पाठ ०७

यहोवा कस्तो परमेश्‍वर हुनुहुन्छ?

छापिएको संस्करण

तपाईँलाई यहोवा कस्तो परमेश्‍वर हुनुहुन्छ जस्तो लाग्छ? के तपाईँलाई उहाँ एकदमै महान्‌ तर विशाल तारापुञ्जका ताराहरूजस्तै धेरै टाढा हुनुहुन्छ जस्तो लाग्छ? अथवा के तपाईँको विचारमा उहाँ मेघगर्जनजस्तै शक्‍तिशाली तर भावना नभएको परमेश्‍वर हुनुहुन्छ? यहोवा वास्तवमा कस्तो परमेश्‍वर हुनुहुन्छ? बाइबलले यहोवाका गुणहरूबारे बताउँछ। साथै यसले उहाँ तपाईँको ख्याल राख्नुहुन्छ भन्‍ने कुरा पनि प्रस्ट पार्छ।

१. हामी किन परमेश्‍वरलाई देख्न सक्दैनौँ?

“परमेश्‍वर अदृश्‍य हुनुहुन्छ।” (युहन्‍ना ४:२४) यहोवाको शरीर हाम्रो जस्तो छैन। उहाँ अदृश्‍य हुनुहुन्छ अनि स्वर्गमा बस्नुहुन्छ।

२. यहोवाका केही गुण के-के हुन्‌?

हामी यहोवालाई देख्न सक्दैनौँ तर उहाँ वास्तविक व्यक्‍ति हुनुहुन्छ। उहाँलाई चिन्दै जाँदा हामी उहाँलाई प्रेम गर्न थाल्छौँ किनकि उहाँमा मनमोहक गुणहरू छन्‌। बाइबल भन्छ: “यहोवा न्याय मन पराउनुहुन्छ; आफ्ना वफादार सेवकहरूलाई उहाँ कहिल्यै त्याग्नुहुन्‍न।” (भजन ३७:२८) उहाँ “कोमल स्नेहले भरिपूर्ण अनि कृपालु हुनुहुन्छ,” विशेषगरि दुःखकष्ट भोगिरहेका मानिसहरूप्रति। (याकुब ५:११) “यहोवा टुटेका हृदय भएकाहरूको नजिक हुनुहुन्छ र निराश भएकाहरूलाई उहाँले बचाउनुहुन्छ।” (भजन ३४:१८) के तपाईँलाई हामी जे गर्छौँ, त्यसले यहोवालाई खुसी वा दुःखी बनाउन सक्छ भन्‍ने कुरा थाह थियो? कसैले खराब काम गर्ने छनौट गर्दा उहाँलाई दुःख लाग्छ। (भजन ७८:४०, ४१) तर कसैले असल काम गर्दा उहाँलाई खुसी लाग्छ।—हितोपदेश २७:११ पढ्‌नुहोस्‌।

३. यहोवा हामीलाई प्रेम गरेको कसरी देखाउनुहुन्छ?

यहोवाको प्रमुख गुण प्रेम हो। वास्तवमा “परमेश्‍वर प्रेम हुनुहुन्छ।” (१ युहन्‍ना ४:८) यहोवाले बाइबलमार्फत आफ्नो प्रेम प्रकट गर्नुभएको छ। त्यति मात्र होइन, उहाँको सृष्टिमा पनि उहाँको प्रेम देखिन्छ। (प्रेषित १४:१७ पढ्‌नुहोस्‌।) उदाहरणको लागि, उहाँले हामीलाई कसरी सृष्टि गर्नुभयो, विचार गर्नुहोस्‌। उहाँले हामीलाई थरिथरिका रङ हेर्ने, सुमधुर सङ्‌गीत सुन्‍ने अनि विभिन्‍न खानेकुराको स्वाद लिने क्षमतासहित सृष्टि गर्नुभएको छ। उहाँ हामीले जीवनको आनन्द उठाएको चाहनुहुन्छ।

अझ खोतल्नुहोस्‌

यहोवा अचम्मलाग्दा काम कसरी गर्नुहुन्छ, थाह पाउनुहोस्‌। यहोवा आफ्ना मनमोहक गुणहरू कसरी प्रकट गर्नुहुन्छ, त्यो पनि बुझ्नुहोस्‌।

४. पवित्र शक्‍ति—परमेश्‍वरको सक्रिय शक्‍ति

चित्रहरूको सँगालो: परमेश्‍वरको पवित्र शक्‍तिका कामहरू। १. ग्रहहरू र ब्रह्‍माण्ड। २. बाइबलको एक जना लेखक परमेश्‍वरको प्रेरणा पाएर उहाँको विचार मुठामा लेख्दै छन्‌।

हामी काम गर्न हात चलाउँछौँ भने यहोवा पवित्र शक्‍ति चलाउनुहुन्छ। बाइबलले बताएअनुसार पवित्र शक्‍ति कुनै व्यक्‍ति नभई परमेश्‍वरले विभिन्‍न काम गर्न चलाउनुहुने शक्‍ति हो। लुका ११:१३ र प्रेषित २:१७ पढ्‌नुहोस्‌। त्यसपछि यी प्रश्‍नहरू छलफल गर्नुहोस्‌:

परमेश्‍वरसित पवित्र शक्‍ति माग्नेहरूमाथि उहाँले त्यो ‘खन्याउनुहुनेछ।’ त्यसोभए पवित्र शक्‍ति कुनै व्यक्‍ति हो कि परमेश्‍वरको सक्रिय शक्‍ति? तपाईँलाई किन त्यस्तो लाग्छ?

यहोवा पवित्र शक्‍ति चलाएर अचम्मलाग्दा काम गर्नुहुन्छ। भजन १०४:३० र २ पत्रुस १:२०, २१ पढ्‌नुहोस्‌ अनि यो प्रश्‍न छलफल गर्नुहोस्‌:

यहोवाले पवित्र शक्‍ति चलाएर के-के गर्नुभएको छ?

५. यहोवासित मनमोहक गुणहरू छन्‌

मोसा परमेश्‍वरका वफादार उपासक थिए। तर तिनी उहाँलाई अझ राम्ररी चिन्‍न चाहन्थे। त्यसैले तिनले परमेश्‍वरलाई भने: “मलाई तपाईँको मार्ग देखाउनुहोस्‌ र मैले तपाईँलाई चिन्‍न सकूँ।” (प्रस्थान ३३:१३) त्यसैले यहोवाले मोसालाई आफू कस्तो परमेश्‍वर हुँ भनेर बताउनुभयो। प्रस्थान ३४:४-६ पढ्‌नुहोस्‌ अनि यी प्रश्‍नहरू छलफल गर्नुहोस्‌:

यहोवाले मोसालाई आफ्ना कस्ता गुणहरूबारे बताउनुभयो?
यहोवाको कुन गुण तपाईँलाई सबैभन्दा धेरै मन पऱ्‍यो?

६. यहोवा मानिसहरूको ख्याल राख्नुहुन्छ

प्राचीन समयका हिब्रू जातिका मानिसहरू परमेश्‍वरका सेवक थिए अनि तिनीहरू मिश्रको दासत्वमा परेका थिए। तिनीहरूले दुःख पाएको देख्दा यहोवालाई कस्तो लाग्यो? अडियो सुन्‍नुहोस्‌ अनि बाइबलमा सँगसँगै हेर्नुहोस्‌ वा प्रस्थान ३:१-१० पढ्‌नुहोस्‌। त्यसपछि तल दिइएका प्रश्‍नहरू छलफल गर्नुहोस्‌:

अडियो: यहोवाले तिनीहरूको दुःख देख्नुभयो (२:४५)

यस विवरणअनुसार मानिसहरूले दुःख भोग्दा यहोवालाई कस्तो लाग्छ?—पद ७ र ८ हेर्नुहोस्‌।
के तपाईँलाई यहोवा मानिसहरूलाई साँच्चै मदत गर्न चाहनुहुन्छ अनि त्यसो गर्न सक्नुहुन्छ जस्तो लाग्छ? तपाईँलाई किन त्यस्तो लाग्छ?

७. सृष्टिमा यहोवाका गुणहरू देखिन्छ

चित्रहरूको सँगालो: एउटा ह्वेल र त्यसको बच्चा, फुलहरू र हमिङबर्ड।

यहोवा सृष्टिमार्फत आफ्ना गुणहरू प्रकट गर्नुहुन्छ। भिडियो हेर्नुहोस्‌। त्यसपछि रोमी १:२० पढ्‌नुहोस्‌ अनि तल दिइएको प्रश्‍न छलफल गर्नुहोस्‌: