यूसुफले निराशाको बाबजुद हार मानेनन्‌। बरु तिनले आफूलाई दिइएको काममा निकै मेहनत गरे। यसरी तिनले आफूलाई यहोवा परमेश्‍वरबाट आशिष्‌ पाउन योग्य बनाए र चाँडै आफ्नो नयाँ मालिकको मन जित्न पनि सफल भए। पोतीफरले आफ्नो जवान दास यूसुफलाई तिनका परमेश्‍वर यहोवाले आशिष्‌ दिनुभएको छ भनेर देखे। यस्तो आशिष्‌ले पोतीफरको घरमा समेत समृद्धि ल्यायो। बिस्तारै यूसुफले मालिक पोतीफरबाट आदर पाउँदै गए र पछि पोतीफरले आफूसित भएका सबै कुरालाई तिनको जिम्मा लगाइदिए।—उत्पत्ति ३९:३-६.

समय बित्दै जाँदा यूसुफ परिपक्व हुँदै गए भनेर बाइबल विवरण बताउँछ। जवान यूसुफ वयस्क भए र तिनी “सुन्दर र हेर्नमा राम्रा थिए।” यी शब्दहरूबाट यूसुफलाई खतरनाक परिस्थितिले घेर्नै लागेको थियो भन्‍ने कुराको सङ्‌केत पाउँछौं। किनभने बाहिरी सुन्दरताले अक्सर अरूको अनावश्‍यक ध्यान खिच्छ।