“पृथ्वीले आफ्नो उब्जनी दिनेछ; परमेश्वरले, हो, हाम्रा परमेश्वरले हामीलाई आशिष् दिनुहुनेछ।”—भजन ६७:६.
सृष्टिकर्ताबाट सधैँभरि आशिष् पाउन सक्नुहुन्छ
ईश्वरले भविष्यवक्ता अब्राहामलाई तिनको एक जना सन्तानमार्फत “पृथ्वीका सबै जातिले” आशिष् पाउनेछन् भनी प्रतिज्ञा गर्नुभयो। (उत्पत्ति २२:१८) ती सन्तान को हुने थिए?
लगभग २,००० वर्षअघि ईश्वरले अब्राहामको सन्तान येसुलाई अद्भुत चमत्कार गर्ने शक्ति दिनुभयो। ती चमत्कारहरूले जातिजातिका मानिसहरूले येसुद्वारा अब्राहामसित प्रतिज्ञा गरिएको आशिष् पाउनेछन् भनेर सङ्केत गऱ्यो।—गलाती ३:१४.
येसुले गर्नुभएको चमत्कारहरूले ईश्वरले मानिसजातिलाई आशिष् दिन रोज्नुभएको व्यक्ति उहाँ नै हुनुहुन्छ भनेर चिनायो। साथै ती चमत्कारहरूले ईश्वरले कसरी येसुमार्फत मानिसजातिलाई सधैँभरि आशिष् दिनुहुनेछ भनेर देखायो। येसुका चमत्कारहरूले कसरी उहाँका मनमोहक गुणहरू दर्साउँछ, विचार गरौँ।
कोमलता—येसुले बिरामीहरूलाई निको पार्नुभयो।
एकपटक कुष्ठरोग लागेको एक मानिसले आफूलाई निको पारिदिन येसुलाई बिन्ती गऱ्यो। येसुले उसलाई छुनुभयो र भन्नुभयो: “म इच्छा गर्छु।” त्यसपछि उसको कुष्ठरोग तुरुन्तै हरायो।—मर्कुस १:४०-४२.
उदारता—येसुले भोकाहरूलाई खुवाउनुभयो।
येसुले मानिसहरूलाई भोकै पठाउन चाहनुभएन। उहाँले कम्तीमा दुई पटक चमत्कार गरेर केही रोटी र माछालाई धेरै बनाउनुभयो अनि हजारौँ मानिसलाई खुवाउनुभयो। (मत्ति १४:१७-२१; १५:३२-३८) सबैले अघाउन्जेल खाए र प्रशस्त खानेकुरा उब्रियो।
दया—येसुले मृतकहरूलाई ब्युँताउनुभयो।
येसु शोकमा डुबेकी र कुनै सहारा नभएकी विधवालाई देखेर “टिठाउनुभयो” र तिनको एक मात्र मृत छोरालाई ब्युँताउनुभयो।—लुका ७:१२-१५.