परिभ्रमण निरीक्षकहरूले कसरी विश्वासी भण्डारेहरू भएर सेवा गर्छन्
“हरेकले वरदान पाएअनुसार, परमेश्वरको नाना प्रकारको अनुग्रहको असल कारिन्दाहरूले [“भण्डारेहरूले,” NW] जस्तैगरी एउटाले अर्कोको सेवा गर।”—१ पत्रुस ४:१०.
१, २. (क) “भण्डारे” शब्दलाई तपाईं कसरी व्याख्या गर्नुहुन्छ? (ख) परमेश्वरले प्रयोग गरिरहनुभएका भण्डारेहरूमा को को समावेश छन्?
यहोवाले सबै विश्वासी मसीहीहरूलाई भण्डारेको रूपमा प्रयोग गर्नुहुन्छ। अक्सर घरानाको सम्पूर्ण हेरविचार गर्न खटाइएको नोकरलाई भण्डारे भनिन्छ। उनले आफ्नो मालिकको व्यापार पनि चलाउनसक्छन्। (लूका १६:१-३; गलाती ४:१, २) येशूले पृथ्वीका आफ्नो वफादार अभिषिक्त जनहरूको समूहलाई “विश्वासी भण्डारे” भन्नुहुन्छ। यो भण्डारेलाई उहाँले “आफ्ना सारा सम्पत्ति[लगायत]” राज्य-प्रचारका सम्पूर्ण गतिविधिहरू सुम्पनुभएको छ।—लूका १२:४२-४४; मत्ती २४:१४, ४५.
२ प्रेरित पत्रुसले सबै मसीहीहरू परमेश्वरले विभिन्न ढंगमा व्यक्त गर्नुभएको अपार अनुग्रहको भण्डारे हुन् भने। प्रत्येक मसीहीले आ-आफ्नो स्थानमा बसेर विश्वासी भण्डारेको काम गर्नसक्छन्। (१ पत्रुस ४:१०) नियुक्त मसीही प्राचीनहरू भण्डारेहरू हुन् र तिनीहरूमध्ये परिभ्रमण निरीक्षकहरू पनि पर्छन्। (तीतस १:७) यी परिभ्रमण प्राचीनहरूप्रति कस्तो दृष्टिकोण राख्नुपर्छ? तिनीहरूसित कस्ता गुन तथा लक्ष्यहरू हुनुपर्छ? अनि तिनीहरूले मण्डलीहरूलाई कसरी धेरैभन्दा धेरै लाभ पुऱ्याउनसक्छन्?
तिनीहरूको सेवाका लागि कृतज्ञ
३. परिभ्रमण निरीक्षकहरूलाई किन “असल भण्डारे” भन्न सकिन्छ?
३ परिभ्रमण निरीक्षक र तिनकी पत्नीलाई एक मसीही दम्पतीले यसो भनेर पत्र लेखे: “तपाईंहरूले हामीलाई दिनुभएको समय र मायाको लागि हामी कृतज्ञता ज्ञापन गर्न चाहन्छौं। परिवारको रूपमा हामीले तपाईंहरूको प्रोत्साहन र सल्लाहबाट निकै लाभ उठायौं। हामी निरन्तर आध्यात्मिकतामा हुर्कनुपर्छ भनेर हामीलाई थाह छ तर आइपर्ने जस्तोसुकै अप्ठ्यारा परिस्थितिहरू यहोवाको सहयोग र तपाईंहरूजस्ता भाइबहिनीहरूले गर्दा सजिलो भइदिन्छ।” यस्ता अभिव्यक्तिहरू अक्सर सुन्न पाइन्छन् किनकि असल भण्डारेले घरानाको आवश्यकता राम्ररी पूरा गरेजस्तै परिभ्रमण निरीक्षकहरूले सँगी मसीहीहरूमा व्यक्तिगत चासो लिन्छन्। कोही कोही त भाषण दिनमा असाध्यै निपुण हुन्छन्। धेरै जना प्रचार कार्यमा पोख्त हुन्छन् भने कोही चाहिं उत्साह र सहानुभूतिको ठूलो स्रोत साबित भइरहेका हुन्छन्। अरूको सेवा गर्न यस्ता वरदानहरू खेती तथा प्रयोग गरेकोले परिभ्रमण निरीक्षकहरूलाई “असल कारिन्दाहरू [“भण्डारेहरू,” NW]” भन्नु उपयुक्त छ।
४. कुन प्रश्नमाथि अब विचारविमर्श गरिनेछ?
४ “कारिन्दाहरूमानै [“भण्डारेहरूमानै,” NW] मानिसहरू विश्वासी पाइयोस् भन्ने चाहिएको छ,” प्रेरित पावलले लेखे। (१ कोरिन्थी ४:२) हप्तैपिच्छे भिन्नाभिन्नै मण्डलीहरूमा सँगी मसीहीहरूको सेवा गर्नु विशिष्ट र आनन्ददायी विशेषाधिकार हो। तथापि, यो गह्रौं जिम्मेवारी पनि हो। त्यसोभए परिभ्रमण निरीक्षकहरूले भण्डारेले गर्नुपर्ने काम विश्वासपूर्वक र सफलतापूर्वक कसरी पूरा गर्नसक्छन्?
भण्डारेले गर्नुपर्ने काम सफलतापूर्वक पूरा गर्ने
५, ६. प्रार्थनापूर्वक यहोवामा भर पर्नु परिभ्रमण निरीक्षकको जीवनमा किन महत्त्वपूर्ण छ?
५ सफल भण्डारे हुने हो भने परिभ्रमण निरीक्षकहरूले यहोवामाथि प्रार्थनापूर्वक भर गर्नु अत्यावश्यक छ। तालिका र धेरै जिम्मेवारीको कारण तिनीहरू कहिलेकाहीं बोझले दबिएको महसुस गर्नसक्छन्। (२ कोरिन्थी ५:४ तुलना गर्नुहोस्।) अतः तिनीहरूले भजनरचयिता दाऊदको यो भजनअनुरूप चल्नु आवश्यक छ: “तेरो भारी परमप्रभुमा राख्, र उहाँले तँलाई सह्माल्नुहुनेछ, उहाँले धर्मात्माहरूलाई कहिल्यै डग्नदिनुहुनेछैन।” (भजन ५५:२२) दाऊदका यी शब्दहरू पनि सान्त्वनादायी छन्: “हाम्रो बोझ दिनहुँ उठाउनुहुने परमप्रभु धन्यका होऊन्।”—भजन ६८:१९.
६ पावलले आफ्नो आध्यात्मिक जिम्मेवारीहरू पूरा गर्ने बल कहाँबाट पाए? तिनले लेखे, “जसले मलाई शक्ति दिनुहुन्छ उहाँमा सबै कुरा म गर्नसक्छु।” (फिलिप्पी ४:१३) हो, यहोवा परमेश्वर पावलको बलको स्रोत हुनुहुन्थ्यो। त्यसैगरि पत्रुसले यो सुझाउ दिए: “यदि . . . कसैले सेवा गर्छ भने, परमेश्वरले दिनुभएको बलले, कि सबै कुरामा परमेश्वरको महिमा येशू ख्रीष्टद्वारा गरिओस्।” (१ पत्रुस ४:११) धेरै वर्षसम्म परिभ्रमण निरीक्षकको सेवा गर्ने एक भाइले परमेश्वरमा भर पर्नुपर्ने आवश्यकतालाई जोड दिंदै यसो भने: “समस्याहरू आइपर्दा सधैं यहोवामाथि भरोसा गर्नुहोस् र उहाँको संगठनसित मदत माग्नुहोस्।”
७. परिभ्रमण निरीक्षकको काममा सन्तुलनले कस्तो भूमिका निर्वाह गर्छ?
७ एक सफल परिभ्रमण निरीक्षक सन्तुलित हुनु आवश्यक छ। अन्य मसीहीहरूले जस्तै तिनले पनि “बढी महत्त्वपूर्ण कुराहरूलाई पक्का गर्नुपर्छ।” (फिलिप्पी १:१०, NW)a स्थानीय प्राचीनहरूको कुनै खास विषयमा केही प्रश्नहरू छन् भने भ्रमण गरिरहेका क्षेत्रीय निरीक्षकसित परामर्श लिनु बुद्धिमानी ठहर्नेछ। (हितोपदेश ११:१४; १५:२२) शायद, निरीक्षकले त्यस मण्डलीको भ्रमण गरिसकेपछि प्राचीनहरूले उक्त विषय सँभाल्दा तिनको सन्तुलित अवलोकन र धर्मशास्त्रीय सल्लाह निकै लाभप्रद साबित हुनसक्छ। यस्तै विचार पावलले तिमोथीसित व्यक्त गरे: “औ धेरै जना गवाहीहरूका बीचमा तिमीले मसँगबाट सुनेका कुराहरू जुन हुन् तिनै अरूहरूलाई पनि सिकाउनसक्ने विश्वासी मानिसहरूलाई सुम्पिदेऊ।”—२ तिमोथी २:२.
८. बाइबल अध्ययन, अनुसन्धान तथा मनन किन अत्यावश्यक छन्?
८ असल सल्लाह दिन धर्मशास्त्रको अध्ययन, अनुसन्धान र मनन अत्यावश्यक छन्। (हितोपदेश १५:२८) एक जिल्ला निरीक्षकले यसो भने: “प्राचीनहरूसित भेट गर्दा कुनै खास प्रश्नहरूको जवाफ थाह छैन भने स्वीकार्न हामी डराउनु हुँदैन।” कुनै विषयमा “ख्रीष्टको मन” प्राप्त गर्ने प्रयत्न गर्दा परमेश्वरको इच्छा पूरा गर्न मदत दिने बाइबलआधारित सल्लाह दिन सकिन्छ। (१ कोरिन्थी २:१६) कहिलेकाहीं परिभ्रमण निरीक्षकले निर्देशनको लागि वाच टावर सोसाइटीलाई पत्र लेख्नुपर्ने हुनसक्छ। तर जे होस्, हामीले अरूमाथि पार्ने प्रभाव वा वाक्पटुशैलीभन्दा यहोवामाथिको भरोसा र सत्यप्रतिको प्रेम निकै महत्त्वपूर्ण छ। “बात र सर्वश्रेष्ठतामा” आउनुको साटो पावलले कोरिन्थमा “कमजोरी भएर डराउँदै र ज्यादै कम्पमा” आफ्नो सेवकाई थाले। के यसले तिनलाई प्रभावहीन तुल्यायो? यसको विपरीत यसले कोरिन्थीहरूलाई “मानिसहरूको ज्ञानमा होइन, तर परमेश्वरको शक्तिमा” विश्वास राख्न मदत गऱ्यो।—१ कोरिन्थी २:१-५.
अन्य अत्यावश्यक गुनहरू
९. परिभ्रमण प्राचीनहरूले समानुभूति देखाउनु किन आवश्यक छ?
९ समानुभूतिले परिभ्रमण निरीक्षकहरूलाई राम्रा नतिजाहरू प्राप्त गर्न मदत गर्छ। पत्रुसले सम्पूर्ण मसीहीहरूलाई ‘सहानुभूति देखाउन’ आग्रह गरे। (१ पत्रुस ३:८) एक परिभ्रमण निरीक्षक ‘मण्डलीमा भएका सबैमा चासो लिनुपर्ने र साँच्चै ध्यान दिनुपर्ने’ आवश्यकता महसुस गर्छन्। यस्तै भावसहित पावलले यसरी लेखे: “आनन्द गर्नेहरूसँग आनन्द गर, रुनेहरूसँग रोओ।” (रोमी १२:१५) यस्तो मनोवृत्तिले परिभ्रमण निरीक्षकहरूलाई सँगी विश्वासीहरूको समस्या र परिस्थितिहरू बुझ्न अथक प्रयत्न गर्न उत्प्रेरित गर्छ। तब तिनीहरूले प्रोत्साहनदायी धर्मशास्त्रीय सल्लाह दिनसक्छन्। अनि यी सल्लाहहरू प्रयोग गर्दा परिणाम राम्रो हुनसक्छ। अरूको तुलनामा निकै समानुभूति प्रकट गर्नसक्ने एक क्षेत्रीय निरीक्षकले इटालीको टुरीन नजीकै पर्ने एउटा मण्डलीबाट यस्तो पत्र पाए: “अरूले तपाईंलाई चासो दिएको चाहनुहुन्छ भने अरूप्रति चासो देखाउनुहोस्; मिलनसार हुन चाहनुहुन्छ भने मिलनसार हुनुहोस्; माया गरेको चाहनुहुन्छ भने माया गर्नुहोस्; मदत गरेको चाहनुहुन्छ भने मदत गर्न तयार हुनुहोस्। तपाईंबाट हामीले सिकेका कुरा यिनै हुन्!”
१०. नम्र हुनुपर्ने विषयबारे क्षेत्रीय तथा जिल्ला निरीक्षकले के भनेका छन् र यस सन्दर्भमा येशूले कस्तो उदाहरण बसाल्नुभयो?
१० नम्र छन् तथा अरूले धक नमानी कुरा गर्नसक्छन् भने परिभ्रमण निरीक्षकहरूले धेरै गर्नसक्छन्। एक जना क्षेत्रीय निरीक्षकले यस्तो टिप्पणी गरे: “नम्र मनोवृत्ति कायम राख्नु अत्यन्त महत्त्वपूर्ण छ।” तिनी नयाँ परिभ्रमण निरीक्षकहरूलाई यसरी सतर्क गराउँछन्: “धनाढ्य भाइहरूले दिन र गर्नसक्ने कुराहरूको खातिर उनीहरूको अचाक्ली प्रभावमा नपर्न र उनीहरूसित मात्रै संगत गर्नदेखि अलग रहेर अरूसित पनि निष्पक्ष व्यवहार गर्न यत्न गर्नू।” (२ इतिहास १९:६, ७) अनि एक जना नम्र परिभ्रमण निरीक्षकले आफू सोसाइटीको प्रतिनिधि हुँ भन्दै फाइँफुट्टी गर्ने खालको दृष्टिकोण अपनाउने छैनन्। एक जिल्ला निरीक्षकले यसरी उपयुक्त टिप्पणी दिए: “नम्र हुनुहोस् र भाइहरूको कुरा सुन्न इच्छुक हुनुहोस्। अरूले धक नमानी तपाईंसित कुरा गर्नसकोस्।” आजसम्म बाँचेकाहरूमध्ये सबैभन्दा महान् पुरुष येशू ख्रीष्टले मानिसहरूलाई अप्ठ्यारो महसुस गराउन सक्नुहुन्थ्यो तर उहाँ यति नम्र र अरूले धक नमानी कुरा गर्नसक्ने व्यक्ति हुनुहुन्थ्यो, केटीकेटीहरूलाई समेत उहाँसामु जान सजिलो लाग्थ्यो। (मत्ती १८:५; मर्कूस १०:१३-१६) केटाकेटी, किशोरकिशोरी, पाको उमेरकाहरू अर्थात् मण्डलीका सबैले आफूसित धक नमानी कुरा गरून् भन्ने इच्छा परिभ्रमण निरीक्षकहरू गर्छन्।
११. आवश्यक हुँदा माफी मागियो भने त्यसले कस्तो असर पार्छ?
११ पक्कै पनि “धेरै कुरामा हामी चुक्तछौं,” त्यसैले परिभ्रमण निरीक्षकहरूबाट गल्ती नै नहुने चाहिं पटक्कै होइन। (याकूब ३:२) परिभ्रमण निरीक्षकले गल्ती गर्दा निष्कपट माफी मागेको खण्डमा अन्य प्राचीनहरूको निम्ति यो नम्रताको उदाहरण बन्छ। हितोपदेश २२:४ अनुसार “नम्रताको फल परमप्रभुको [श्रद्धेय] भय हो, धन, मान र जीवन पनि साथ हुन्छन्।” अनि के परमेश्वरका सबै सेवकहरू ‘आफ्ना परमेश्वरसित नम्र भएर हिंड्नु’ आवश्यक छैन र? (मीका ६:८) नयाँ परिभ्रमण निरीक्षकहरूका लागि के सुझाउ दिन चाहन्छन् भनेर सोध्दा एक क्षेत्रीय निरीक्षकले यस्तो टिप्पणी गरे: “सबै भाइहरूलाई आदर र सम्मान गर्नुहोस् र तिनीहरूलाई आफूभन्दा असल ठान्नुहोस्। भाइहरूबाट तपाईंले निकै कुराहरू सिक्नुहुनेछ। नम्र हुनुहोस्। स्वाभाविक हुनुहोस्। आडम्बरी नहुनुहोस्।”—फिलिप्पी २:३.
१२. मसीही सेवकाईमा जोस देखाउनु किन सार्थक छ?
१२ मसीही सेवकाईप्रतिको जोसले गर्दा परिभ्रमण निरीक्षकका शब्दहरू अर्थपूर्ण हुन्छन्। वास्तवमा तिनी र तिनकी पत्नीले सुसमाचारकको काम गरेर जोसिलो उदाहरण बसाल्दा प्राचीनहरू, तिनीहरूका पत्नीहरू र मण्डलीका बाँकी व्यक्तिहरू सेवकाईमा जोस प्रकट गर्न प्रोत्साहित हुन्छन्। “सेवामा जोसिलो हुनुहोस्,” एक क्षेत्रीय निरीक्षक आग्रह गर्छन्। तिनी अझै यसो भन्छन्: “साधारणतया मैले के पाएको छु भने, सेवकाईमा मण्डली जति जोसिलो हुन्छ, तिनीहरूको समस्या त्यति नै कम हुन्छ।” अर्को क्षेत्रीय निरीक्षकले यस्तो टिप्पणी गरे: “मेरो विचारमा प्राचीनहरूले भाइबहिनीहरूसित क्षेत्र सेवकाईमा काम गरे अनि तिनीहरूलाई सेवकाईबाट आनन्द उठाउन मदत दिए मनमा शान्ति हुनेछ र यहोवाको सेवा गरेकोमा असाध्यै सन्तुष्ट लाग्नेछ।” प्रेरित पावल ‘थिस्सलोनिकीहरूसँग परमेश्वरको सुसमाचार बोल्नालाई अति विरोधमा पनि निर्भय रहे।’ अतः तिनको भ्रमण तथा प्रचार क्रियाकलापको मीठो सम्झना उनीहरूसित हुनु र तिनलाई फेरि भेट्न इच्छा लाग्नु कुनै नौलो कुरा थिएन।—१ थिस्सलोनिकी २:१, २; ३:६.
१३. क्षेत्र सेवकाईमा सँगी मसीहीहरूसित काम गर्दा परिभ्रमण निरीक्षकले कुन कुरालाई ध्यानमा राख्छन्?
१३ क्षेत्र सेवकाईमा सँगी मसीहीहरूसित काम गर्दा परिभ्रमण निरीक्षकले तिनीहरूको परिस्थिति र सीमितताहरूलाई ध्यानमा राख्छन्। तिनका सुझाउहरू मदतकारी भए तापनि एक अनुभवी प्राचीनसित काम गर्दा कोही अलि हडबडाउनसक्छन् भनेर तिनले बुझेका हुन्छन्। तसर्थ, कुनै कुनै बेला सल्लाहभन्दा प्रोत्साहन निकै लाभप्रद हुनसक्छ। प्रकाशक वा अग्रगामीसित बाइबल अध्ययनमा जाँदा उनीहरू तिनले बाइबल अध्ययन सञ्चालन गरिदिएको चाहलान्। शायद यसो गर्दा उनीहरूले आफ्नो शिक्षणपद्धतिमा उन्नति गर्ने केही तरिकाहरू सिक्नसक्छन्।
१४. जोसिलो परिभ्रमण निरीक्षकले अरूलाई जोसिलो हुन उत्प्रेरित गर्छन् भनेर किन भन्न सकिन्छ?
१४ जोसिलो परिभ्रमण निरीक्षकले अरूलाई जोसिलो हुन उत्प्रेरित गर्छन्। युगान्डाका एक क्षेत्रीय निरीक्षकले ज्यादै कम प्रगति गरिरहेको बाइबल विद्यार्थीसित अध्ययन गर्न जान एक जना भाइसँग एक घण्टा जति बाक्लो जंगलको बाटो हिंडे। हिंड्डा हिड्दै घनघोर पानी परेकोले गन्तव्यस्थानसम्म पुगुञ्जेल तिनीहरू निथ्रुक्क भिजे। छ सदस्यहरू भएको त्यस परिवारले तिनीहरूकहाँ आउने व्यक्ति परिभ्रमण निरीक्षक थिए भनेर थाह पाउँदा निकै प्रभावित भए। तिनीहरूका चर्चका सेवकहरूले बगालप्रति त्यस्तो चासो कहिल्यै देखाउँदैनन् भनेर तिनीहरूलाई थाह थियो। आउँदो आइतबारका दिन तिनीहरूले पहिलो चोटि सभा धाए अनि यहोवाका साक्षी बन्ने इच्छा जाहेर गरे।
१५. मेक्सिकोका जोसिलो क्षेत्रीय निरीक्षकले कस्तो रमाइलो अनुभवको आनन्द उठाए?
१५ मेक्सिकोको ह्वाक्क प्रान्तमा एक क्षेत्रीय निरीक्षकले अरूले आशै नगरेको कुरा गर्ने प्रयास गरे। राज्य प्रकाशक बनेका सात सहकैदीहरूको समूहलाई भेट्न तिनले चार रात कैदखानामा बिताउने प्रबन्ध मिलाए। निकै दिनसम्म तिनले यी कैदीहरूसित कैदखानाको कोठा कोठामा प्रचार तथा बाइबल अध्ययनहरू गरे। चासो देखाइएकोले यी अध्ययनहरूमध्ये कुनै कुनै त रातभरि चल्थ्यो। त्यस जोसिलो क्षेत्रीय निरीक्षक लेख्छन्, “भेटको अन्तमा आपसी प्रोत्साहनले गर्दा ती सहकैदीहरू तथा म आनन्दले भरिपूर्ण भयौं।”
१६. परिभ्रमण निरीक्षकहरू र तिनीहरूका पत्नीहरूले प्रोत्साहन दिनु किन असाध्यै लाभकारी छ?
१६ परिभ्रमण निरीक्षकहरू प्रोत्साहनदायी हुने कोसिस गर्छन्। म्यासेडोनियामा मण्डलीहरूको भ्रमण गर्दा पावलले ‘तिनीहरूलाई धेरै कुराको अर्ती दिए।’ (प्रेरित २०:१, २) जवान तथा वृद्ध सबैलाई आध्यात्मिक लक्ष्यतिर डोऱ्याउन प्रोत्साहनदायी शब्दहरू निकै मदतकारी साबित हुनसक्छन्। वाच टावर सोसाइटीको एउटा ठूलो शाखा कार्यालयमा अनौपचारिक सर्वेक्षण लिइँदा त्यहाँका झन्डै २० प्रतिशत स्वयंसेवकहरूलाई क्षेत्रीय निरीक्षकले पूर्ण-समय सेवा गर्न प्रोत्साहन दिइएको पाइयो। पूर्ण-समय राज्य उद्घोषकको भूमिका निर्वाह गरेर क्षेत्रीय निरीक्षककी पत्नी पनि प्रोत्साहनको ठूलो स्रोत साबित हुनसक्छिन्।
१७. एक वृद्ध क्षेत्रीय निरीक्षक अरूलाई मदत गर्न पाएको विशेषाधिकारप्रति कस्तो महसुस गर्छन्?
१७ वृद्ध जनहरू तथा निराशहरूलाई विशेषगरि प्रोत्साहन चाहिन्छ। एक वृद्ध क्षेत्रीय निरीक्षक लेख्छन्: “परमेश्वरको बगालका निष्क्रिय तथा अशक्तहरूलाई मदत गर्ने विशेषाधिकार पाउनु मेरो कामको वर्णन नै गर्न नसकिने भित्री आनन्द दिने एक पक्ष हो। ‘यस्ता व्यक्तिहरूलाई स्थिर गराउन केही आत्मिक वरदान दिंदा’ म धेरै प्रोत्साहित हुन्छु र बल पाउँछु अनि त्यतिखेर म रोमी १:११, १२ का शब्दहरूको विशेष अर्थ पाउँछु।”
तिनीहरूको आनन्दित कार्यका इनामहरू
१८. परिभ्रमण निरीक्षकहरूका कस्ता धर्मशास्त्रीय लक्ष्यहरू हुन्छन्?
१८ परिभ्रमण निरीक्षकहरूले सँगी विश्वासीहरूप्रति साँच्चै चासो लिन्छन्। तिनीहरू मण्डलीहरूलाई दह्रो बनाउन र आध्यात्मिक तवरमा स्थिर गराउन चाहन्छन्। (प्रेरित १५:४१) “प्रोत्साहन दिन, स्फूर्ति प्रदान गर्न अनि सेवकाईको काम पूरा गर्ने र सत्यअनुसार निरन्तर जीवन यापन गर्ने इच्छा जगाउन” एक जना परिभ्रमण निरीक्षकले अथक प्रयास गर्छन्। (३ यूहन्ना ३) अर्कोले चाहिं सँगी विश्वासीहरूलाई विश्वासमा स्थिर गराउन खोज्छन्। (कलस्सी २:६, ७) परिभ्रमण निरीक्षकहरू “सच्चा जोड़ीदार” हुन्, अरूको विश्वासको मालिक होइनन् भनेर नबिर्सनुहोस्। (फिलिप्पी ४:३; २ कोरिन्थी १:२४) तिनको भ्रमणले प्रोत्साहन प्राप्त गर्ने र थप क्रियाकलापहरू गर्ने अवसर दिन्छ भने प्राचीनहरूले चाहिं के कस्तो प्रगति गरियो पुनरावलोकन गर्ने तथा भावी लक्ष्यहरूबारे विचारविमर्श गर्ने मौका पाउँछन्। तिनको बोली तथा उदाहरणद्वारा मण्डलीका प्रकाशकहरू, अग्रगामीहरू, स्वयंसेवकहरू र प्राचीनहरूले बलियो तथा अझ अरू काम गर्न उत्प्रेरित हुने आशा गर्नसक्छन्। (१ थिस्सलोनिकी ५:११ तुलना गर्नुहोस्।) अतः क्षेत्रीय निरीक्षकको भ्रमणलाई सम्पूर्ण हृदयले समर्थन गर्नुहोस् र जिल्ला निरीक्षकले दिने सेवाबाट पूर्णतया लाभ उठाउनुहोस्।
१९, २०. परिभ्रमण निरीक्षकहरू तथा तिनीहरूका पत्नीहरूले आ-आफ्नो विश्वासी सेवाको इनाम कसरी पाएका छन्?
१९ परिभ्रमण निरीक्षकहरू र तिनीहरूका पत्नीहरूले आ-आफ्नो विश्वासी सेवा गरे वापत प्रचुर मात्रामा इनाम पाएका छन् र आफ्नो असल कामको निम्ति यहोवाले आशिष् दिनुहुनेछ भनी तिनीहरू ढुक्क हुनसक्छन्। (हितोपदेश १९:१७; एफिसी ६:८) वृद्ध दम्पती गर्ग र माग्दालेनाले निकै वर्ष परिभ्रमण कार्य गरे। लक्जम्बर्गमा भएको एउटा अधिवेशनमा आफूले लगभग २० वर्षअघि साक्षी दिएको एक व्यक्ति माग्दालेनालाई भेट्न आइन्। माग्दालेनाले दिएको बाइबल साहित्यले गर्दा यस यहूदी महिलाको चासो जागेको थियो र समयको दौडान उनले बप्तिस्मा पनि लिइन्। चालीस वर्षअघि गर्ग आफ्नो घरमा आएको सम्झने एउटी आध्यात्मिक बहिनी तिनलाई भेट्न आइन्। तिनले जोसिलो ढंगमा सुसमाचार प्रस्तुत गरेकोले अन्ततः उनी र उनका पतिले सत्य स्वीकारेका थिए। निस्सन्देह, यो देखेर गर्ग र माग्दालेना असाध्यै हर्षित भए।
२० एफिसीमा गरेको फलदायी सेवकाईले गर्दा पावल आनन्दित भए र शायद तिनै कारणहरूले गर्दा तिनी येशूका यी शब्दहरू उद्धरण गर्न उत्प्रेरित भएको हुनुपर्छ: “लिनुभन्दा दिनु अझ असल हो।” (प्रेरित २०:३५) परिभ्रमण कार्यमा निरन्तर दिइरहनुपर्ने भएकोले र अझ विशेषगरि आफ्नो परिश्रमको फल मीठो भएको थाह पाउँदा परिभ्रमण कार्यमा लाग्नेहरू खुशी हुन्छन्। निरुत्साही प्राचीनलाई मदत गर्ने एक क्षेत्रीय निरीक्षकले यस्तो लेखिएको पत्र पाए: “तपाईं मेरो आध्यात्मिक जीवनमा कुन हदसम्म ‘सान्त्वना दिने मानिस’ हुनुभएको छ शायद तपाईंलाई थाह छैन होला। . . . ‘पाइलाहरू चिप्लन लागेका’ आधुनिक समयको आसापलाई कत्ति मदत गर्नुभयो शायद तपाईं अनुमान लाउन सक्नुहुन्न।”—कलस्सी ४:११; भजन ७३:२.
२१. पहिलो कोरिन्थी १५:५८ परिभ्रमण निरीक्षकहरूका क्रियाकलापमा प्रयोग हुन्छन् भनी तपाईं किन भन्नुहुन्छ?
२१ क्षेत्रीय कार्यमा लागेको वर्षौं भइसकेको एक वृद्ध मसीही १ कोरिन्थी १५:५८ लाई सम्झन रुचाउँछन्। उक्त पदमा पावलले यस्तो आग्रह गरे: “स्थिर र अटल बस। सधैं प्रभुको काममा प्रशस्त हुँदै जाओ। किनकि तिमीहरू जान्दछौ, कि तिमीहरूको परिश्रम प्रभुमा व्यर्थ हुँदैन।” परिभ्रमण निरीक्षकहरूले अवश्य प्रशस्त मात्रामा प्रभुको काम गर्नु परेको छ। अनि तिनीहरूले परमेश्वरको अपार अनुग्रहको विश्वासी भण्डारेको रूपमा आनन्दित हुँदै सेवा गरेकोले हामी कत्ति कृतज्ञ छौं!
[फुटनोट]
a प्रहरीधरहरा, (अंग्रेजी) मे १५, १९९१, पृष्ठ २८-३१ को “धेरै गर्न पाएर के तपाईं खुशी हुन सक्नुहुन्छ?” शीर्षक लेख हेर्नुहोस्।
तपाईं कसरी जवाफ दिनुहुन्छ?
◻ परिभ्रमण निरीक्षकहरूलाई किन “असल भण्डारे[को]” रूपमा लिन सकिन्छ?
◻ क्षेत्रीय निरीक्षक तथा जिल्ला निरीक्षकलाई धेरैभन्दा धेरै असल काम गर्न मदत गर्ने केही तत्त्वहरू के हुन्?
◻ परिभ्रमण कार्यमा लाग्ने व्यक्तिहरूले नम्रता र जोस देखाउनु किन अति महत्त्वपूर्ण छन्?
◻ परिभ्रमण निरीक्षकहरूको कस्ता असल लक्ष्यहरू हुन्छन्?
[पृष्ठ १६-मा भएको चित्र]
परिभ्रमण निरीक्षकहरू सँगी विश्वासीहरूलाई प्रोत्साहन दिन खोज्छन्
[पृष्ठ १७-मा भएको चित्र]
जवान तथा वृद्ध सबैले परिभ्रमण निरीक्षक र तिनीहरूका पत्नीहरूको संगतिबाट लाभ उठाउनसक्छन्
[पृष्ठ १८-मा भएको चित्र]
परिभ्रमण निरीक्षकको जोसिलो सेवकाईले अरूलाई जोसिलो बनाउँछ