के तपाईं परमेश्वरको प्रेमको मूल्यांकन गर्नुहुन्छ?
एक पटक अय्यूब नाउँ गरेका मानिसले असिद्ध मानव अवस्थाबारे यी शब्दहरूमा वर्णन गरे: “स्त्रीबाट जन्मेको मानिस अल्प–आयुका र अशान्तिले भरिएको हुन्छ, त्यो फूलझैं फक्रन्छ र ओइलाइहाल्छ। त्यो छायाजस्तै हराइहाल्छ, रहँदैन।” (अय्यूब १४:१, २) त्यतिखेर अय्यूबले वेदना र शोकले भरिएको जीवन अनुभव गरिरहेका थिए। के तपाईंले पनि कहिल्यै त्यस्तो महसुस गर्नुभएको छ?
तथापि, हामीले सामना गर्नुपर्ने सबै अप्ठ्यारा तथा समस्याहरूको बावजूद परमेश्वरको अनुकम्पा र प्रेममा आधारित एउटा ठोस आशा छ। सर्वप्रथम, हाम्रो स्वर्गमा हुनुहुने दयालु पिताले मानवजातिलाई तिनीहरूको पापपूर्ण पतित अवस्थाबाट छुटकारा दिनको लागि छुडौतीको बलिदानको प्रबन्ध गर्नुभएको छ। यूहन्ना ३:१६, १७ अनुसार येशू ख्रीष्टले यसो भन्नुभयो: “परमेश्वरले संसारलाई यस्तो प्रेम गर्नुभयो, उहाँले आफ्ना एकमात्र पुत्रलाई दिनुभयो, उहाँमाथि विश्वास गर्ने प्रत्येक नाश नहोस्, तर त्यसले अनन्त जीवन पाओस्। परमेश्वरले संसारलाई दोषी ठहराउन भनी पुत्रलाई [येशू] संसारमा पठाउनुभएन, तर संसार उहाँबाट बचोस् भनेर पठाउनुभयो।”
हामी असिद्ध मानवहरूप्रति परमेश्वरको कृपालु मनोवृतिलाई पनि विचार गर्नुहोस्। प्रेरित पावलले यसो भने: “मानिसहरूका निम्ति ठहराएको समय र बासका सीमानाहरू निश्चय गरेर पृथ्वीको सतहमाथि बास गर्नालाई उहाँले एउटै मानिसबाट हरेक जातिलाई बनाउनुभयो, तापनि तिनीहरूले परमेश्वरको खोजी गरून्, र सायद छामेर भेट्टाऊन् भनेर उहाँ हामी हरेकबाट टाढा हुनुहुन्न।” (प्रेरित १७:२६, २७) यसबारे सोच्नुहोस्! हामी असिद्ध मानवहरू भए तापनि मायालु सृष्टिकर्ता यहोवा परमेश्वरसँगको व्यक्तिगत सम्बन्धको आनन्द उठाउन सक्छौं।
परमेश्वरले हाम्रो ख्याल राख्नुहुन्छ र हाम्रो अनन्त हितको लागि मायालु प्रबन्ध मिलाउनुभएको छ भन्ने थाह पाएर हामी निर्धक्क भई भविष्यको सामना गर्न सक्छौं। (१ पत्रुस ५:७; २ पत्रुस ३:१३) त्यसैकारण परमेश्वरको वचन बाइबल अध्ययन गरेर हाम्रो मायालु परमेश्वरबारे अझ बढी सिक्नुपर्ने हर कारण छ।