येशूका उपदेशहरूले के तपाईंको प्रार्थनामा प्रभाव पार्छ?
“येशूले यी कुरा गरिसक्नुभएपछि भीड उहाँका शिक्षाले छक्क परे।”—मत्ती ७:२८.
१, २. येशूको सिकाउने तरिका देखेर भीड किन छक्क परे?
हामीले परमेश्वरका एक मात्र पुत्र येशू ख्रीष्टका उपदेशहरू स्वीकार्नुपर्छ र ती जीवनमा उतार्नुपर्छ। अवश्यै उहाँले जस्तो त अरू कोही मानिसले सिकाउन सकेन। डाँडाको उपदेशमा उहाँको शिक्षाले मानिसहरू छक्क परे!—मत्ती ७:२८, २९ पढ्नुहोस्।
२ यहोवाका पुत्रले शास्त्रीहरूले जस्तो गरी सिकाउनुभएन। तिनीहरूको लम्बेचौडे भाषण असिद्ध मानिसहरूको शिक्षामा आधारित थियो। ख्रीष्टले “अख्तियार भएकाले” जस्तो गरी सिकाउनुभयो किनभने उहाँले सिकाएका कुराहरू परमेश्वरतर्फका थिए। (यूह. १२:५०) त्यसैले डाँडाको उपदेशमा येशूले भनेका थप कुराले हाम्रो प्रार्थनालाई कसरी प्रभाव पार्न सक्छ र पार्नुपर्छ, आउनुहोस् हेरौं।
कपटीहरूले जस्तो प्रार्थना कहिल्यै नगर्नुहोस्
३. मत्ती ६:५ मा पाइने येशूका शब्दहरूको सार बताउनुहोस्।
३ प्रार्थना साँचो उपासनाको महत्त्वपूर्ण भाग हो र हामीले यहोवालाई नियमित प्रार्थना गर्नुपर्छ। तर हाम्रो प्रार्थना डाँडाको उपदेशमा येशूले भनेका कुराबाट प्रभावित हुनुपर्छ। उहाँले भन्नुभयो: “जब तिमी प्रार्थना गर्दछौ तब कपटीहरू जस्ता नहोऊ, किनकि तिनीहरू सभाघरहरूमा र गल्लीहरूका कुनामा मानिसहरूले देखून् भनी खडा भएर प्रार्थना गर्न मन गर्दछन्। म तिमीहरूलाई साँचो भन्दछु, ‘तिनीहरूले आफ्नो इनाम पाइसकेका हुन्छन्।’ ”—मत्ती ६:५.
४-६. (क) फरिसीहरू किन “सभाघरहरूमा र गल्लीहरूका कुनामा . . . खडा भएर प्रार्थना गर्न मन” गर्दथिए? (ख) त्यस्ता कपटीहरूले कसरी “इनाम पाइसकेका हुन्छन्”?
४ येशूका चेलाहरूले आत्म-धर्मी फरिसी जो “कपटी” थिए तिनीहरूको प्रार्थनाको नकल गर्नुहुँदैन थियो। तिनीहरूको भक्ति केवल देखावटी थियो। (मत्ती २३:१३-३२) ती कपटीहरू “सभाघरहरूमा र गल्लीहरूका कुनामा . . . खडा भएर प्रार्थना गर्न मन” पराउँथे। किन? “मानिसहरूले देखून्” भनी। प्रथम शताब्दीका यहूदीहरूले होमबलिको बेला मन्दिरमा (बिहान नौ बजेतिर र दिउँसो तीन बजेतिर) सामूहिक प्रार्थना गर्ने गर्थे। यरूशलेमका थुप्रै बासिन्दाहरूले मन्दिर परिसरमा उपासकहरूको भीडसँगै प्रार्थना गर्थे। त्यस सहरबाहिरका भक्त यहूदीहरूले ‘सभाघरहरूमा खडा’ भएर दिनमा दुई चोटि प्रार्थना गर्थे।—लूका १८:११, १३ तुलना गर्नुहोस्।
५ प्रार्थना गर्ने त्यो समयमा प्रायः मानिसहरू मन्दिर नजिकै नहुने भएकाले आफू ती समय जहाँ हुन्थे, त्यहीं प्रार्थना गर्ने गरेको हुन सक्छ। कोही-कोही चाहिं प्रार्थना गर्ने समयमा “गल्लीहरूका कुनामा” पुग्न दौडधूप गर्थे। गल्ली हुँदै गइरहेका “मानिसहरूले देखून्” भन्ने तिनीहरू चाहन्थे। धर्मको आडम्बर गर्ने ती कपटीहरू तिनीहरूलाई देख्ने मानिसहरूको प्रशंसा पाउन “बाहाना गरेर लामा-लामा प्रार्थना” गर्दथिए। (लूका २०:४७) हाम्रो मनोवृत्ति त्यस्तो हुनुहुँदैन।
६ त्यस्ता कपटीहरूले “इनाम पाइसकेका हुन्छन्” भनी येशूले घोषणा गर्नुभयो। तिनीहरू सँगी मानवहरूबाट मान-सम्मान र प्रशंसाको औधी चाह गर्दथिए। अनि तिनीहरूले पाउने इनाम भन्नु नै त्यति थियो किनभने कपटले भरिएको तिनीहरूको प्रार्थना यहोवाले सुन्नुहुने थिएन। अर्कोतर्फ, ख्रीष्टका साँचो चेलाहरूको प्रार्थना परमेश्वरले सुन्नुहुने थियो। यो, येशूले यस विषयमा भन्नुभएको थप कुराबाट स्पष्ट हुन्छ।
७. “ढोका थुनेर गुप्तमा बसेर” प्रार्थना गर्नु भन्ने सल्लाहको अर्थ के हो?
७ “तर तिमी जब प्रार्थना गर्दछौ, त्यसबेला आफ्नो भित्री कोठाभित्र पस, र ढोका थुनेर गुप्तमा बसेका तिम्रा पितालाई प्रार्थना गर, र गुप्तमा देख्ने तिम्रा पिताले तिमीलाई इनाम दिनुहुनेछ।” (मत्ती ६:६) येशूले ढोका थुनेर गुप्तमा प्रार्थना गर भन्नुको अर्थ यो चाहिं होइन, मण्डलीको प्रतिनिधित्व गर्दै कसैले पनि प्रार्थना गर्नु हुँदैन। यो सल्लाहको उद्देश्य थियो: अरू मानिसको ध्यान खिच्ने र प्रशंसा बटुल्ने हेतुले सार्वजनिक प्रार्थना गर्न निरुत्साहित गर्नु। सार्वजनिक प्रार्थनामा परमेश्वरका जनहरूको प्रतिनिधित्व गर्ने सुअवसर पाउँदा हामीले यो कुरा मनमा राख्नुपर्छ। प्रार्थनाको सन्दर्भमा येशूको थप सल्लाह हामी पालन गरौं।
८. मत्ती ६:७ अनुसार प्रार्थना गर्ने कस्तो अनुचित तरिका हामीले त्याग्नुपर्छ?
८ “तर प्रार्थना गर्दा अन्यजातिहरूजस्ता व्यर्थै नबरबराओ। किनभने धेरै शब्दमा बोल्दा तिनीहरूको सुनाइ हुन्छ भन्ने तिनीहरू विचार गर्दछन्।” (मत्ती ६:७, NRV ) यसरी येशूले प्रार्थना गर्ने अर्को अनुचित तरिकाबारे भन्नुभयो। त्यो थियो: एउटै कुरा दोहोऱ्याइ, तेहऱ्याइ भन्ने। उहाँले यसो भन्नुको अर्थ, हार्दिक बिन्ती अथवा धन्यवादका प्रार्थना दोहोऱ्याउनै हुँदैन भन्ने त थिएन। आफ्नो मृत्युको अघिल्लो रात गेतसमनीको बगैंचामा येशूले प्रार्थना गर्दा बारम्बार “उही कुरो” दोहोऱ्याउनुभयो।—मर्कू. १४:३२-३९.
९, १०. कुन अर्थमा हामीले एउटै कुरा दोहोऱ्याइ तेहऱ्याइ प्रार्थना गर्नुहुँदैन?
९ एउटै कुरा बारम्बार दोहोऱ्याउने “अन्यजातिहरू”-को प्रार्थना नकल गर्नु गलत हुनेछ। तिनीहरू कण्ठस्थ गरेको कुरा ‘व्यर्थै बरबराउने’ गर्छन् अर्थात् दोहोऱ्याइ तेहऱ्याइ भन्ने गर्छन्। अनि यसमा थुप्रै अनावश्यक शब्दहरू पनि समावेश हुन्छन्। बालका उपासकहरूले “हे बाल, हे बाल, हाम्रो बिन्ती सुन्नुहोस्” भन्दै “बिहानदेखि मध्यान्हसम्म” झूटा देवको नाउँ पुकार्नु बेकार साबित भयो। (१ राजा १८:२६) आज लाखौंले “तिनीहरूको सुनाइ हुन्छ” भन्ठान्दै एउटै कुरा बारम्बार दोहोऱ्याउँदै लामो प्रार्थना गर्छन्। दोहोऱ्याइ तेहऱ्याइ “धेरै शब्दमा” लामो प्रार्थना गर्नु यहोवाको नजरमा मूल्यहीन छ भनेर बुझ्न येशू हामीलाई मदत दिनुहुन्छ। उहाँले अझ यसो भन्नुभयो:
१० “यसकारण तिनीहरू जस्ता नहोऊ। किनभने तिमीहरूले उहाँसँग माग्नभन्दा अघिबाटै तिमीहरूलाई कुन-कुन कुराको खाँचो छ, सो तिमीहरूका पिता जान्नुहुन्छ।” (मत्ती ६:८) थुप्रै यहूदी धर्मगुरुहरूले लम्बेतान प्रार्थना गरेर आफूलाई अन्यजातिहरू जस्तै बनाए। प्रशंसा, धन्यवाद र बिन्ती समावेश भएको हार्दिक प्रार्थना साँचो उपासनाको महत्त्वपूर्ण भाग हो। (फिलि. ४:६) तर, परमेश्वरलाई हाम्रो आवश्यकता थाह दिन एउटै कुरा दोहोऱ्याइ तेहऱ्याइ भन्नुपर्छ भन्ने सोचाइ गलत हो। ‘माग्नभन्दा अघिबाटै हामीलाई कुन-कुन कुराको खाँचो छ’ त्यो सब थाह पाउनुहुने परमेश्वरलाई प्रार्थना गरिरहेका छौं भनेर हामीले सम्झनुपर्छ।
११. सार्वजनिक प्रार्थना गर्ने सुअवसर पाउँदा हामीले के कुरा मनमा राख्नुपर्छ?
११ परमेश्वरलाई अस्वीकार्य प्रार्थनाबारे येशूले भनेको कुराबाट हामीले के बुझ्नुपर्छ भने ठूल-ठूला र सुन्नमा मीठा-मीठा शब्दहरू प्रयोग गर्दैमा यहोवा प्रभावित हुनुहुने छैन। सार्वजनिक प्रार्थना स्रोताहरूलाई प्रभाव पार्ने हेतुले गर्नुहुँदैन भनेर हामीले मनमा राख्नुपर्छ। साथै प्रार्थना एकदमै लामो भएर स्रोताको ध्यान “आमिन” भन्ने समय कहिले आउला भन्ने कुरामा मात्र जाने पनि हुनुहुँदैन। घोषणाहरू गर्न वा स्रोतालाई सल्लाह दिन प्रार्थनालाई माध्यमको रूपमा चलाउनु पनि डाँडाको उपदेशमा येशूले भन्नुभएको कुराबमोजिम हुनेछैन।
येशू हामीलाई प्रार्थना गर्न सिकाउनुहुन्छ
१२. “तपाईंको नाउँ पवित्र गरिओस्” भन्ने बिन्तीको महत्त्वलाई तपाईं कसरी बुझाउनुहुन्छ?
१२ हो, प्रार्थना गर्ने महान् सुअवसरको दुरुपयोगबारे येशूले चेतावनी दिनुभयो। तर उहाँले आफ्ना चेलाहरूलाई प्रार्थना गर्न पनि सिकाउनुभयो। (मत्ती ६:९-१३ पढ्नुहोस्) त्यो नमुना प्रार्थना कण्ठ गरेर दोहोऱ्याइ तेहऱ्याइ भन्नको लागि होइन। यो त हाम्रो प्रार्थना कस्तो हुनुपर्छ भन्ने एउटा नमुना मात्र हो। उदाहरणको लागि, येशूले परमेश्वरलाई पहिलो स्थानमा राख्दै आफ्नो प्रार्थना यसरी सुरु गर्नुभयो: “हे हाम्रा स्वर्गमा बस्ने पिता, तपाईंको नाउँ पवित्र गरिओस्।” (मत्ती ६:९) हामीले यहोवालाई “हाम्रा . . . पिता” भनेर सम्बोधन गर्नु उचित छ किनभने उहाँ हाम्रो सृष्टिकर्ता हुनुहुन्छ जो पृथ्वीभन्दा धेरै टाढा ‘स्वर्गमा बस्नुहुन्छ।’ (व्यव. ३२:६; २ इति. ६:२१; प्रेरि. १७:२४, २८) “हाम्रा” भनेर बहुवचन चलाइएको कारण हामीले के कुरा याद गर्नुपर्छ भने, सँगी विश्वासीहरूले पनि परमेश्वरसित नजिकको सम्बन्ध गाँसेका छन्। “तपाईंको नाउँ पवित्र गरिओस्” भन्ने अभिव्यक्ति एउटा बिन्ती हो। यसले अदनको विद्रोहदेखि कलंक लागेको यहोवाको नाउँलाई पवित्र पार्न उहाँले कदम चालून् भन्ने कुरालाई बुझाउँछ। त्यस प्रार्थनाको जवाफमा यहोवाले पृथ्वीबाट दुष्टता हटाउनुहुनेछ र आफ्नो नाउँ पवित्र तुल्याउनुहुनेछ।—इज. ३६:२३.
१३. (क) “तपाईंको राज्य आओस्” भन्ने बिन्ती कसरी पूरा हुनेछ? (ख) पृथ्वीमा परमेश्वरको इच्छा पूरा हुनुमा के-के समावेश छ?
१३ “तपाईंको राज्य आओस्। तपाईंको इच्छा स्वर्गमाझैं यस पृथ्वीमा पूरा होस्।” (मत्ती ६:१०) नमुना प्रार्थनामा गरिएको यस बिन्तीको सन्दर्भमा हामीले एउटा कुरा मनमा राख्नुपर्छ। त्यो हो: यस “राज्य”-ले ख्रीष्ट र पुनरुत्थान भएका “पवित्र जनहरू”-लाई सुम्पिएको स्वर्गमा स्थापित मसीही राज्यलाई बुझाउँछ। (दानि. ७:१३, १४, १८; यशै. ९:६, ७) यो राज्य “आओस्” भन्नुको मतलब परमेश्वरको शासनका सबै विरोधी हटाउन उहाँको राज्य आओस् भनी बिन्ती गर्नु हो। यो राज्य चाँडै आउनेछ जसले गर्दा धार्मिकता, शान्ति र समृद्धिले छाएको प्रमोदवनको लागि बाटो खोलिनेछ। (भज. ७२:१-१५; दानि. २:४४; २ पत्रु. ३:१३) यहोवाको इच्छा स्वर्गमा पूरा हुँदैछ र पृथ्वीमा पनि पूरा होस् भनेर बिन्ती गर्नुको मतलब पृथ्वीमा उहाँको उद्देश्य पूरा होस् भन्ने हो। यस उद्देश्यमा, प्राचीन समयमा जस्तै वर्तमान समयका आफ्ना विरोधीहरूलाई नामेट पार्ने कुरा पनि समावेश छ।—भजन ८३:१, २, १३-१८ पढ्नुहोस्।
१४. “हाम्रो दिनभरिको भोजन”-को लागि बिन्ती गर्नु किन उपयुक्त छ?
१४ “हाम्रा दिनभरिको भोजन आज हामीलाई दिनुहोस्।” (मत्ती ६:११; लूका ११:३) प्रार्थनामा यसरी बिन्ती गर्दा “दिनभरिको” आवश्यक भोजन प्रबन्ध गरिदिनुहोस् भनी परमेश्वरलाई पुकारिरहेका हुन्छौं। यसबाट हामी यो कुरामा विश्वस्त भएको स्पष्ट हुन्छ कि हाम्रो दिनहुँको आवश्यकता यहोवाले पूरा गर्न सक्नुहुन्छ। यो प्रार्थना चाहिएको भन्दा धेरै जोडजाम गर्नको लागि गरिने त होइन। दैनिक आवश्यकताको लागि बिन्ती गर्दा, परमेश्वरले इस्राएलीहरूलाई “दिनदिनको हिस्सा”-को मन्न मात्र ‘बटुल्न’ भन्नुभएको सम्झना आउन सक्छ।—प्रस्थ. १६:४.
१५. “हाम्रो अपराध क्षमा गर्नुहोस्, जसरी हामीले पनि आफ्ना अपराधीहरूलाई क्षमा गरेका छौं” भन्ने बिन्तीको अर्थ के हो, बताउनुहोस्।
१५ नमुना प्रार्थनामा यसपछि गरिएको बिन्तीले हामीले गर्नुपर्ने एउटा कुरातर्फ ध्यान खिच्छ। येशूले भन्नुभयो: “हाम्रा अपराध क्षमा गर्नुहोस्, जसरी हामीले पनि आफ्ना अपराधीहरूलाई क्षमा गरेका छौं।” (मत्ती ६:१२) हामी विरुद्ध अपराध अर्थात् पाप गर्नेहरूलाई “क्षमा गरेका” छौं भने मात्र यहोवाबाट क्षमा पाउन सक्छौं। (मत्ती ६:१४, १५ पढ्नुहोस्) हामीले खुला मनले अरूलाई क्षमा दिनुपर्छ।—एफि. ४:३२; कल. ३:१३.
१६. परीक्षा र दुष्टबाट छुटाउनुहोस् भन्ने बिन्तीलाई हामी कसरी बुझ्न सक्छौं?
१६ “हामीलाई परीक्षामा नल्याउनुहोस्, तर दुष्टबाट छुटाउनुहोस्।” (मत्ती ६:१३) येशूको नमुना प्रार्थनाका यी दुई सम्बन्धित बिन्तीलाई हामीले कसरी बुझ्नुपर्छ? एउटा कुरा पक्का छ: यहोवाले हामीलाई पाप गर्न प्रलोभनमा पार्नुहुन्न। (याकूब १:१३ पढ्नुहोस्) असली “प्रलोभक” त्यो “दुष्ट” शैतान हो। (मत्ती ४:३, NW) तर बाइबलमा यहोवाले परीक्षा ल्याउनुभयो भन्नुको मतलब, उहाँ आफैले परीक्षा ल्याउनुभयो भनेको होइन, केवल हुन दिनुभएको मात्र हो। (रूथ १:२०, २१; उप. ११:५) त्यसैले “हामीलाई परीक्षामा नल्याउनुहोस्,” भन्ने बिन्तीको अर्थ उहाँको आज्ञा विपरीत चल्ने प्रलोभनमा पर्दा त्यसको वशमा पर्न नदिन यहोवालाई आग्रह गर्नु हो। अनि “दुष्टबाट छुटाउनुहोस्” भन्ने बिन्तीको अर्थ शैतानलाई हामीमाथि हाबी हुन नदिनुहोस् भनी बिन्ती गर्नु हो। हामी विश्वस्त हुन सक्छौं कि परमेश्वरले हामीलाई ‘आफ्नो शक्तिदेखि बाहिरको परीक्षामा पर्न दिनुहुनेछैन।’—१ कोरिन्थी १०:१३ पढ्नुहोस्।
‘मागिरह, खोजिरह, घच्घच्याइरह’
१७, १८. ‘मागिरह, खोजिरह र घच्घच्याइरह’ भन्नुको अर्थ के हो?
१७ प्रेरित पावलले सँगी विश्वासीहरूलाई “प्रार्थनामा अटुटसँग लागिरहो” भनी अर्ती दिए। (रोमी १२:१२) येशूले यस्तै कुरा सशक्त ढंगमा भन्नुभयो: “माग [ अर्थात्, “मागिरह,” NW ], तिमीहरूलाई दिइनेछ, खोज [ अर्थात्, “खोजिरह,” NW ], तिमीहरूले भेट्टाउनेछौ, घच्घच्याऊ [ अर्थात्, “घच्घच्याइरह,” NW ] तिमीहरूका निम्ति उघारिनेछ। किनकि जसले माग्दछ, त्यसले पाउँछ, जसले खोज्दछ, त्यसले भेट्टाउँछ। जसले घच्घच्याउँछ, त्यसको निम्ति उघारिनेछ।” (मत्ती ७:७, ८) परमेश्वरको इच्छाबमोजिम छ भने जुनसुकै कुरा ‘मागिरहनु’ उचित हो। येशूका शब्दहरूसित मेल खाने कुरा प्रेरित यूहन्नाले पनि लेखे: “[परमेश्वरमा] भएको हाम्रा हिम्मत यही हो, कि उहाँको इच्छाबमोजिम हामीले उहाँसँग जे कुरा मागे पनि उहाँले हाम्रो बिन्ती सुन्नुहुन्छ।”—१ यूह. ५:१४.
१८ ‘मागिरह र खोजिरह’ भन्ने येशूको सल्लाहको अर्थ हो: हामीले निष्कपटता साथ प्रार्थना गर्नुपर्छ र तुरुन्तै जवाफ पाएन भने हरेस खानु हुँदैन। परमेश्वरको राज्यले ल्याउने आशिष्, लाभ र इनामको आनन्द उठाउन ‘घच्घच्याइरहनु’ पनि आवश्यक छ। तर यहोवाले प्रार्थनाको जवाफ दिनुहुन्छ भनेर के हामी विश्वस्त हुन सक्छौं? हो, यहोवाप्रति विश्वासी छौं भने विश्वस्त हुन सक्छौं किनभने येशूले भन्नुभयो: “जसले माग्दछ, त्यसले पाउँछ, जसले खोज्दछ, त्यसले भेट्टाउँछ। जसले घच्घच्याउँछ, त्यसको निम्ति उघारिनेछ।” यहोवाका सेवकहरूको थुप्रै अनुभवले पुष्टि गर्छ कि यहोवा साँच्चै “प्रार्थना सुन्नुहुने” परमेश्वर हुनुहुन्छ।—भज. ६५:२.
१९, २०. मत्ती ७:९-११ मा लिपिबद्ध येशूका शब्दहरूलाई विचार गर्दा यहोवा कसरी मायालु बुबाजस्तो हुनुहुन्छ?
१९ आफ्नो बालबच्चाको लागि असल कुराको प्रबन्ध गर्ने मायालु पितासित येशूले यहोवालाई तुलना गर्नुभयो। येशूले डाँडाको उपदेश दिनुहुँदा तपाईं त्यहाँ भएको र उहाँले यसो भनेको कल्पना गर्नुहोस्: “तिमीहरूमध्ये कुन मानिस होला, जसको छोराले रोटी माग्दा त्यसलाई ढुङ्गा देला? कि माछा माग्दा त्यसलाई साँप देला यसकारण तिमीहरू दुष्ट भएर आफ्ना छोराछोरीहरूलाई असल चीज दिन जान्दछौ भने, स्वर्गमा हुनुहुने तिमीहरूका पिताले उहाँसित माग्नेहरूलाई कति बढ्ता गरेर असल चीज दिनुहुनेछ।”—मत्ती ७:९-११.
२० जन्मजातै असिद्ध भएकोले मानव बुबा तुलनात्मक हिसाबमा “दुष्ट” हुन्छ। तैपनि आफ्नो सन्तानप्रति तिनमा स्वाभाविक प्रेम हुन्छ। तिनले आफ्नो बच्चालाई बेइमानी गर्दैन तर “असल चीज” दिने प्रयास गर्छ। बुबाले जस्तो प्रेम गर्ने स्वर्गमा हुनुहुने हाम्रा मायालु पिताले हामीलाई “असल चीज” दिनुहुन्छ। जस्तै: पवित्र आत्मा। (लूका ११:१३) यसले हामीलाई “हरेक असल दान र हरेक उत्तम वरदान”-का प्रबन्धक यहोवालाई स्वीकारयोग्य सेवा चढाउन अझै बल प्रदान गर्छ।—याकू. १:१७.
उहाँका उपदेशहरूबाट लाभ उठाउन नछोड्नुहोस्
२१, २२. डाँडाको उपदेश कसरी उल्लेखनीय छ र येशूका उपदेशहरू तपाईंलाई कस्तो लाग्छ?
२१ डाँडाको उपदेश जस्तो विशिष्ट भाषण पृथ्वीमा अहिलेसम्म दिइएको छैन। यो, यसको आध्यात्मिक विषयवस्तु र सुस्पष्टताको लागि उल्लेखनीय छ। यसका सल्लाह व्यवहारमा उताऱ्यौं भने निश्चय नै धेरै लाभ उठाउन सक्नेछौं भनी यी तीन लेखमा छलफल गरिएका बुँदाहरूबाट स्पष्ट हुन्छ। येशूका यी उपदेशहरूले अहिले हाम्रो जीवनस्तर उकास्नुका साथै आनन्दित भविष्यको आशा दिन्छ।
२२ हामीले यी लेखहरूमा डाँडाको उपदेशमा पाइने केही आध्यात्मिक रत्नहरू मात्र केलाएर हेऱ्यौं। उहाँको भाषण सुन्नेहरू “उहाँका शिक्षाले छक्क परे” भन्दा अचम्म मान्नुपर्दैन। (मत्ती ७:२८) महान् शिक्षक येशू ख्रीष्टका यी र अन्य अमूल्य शिक्षाले हाम्रो मनमस्तिष्क भर्दा हाम्रो पनि प्रतिक्रिया त्यस्तै हुनेछ। (w 09 2/15)
तपाईंको जवाफ?
• कपटले भरिएको प्रार्थनाबारे येशूले के भन्नुभयो?
• प्रार्थनामा उही कुरा दोहोऱ्याइ तेहऱ्याइ भन्नदेखि हामी किन जोगिनुपर्छ?
• येशूको नमुना प्रार्थनामा कस्ता बिन्तीहरू छन्?
• हामी कसरी ‘मागिरहन, खोजिरहन र घच्घच्याइरन’ सक्छौं?
[पृष्ठ ..-मा भएको चित्र]
अरूले देखोस् र सुनोस् भनेर प्रार्थना गर्ने कपटीहरूको येशूले निन्दा गर्नुभयो