“परमेश्वरको राज्यका जोसिला उद्घोषकहरू” जिल्ला अधिवेशनबाट पूरा लाभ उठाउने
१ स्फूर्तिदायी कार्यक्रम: हालै सम्पन्न जिल्ला अधिवेशनको स्फूर्तिदायी कार्यक्रमबाट हामीले कत्ति लाभ उठायौं! हामी सबै एउटै उद्देश्यका लागि भेला भएका थियौं अर्थात् परमेश्वरको राज्य जोसका साथ उद्घोषणा गर्न अझ बढी सक्षम हुन। पहिलो वक्ताले “उद्घोषणा गर्नु” भन्ने अभिव्यक्तिलाई कसरी परिभाषित गरे, के तपाईंले सम्झनुभएको छ? “यहोवा हामीसित हुनुहुन्छ भनी थाह पाएर साहसी हुनुहोस्” भन्ने भाषणमा हामीलाई कस्तो अनुसन्धान गर्न प्रोत्साहन दिइएको थियो, के तपाईंले सम्झनुभएको छ? तपाईंले अहिलेसम्म कुन-कुन जीवनी पढिसक्नुभयो?
२ “विभिन्न परीक्षाहरूद्वारा हाम्रो विश्वासको जाँच हुन्छ” भन्ने गोष्ठीमा यहोवाले सतावट हुन दिनुहुने तीनवटा मुख्य कारण बताइएको थियो। ती के-के हुन्, के तपाईं बताउन सक्नुहुन्छ? हाम्रो मसीही तटस्थताको धर्मशास्त्रीय आधार के हो? तटस्थ रहँदा हामीले सामना गर्नुपर्ने चुनौतीहरूको लागि तयार रहन हामीलाई के गर्ने प्रोत्साहन दिइएको थियो? धीरजी भई परीक्षा सहँदा कसरी यहोवाको प्रशंसा हुन्छ?
३ “संकटको बेला दृढ रहनुहोस्” भन्ने नाटकका कुन दृश्यहरूले तपाईंलाई विशेष गरी बल प्रदान गऱ्यो? हामी कसरी यर्मियाजस्तै हुन सक्छौं?
४ “यस संसारको रूप बितेर जाँदैछ” भन्ने जनभाषणले परमेश्वरको भयानक दिन आउनुअघि कस्ता महत्त्वपूर्ण परिवर्तनहरू हुनेछन् भनेर वर्णन गऱ्यो? “परमेश्वरको राज्यका जोसिला उद्घोषकहरूको हैसियतमा सुकर्ममा प्रशस्त हुनुहोस्” भन्ने समापन भाषण सुन्नुहुँदा तपाईंले उक्त जानकारी आफ्नो व्यक्तिगत सेवकाईसित कसरी मिलान गर्नुभयो?
५ लागू गर्नुपर्ने मुख्य बुँदाहरू: “धन्यवादी मनोभाव झल्काउनुहोस्” भन्ने भाषणमा वर्णन गरिएझैं हामी कसरी यहोवाप्रति आफ्नो हार्दिक मूल्यांकन जाहेर गर्न सक्छौं? “परमेश्वरको राज्यका उद्घोषकहरू जोसले उत्प्रेरित” भन्ने मुख्य भाषणमा हामीलाई कसको जोस अनुकरण गर्न प्रोत्साहित गरियो? हामीलाई कस्तो आत्म-परीक्षण गर्न आग्रह गरियो?
६ “मीकाको भविष्यवाणीले हामीलाई यहोवाको नाउँमा हिंड्न बल प्रदान गर्छ” भन्ने गोष्ठीले यहोवाको अनुग्रह प्राप्त गर्न हामीले पूरा गर्नुपर्ने कुन तीनवटा आवश्यकता प्रकाश पाऱ्यो? के यो प्राप्त गर्न सकिन्छ? (मीका ६:८) “नैतिक तवरमा स्वच्छ रहँदै आफ्नो हृदयलाई सुरक्षित राख्नुहोस्” भन्ने भाषणअनुसार हामीले कुन-कुन तरिकामा नैतिक स्वच्छता कायम राख्नुपर्छ? “छलछामदेखि सावधान रहनुहोस्” भन्ने भाषणले कुन-कुन क्षेत्रमा नठगिन अनि अरूलाई पनि नठग्न होसियार हुनुपर्ने चेतावनी दियो?
७ “आफ्नो सेवकाईको महिमा गर्ने परमेश्वरको राज्यका उद्घोषकहरू” भन्ने गोष्ठीबाट सिक्नुभएका कुन-कुन व्यावहारिक बुँदा सेवकाईमा लागू गर्न थालिसक्नुभयो? “आध्यात्मिक कुराकानीले उन्नति गराउँछ” भन्ने भाषणले फिलिप्पी ४:८ विश्लेषण गऱ्यो। शास्त्रपदले हामीलाई आफ्नो कुराकानी आध्यात्मिक कुरामा केन्द्रित गर्न कसरी मदत गर्छ अनि हामीले कहिले त्यसो गर्नुपर्छ?
८ “दुःखको बेला सम्पूर्ण भरोसा यहोवामाथि राख्नुहोस्” भन्ने भाषणले दुःखदायी घटना, आर्थिक कठिनाइ, अस्वस्थता, पारिवारिक समस्या वा सधैं संघर्ष गरिरहनुपर्ने कमजोरीको कसरी सामना गर्ने भनी बतायो। यस्तो अवस्थामा हामी कसरी यहोवामाथि भरोसा देखाउन सक्छौं?
९ नयाँ आध्यात्मिक खजाना: वर्शिप दी ओन्ली ट्रु गड भन्ने नयाँ पुस्तक पाउँदा हामी रमाएका थियौं। यसको उद्देश्यबारे घोषणा गरिंदा त्यसले तपाईंलाई कस्तो असर गऱ्यो? यो हाम्रो चेला बनाउने कार्यमा दोस्रो अध्ययन सामग्रीको रूपमा किन मदतकारी हुनेछ?
१० त्यसपछि हामीले ड्र क्लोज टु जेहोभा भन्ने राम्रो पुस्तक पायौं। यसका केही विशेष पक्षहरू के हुन्? तपाईंलाई कुन चित्रहरू विशेष गरी राम्रो लाग्यो? यो पुस्तक पढेर के तपाईं यहोवासित नजिक हुनुभएको छ? यसबाट अरू क-कसले लाभ उठाउन सक्छन्?
११ “परमेश्वरको राज्यका जोसिला उद्घोषकहरू” जिल्ला अधिवेशनले यी चुनौतीपूर्ण समयमा आध्यात्मिक प्रोत्साहन प्रदान गऱ्यो। यस्तो उल्लेखनीय आध्यात्मिक प्रबन्धबाट लाभ उठाउन त्यहाँ भनिएका कुराहरू सम्झन, सुनेका कुराप्रति कृतज्ञ हुन अनि त्यसलाई व्यवहारमा उतार्न यथासक्दो प्रयास गरौं। (२ पत्रु. ३:१४) यसो गर्दा हामी यहोवाको महिमाको लागि प्रभु येशू ख्रीष्टको मूल्यांकन गर्दै आफ्नो निष्ठा कायम गर्नुका साथै परमेश्वरको राज्यका जोसिला उद्घोषकहरू हुन बल प्राप्त गर्नेछौं।—फिलि. १:९-११.