ONTOPOLWA 2

Ilongekidha opo ondjokana yoye yi ka kale nomupondo

1, 2. (a) Ongiini Jesus a tsu omuthindo nkene okwiilongekidha komeho yethimbo kwa simana? (b) Oshike unene osho shi na okwiilongekidhilwa komeho yethimbo?

OPO omuntu a tunge etungo okwa pumbwa okwiilongekidha nawa. Manga inaa tameka ekankameno oku na okukala e na ehala nosho wo opulana yetungo. Ihe opu na shilwe sha simanenena. Jesus okwa ti: “Ngele ku na gumwe e na edhiladhilo okutunga oshungo, oku na okukuutumba tango, a yalule kutya otayi pula shi thike peni, ye a tale, ngele oku na iimaliwa ya gwana oku yi tunga sigo ya pu.”—Lukas 14:28.

² Shoka hashi ningwa uuna omuntu ta tungu etungo osha faathana nomuntu ngoka a hala okutunga ondjokana yomupondo. Oyendji ohaya ti: “Onda hala okuhokana.” Ihe mbela yangapi hayi ipula naashoka sha kwatelwa mo? Nonando Ombiimbeli otayi popile ondjokana, oya popya wo omashongo ngoka ge li mo. (Omayeletumbulo 18:22; 1 Aakorinto 7:28) Onkee ano, mboka taya dhiladhila okuhokana oya pumbwa okukala ye na etaloko lyolela li na ko nasha nondjokana naashoka sha kwatelwa mo.

3. Omolwashike Ombiimbeli yi li ekwatho li na ongushu kwaambono tayi ilongekidhile ondjokana, notayi tu kwathele tu yamukule omapulo gatatu geni?

³ Ombiimbeli otayi vulu okukwathela. Omayele gayo oga nwethwa mo kOmutotipo gwondjokana, Jehova Kalunga. (Aaefeso 3:14, 15; 2 Timoteus 3:16) Mokulongitha omakotampango ngoka ge li membo ndika lyonale, ihe oge li pethimbo, natu tale nkene taga vulu oku tu kwathela miinima tayi landula: (1) Ongiini omuntu ta vulu okumona kutya okwa gwana okuya mondjokana? (2) Oshike wu na okutala mukuume kopandjokana? na (3) Ongiini okweendelathana taku vulu okukala momukalo gu shi okusimanekwa?

MBELA OWA GWANA OKUYA MONDJOKANA?

4. Iinima yini ya simanenena tayi kwathele ondjokana yi pondole, nomolwashike?

⁴ Okutunga etungo otashi vulika ku kale ku na ondilo, ihe oku li kaleka monkalo yi li nawa ohashi pula wo oshindji. Osha faathana nondjokana. Okuhokana oku li eshongo nale, ihe okukaleka po ekwatathano uule womimvo odhindji nasho oshi na wo okukalekwa momadhiladhilo. Okukaleka po ekwatathano lya tya ngaaka otaku pula shike? Oshinima sha simana osho okudhiginina shoka wu uvaneka nomutima aguhe. Ombiimbeli otayi hokolola ekwatathano lyopandjokana tayi ti: “Omulumentu oku na okuthiga po he nayina e ta kwatathana nomukadhi, oyo notaa ningi onyama yimwe.” (Genesis 2:24) Jesus Kristus okwa yelitha kutya opu na owala etompelo limwe lyopamanyolo ndyoka pakankameno lyalyo omuntu ta vulu okuteya ondjokana nokuhokanununa, netompelo ndyoka olyo “oluhondelo,” sha hala okutya, ngele gumwe okwa lala naangoka kee shi kuume ke kopandjokana. (Mateus 19:9) Ngele to dhiladhila okuya mondjokana, kaleka ekotampango ndika lyopamanyolo momadhiladhilo. Ngele owu wete kutya ito ka kala metsokumwe neuvaneko lyoye, nena ino gwana okuya mondjokana.—Deuteronomium 23:21; Omuuvithi 5:4, 5.

5. Nonando euvaneko lyondjokana ohali tilitha yamwe, omolwashike li na okukala lya lengwa kwaamboka ya hala okuhokana?

⁵ Aantu oyendji ohaya kala ya tila okuhokana molwaashoka oye na okuninga euvaneko lyokudhiginina ondjokana. Omulumentu gumwe omugundjuka okwa hokolola a ti: “Okutseya kutya otu na okukala pamwe onkalamwenyo yetu ayihe onda li ndi uvite nda fa nda ngambekwa nonda mangwa thiluthilu.” Ihe ngele owu hole shili omuntu ngoka wa hala okuhokana, euvaneko ndyoka itali ka kala omutenge. Pehala lyaashono, otali ka kala shi li egameno. Euvaneko ndyoka ohali ningitha aaihokani ya kale ya hala okukala pamwe omathimbo omawanawa nomawinayi nokuyambidhidhathana kutya nduno oshike tashi ka holoka po. Omukriste omuyapostoli Paulus okwa nyola kutya ohole yashili “ohayi idhidhimikile ayihe.” (1 Aakorinto 13:4, 7) Omukiintu gumwe okwa ti: “Euvaneko lyokudhiginina ondjokana olya ningitha ndje ndi kale ndi uvite nda gamenwa. Ondi uvite uugumbo sho twa gana montaneho yaantu kutya otatu ka dhiginina okukala pamwe.”—Omuuvithi 4:9-12.

6. Omolwashike shi li nawa waaha tondokele ondjokana manga wu li omugundjuka unene?

⁶ Opo omuntu a kale metsokumwe neuvaneko ndyoka oku na okukala a koka. Onkee ano, oshi li nawa waaha hokane omanga wu li omugundjuka, sho omahalo gopamilalo haga kala ga hwama noge na oonkondo momuntu nohashi vulika ge mu nwethe mo a ninge etokolo lya puka. Aagundjuka ohaya lunduluka neendelelo sho taya koko. Oyendji mboka haya hokana manga ye li aagundjuka unene ohaye shi mono kutya konima yoomvula oonshona oompumbwe nomahalo gawo nosho wo gookuume kawo ohaga lunduluka. Omayalulo oge shi ulika kutya mboka haya hokana ye li aagundjuka unene, ihaya kala ye na ombili mondjokana nohayi ihenge shi vulithe mboka haya hokana ya koka. Onkee ano, ino tondokela ondjokana. Oshi li pandunge okukala inoo hokana uule wethimbo lyontumba opo wu mone owino oyindji nokukala wa gwana okuya mondjokana. Okutegelela otashi ku pe wo ompito wi itseye nawa, shoka shi li sha simana ngele owa hala ondjokana yoye yi pondole.

ITSEYA TANGO

7. Omolwashike mboka taya dhiladhila okuhokana ye na okwiikonakona tango?

⁷ Mbela oho shi mono oshipu okudhiladhila komaukwatya ngoka wa hala kuume koye kopandjokana komonakuyiwa a kale e na? Oyendji ohaye shi mono oshipu. Ihe ongiini kombinga yomaukwatya goye mwene? Mbela omaukwatya geni wu na ngoka taga ningitha ondjokana yeni yi kale yomupondo? Oto ka kala omusamane nenge omukulukadhi a tya ngiini? Pashiholelwa, mbela oho zimine omapuko goye noho taamba ko omapukululo nenge oho kala aluhe twi ipopile uuna to pukululwa? Mbela owu li omunyanyukwi nowu na omukumo nenge oho teka omukumo mbala nowu hole okunyenyeta? (Omayeletumbulo 8:33; 15:15) Dhimbulukwa kutya ondjokana itayi ka lundulula uukwatya woye. Ngele owu na uuntsa, ho geye mbala nenge ho teka omukumo mbala manga inoo hokana, osho owala to kala ngaaka nuuna wa hokana. Molwaashoka oshi li oshidhigu okumona kutya otu na iikala ya tya ngiini, omolwashike itoo pula omuvali gwoye nenge kuume omwiinekelwa e ku lombwele kutya ngoye omuntu wa tya ngiini naampoka wa pumbwa okuninga omalunduluko? Ngele owa mono kutya owa pumbwa okuninga omalunduluko gontumba, ga ninga manga inoo ya mondjokana.

8-10. Ombiimbeli otayi gandja omayele geni ngoka taga kwathele kehe gumwe i ilongekidhile ondjokana?

⁸ Ombiimbeli otayi tu ladhipike tu ethe ombepo ondjapuki yaKalunga yi imike mutse omaukwatya ngaashi “ohole, enyanyu, ombili, ontalanteni, uukuume, uuwanawa, uudhiginini, engungumano, eidhidhimiko.” Otayi tu lombwele wo kutya ‘omadhiladhilo getu naga shituluke lela, ga ninge omape’ notu ‘zale omuntu omupe ngoka a shitwa a fa Kalunga nohi iholola ye mwene mokukalamwenyo ku uka nokwa yapuka.’ (Aagalati 5:22, 23, OB-1954; Aaefeso 4:23, 24) Okutula miilonga omayele ngaka manga inoo hokana osha fa owala to pungula iimaliwa yoye kombaanga, sha hala kutya, oshinima shoka sha simana monakuyiwa uuna to ka hokana.

⁹ Pashiholelwa, ngele ngoye omukiintu, ilonga okugandja eitulomo ‘keopalo lyomeni’ pehala lyokugandja eitulomo keholokopo lyokombanda. (1 Petrus 3:3, 4) Eifupipiko nosho wo omadhiladhilo omawanawa otayi ke ku kwathela wu kale wu na uunongo mboka wu li “oshishani hashi adhima” shili. (Omayeletumbulo 4:9; 31:10, 30; 1 Timoteus 2:9, 10) Ngele ngoye omulumentu, ilonga okuungaunga naakiintu nawa nonesimaneko. (1 Timoteus 5:1, 2) Sho to ilongo okuninga omatokolo nokukala noshinakugwanithwa, ilonga wo okukala wa ngungumana nomwiifupipiki. Iikala yokutya “ongame te ti” otayi eta uupyakadhi mondjokana.—Omayeletumbulo 29:23; Mika 6:8; Aaefeso 5:28, 29.

¹⁰ Aakriste ayehe oye na okulundulula omadhiladhilo gawo, nonando kashi li oshinima oshipu. Ngele otaye shi ningi, otashi ke ya kwathela ya kale ookuume kopandjokana ye li nawa.

SHOKA WU NA OKUTALA MUUKUUME KOPANDJOKANA

11, 12. Ongiini aantu yaali taya vulu okumona ngele oyo opalelathana nenge hasho?

¹¹ Mbela meputuko lyeni omuntu oha kongo ye mwene kuume ke kopandjokana? Ngele osho, owu na okweenda ngiini ngele owa mono gumwe ngoka wa hokwa? Ipula tango: ‘Mbela onda hala ngaa shili okuhokana?’ Oshi li oshiwinayi noonkondo okudhana nomaiyuvo gagumwe moku mu ningitha a kale e na etegameno lyiifundja. (Omayeletumbulo 13:12) Ipula wo to ti: ‘Mbela onda gwana ngaa okuhokana?’ Ngele eyamukulo komapulo agehe ngoka olyo eeno, onkatu ya landula ko oyi ikolelela kwaashoka hashi ningwa meputuko lyeni. Oto vulu okuya komuntu ngoye mwene nenge wu tume ko gumwe nenge wu ninge shoka sha taambiwa ko meputuko lyeni. Ngele owa tindwa, ino kondjitha omuntu e ku itaale. Dhimbulukwa kutya omuntu ngoka naye oku na uuthemba wokuninga etokolo moshinima shoka. Ihe ngele owi itaalwa, oto vulu okukonga oompito tadhi opalele opo mu tseyathane nawa naye. Shoka otashi ku kwathele wu mone ngele oshi li pandunge wu hokane omuntu ngoka. Okushike wu na okutala poompito dha tya ngaaka?

¹² Opo tu yamukule epulo ndyoka, dhiladhila kaantu yaali haya hiki iihikomwa yomusika ya yoolokathana. Otashi vulika kehe gumwe gwomuyo a kale e shi nawa okuhika oshihikomwa she, ihe otashi ka kala ngiini ngele oya pulwa ya hike oshita? Opo ye shi pondole, oya pumbwa elongelokumwe. Osha faathana nangoye nakuume koye. Otashi vulika kehe gumwe a longe nuudhiginini opo a kokeke omaukwatya omawanawa, ihe mbela otaga ka longela ngaa kumwe ngele mwa hokana? Niitya yimwe, mbela omwo opalelathana ngaa?

13. Omolwashike sha nika uusama okukonga gumwe ngoka kee shi gweitaalo lyoye?

¹³ Osha simanenena mu kale meitaalo limwe nokuvulika komakotampango ga faathana. Omuyapostoli Paulus okwa nyola a ti: “Inamu kambadhala okulongela kumwe naamboka kaaye shi ooitaali.” (2 Aakorinto 6:14; 1 Aakorinto 7:39) Okuya mondjokana nagumwe ngoka kee shi omwiitaali olundji ohashi eta okwaahauvathana. Kombinga onkwawo, ngele ayehe yaali ohaya longele Jehova Kalunga oshi li ekankameno lya kola lyoku ka longela kumwe. Jehova okwa hala wu kale wa nyanyukwa nowu kale nekwatathano ewanawa naangoka wa hokana nosho wo naye opo ondjokana yeni yi kale ya fa ongodhi ya yogohwa oondali ndatu.—Omuuvithi 4:12.

14, 15. Mbela okukala mu li meitaalo limwe osho owala tashi eta elongelokumwe mondjokana? Shi yelitha.

¹⁴ Nonando okukala hamu longele Kalunga osha simanenena opo mu kale mwa hangana, omu na wo okutala kiinima yilwe. Opo mu tse kumwe nakuume koye kopandjokana omu na okukala nomalalakano ga faathana. Omu na omalalakano geni? Pashiholelwa, mbela amuhe omwa hala aanona? Monkalamwenyo yeni omwa hala okupititha komeho shike?a (Mateus 6:33) Aaihokani mboka ye shi pondola ohaya kala ookuume kopothingo nohaya nyanyukilwa okukala pamwe. (Omayeletumbulo 17:17) Okukala ye na omalalakano ga faathana ohashi ya kwathele ya tse kumwe. Kashi li oshipu okukaleka po uukuume wopothingo ngele kamu na omalalakano ga faathana, nomondjokana osho wo shi li ngaaka. Nonando ongaaka, ngele kuume koye oku hole omainyanyudho gontumba ngoka ngoye kuu hole, mbela shoka otashi ti kutya kamu na okuhokana? Hasho naanaa. Unene tuu ngele omu na omalalakano ga faathana giinima yimwe ya simanenena monkalamwenyo mbyoka mu hole. Natango, oto vulu okunyanyudha kuume koye mokukala ho kutha ombinga miinima mbyoka e hole.—Iilonga 20:35.

¹⁵ Shoka sha simana unene kashi shi okukala mu na uukwatya wa faathana, ihe pehala lyaashono omu na okukala hamu tivuka opo mu opalelathane. Pehala lyokupula: “Mbela ohatu uvathana ngaa miinima ayihe?” oshi li hwepo okupula to ti: “Otatu ka ninga po shike uuna kaatu uvitathane? Mbela otatu vulu okukundathana twa ngungumana nonesimaneko? Nenge oonkundathana dhetu olundji ohadhi shituka owala oontamanana?” (Aaefeso 4:29, 31) Ngele owa hala okuhokana, takamitha opo waaha hokane omuntu ngoka e na uuntsa noiha pitwa momutse, ye ke na elongelokumwe nenge ngoka ha thiminike noku hole owala iinima tayi ningwa ngaashi a hala.

KONGA UUYELELE KOMEHO YETHIMBO

16, 17. Oshike omulumentu nenge omukiintu e na okutala kusho uuna ta kongo kuume kopandjokana?

¹⁶ Megongalo lyopaKriste, mboka hayi inekelelwa iinakugwanithwa oye na “okukonakonwa tango.” (1 Timoteus 3:10) Nangoye wo oto vulu okutula miilonga ekotampango ndika. Pashiholelwa, omukiintu ota vulu okupula ta ti: “Omulumentu nguka oku na iikala ya tya ngiini? Ookuume ke oolye? Mbela oku na eipangelomwene? Ohu ungaunga ngiini naakokele? Okwa za muukwanegumbo wa tya ngiini? Ohu ungaunga ngiini nawo? Mbela oku hole eliko? Mbela oha longitha nayi iikolitha? Mbela oha tumbu oshinyenu nokufululukila maantu ngele a geya? Iinakugwanithwa yashike e na megongalo nongiini hu ungaunga nayo? Mbela otandi ke mu simaneka ngaa?”—Levitikus 19:32; Omayeletumbulo 22:29; 31:23; Aaefeso 5:3-5, 33; 1 Timoteus 5:8; 6:10; Titus 2:6, 7.

¹⁷ Omulumentu ota vulu okupula ta ti: “Mbela omukiintu nguka oku hole ngaa Kalunga nokwe mu simaneka? Mbela ota vulu ngaa okusila egumbo oshimpwiyu? Yaandjawo otaya ka kala ya tegelela tu ya ningile shike? Mbela omunawino, oha longo nuudhiginini noha tsilike? Mbela oha popi kombinga yashike? Mbela oku na ko nasha ngaa nonkalonawa yayalwe nenge okwi ihole mwene nohi itula miinima yayalwe? Mbela omwiinekelwa? Mbela okwiilongekidha okuvulika nehalo ewanawa kuukwamutse, nenge oku na omanganga noku li omunashipotha?—Omayeletumbulo 31:10-31; Lukas 6:45; Aaefeso 5:22, 23; 1 Timoteus 5:13; 1 Petrus 4:15.

18. Ngele uunkundi wontumba owa holoka pethimbo lyokweendelathana, oshike wu na okudhimbulukwa?

¹⁸ Dhimbulukwa kutya kuume koye naye oluvalo lwaAdam inaalu gwanenena. Kehe gumwe oha ningi omapuko. Onkee ano, oto ka pumbwa oku mu dhimina po ngaashi owala naye e na oku ku dhimina po. (Aaroma 3:23; Jakob 3:2) Natango, otashi vulika a ka hwepopale ngele oku na uunkundi wontumba. Pashiholelwa, pethimbo lyokweendelathana otashi vulika pu holoke okwaahauvathana. Dhimbulukwa kutya naantu mboka ye holathane noya simanekathana ohaya kala kaayu uvitathane omathimbo gamwe. (Yelekanitha Genesis 30:2; Iilonga 15:39.) Otashi vulika mwa pumbwa owala okukala hamu ‘idhidhimikilathana’ nokwiilonga okukandula po omikundu nombili. (Omayeletumbulo 25:28) Mbela ngoye nakuume koye omu na ehalo okulundulula iikala yeni? Mbela oto vulu okwiilonga wu kale ihoo geye mbala? (Omuuvithi 7:9) Okwiilonga okukala ho kandula po uupyakadhi nombili otaku vulu oku ku kwathela wu kale aluhe ho popi oshili nakuume koye uuna mwa hokana.—Aakolossa 3:13.

19. Oshi li pandunge okuninga shike ngele owa limbililwa omuntu ngoka tamu endelathana naye?

¹⁹ Ihe ongiini ngele owa ndhindhilike mukuume koye sha shoka tashi ku limbilike? Oshinima shoka ino shi ipwililikila. Kashi na nduno mbudhi kutya omuntu owu mu hole shi thike peni nenge owa halelela okuhokana, ino ipwililikila omapuko ga kwata miiti. (Omayeletumbulo 22:3; Omuuvithi 2:14) Ngele owu na ekwatathano nagumwe ngoka e ku limbilika, oshi li pandunge wu hulithe po ekwatathano nomuntu ngoka, pehala lyokutsikila sigo mwa hokana.

OKWEENDELATHANA KWENI NAKU KALE KU SHI OKUSIMANEKWA

20. Ongiini eendelathano tali vulu okuningwa momukalo gu shi okusimanekwa?

²⁰ Ongiini to kaleke okweendelathana kweni ku shi okusimanekwa? Tango, shilipaleka kutya otamu ihumbata momukalo omwaanawa. Mbela okwiikwata moonyala, okwiihupita nokwiipapatela kwaantu inaaya hokana okwa talika ko ngiini momudhingoloko gweni? Nonando otashi vulika shi kale sha taambiwa ko, iinima mbyoka oyi na owala okuningwa uuna mu li lela pokuhokana. Takamitha opo okuulukilathana ohole kaaku mu fale meyono nenge moluhondelo nokuli. (Aaefeso 4:18, 19; yelekanitha Ondjimbolela 1:2; 2:6; 8:5, 9, 10.) Molwaashoka omutima ogu na omakoto, amuhe omu na okuyanda okukala mu li one amuke megumbo, moshihauto nenge pehala kehe mpoka tashi vulika shi mu fale meyono. (Jeremia 17:9) Ngele oto ihumbata nawa pethimbo lyeendelathano lyeni, otashi ulike kutya owu na eipangelo nonokutya owa pititha komeho uuwanawa wamukweni. Shoka sha simanenena osho kutya okweendelathana kwa yogoka otaku ka nyanyudha Jehova Kalunga, ngoka a lombwela aapiya ye ya henuke onyata kehe noluhondelo.—Aagalati 5:19-21.

21. Opo eendelathano li kale tali simanekitha, oshike mwa pumbwa okwiilombwela mwa manguluka?

²¹ Oshitiyali, eendelathano tali simanekitha olya kwatela mo okupopya oshili. Sho mu li pokuhokana, omwa pumbwa okwiilombwela iinima yontumba mwa manguluka. Openi tamu ka kala? Mbela amuhe otamu ka longa iilonga yokwiikongela omboloto? Omwa hala aanona? Oshi li nawa wo mu holole iinima yomonakuziwa mbyoka tayi ka guma ondjokana yeni. Moonkundathana dheni otamu vulu okukwatela mo iinima ngaashi oongunga ndhoka wu na, uukolele wopalutu nenge oonkalo dhilwe dha kwata miiti ndhoka wu na. Ngele ngoka tamu ka hokana naye oku na aanona, dhimbulukwa kutya oku na oshinakugwanithwa e shi pewa kuKalunga e ya putudhe. Ngele omwa hokana nena owu na wo okutaamba ko aanona ye. Molwaashoka aantu mboka ye na ombuto yoHIV (AIDS) ihayu ulike omandhindhiliko nziya, inashi puka ngele kuume koye ta pula mu ki ikonakonithe nenge ngele aavali aanahole taya pula mu shi ninge, unene tuu ngele opu na gumwe a li ha hondele nenge a li hi iwendele iingangamithi. Ngele opu na gumwe a monika ombuto, ke na okuthiminika kuume ngoka kee yi na ya tsikile nekwatathano ngele ye okwa hala oku li hulitha po. Oshi li nawa lela komuntu ngoka a li e na onkalamwenyo ya nyata opo e ki ikonakonithe tango manga inaa tameka okweendela gumwe.

DHILADHILENI WO KOMBINGA YONAKUYIWA

22, 23. (a) Ongiini omuntu ta vulu okukala kee na ondjele uuna ta longekidha ohango? (b) Etaloko li li pandjele lini omuntu ta vulu okukala e na uuna ti ilongekidhile ohango nondjokana?

²² Moomwedhi dhahugunina sho ohango yi li pokuthika, amuhe otamu ka kala mwi ipyakidhila unene nokwiilongekidhila ohango. Otashi vulika mu kuthe po iimpwiyu oyindji mokukala mu na ondjele. Ohango yuuzeko otashi vulika yi nyanyudhe aakwanezimo naantu momudhingoloko, ihe otayi vulu okulolodha palutu aafuko niilyo yuukwanegumbo nokumana po iimaliwa yawo. Hamithigululwakalo adhihe dha puka, ihe omu na okukala mwa kotoka kaamu ninge aapika yomikalondjigilile nokaamu kale mu na uutumbendundu, iinima mbyoka tayi vulu oku mu imba mu nyanyukilwe ohango yeni. Nonando aafuko oye na okukala ye na ko nasha nomaiyuvo gayalwe, omufuko gwomumati oye e na okutokola shoka tashi ka ningwa poshituthi.—Johannes 2:9.

²³ Dhimbulukwa kutya ohango ohayi dhana owala esiku limwe omanga ondjokana tayi kala uule wonkalamwenyo yeni ayihe. Kotokela okukala to ipula unene nokuhokana. Pehala lyaashono, pula ewiliko kuJehova Kalunga nokwiilongekidhila onkalamwenyo yondjokana. Ngele to shi ningi, oto ki ilongekidhila ondjokana yomupondo.

[Enyolo lyopevi]

ONGIINI OMAKOTAMPANGO GOMBIIMBELI NGAKA TAGA VULU OKUKWATHELA OMUNTU I ILONGEKIDHILE ONDJOKANA YOMUPONDO?

Aaihokani oye na okukala ya dhiginina euvaneko lyawo.—Genesis 2:24.

Osha simanenena okugandja eitulomo keopalo lyomeni shi vulithe pwaandyoka lyokombanda.—1 Petrus 3:3, 4.

“Inamu kambadhala okulongela kumwe naamboka kaaye shi ooitaali.”—2 Aakorinto 6:14.

Aantu mboka inaaya yogoka pamikalo oyi iteka Kalunga.—Aaefeso 4:18, 19, OB-1954.

[Oshimpungu pepandja 17]

OMITHIGULULWAKALO NAASHOKA OMBIIMBELI TAYI POPI

Iigonda: Miilongo yimwe omumati oku na okugandja ongombe nenge iimaliwa kaavali yomukadhona yi li iigonda. Kapu na shoka sha puka nomithigululwakalo ndhika shampa owala dhi li paveta. (Aaroma 13:1) Ihe uukwanegumbo mboka tawu pewa iigonda kawu na okupula iimaliwa nenge iinima ya pitilila. (Omayeletumbulo 20:21; 1 Aakorinto 6:10) Iigonda mbyoka hayi gandjwa kayi na nando okutalika ko kutya omukulukadhi okwa landwa, nomulumentu ke na okukala ta dhiladhila kutya oshinakugwanithwa she owala okuyambidhidha omukulukadhi gwe naapambele ye painiwe.

Okuhokana ombanda: Omaputuko gamwe oga pitika omulumentu a kale naakulukadhi ye vulithe pugumwe. Momaputuko ngoka omulumentu ohi iningi kayamukulwa pehala lyokukala omusamane nosho wo tate omunambili. Natango, okuhokana ombanda ohaku hwahwameke ombepo yethigathanopo mokati kaakulukadhi. Ombiimbeli oya pitika owala Omukriste a kale inaa hokana nenge a kale e na owala kuume kopandjokana gumwe.—1 Aakorinto 7:2.

Okwooteka: Aantu oyendji ohaya ti kutya okukala pamwe manga inaaya hokana otashi ya kwathele ya mone ngele otayo opalelathana. Ihe okwooteka itaku ti nando kutya aantu otaya ka kala aadhiginini keuvaneko lyawo lyondjokana. Ondjokana oyo owala tayi vulu okugamena aaihokani naanona mboka taya ka valwa. Okwooteka oku li oluhondelo momeho gaJehova Kalunga.—1 Aakorinto 6:18; Aahebeli 13:4.

Etaloko lyoye lyokutala ko kuume koye kopandjokana: Pamithigululwakalo dhimwe, omusamane ke shi omukwawo gwomukulukadhi gwe. Omusamane ohashi vulika a tale ko omukulukadhi gwe ongomupika nokukala ta gandja eitulomo kaakwawo shi vulithe komukulukadhi gwe. Kombinga onkwawo, omukulukadhi otashi vulika a kale a tala ko omusamane gwe e li owala gwoku mu valela aanona. Omataloko ngaka otaga kondjithathana nomakotampango gOmbiimbeli. Ombiimbeli otayi ti kutya aaihokani oye li “omuntu gumwe.” Omulumentu oku na okukala e hole omukulukadhi gwe shi vulithe aakwawo, nokuli shi vulithe aavali ye. (Markus 10:7, 8) Omukulukadhi oku na wo okuninga sha faathana. Kehe gumwe oku na okutala ko kuume ke kopandjokana ngaashi onyama ye mwene noku li omukwawo lela. Yalwe otashi vulika ye ya popile muuwinayi taya ti kutya omukulukadhi oku na sho a ninga omusamane gwe. Ihe oshi li nawa okunyanyudha Jehova, Omutotipo gwondjokana, pehala lyokunyanyudha yalwe.—Omayeletumbulo 29:25.

[Omathano pepandja 19]

Manga inoo hokana, kambadhala wu kale wu na uukwatya, iikala nosho wo uunkulungu mboka tawu ke ku kwathela mondjokana