ख्रीष्टियन जीवन
हामी कसरी बाइबलको लगनशील विद्यार्थी बन्न सक्छौं?
परीक्षामा पर्दा के तपाईं दानियल जस्तै वफादार रहनुहुन्छ? दानियल लगनशील भई परमेश्वरको वचन अध्ययन गर्थे, यसमा भविष्यवाणीहरू पनि समावेश थियो। (दा ९:२) दानियल जस्तै लगनशील भई बाइबल अध्ययन गर्नुभयो भने तपाईं पनि वफादार रहन सक्नुहुनेछ। कसरी? परमेश्वरको प्रतिज्ञाहरू पूरा हुनेछ भन्ने कुरामा तपाईंको विश्वास बढ्नेछ। (यहो २३:१४) परमेश्वरप्रति तपाईंको प्रेम विकास हुनेछ जसले तपाईंलाई सही कुरा गर्न उत्प्रेरित गर्नेछ। (भज ९७:१०) त्यसोभए कसरी सुरु गर्ने? निम्न सुझावहरू विचार गर्नुहोस्।
म कुन विषयमा अध्ययन गरूँ? अध्ययन गर्ने राम्रो तालिकामा ख्रीष्टियन सभाहरूको तयारी समावेश छ। साप्ताहिक बाइबल अध्ययन गर्दा नबुझेका बुँदाहरूबारे समय निकालेर अनुसन्धान गर्नुभयो भने अझ लाभदायी हुनेछ। साथै, थुप्रैले बाइबल भविष्यवाणी, पवित्र शक्तिको फलका विभिन्न पक्षहरू, पावलको मिसनरी यात्रा, अनि यहोवाको भौतिक सृष्टि जस्ता विषयहरूबारे अध्ययन गर्छन्। यदि तपाईंको मनमा पनि बाइबलसित सम्बन्धित कुनै प्रश्न उठ्यो भने नोट गर्नुहोस् अनि अर्को पटक अध्ययन गर्नुहोस्।
म जानकारी कहाँ खोजूँ? अनुसन्धान कसरी गर्ने भनेर बुझ्न आध्यात्मिक खजाना खोज्ने अनुसन्धान सामग्री भिडियो हेर्नुहोस्। अभ्यासको लागि दानियल अध्याय ७ मा पाइने पशुहरूले कुन-कुन विश्वशक्तिलाई चित्रण गर्छ, अनुसन्धान गर्नुहोस्।
अध्ययनको लागि म कति समय बिताऊँ? आध्यात्मिक तवरमा स्वस्थ रहन नियमित अध्ययन अत्यावश्यक छ। सुरुमा छोटो समय अध्ययन गर्नुहोस् त्यसपछि बिस्तारै समय बढाउँदै लैजानुहोस्। परमेश्वरको वचन अध्ययन गर्नु गाडधन खोज्नु जस्तै हो। जति धेरै भेटियो उति धेरै खोज्न मन लाग्छ। (हितो २:३-६) त्यसैगरि दिनहुँ बाइबल अध्ययन गर्दा परमेश्वरको वचन अध्ययन गर्ने तिर्सना बढ्नेछ अनि बाइबल अध्ययन गर्ने तालिका कायम राख्न सक्नुहुनेछ।—१प २:२.
दानियल अध्याय ७ मा उल्लेख गरिएका पशुहरूले केलाई चित्रण गर्छ?
थप प्रश्न:
दानियल ७: ८, २४ कसरी पूरा भयो?
अर्को पटक अध्ययन गर्ने विषय:
प्रकाश अध्याय १३ मा उल्लेख गरिएका जनावरहरूले केलाई चित्रण गर्छ?