Oompwidhuli Aadhipagi!
Satana noompwidhuli oya kala aluhe aakwanyanya noye li oshiponga oshinene. Methimbo lyonale, Satana okwa dhipagele iimuna naapiya yaJob omudhiginini. Opo nduno, okwa dhipaga po aanona yaJob omulongo sho e etitha “oshikungulu shombepo” shoka sha hanagula po egumbo moka ya li. Konima yaashono Satana oku umbu Job “iitumbuka yiihuna yowala okoshithi shompadhi sigo okombanda yomutse.”—Job 1:7-19; 2:7.
Pethimbo lyaJesus, oompwidhuli odha thitike aantu yamwe omawi noku ya tsikitha. (Mateus 9:32, 33; 12:22) Odha hepeke omulumentu gumwe noku mu ninga a kale ti idhengagula ye mwene nomamanya. (Markus 5:5) Odha lilitha wo omumati, dhe mu hata pevi noku “mu mbungambunga.”—Lukas 9:42, OB-1986.
Methimbo lyonale, oompwidhuli odhe etele aantu yamwe omikithi nokumbungambunga yalwe
Nena, Satana noompwidhuli oyo natango aadhipagi kamana kandongo. Dhoshili, iilonga yawo yuuwinayi oyi indjipala okuza sho yu umbwa mo megulu. Omahokololo muuyuni auhe otaga hokolola onyanya yawo. Ohaya hepeke aantu yamwe nomikithi. Ohaya ningile nayi yalwe uusiku, haye yi imbi okukotha nenge ye ya yagumithe oondjodhi oontilithi. Ohaya longitha nayi yalwe pamilalo. Natango ohaya yitha yalwe oompwengu, haye ya dhipaga, nenge yi idhipage yo yene.
Nena, oompwidhuli ohadhi ningi aantu yamwe ya kale aalongithi yoonkondo; ohadhi ningile nayi yalwe uusiku, moku ya yagumitha oondjodhi oontilithi
Lintina, ngoka a kala muSuriname, ota ti kutya ompwidhuli, nenge ombepo ombwinayi, oya dhipaga iilyo 16 yomuukwanegumbo we noya kala noku mu hepeka uule woomvula 18 palutu nopamadhiladhilo. Moku shi mona ye mwene, ye ota yelitha kutya oompwidhuli “ohadhi nyanyukilwa okuhepeka sigo omeso mboka inaaya hala okuhepekwa kudho.”
Ihe Jehova ota vulu okugamena aapiya ye komaponokelo gaSatana.—Omayeletumbulo 18:10.