५. यस आखिरी दिनमा शैतानले कसरी आफ्ना छली प्रयासहरूलाई तीव्र पारेको छ र त्यसले विशेष गरी कसलाई आफ्नो तारो बनाएको छ?

^५ यस आखिरी दिनमा शैतानले आफ्नो प्रयास अझ तीव्र बनाएको छ। त्यो पृथ्वी तलमा फ्याँकिएको छ। त्यसलाई आफ्नो समय अल्प छ भनी थाह भएकोले त्यो “ठूलो क्रोध[मा]” छ। आफू सँगसँगै सकेसम्म बढी मानिसलाई विनाशमा पुऱ्‍याउन कटिबद्ध भएको कारण त्यसले ‘सारा संसारलाई ठगिरहेको छ।’ (प्रकाश १२:९, १२) शैतानले आकलझुकल मात्र छक्याउने गर्दैन। बरु, मानिसहरूलाई बहकाउन त्यो एकनासले लागिरहन्छ।a त्यसले अविश्‍वासीहरूको मन अन्धा तुल्याइदिएर परमेश्‍वरबाट तिनीहरूलाई अलग गर्न आफूसँग भएका सबै छली तरिकाहरू चलाउँछ र यी तरिकाहरूमध्ये भ्रम तथा विश्‍वासघात पनि एक हो। (२ कोरिन्थी ४:४) त्यो छक्याउनमा खप्पिस, विशेष गरी “आत्मा र सत्यतामा” परमेश्‍वरको उपासना गर्नेहरूलाई निल्न तल्लीन छ। (यूहन्‍ना ४:२४; १ पत्रुस ५:८) वास्तवमा शैतानले यस्तो दाबी गरेको छ भनेर कहिल्यै नबिर्सनुहोस्‌: ‘मैले जो कोहीलाई पनि परमेश्‍वरबाट अलग गर्न सक्छु।’ (अय्यूब १:९-१२) शैतानका छलपूर्ण “युक्‍तिहरू” र त्यस विरुद्ध कसरी सावधान रहने भन्‍नेबारे आउनुहोस्‌ हामी विचार गरौं।—एफिसी ६:११.