१०. (क) ईसापूर्व १५१३ को नीसान महिनामा यहोवाले इस्राएलीहरूलाई कस्तो निर्देशन दिनुभयो? (ख) मोशाले किन यहोवाको निर्देशन पालन गरे?

^१० ईसापूर्व १५१३ को नीसान महिनामा यहोवाले मोशा र हारूनलाई इस्राएलीहरूकहाँ गएर यसो भन्‍न लगाउनुभयो: एउटा स्वस्थ थुमा वा बाख्रा छानेर त्यसलाई मार्नू अनि त्यसको रगत ढोकाको चौकोसको खामाहरूमा लगाउनू। (प्रस्थ. १२:३-७) मोशाले के गरे? तिनीबारे प्रेषित पावलले यस्तो लेखे: “विश्‍वासैले गर्दा तिनले निस्तार-चाड मनाएका थिए अनि रगत छ्यापेका थिए, ताकि नाश गर्नेले इस्राएलीहरूका जेठो सन्तानलाई हात नलगाओस्‌।” (हिब्रू ११:२८) यहोवाका प्रतिज्ञाहरू पूरा हुनेछन्‌ भनेर मोशालाई थाह थियो। मिश्रका सबै जेठो सन्तान मर्नेछन्‌ भन्‍ने यहोवाको प्रतिज्ञामा पनि तिनी विश्‍वास गर्थे।

११. मोशाले किन अरूलाई चेतावनी दिए?

^११ मोशाका छोराहरू मिद्यानमा भएकोले उनीहरू सुरक्षित थिए (प्रस्थ. १८:१-६) तैपनि मोशाले यहोवाको आज्ञा माने र जेठो सन्तानको ज्यान खतरामा परेका अरू इस्राएली परिवारकहाँ यहोवाको सन्देश पुऱ्‍याए। किनकि तिनी सँगी मानवलाई प्रेम गर्थे। “नाश गर्ने”-को हातबाट इस्राएलीहरूका जेठो सन्तानलाई बचाउन मोशाले तुरुन्तै “इस्राएलका सबै बूढाप्रधानहरूलाई बोलाउन पठाएर तिनीहरूलाई भने, . . . ‘निस्तारको बलिको निम्ति मार।’”—प्रस्थ. १२:२१.a

१२. यहोवाले हामीलाई कस्तो सन्देश घोषणा गर्न अह्राउनुभएको छ?

^१२ स्वर्गदूतहरूको डोऱ्‍याइमा यहोवाका सेवकहरूले यो महत्त्वपूर्ण सन्देश घोषणा गरिरहेका छन्‌: “परमेश्‍वरसित डराओ र उहाँलाई महिमा देओ, किनकि उहाँले न्याय गर्ने समय आइपुगेको छ। त्यसैले उहाँको उपासना गर, जसले आकाश, पृथ्वी, समुद्र र पानीका मुहानहरू बनाउनुभयो।” (प्रका. १४:७) यो सन्देश प्रचार गर्ने समय अहिल्यै हो। हामीले आफ्ना छिमेकीहरूलाई झूटो धर्मबाट निस्कन चेतावनी दिनै पर्छ। यसो गर्दा उनीहरूले “त्यसमाथि आइपर्ने विपत्तिहरू भोग्न” पर्नेछैन। (प्रका. १८:४) “अरू भेडा”-को मदत लिएर अभिषिक्‍त ख्रीष्टियनहरूले मानिसहरूलाई “परमेश्‍वरसित मिलाप” गर्न बिन्ती गरिरहेका छन्‌।—यूह. १०:१६; २ कोरि. ५:२०.

१३. सुसमाचार प्रचार गर्ने इच्छा अझ प्रबल बनाउन के गर्नुपर्छ?

^१३ “न्याय गर्ने समय” आइसकेको छ भनेर हामी विश्‍वस्त छौं। यहोवाले भन्‍नुभएझैं ढिलासुस्ती नगरी प्रचारकार्यमा भाग लिनु महत्त्वपूर्ण छ भनेर पनि हामी विश्‍वस्त छौं। एउटा दर्शनमा प्रेषित यूहन्‍नाले ‘पृथ्वीका चार कुनामा चार वटा स्वर्गदूत उभिरहेको र तिनीहरूले पृथ्वीका चार बतासलाई बलियोसित थामिराखेको’ देखे। (प्रका. ७:१) यी स्वर्गदूतहरू महासङ्‌कष्टको विनाशकारी बतास छोड्‌न तम्तयार भएको के तपाईं विश्‍वासको आँखाले देख्नुहुन्छ? देख्नुहुन्छ भने निर्धक्क भएर सुसमाचार प्रचार गर्न सक्नुहुनेछ।