यहोवा हामीलाई सहनशील हुन कसरी मदत गर्नुहुन्छ?

१. हामी किन सहनशील हुनुपर्छ र हामीलाई कसले मदत गर्नुहुन्छ? (१ पत्रुस ५:१०)

हामी अहिले कठिन समयमा बाँचिरहेका छौँ। त्यसैले हामी सहनशील हुनु आवश्‍यक छ। हामीमध्ये कतिले दीर्घकालीन रोगको सामना गर्नुपरेको छ, कतिले आफ्नो प्रियजन गुमाएका छन्‌। अनि कतिपयले भने आफ्नो परिवारका सदस्यहरू वा सरकारी अख्तियारवालाहरूबाट खेदो भोगिरहेका छन्‌। (मत्ति १०:१८, ३६, ३७) तपाईँले पनि कुनै न कुनै गाह्रो अवस्थाको सामना गरिरहनुभएको छ होला। तर यहोवाले तपाईँलाई सहन मदत गर्नुहुनेछ भन्‍ने कुरामा ढुक्क हुनुहोस्‌।—१ पत्रुस ५:१० पढ्‌नुहोस्‌।

२. हामीलाई सहनशील हुन कसले मदत गर्नुहुन्छ?

^२ सहनशील हुनु भनेको जस्तोसुकै चुनौती, खेदो, परीक्षा वा प्रलोभनहरू आए तापनि यहोवाप्रति वफादार रहिरहनु अनि आनन्दित भई उहाँको सेवा गरिरहनु हो। साथै सहनशील हुनुमा पछि अवस्था सुध्रिनेछ भनेर ढुक्क हुनु पनि समावेश छ। हामी आफ्नै बलबर्कतमा सहनशील हुन सक्दैनौँ। बरु हामीलाई यहोवाको मदत चाहिन्छ, जसले हामीलाई “असाधारण शक्‍ति” दिन सक्नुहुन्छ। (२ कोरि. ४:७) यस लेखमा हामी सहनशील हुन सकौँ भनेर यहोवाले गर्नुभएका चार वटा प्रबन्धबारे छलफल गर्नेछौँ। साथै ती प्रत्येकबाट हामी कसरी लाभ उठाउन सक्छौँ भनेर पनि बुझ्नेछौँ।

प्रार्थना

३. प्रार्थना किन एउटा अद्‌भुत प्रबन्ध हो?

^३ हामी सहनशील हुन सकौँ भनेर यहोवाले एउटा अद्‌भुत प्रबन्ध गर्नुभएको छ। हामी त्रुटिपूर्ण भए तापनि यो प्रबन्धले गर्दा हामी यहोवासित कुराकानी गर्न सक्छौँ। (हिब्रू ४:१६) एकैछिन सोच्नुहोस्‌ न, हामी यहोवालाई जुनसुकै विषयमा, जतिबेला पनि प्रार्थना गर्न सक्छौँ। अनि हामीले जुन भाषा बोले पनि वा जहाँ बसेर प्रार्थना गरे पनि उहाँ हाम्रो प्रार्थना सुन्‍न सक्नुहुन्छ। हो, चाहे हामी अनकन्टार ठाउँमा होऔँ वा झ्यालखानामै परेका किन नहोऔँ! (योना २:१, २; प्रेषि. १६:२५, २६) कहिलेकाहीँ एकदमै चिन्तित भएको बेला प्रार्थनामा के भन्‍ने भनेर हामीलाई थाहै नहुन सक्छ। तर त्यस्तो बेला पनि उहाँ हाम्रो मनमा दबिएका भावना बुझ्नुहुन्छ। (रोमी ८:२६, २७) साँच्चै, प्रार्थना एउटा अद्‌भुत प्रबन्ध हो!

४. प्रार्थना गऱ्‍यौँ भने यहोवाले हामीलाई सहनशील हुन मदत गर्नुहुनेछ भनेर किन भन्‍न सक्छौँ?

^४ बाइबलमा यस्तो प्रतिज्ञा गरिएको छ: “[यहोवाको] इच्छाबमोजिम हामीले जेसुकै मागे पनि उहाँले हाम्रो बिन्ती सुन्‍नुहुन्छ।” (१ युह. ५:१४) त्यसोभए सहनशील हुन सकौँ भनेर हामीले प्रार्थना गर्दा के यहोवा सुन्‍नुहुन्छ? पक्कै सुन्‍नुहुन्छ। यो यहोवाको इच्छाबमोजिमको प्रार्थना हो। हामी किन त्यसो भन्‍न सक्छौँ? किनभने चुनौतीहरूको दौडान हामी सहनशील भयौँ भने यहोवाले सैतानलाई मुखभरिको जवाफ दिन सक्नुहुन्छ। (हितो. २७:११) साथै बाइबल यसो पनि भन्छ: ‘जो-जो आफ्नो पूर्ण हृदयले यहोवा परमेश्‍वरप्रति भक्‍त छन्‌, तिनीहरूको खातिर उहाँ आफ्नो शक्‍ति प्रकट गर्न चाहनुहुन्छ।’ (२ इति. १६:९) त्यसैले यहोवा हामीलाई सहनशील हुन मदत गर्न सक्नुहुन्छ भन्‍ने कुरामा हामी ढुक्क हुन सक्छौँ। हो, उहाँसित त्यसो गर्ने इच्छा र शक्‍ति दुवै छ।—यसै. ३०:१८; ४१:१०; लुका ११:१३.

५. प्रार्थनाले हामीलाई मनोशान्ति पाउन कसरी मदत गर्छ? (यसैया २६:३)

^५ हामीले प्रार्थना गऱ्‍यौँ भने के हुन्छ? बाइबल यसो भन्छ: “परमेश्‍वरको शान्ति, जुन मानिसको समझभन्दा बाहिरको छ, त्यसले . . . [हाम्रो] हृदय र सोच्ने क्षमताको रक्षा गर्नेछ।” (फिलि. ४:७) कत्ति सान्त्वनादायी कुरा नि, होइन र? यहोवाको सेवा नगर्नेहरूले चुनौतीहरूको सामना गर्नुपर्दा मनोशान्ति पाउन विभिन्‍न तरिका अपनाउँछन्‌। उदाहरणको लागि, चिन्ता-फिक्रीमा डुबेका कतिपय मानिसहरू आफ्नो दिमाग खाली गर्न ध्यान गर्ने गर्छन्‌। तर यसरी आफ्नो दिमाग खाली गर्नु आध्यात्मिक तवरमा खतरनाक हुन्छ। (मत्ति १२:४३-४५ तुलना गर्नुहोस्‌।) यस्ता तरिका अपनाउनेहरूले केही क्षणको लागि शान्त महसुस त गर्लान्‌। तर तिनीहरूले यहोवाको शान्तिचाहिँ पाउँदैनन्‌। ध्यान गरेर पाइने शान्तिभन्दा परमेश्‍वरको शान्ति कता हो कता उत्कृष्ट छ। हामी यहोवामा पूरै भर पर्छौँ। त्यसैले उहाँलाई प्रार्थना गर्छौँ अनि उहाँले हामीलाई “निरन्तर शान्ति” दिनुहुन्छ। (यसैया २६:३ पढ्‌नुहोस्‌।) यहोवाले त्यसो गर्नुहुने एउटा तरिका भनेको हामीले पढेका सान्त्वनादायी पदहरू सम्झन मदत गर्नुभएर हो। यस्ता पदहरूले यहोवा हामीलाई माया गर्नुहुन्छ र हामीलाई मदत गर्न चाहनुहुन्छ भनेर ढुक्क बनाउँछ। यसरी हामी शान्त महसुस गर्छौँ।—भज. ६२:१, २.

६. तपाईँ प्रार्थनामा कस्ता कुराहरू समावेश गर्न सक्नुहुन्छ? (चित्र पनि हेर्नुहोस्‌।)

^६ तपाईँ के गर्न सक्नुहुन्छ? कुनै चुनौतीपूर्ण अवस्थाको सामना गर्नुपर्दा “आफ्नो भारी यहोवामा” बिसाउनुहोस्‌ र उहाँको शान्ति पाउन प्रार्थना गर्नुहोस्‌। (भज. ५५:२२) त्यो चुनौतीको सामना गर्न आवश्‍यक बुद्धि पनि माग्नुहोस्‌। (हितो. २:१०, ११) तर सहनशील हुन सकूँ भनेर प्रार्थना गर्दा धन्यवादको प्रार्थना चढाउन नबिर्सनुहोस्‌। (फिलि. ४:६) चुनौतीको सामना गर्न यहोवा तपाईँलाई कसरी मदत गर्दै हुनुहुन्छ भनेर याद गर्नुहोस्‌ र त्यसको लागि उहाँलाई धन्यवाद दिनुहोस्‌। हुनत चुनौती झेलिरहेकोले तपाईँलाई गाह्रो भइरहेको होला तर यहोवाले दिइरहनुभएका आशिष्‌हरूलाई पनि नबिर्सनुहोस्‌।—भज. १६:५, ६.

परमेश्‍वरको वचन

७. बाइबलबाट हामी कसरी सहने बल पाउन सक्छौँ?

^७ यहोवाले हामीलाई उहाँको वचन बाइबल दिनुभएको छ। उहाँले हामीलाई पक्कै मदत गर्नुहुनेछ भनेर बाइबलका थुप्रै पदहरूले स्पष्ट पार्छ। उदाहरणको लागि, मत्ति ६:८ विचार गरौँ। त्यहाँ यस्तो लेखिएको छ: “तिमीहरूले माग्नुभन्दा अघि नै तिमीहरूलाई के चाहिन्छ भनेर तिमीहरूका बुबालाई थाह छ।” यी शब्दहरू येसुले भन्‍नुभएको हो र यहोवालाई उहाँले भन्दा राम्ररी अरू कसैले चिनेको छैन। त्यसैले हामी यो कुरामा ढुक्क हुन सक्छौँ: हामीले भोगिरहेको गाह्रो अवस्थाबारे यहोवालाई थाह छ र उहाँले हामीलाई मदत गर्नुहुनेछ। हामीलाई सहन बल दिने यस्ता थुप्रै पदहरू हामी बाइबलमा पाउँछौँ।—भज. ९४:१९.

८. (क) कुन बाइबल सिद्धान्तले हामीलाई सहन मदत गर्छ? (ख) चाहिएको बेला बाइबलका सिद्धान्तहरू सम्झन हामी के गर्न सक्छौँ?

^८ बाइबल सिद्धान्तहरूबाट पनि हामी सहने बल पाउँछौँ। ती सिद्धान्तहरू राम्ररी बुझ्यौँ भने हामीले बुद्धि पाउनेछौँ, जसले गर्दा सही निर्णय गर्न सक्नेछौँ। (हितो. २:६, ७) उदाहरणको लागि, बाइबलले हामीलाई भोलिको अचाक्ली चिन्ता गर्नुको साटो हरेक दिन यहोवामा भरोसा राख्दै जीवन बिताउन प्रोत्साहन दिन्छ। (मत्ति ६:३४) हामीले बाइबल पढ्‌ने र त्यसमा मनन गर्ने बानी बसालेका छौँ भने हामीलाई चाहिएको बेला बाइबलका सिद्धान्तहरू सम्झन सजिलो हुनेछ।

९. यहोवाले आफ्ना जनहरूलाई मदत गर्नुभएका विवरणहरू पढ्‌दा हामी कस्तो महसुस गर्छौँ?

^९ बाइबलमा हामीजस्तै साधारण मानिसहरूको विवरण पनि पाउँछौँ, जसले यहोवामाथि भरोसा राखे र उहाँको मदत पाए। (हिब्रू ११:३२-३४; याकु. ५:१७) त्यस्ता विवरणहरूमा मनन गर्दा यहोवा “हाम्रो शरणस्थान र बल” अनि “दुःखको समयमा सजिलै पाइने मदतगार” हुनुहुन्छ भनेर हामी अझै विश्‍वस्त हुन सक्छौँ। (भज. ४६:१) विगतमा यहोवाका सेवकहरूले गाह्रो अवस्था भोग्नुपर्दा यहोवामाथि भरोसा राखिरहे र सहनशील भई उहाँको सेवा गरिरहे। ती विवरणहरूमा मनन गऱ्‍यौँ भने हामीले पनि सहने बल पाउनेछौँ।—याकु. ५:१०, ११.

१०. तपाईँ कसरी बाइबलबाट पूरापूर लाभ उठाउन सक्नुहुन्छ?

^१० तपाईँ के गर्न सक्नुहुन्छ? दिनदिनै बाइबल पढ्‌नुहोस्‌ अनि तपाईँलाई असाध्यै मदतकारी लागेका पदहरू लेखेर राख्नुहोस्‌। थुप्रैले दिनको सुरुमै दैनिक पद र त्यसको टिप्पणी पढ्‌ने गरेका छन्‌। त्यसो गर्दा तिनीहरूले दिनभरि उक्‍त पदबाट कुनै न कुनै तरिकामा मदत पाएका छन्‌। मारीa बहिनीको अनुभव विचार गरौँ। तिनका आमाबुबा दुवैलाई क्यान्सर भएको पत्ता लाग्यो र डाक्टरले अब उहाँहरूसित धेरै दिन छैन भनेर बताए। यस्तो गाह्रो अवस्था सहन मारीलाई केले मदत गऱ्‍यो? तिनी भन्छिन्‌: “हरेक दिन बिहान म दैनिक पद पढ्‌थेँ र त्यसमा मनन गर्थेँ। यस्तो बानी बसालेकोले गर्दा मैले आफ्नो गाह्रो अवस्थामा मात्रै घोरिएर बस्नुको साटो यहोवाले उहाँको वचनमार्फत सिकाउनुहुने राम्रो कुरामा ध्यान दिन सकेँ।”—भज. ६१:२.

हाम्रा भाइबहिनी

११. अरूले पनि हाम्रो जस्तै गाह्रो अवस्था भोग्दै छन्‌ भनेर थाह पाउँदा हामी कस्तो महसुस गर्छौँ?

^११ यहोवाले हामीलाई एक्लै छोड्‌नुभएको छैन। उहाँले हामीलाई भाइबहिनीहरू दिनुभएको छ। ‘संसारभरिका सबै भाइबहिनीले हामीले जस्तै दुःखकष्ट भोगिरहेका छन्‌’ भनेर थाह पाउँदा हामी सहने बल पाउँछौँ। (१ पत्रु. ५:९) हुनत हामीले गाह्रो अवस्था भोगिरहेका छौँ होला तर अरूले पनि त्यस्तै गाह्रो अवस्था भोगेका छन्‌ र सहनशीलता देखाएका छन्‌। त्यसैले हामी पनि सहनशील हुन सक्छौँ।—प्रेषि. १४:२२.

१२. भाइबहिनीहरूले हामीलाई कसरी मदत गर्न सक्छन्‌ अनि हामी तिनीहरूलाई कसरी मदत गर्न सक्छौँ? (२ कोरिन्थी १:३, ४)

^१२ भाइबहिनीले हामीलाई गाह्रो अवस्था सहन मदत गर्न सक्छन्‌। प्रेषित पावलले पनि त्यस्तै महसुस गरे। तिनी नजरबन्दमा हुँदा भाइबहिनीले तिनलाई सान्त्वना, प्रोत्साहन अनि व्यावहारिक मदत दिए। पावल तिनीहरूप्रति आभारी थिए। त्यसैले तिनीहरूको नामै उल्लेख गरेर कृतज्ञता व्यक्‍त गरे। (फिलि. २:२५, २९, ३०; कल. ४:१०, ११) आज हामीले पनि गाह्रो अवस्थाको सामना गर्नुपर्दा भाइबहिनीहरूले हामीलाई मदत र सान्त्वना दिन्छन्‌। अनि ती भाइबहिनीहरूले गाह्रो अवस्था भोग्नुपर्दा हामी तिनीहरूलाई मदत अनि सान्त्वना दिन सक्छौँ।—२ कोरिन्थी १:३, ४ पढ्‌नुहोस्‌।

१३. गाह्रो अवस्था सहन माया बहिनीलाई केले मदत गऱ्‍यो?

^१३ रूसकी माया बहिनीको अनुभव विचार गरौँ। सन्‌ २०२० मा तिनको घरको खानतलासी गरियो अनि आफ्नो विश्‍वासबारे अरूलाई बताएकोले तिनलाई अदालतमा उभ्याइयो। त्यतिबेला तिनले भाइबहिनीहरूबाट निकै प्रोत्साहन पाएको महसुस गरिन्‌। तिनी यसो भन्छिन्‌: “भावनात्मक रूपमा एकदमै गाह्रो भएको बेला भाइबहिनीहरूले मलाई फोन गर्नुभयो अनि चिठी र मेसेजहरू पठाउनुभयो। यसबाट मैले उहाँहरूको माया महसुस गर्न सकेँ। हुनत भाइबहिनी मलाई माया गर्नुहुन्छ अनि उहाँहरू मेरो परिवार हो भनेर मलाई थाह थियो। तर २०२० मा त्यो घटना भएपछि यो कुरामा म अझ विश्‍वस्त भएँ।”

१४. भाइबहिनीबाट बल पाउन हामीले के गर्नुपर्छ? (चित्र पनि हेर्नुहोस्‌।)

^१४ तपाईँ के गर्न सक्नुहुन्छ? गाह्रो अवस्था आइपर्दा भाइबहिनीहरूसित कुरा गर्नु र समय बिताउनु झनै जरुरी हुन्छ। साथै एल्डरहरूसित मदत माग्न पनि हिचकिचाउनु हुँदैन। तिनीहरू “हुरीबतास चल्दा लुक्ने ठाउँ अनि आँधीबेहरी आउँदा आड लिने ठाउँ” हुन्‌। (यसै. ३२:२) साथै नबिर्सनुहोस्‌ अरू भाइबहिनीले पनि गाह्रो अवस्था भोगिरहेका छन्‌। त्यस्ता भाइबहिनीको लागि तपाईँ केही मायालु कुरा गरिदिन सक्नुहुन्छ। यसो गर्नुभयो भने तपाईँ आफै पनि आनन्दित हुनुहुनेछ र गाह्रो अवस्था सहन बल पाउनुहुनेछ।—प्रेषि. २०:३५.

हाम्रो आशा

१५. आशाले कसरी येसुलाई मदत गऱ्‍यो र हामीलाई पनि कसरी मदत गर्छ? (हिब्रू १२:२)

^१५ यहोवाले हामीलाई पक्का आशा दिनुभएको छ। (रोमी १५:१३) यसले गर्दा हामी गाह्रो अवस्था सहने बल पाउँछौँ। पृथ्वीमा जीवन बिताउनुभएको अन्तिम दिन येसुलाई कत्ति गाह्रो भएको थियो होला! तर त्यो सहन उहाँलाई आशाले मदत गऱ्‍यो। (हिब्रू १२:२ पढ्‌नुहोस्‌।) आफ्नो वफादारीले यहोवाको नाम उच्च पार्नेछ भनेर येसुलाई थाह थियो। त्यसैले उहाँ अन्तसम्मै वफादार रहनुभयो। येसुसित स्वर्गमा आफ्नो बुबाकहाँ फर्कने र राजा भएपछि अभिषिक्‍त भाइहरूसँग मिलेर शासन गर्ने आशा पनि थियो। हामीले पनि नयाँ संसारमा सधैँभरि जिउने आशा पाएका छौँ। यो आशाले हामीलाई सैतानको संसारमा जस्तोसुकै गाह्रो अवस्था सहन बल दिन्छ।

१६. आशाले एउटी बहिनीलाई कसरी मदत गऱ्‍यो अनि तिनले भनेको कुराबाट तपाईँले के सिक्नुभयो?

^१६ आशाले रूसमा बस्ने आला बहिनीलाई कसरी मदत गऱ्‍यो, विचार गरौँ। तिनको पतिलाई गिरफ्तार गरियो र पुर्पक्षको लागि हिरासतमा राखियो। आला बहिनीले यसो भनिन्‌: “भविष्यको आशाबारे मनन गर्दा मैले सहने बल पाएकी छु। यस्तो आशा दिनुभएकोमा म यहोवालाई धन्यवाद दिने गर्छु। मलाई थाह छ, यो गाह्रो अवस्था सधैँभरि रहनेछैन। अन्तमा यहोवाको जित हुनेछ र उहाँले हामीलाई इनाम दिनुहुनेछ।”

१७. भविष्यको आशाप्रति कृतज्ञ भएको हामी कसरी देखाउन सक्छौँ? (चित्र पनि हेर्नुहोस्‌।)

^१७ तपाईँ के गर्न सक्नुहुन्छ? यहोवाले दिनुभएको भविष्यको सुन्दर आशाबारे मनन गर्न समय निकाल्नुहोस्‌। नयाँ संसारमा जीवन बिताएको अनि त्यतिबेला आशिष्‌हरू पाएको कल्पना गर्नुहोस्‌। यसो गर्दा अहिले आफूले भोग्नुपरेको जस्तोसुकै सङ्‌कष्ट पनि “क्षणिक र हलुका” लाग्नेछ। (२ कोरि. ४:१७) साथै आफ्नो आशाबारे अरूलाई बताउने मौका खोजिरहनुहोस्‌। भविष्यको आशाबारे थाहै नभएका मानिसहरूलाई अहिले चुनौतीहरू सहन कत्ति गाह्रो भइरहेको होला, सोच्नुहोस्‌ त! तपाईँले भविष्यको आशाबारे केही कुरा मात्र बताउँदा पनि तिनीहरूको चासो जाग्न सक्छ र तिनीहरू त्यसबारे अझ बुझ्न उत्प्रेरित हुन सक्छन्‌।

१८. हामी यहोवाका प्रतिज्ञाहरूमा किन भरोसा गर्न सक्छौँ?

^१८ अनेकन्‌ परीक्षा भोग्नुपरे पनि अय्युब वफादार रहिरहे। त्यसैले तिनले यहोवालाई यसो भन्‍न सके: “अब मैले थाह पाएँ, तपाईँ सबै कुरा गर्न सक्नुहुन्छ। आफूले ठानेको कुनै पनि कुरा पूरा गर्नु तपाईँको लागि असम्भव छैन।” (अय्यु. ४२:२) यहोवालाई आफ्नो उद्देश्‍य पूरा गर्नदेखि कुनै कुराले रोक्न सक्दैन भनेर अय्युबले बुझे। यसबाट हामी पनि सहने बल पाउँछौँ। यो कुरा बुझ्न एउटी बिरामी स्त्रीबारे कल्पना गर्नुहोस्‌। विभिन्‍न डाक्टरकोमा धाए तापनि निको नभएकोले तिनी निराश भएकी छिन्‌। तर एक जना अनुभवी डाक्टरले तिनको रोग पत्ता लगाउँछन्‌ र त्यसको उपचार कसरी गर्ने भनेर राम्ररी बुझाउँछन्‌। हुनत तिनको रोग निको हुन केही समय लाग्नेछ तर तिनी ढुक्क महसुस गर्छिन्‌। आफू निको हुनेछु भन्‍ने आशाले गर्दा तिनले सहने बल पाउँछिन्‌। त्यसरी नै नयाँ संसारको पक्का आशाले हामीलाई सहन मदत गर्छ।

१९. गाह्रो अवस्था सहन हामीलाई केले मदत गर्छ?

^१९ हामीले छलफल गरेझैँ यहोवाले गर्नुभएका विभिन्‍न प्रबन्धहरूले गर्दा हामी सहनशील हुन सक्छौँ। ती हुन्‌: प्रार्थना, उहाँको वचन, हाम्रा भाइबहिनीहरू र हाम्रो आशा। हामीले यी प्रबन्धहरूबाट पूरापूर लाभ उठाउनुपर्छ। यसो गऱ्‍यौँ भने सैतानको संसार रहुन्जेल जस्तोसुकै गाह्रो अवस्था सहनुपरे पनि यहोवाले हामीलाई बल दिइरहनुहुनेछ।—फिलि. ४:१३.