Ontopolwa 12
Ou Na Sha nOmpata Yi Na Oshilonga
1, 2. (a) Omolwashike omikalo dhonkalamwenyo yoye tadhi ti sha shili kungoye? (b) Okoolye ishewe tadhi ti sha, nomolwashike?
OMIKALO dhonkalamwenyo yoye otadhi ti sha shili. Otadhi utha ngele onakuyiwa yoye otayi kala elago nenge oshiponga. Hugunina otadhi utha ngele oto hulu po pamwe nuuyuni mbuka nenge oto ka hupa mehulilo lyawo sigo tuu omuuyuni waKalunga uupe wuuyuki moka to vulu oku ka kala sigo aluhe.—1 Johannes 2:17; 2 Petrus 3:13.
2 Ihe omikalo dhonkalamwenyo yoye hangoye owala tadhi gumu. Yamwe oya kwatelwa mo mwaashoka. Shoka to ningi, otashi ya gumu wo. Pashiholelwa, ngele aakuluntu yoye natango oye na omwenyo, shoka to ningi otashi ya etele esimano nenge tashi ya sitha ohoni. Ombimbeli otayi ti: “Omuna omunandunge ha nyanyudha he, omuna egoya oluhodhi lwayina.” (Omayeletumbulo 10:1) Oshinima ishewe oshinene, omikalo dhonkalamwenyo yoye otadhi gumu wo Jehova Kalunga. Otadhi vulu oku mu nyanyudha nenge oku mu yemateka. Omolwashike? Omolwompata yi na oshilonga ndjoka ngoye u na sha nayo.
AANTU OTAA KALA TUU AADHIGININI KUKALUNGA?
3. Eshongo lyashike Satana a ningi kuJehova?
3 Ompata ndjika oya tukuluthwa kuSatana Ondiaboli. Okwe yi tukulutha sho ye a pondola Adam naEva okuteya ompango yaKalunga nomwaashono ya ye pamwe naye moshipotha she shuunandumbo naKalunga. (Genesis 3:1-6) Mwaashono Satana okwa li a dhiladhila kutya ye oku na omatompelo okugandja eshongo kuJehova: ‘Aantu otaye ku longele mwaashono ho ya pe. Pe ndje owala ethimbo opo ngame tandi ki itekitha po ayehe mungoye.’ Nonando oohapu ndhika itadhi monika naanaa ngawo mOmbimbeli, osha yela kutya Satana okwa popi sha faathana naashono kuKalunga. Shika otashi monika mEmbombimbeli lyaJob.
4, 5. (a) Olye a li Job? (b) Oshike sha ningwa po megulu pethimbo lyaJob?
4 Job okwa li omulumentu a li ko oomvula omayuvi ogendji dha piti po konima yoshipotha muEden. Ye okwa li omupiya omuyuki nomudhiginini gwaKalunga. Ihe osha li tuu tashi ti sha shili kuKalunga nenge kuSatana sho Job a li omudhiginini? Ombimbeli otayi holola kutya osho. Yo otayi tu hokololele eholoko lyaSatana koshipala shaJehova muuwa womegulu. Ndhindhilika kwaashono yo ya li taa popi:
5 “Esiku limwe aana yaKalunga ye ya po okuholokela koshipala shOmuwa, naSatana ye endele pamwe nayo. Omuwa okwa pula Satana: Oto zilile peni? Satana ya yamukula Omuwa ya ti: Ote zilile kokuyanga kombanda yevi noku li endagula. Omuwa okwa pula Satana: Ongoye owa koneke omuntu gwandje Job? Oshoka kombanda yevi kaku na omuntu e thike puye, kee na nando oombudhi, omuyuuki, onakutila Kalunga nonakutonda uuwinayi.”—Job 1:6-8.
6. PaMbimbeli, ompata yini po ya li po pethimbo lyaJob?
6 Omolwashike Jehova a ti kuSatana kutya Job oye omulumentu omuyuki? Opwa li lela ompata moshinima shoka ngele Job ota kala a dhiginina muJehova nenge hasho. Dhiladhila kepulo lyaKalunga, “Oto zilile peni?” nokeyamukulo lyaSatana, “Ote zilile kokuyanga kombanda yevi noku li endagula.” Epulo ndika neyamukulo lyaSatana olya holola kutya Jehova okwe ethele Satana ompito a landule eshongo lye kutya ye ota vulu okwiitekitha kehe tuu gumwe muKalunga. Ano eyamukulo lyaSatana kepulo lyaJehova molwuudhiginini waJob olya li shike?
7, 8. (a) Etompelo lyaSatana olini po mwaashono Job a longele Kalunga? (b) Jehova oshike a ningi okuhulitha po ompata?
7 “Satana ya yamukula Omuwa ya ti: U shi, Job ha tila Kalunga owala? Hangoye mwene we mu umbile enkolo, oye mwene, egumbo lye noshaa shoka e shi na, iilonga yiikaha ye ongoye we yi yambeke, iimuna ye ya taandele noshilongo. U tsile ko oshikaha shoye, ngu u gume ko shaa shoka e shi na, oye note ku [tuku] shili montaneho yoye.”—Job 1:9-11, faathanitha NW.
8 Meyamukulo lye, Satana okwa gandja omatompelo giifundja molwuudhiginini waJob kuKalunga. ‘Job ote ku longele owala molwiinima mbyoka we mu pa, hamolwashono e ku hole,’ osho Satana a tsu ompata. Satana okwa nyenyeta wo kutya Jehova okwa longitha oonkondo dhe oonene pamukalo inaagu uka. ‘Owe mu gamene aluhe,’ ye osho a ti. Ano okuhulitha po ompata, Jehova okwa yamukula: “Tala, shaa shoka e shi na, omiikaha yoye, ngoye ino mu guma ye mwene!”—Job 1:12.
9. Uudhigu uni po Satana e etele Job, nonoshilanduliko shini po?
9 Mbala Satana okwa li a tameke okweetela Job uudhigu. Ye okwa dhipagitha po uusita auhe wiimuna yaJob nenge e yi yakitha po. Opo nduno a dhipagitha po aanona 10 yaJob. Konyala Job okwa li a kanitha ashihe, ihe ye okwa kala a dhiginina muJehova. Ye ina tuka Kalunga. (Job 1:2, 13-22) Ihe shika kasha li ehulilo lyoshinima.
10. Oshike tashi holola kutya Satana ine etha po owala ngeya olugodhi?
10 Satana okwa holoka ishewe koshipala shaJehova pamwe naayengeli yamwe. Natango tuu Jehova okwa pula Satana ngele a mono uudhiginini waJob, nokwa ti: “Nonatango a hokwa po [uudhiginini].” Opo nduno Satana a yamukula: “Oshipa omoshipa. Omuntu shaa shoka e shi na, ote shi gandjele omwenyo gwe. Tsa oshikaha shoye, ngu u gume ko omasipa ge nontumba ye, ye note ku [tuku] shili montaneho yoye.”—Job 2:1-5, faathanitha NW.
11. (a) Omamakelo geni po ishewe Satana e etele Job? (b) Oshizemo osha li shike?
11 Onkee ano Jehova okwa pitikile Satana a ningile Job ngaashi ye a hala, kakele kaashono Kalunga a ti: ‘Ino mu dhipaga.’ (Job 2:6) Opo nduno Satana e etele Job omukithi omwiinayinayi. Eehamo lyaJob olya li enene, onkee okwa galikana kuKalunga a se. (Job 2:7; 14:13, 14) Omukiintu gwe mwene okwe mu pilukile e ta ti: “Tuka Kalunga ngu u se!” (Job 2:9, NW) Ihe Job okwa tindi oku shi ninga. “Sigo okusa kwandje itaandi ekelele [uudhiginini] wandje,” osho ye a ti. (Job 27:5, faathanitha NW.) Job okwa kala a dhiginina muKalunga. Ano osha li euliko kutya Satana okwa li a puka meshongo lye kutya Job ota longele Kalunga molweliko owala lyiinima, itashi zi mohole. Osha hololwa wo kutya Satana ina vula okwiitekitha ayehe muKalunga.
12. (a) Job okwa gandja eyamukulo lini po kuKalunga keshongo lyaSatana? (b) Uudhiginini waJesus kuKalunga owu ulike shike?
12 Oto dhiladhila kutya ondjila yuudhiginini waJob oyu uvitha Jehova ngiini? Oye mu nyanyudha unene! Oohapu dhaKalunga otadhi tu kumagidha: “Kala u na oondunge, omumwandje, nokunyanyudha omutima gwandje, opo ihe tandi vulu okuyamukula ongoka ta lundile ndje.” (Omayeletumbulo 27:11, NW) Satana oye ngoka ta lundile Jehova. Nomondjila yuudhiginini we Job okwa nyanyudha omutima gwaKalunga. Yo oya li eyamukulo lyaKalunga kelundilo nenge keshongo lyeitadho lyaSatana kutya aantu itaye ke Mu longela momamakelo. Oyendji yamwe oya gandja wo eyamukulo kuKalunga pamukalo gwa faathana. Oshiholelwa oshinene oJesus, omulumentu ngoka a li a gwanenena. Ye okwa kala a kakatela uudhiginini we kuKalunga nonando Satana a kala noku mu etela omamakelo nomayeleko. Shika oshu ulike kutya Adam ngoka a li omulumentu a gwanenena po okwa li wo ta vulu oku shi ninga ando okwa li a hala, nonokutya Kalunga ina kala nando kee shi omuyuki sho a li a tegelela evuliko lyolela komuntu.
OWA GAMA PENI?
13. (a) Omikalo dhonkalamwenyo yoye odhi na sha ngiini nompata? (b) Ongiini tatu vulu okunyanyudha Kalunga nenge oku mu nikitha uuthigwa?
13 Ongiini kombinga yonkalamwenyo yoye? Ngiika oto dhiladhila kutya itashi ti sha shili nkene u li. Ihe otashi ti sha. U shi shi nenge waa shi shi, otashi ambidhidha ompata kombinga yaKalunga nenge yaSatana. Jehova oku na ko nasha nangoye, nokwa hala okumona to mu longele nokukala sigo aluhe meviparadisa. (Johannes 3:16) Sho Aaisrael ya tukulile Kalunga oshipotha, yo oye mu nikitha uuthigwa nenge ye mu ningitha omwenyo omwiinayi. (Epsalmi 78:40, 41) Omikalo dhonkalamwenyo yoye otadhi nyanyudha tuu Kalunga nenge otadhi mu nikitha uuthigwa? Nokuli opo u nyanyudhe Kalunga, u na okwiilonga u tseye iipango ye nokuvulika kuyo.
14. (a) Iipango yini po yi li po molwoluhondelo tu na okuvulika kuyo opo tu nyanyudhe Kalunga? (b) Omolwashike eteyo lyiipango mbyoka li li eyono?
14 Elalakano limwe enene lyaSatana olyo okupukitha aantu ya teye iipango yaKalunga mekwatathano nelongitho lyoonkondo dhawo dhokumona oluvalo, yondjokana noyuunegumbo. Iipango yaKalunga mbyoka ya gandjwa okugamena elago lyetu, otayi ti kutya aantu mboka inaa hokana kaye na okulalathana, kutya aantu ye na owala okulalathana nookuume kawo yomondjokana. (1 Aatessalonika 4:3-8; Aaheberi 13:4) Ngele pwa teywa ompango yaKalunga, olundji aanona ohaa valwa noyaa na aakuluntu mboka ye ya hole nenge inaaye ya hala. Nooyina ohayi ikutha omala ya dhipage aanona omanga inaaya valwa. Kakele kaashono, aahondeli oyendji otaa kwatwa komikithi omiiwinayi dhomoluhondelo ndhoka hadhi yono po aanona mboka taa ka valwa ko. Osho oshilonga shokwaanuudhiginini, eyono kuKalunga, okulala nagumwe ngoka inoo hokana naye. Job okwa ti: “Omwenyo gwandje, ando wa pumpilile omukiintu gwomukwetu, ongame nonda langele ando pomweelo gwomukwetu, . . . osho ando oshilonga shiihuna okuyona kwokugeyelwa.”—Job 31:1, 9, 11.
15. (a) Ngele tatu igandja moluhondelo, olye tatu opalele? (b) Omolwashike shi li ondungelela okuvulika kiipango yaKalunga?
15 Kashi na oku tu kumitha kutya uuyuni mbuka tau pangelwa kOndiaboli, ohau ningi sha fa shu uka nosho opala momeho goye u lale nagumwe ngoka inoo hokana naye. Ihe ngele to shi ningi, oto opalele lye? OSatana, haJehova. Opo u nyanyudhe Jehova, u na oku‘za oluhondelo ontuku.’ (1 Aakorinto 6:18) Dhoshili, haaluhe oshipu okukala wa dhiginina kuKalunga. NokuJob kasha li oshipu. Ihe dhimbulukwa, osho ondungelela okuvulika kiipango yaKalunga. Oto kala nelago ngashingeyi ngele to shi ningi. Ihe shoka sha simana unene osho kutya oto ka ambidhidha ombinga yaKalunga mompata noto ke mu nyanyudha. Noye ote ke ku laleka nuuyamba nomwenyo gwaaluhe melago kombanda yevi.
16. (a) Ongiini Job a lalekwa nuuyamba molwuudhiginini we? (b) Oshike tashi vulu okutiwa kombinga yeyonagulo lyaSatana, ngaashi edhipago lyaanona 10 yaJob?
16 Dhoshili, Satana okwa li e etele Job oluhepo olunene noye e eta eso lyaanona 10 yaJob. Kapu na omalimbililo nando mwaashono kutya Job okwa li a kanitha oshindji unene shili. Ihe sho Job a kala a dhiginina, Kalunga okwe mu laleke nuuyamba moku mu pa lwaali yi vule mbiya a li e na tango omanga Satana inaa pitikilwa oku mu makela. Niishewe, Job okwa ka valelwa natango aanona 10. (Job 42:10-17) Kombanda yaashono, otatu vulu okukala nuushili kutya aanona 10 yaJob mboka ya dhipagwa po kuSatana, otaa ka galulilwa omwenyo meyumuko. Dhoshili, kape na eehamo nenge uudhigu mboka wa pitikilwa Satana e u ete mboka Tate yetu omunahole, Jehova, ite ke u hulitha po peuthwathimbo lye.
17. Omolwashike omikalo dhonkalamwenyo yetu tadhi ti sha shili?
17 Ano shi kaleka aluhe momadhiladhilo kutya omikalo dhonkalamwenyo yoye otadhi ti sha. Otadhi ti sha unene tuu kuJehova Kalunga nokuSatana Ondiaboli. Shika omolwashono u na sha nompata ngele aantu otaa kala ya dhiginina kuKalunga nenge hasho.
[Picture on page 106]
Job okwa gandja eyamukulo keshongo lyaSatana kutya kapu na ngoka ta ka kala a dhiginina kuKalunga momamakelo
[Picture on page 110]
Okulala nagumwe ngoka inoo hokana naye osho eyono kuKalunga
[Picture on page 111]
Jehova okwa laleke nuuyamba Job molwuudhiginini we noyindji unene yi vule mbiya a li e na tango