आउनुहोस्, हामी सबै यहोवा र उहाँको पुत्रको आदर गरौं
अप्रिल ८ को स्मरणार्थ उत्सवमा उपस्थित हुने सबैले कसरी अझ पूर्णतया लाभ उठाउनसक्छन्
१ आज कसलाई विशेष आदर दिइएको छ? संसारले उच्च ठान्ने काम गर्नेहरूलाई। तथापि, तिनीहरूले गरेका काम अक्सर छिट्टै बिर्सिइन्छन्। तर सारा मानवजातिलाई साँच्चै लाभ पुऱ्याउने कार्यबारे के भन्न सकिन्छ? अप्रिल ८, २००१ मा सूर्यास्तपछि प्रभुको साँझको भोज मनाउँदा सबैभन्दा महान् कार्यले हाम्रो ध्यान आकर्षित गर्नेछ।
२ उच्च आदरको योग्य को छ? बाइबल यस्तो जवाफ दिन्छ: “हे हाम्रा . . . परमेश्वर, तपाईं महिमा, आदर र शक्ति ग्रहण गर्ने योग्यको हुनुहुन्छ, किनभने सबै कुरा तपाईंलेनै सृष्टि गर्नुभएको हो।” (प्रका. ४:११) सृष्टिकर्ता हुनुभएकोले यहोवा ब्रह्माण्डको सार्वभौम शासक हुनुहुन्छ। उहाँको आदर अनन्तसम्म गरिनेछ!—१ तिमो. १:१७.
३ परमेश्वरको पुत्र येशू ख्रीष्टले सम्माननीय काम गर्नुभयो। यस कार्यले मानवजातिका लागि अनन्त आशिष् ल्याउँनेछ। उहाँले आफ्नो पिताको पूर्णतया अनुकरण गर्नुभयो। (यूह. ५:१९) उहाँको खोटरहित आज्ञाकारिता र वफादारी सेवाले उहाँलाई “शक्ति, धन, ज्ञान बल, आदर, महिमा र धन्यवाद ग्रहण गर्ने योग्यको” बनायो। (प्रका. ५:१२) उहाँको पिताले उहाँलाई राज्याधिकार दिनु भएर उहाँको आदर गर्नुभयो। (भज. २:६-८) अप्रिल ८, २००१ मा स्मरणार्थ उत्सव मनाउँदा हामीले पिता र पुत्र दुवैको आदर गर्ने मौका पाउनेछौं।
४ दुःखको कुरा, तुलनात्मक रूपमा मानव इतिहासभर थोरैले मात्र यहोवा र उहाँको पुत्रलाई दिनुपर्ने आदर दिएका छन्। कहिलेकाहीं परमेश्वरका पुरातन जनहरूले समेत यहोवालाई नाउँ मात्रको सेवा चढाउँथे। यो त सरासर अनादर थियो। (मला. १:६) उचित आदरले यहोवा र उहाँको पुत्रले हाम्रोलागि गर्नुभएका कुराहरूप्रति मूल्यांकन र प्रेममा आधारित वफादार आज्ञाकारिताको माग गर्छ। यस्तो आदर र सम्मान दिनुको अर्थ, हाम्रा सबै कामकुरामा यहोवा र येशूलाई सम्झँदै ईश्वरीय भय र गहिरो श्रद्धा देखाउनु हो। मसीही मण्डलीले अरूलाई यसो गर्न सिकाउने र मदत दिने प्रयास गर्छ।
५ आदर देखाउने विशेष अवसर: स्मरणार्थ उत्सव यहोवाका साक्षीहरूको हरेक वर्ष हुने सबैभन्दा अर्थपूर्ण भेला हो। यहोवाको सेवा र आदर गर्न चाहने सबै उपस्थित हुनुपर्छ। (लूका २२:१९) साठी लाख सक्रिय यहोवाका साक्षीहरूको अलावा, १ करोड ४० लाखभन्दा धेरै नवजिज्ञासुहरू उपस्थित हुनेछन् भन्ने आशा हामी गर्छौं। स्वर्गमा हुनुहुने हाम्रो पिताको आदर गर्ने कस्तो राम्रो अवसर! उत्सव येशूमा केन्द्रित रहे तापनि उहाँले पूरा गर्नु भएको कामको लागि आदर र सम्मान देखाउँदा पिता अर्थात् उहाँलाई पठाउनेको महिमा हुन्छ।—यूह. ५:२३.
६ यस विशेष अवसरलाई समर्थन गर्न हामी के गर्नसक्छौं? हामीले नवजिज्ञासुहरूलाई पूर्णतया लाभ उठाउन मदत गर्नसक्छौं। तिनीहरूलाई उपस्थित हुन आग्रह गर्नुहोस् र आवश्यक परेमा, उत्सवसम्म आउन तिनीहरूलाई मदत गर्नुहोस्। भाषणको उद्देश्य बुझाउनुहोस्। तिनीहरूलाई अरूसँग परिचित गराउनुहोस्। तिनीहरूले देखेका र सुनेका कुराहरूले तिनीहरूलाई हामीसँगै एकताबद्ध भई यहोवाको आदर गर्न उत्प्रेरित गर्नसक्छन्।
७ कार्यक्रमले पार्ने असरबारे पूर्वानुमान नगर्नुहोस्। एक विश्वविद्यालयका छात्रले यस्तो प्रतिक्रिया देखाएका थिए: “म चर्चको स्मरणार्थ उत्सवमा धेरै पटक गएको छु। तर यहाँ त एकदम फरक रहेछ। यहाँ बाइबलमा जे भनेको छ, त्यही गरेको मैले पाएँ र मेरो विचारमा सच्चाइ तपाईंहरूसँग छ।” तिनी सभाहरूमा नियमित उपस्थित हुन थाले र तिनले छिट्टै बप्तिस्मा पनि लिए।
८ नयाँहरूलाई उन्नति गर्न मदत दिनुहोस्: स्मरणार्थमा उपस्थित हुने नयाँ व्यक्तिहरूलाई याद गर्नुहोस् र तिनीहरूले सिकेका अनि देखेका स्फूर्तिदायी कुराहरूको पुनरावृत्ति गर्न तुरुन्तै भेटिहाल्नुहोस्। बाइबल ज्ञान बढाउने अरू सभाहरूबारे तिनीहरूलाई सजग गराइहाल्नुस्। ज्ञान पुस्तक अध्याय १७ “परमेश्वरका जनहरूबीच सुरक्षा पाउनुहोस्”-को पुनरावृत्ति गर्दा मण्डलीले प्रदान गर्ने बृहत आध्यात्मिक प्रबन्धहरू प्रष्टिनेछन् र यी प्रबन्धहरूबाट तिनीहरूले सजिलै लाभ उठाउनसक्छन्। तिनीहरूसँग आवर होल एसोसियसन अफ ब्रदर्स नामक भिडियो हेर्ने प्रबन्ध मिलाउनुहोस् ताकि तिनीहरू आफैले यहोवाका मानिसहरूको एकता, आनन्द र जोस देखून्!
९ जिज्ञासुहरूले व्यक्तिगत रूपमा यहोवालाई कसरी आदर र सम्मान देखाउन सकिन्छ भनी सिक्नु महत्त्वपूर्ण छ। हार्दिक प्रार्थनाले यहोवालाई प्रसन्न तुल्याउँछ र यो निरन्तर आध्यात्मिक स्फूर्ति पाउने स्रोत हो भनी बुझाउनुहोस्। (१ यूह. ५:१४) चाहनुहुन्छ पुस्तिकाको पाठ ८ देखि १२ प्रयोग गर्दै यहोवालाई आदर गर्ने चालचलनबारे वर्णन गर्नुहोस्। जेहोभाज विटनेसेज पुस्तिकाको पृष्ठ ३०-१ मा बताइएका कुराहरू छलफल गर्दै नयाँ व्यक्तिहरूलाई व्यक्तिगत तवरमा प्रचारकार्यमा भाग लिएर यहोवाको आदर गर्न सकिने सम्भावनाबारे सोच्न प्रोत्साहित गर्नुहोस्।
१० येशूको बलिदान र उहाँको चेलाको हैसियतमा सेवा गर्न पाएको सुअवसरप्रतिको मूल्यांकनले पिताको आदर गर्छ र अरूले यसबाट आशिष् पाउँछन्। किनभने, येशूले यस्तो प्रतिज्ञा गर्नुभएको छ: “कसैले मेरो सेवा गर्छ भने पिताले त्यसको कदर गर्नुहुनेछ।”—यूह. १२:२६.