदिने प्रतिज्ञा गर्नुभएको छ।”+ ३० तर होबाबले मोसालाई भने: “अहँ, म आउँदिनँ। म आफ्नै देश अनि कुटुम्बकहाँ फर्कनेछु।” ३१ तब मोसाले भने: “कृपया हामीलाई छोडेर नजानुहोस् किनभने निर्जनभूमिमा कहाँ पाल टाँग्नुपर्छ, त्यो तपाईँलाई थाह छ। तपाईँ हाम्रो अघिअघि हिँडेर हामीलाई बाटो देखाइदिनुहोस्। ३२ तपाईँ हामीसित आउनुभयो भने+ यहोवा परमेश्वरले हाम्रो निम्ति जे-जे असल कुरा दिनुहुन्छ, त्यो तपाईँसित पनि बाँड्नेछौँ।”
३३ तब इस्राएलीहरू यहोवा परमेश्वरको डाँडाबाट हिँडे+ र तीन दिनसम्म यात्रा गरे। इस्राएलीहरूको निम्ति आराम गर्ने ठाउँ खोज्न यहोवा परमेश्वरको करारको सन्दुक*+ बोक्नेहरू तीन दिनसम्मै तिनीहरूको अघिअघि हिँडे।+ ३४ तिनीहरूले यात्रा सुरु गर्दा यहोवा परमेश्वरको बादल+ दिउँसो तिनीहरूको अघिअघि हुन्थ्यो।
३५ करारको सन्दुकलाई अर्को ठाउँमा सार्नुपर्दा मोसा यसो भन्थे: “हे यहोवा, उठ्नुहोस्!+ तपाईँका शत्रुहरूलाई तितरबितर पारिदिनुहोस् र तपाईँलाई घृणा गर्नेहरू तपाईँको सामनेबाट भागून्।” ३६ अनि करारको सन्दुक बिसाउँदा तिनी यसो भन्थे: “हे यहोवा, हजारौँ-हजार इस्राएलीकहाँ फर्कनुहोस्!”+