ONTOPOLWA 4
Ongiini to vulu okusila uukwanegumbo woye oshimpwiyu?
1. Omolwashike shi li oshidhigu okusila uukwanegumbo oshimpwiyu kunena?
IINIMA oyindji otayi ende tayi lunduluka, unene tuu onkalamwenyo yuukwanegumbo. Shoka sha li sha taambiwa ko nenge shi li pamuthigululwakalo oomvula 40 nenge 50 dha pita olundji inashi halika we kunena. Omolwoshinima shoka, okusila uukwanegumbo oshimpwiyu osha ninga oshidhigu noonkondo. Ihe ngele oto pulakene komayele ngoka ge li mOmanyolo oto ka sinda uupyakadhi mboka.
GWANENWA KIIYEMO YOYE
2. Oonkalo dhopamahupilo dhini hadhi eta uupyakadhi muukwanegumbo?
2 Kunena aantu oyendji inaya hala onkalamwenyo ya nathangwa, ihe oya hala ndjoka yuuzeko. Molwaashoka oongeshefa kunena otadhi nduluka iilongomwa oyindji nokulongitha omatseyitho momukalo gokuheka oshigwana, ootate noomeme omamiliyona ohaya longo oowili odhindji opo ya vule okulanda iinima mbyoka. Aantu yalwe omamiliyona otaya kondjo opo ya vule okupalutha omaukwanegumbo gawo. Ohaya longo olutaima notashi vulika ya kale ye na iilonga yopaali opo ya vule okufuta iipumbiwa yawo. Ihe yalwe oya pandula owala okukala ye na iilonga, molwaashoka kunena iilonga oya pumba muuyuni auhe. Eeno, onkalamwenyo kayi shi aluhe ompu komaukwanegumbo kunena, ihe omakotampango gOmbiimbeli otaga vulu oku ga kwathela ge shi pondole.
3. Ekotampango lini omuyapostoli Paulus a yelitha, nongiini oku li tula miilonga taku vulu okukwathela omuntu a sile oshimpwiyu uukwanegumbo we?
3 Omuyapostoli Paulus naye okwa li a mono uudhigu pamahupilo. Ihe okwa li i ilongo oshilongwa sha simana mokuungaunga nawo, shoka a li a yelitha montumwafo ndjoka a nyolele kuume ke Timoteus. Paulus okwa nyola a ti: “Muuyuni itatu ya mo nando onasha, nosho wo itatu vulu okuza mo nasha. Onkee ano natu kale twa gwana, ngele otu na iikulya nomizalo.” (1 Timoteus 6:7, 8) Odhoshili kutya uukwanegumbo inawu pumbwa owala iikulya nomizalo. Owa pumbwa wo ehala lyokukala. Aanona oye na okuya kosikola. Owa pumbwa wo okukala wu na iimaliwa yokufuta oshipangelo ngele gumwe te ehama nosho wo oofuto dhilwe. Ihe nonando ongaaka, ekotampango lyoohapu dhaPaulus otali vulu okutulwa miilonga. Onkalamwenyo yetu otayi ka kala yi li hwepo ngele otwa gwanenwa kwaashono twa pumbwa, pehala lyokulalakanena shoka twa hala.
4, 5. Ongiini okudhiladhila komeho yethimbo nokuninga omutengenekwathaneko taku vulu okukwathela uukwanegumbo wu longithe nawa iiniwe yawo?
4 Uuna tashi ya piinima yopamaliko, aaihokani oye na okudhimbulukwa kutya yo “omuntu gumwe.” (Aaefeso 5:31) Oye na wo okukala ye shi shi kutya oshinakugwanithwa shawo sha simanenena okusila oshimpwiyu uukwanegumbo wawo. (1 Timoteus 5:8) Onkee ano, aaihokani oye na okutula kumwe eliko lyawo opo ya sile oshimpwiyu uukwanegumbo wawo. Shika osha kwatela mo okuninga omutengenekwathaneko gwiimaliwa opo ya longithe nawa iiniwe mbyoka ye na. Uuna ya hupitha po okamaliwa kontumba konima yokulanda iipumbiwa yawo otaya vulu okutokola ngele otaya ka kwathela aakwanezimo. Kungawo uukwanegumbo otawu ka vula okulongitha iimaliwa yawo nawa, otawu ka vula okulanda iipumbiwa yawo yesiku nesiku noitawu ka lya oondjo inaashi pumbiwa.—Lukas 14:28.
5 Miilongo yimwe omutengenekwathaneko gwa tya ngaaka ogwa kwatela mo wo mwaaha lye omukuli ngoka tagu pula iihohela oyindji mu ka lande iinima kaayi na oshilonga. Shika osha kwatela mo wo okungambeka uukalata wokukutha iinima moondjo. (Omayeletumbulo 22:7) Osha kwatela mo wo okulanda iinima kaposi kaalela nopwaahe na okutala kiilanduliko. Okuninga omutengenekwathaneko otaku ka kwathela wo opo iimaliwa kaayi longithwe nayi mokundombola, okuhila omakaya nokunwa sha pitilila mbyoka yi li hayi hanagula po eliko lyuukwanegumbo notashi tsu ondumbo nomakotampango gOmbiimbeli.—Omayeletumbulo 23:20, 21, 29-35; Aaroma 6:19; Aaefeso 5:3-5.
6. Ooshili dhopamanyolo dhini hadhi kwathele mboka ye li moluhepo?
6 Ihe ongiini kombinga yaamboka ye li moluhepo? Otaya vulu okuhekelekwa ngele oya tseya kutya omaupyakadhi guuyuni mbuka ogopokathimbo owala. Muuyuni uupe mboka wu li popepi, Jehova ota ka hulitha po oluhepo nosho wo iinima ayihe mbyoka tayi hepeke aantu. (Episalomi 72:1, 12-16) Nonando Aakriste yashili oya kale ya hepa ngashingeyi, ihaya kanitha etegameno lyawo molwaashoka oyi inekela meuvaneko lyaJehova ndyoka tali ti: “Itandi ku etha nando; itandi ku thigi po.” Onkee ano, omwiitaali ota vulu okupopya neinekelo ta ti: “Omuwa oye omukwathi gwandje, itandi tila sha.” (Aahebeli 13:5, 6) Momathimbo ngaka omadhigu, Jehova okwa kala nokuyambidhidha aalongeli ye momikalo odhindji mboka haya tula miilonga omakotampango ge nokupititha komeho Uukwaniilwa monkalamwenyo. (Mateus 6:33) Oyendji yomuyo otaya vulu okupopya neinekelo taya ti: “Nashi kale oshishona nenge nashi kale oshindji. Onda pyokoka miinima ayihe: okukala nda kuta nenge okukala nda sa ondjala, okukala meloolo nenge okukala moluhepo. [Ayihe otandi yi vulu munguka ta koleke ndje, OB-1954].”—Aafilippi 4:12, 13.
OKUYAKULATHANA OMUTENGE
7. Oohapu dhaJesus odhini tadhi kwathele iilyo yuukwanegumbo yi pondole?
7 Jesus okwa li a popi lwopehulilo lyuukalele we kombanda yevi a ti: “Hola mukweni ngaashi ngoye wi ihole mwene.” (Mateus 22:39) Okutula miilonga omayele ngaka otashi ka kwathela noonkondo mokusila oshimpwiyu uukwanegumbo. Odhoshili kutya ooyakwetu yopopepi oomboka tu li nayo muukwanegumbo: omusamane gwoye, omukulukadhi gwoye naanona yeni. Ongiini iilyo yuukwanegumbo tayi vulu okuulikilathana ohole?
8. Ongiini ohole tayi vulu okuulikwa muukwanegumbo?
8 Omukalo gumwe moka iilyo yuukwanegumbo tayi vulu oku shi ninga omokukwathelathana miilonga yomegumbo. Kungeyi aanona oya pumbwa okulongwa ya kale haya pungula iinima mbyoka ya li taya longitha, kutya nduno oonguwo nenge iidhanitho. Otashi vulika shi pule ethimbo okuhalaka nokukomba megumbo esiku kehe nosho wo okuyoga iiyaha. Ihe ngele kehe gumwe ota kutha ombinga, nena otashi ka kwathela uukwanegumbo auhe. Okukala omunanyalo, wi ihole mwene nowu na iikala yokuninga iinima nokungongota ohashi sitha uukwanegumbo awuhe uunye. (Omayeletumbulo 26:14-16) Ihe ngele aantu taya longo nehalo ewanawa, ohashi nyanyudha iilyo yuukwanegumbo. Ombiimbeli otayi ti: “Kalunga oku hole ngoka ta gandja nenyanyu.”—2 Aakorinto 9:7.
9, 10. (a) Omitenge dhini hadhi kala olundji dha gwilila po aakiintu momagumbo, nongiini tadhi vulu okupupalekwa? (b) Ongiini iilonga yi na okutopolelwathana muukwanegumbo?
9 Ondjaalela nosho wo ohole otayi ka kwathela momaukwanegumbo kaamu holoke omaupyakadhi ga kwata miiti. Pamuthigululwakalo oomeme oyo unene ya taalelwa kukehe oshilonga megumbo. Oye na okusila oshimpwiyu aanona, okwoopaleka egumbo, okuyoga oonguwo oku ka landa iinima nokuteleka. Miilongo yimwe, aakiintu oye na okulonga mepya, oku ka landitha iilikolomwa yawo nenge ya yambidhidhe uukwanegumbo wawo painiwe momikalo dhontumba nodhongandi. Nokuli nomomaputuko moka aakiintu ya li haya longo owala iilonga yomegumbo, oonkalo odha thiminika omamiliyona yomuyo ya ka konge iilonga. Omukulukadhi ngoka ha longo nuudhiginini iilonga ya yoolokathana okwa gwana okupandulwa. Ngaashi “omukulukadhi omwaanawa” ngoka ta popiwa mOmbiimbeli, oha kala i ipyakidhila “noiha li oshikwiila shonyalo.” (Omayeletumbulo 31:10, 27) Ihe shika itashi ti nando kutya omukulukadhi oye owala e na okulonga megumbo. Konima ngele omusamane nomukulukadhi ya zimbuka, mbela iilonga ayihe oyi na owala okukala ya taalela omukulukadhi omanga omusamane niilyo yilwe yuukwanegumbo tayi li onyalo? Hasho nando. (Yelekanitha 2 Aakorinto 8:13, 14.) Pashiholelwa, ngele meme oye ta teleke, ota ka pandula ngele iilyo yimwe yuukwanegumbo tayi mu kwathele moku ka teka, oku ka tyaya, oku ka tsa, okulongekidha iinima yilwe, oku ka landa iipumbiwa yomegumbo nokwoopaleka. Kungeyi uukwanegumbo otawu yakulathana omutenge.—Yelekanitha Aagalati 6:2.
10 Yamwe otashi vulika ya tye: “Meputuko lyetu aalumentu ihaya longo iilonga mbyoka.” Otashi vulika shi kale ngaaka, ihe mbela kashi li pandunge wu dhiladhile muule kombinga yaashoka? Sho Jehova Kalunga a toto po uukwanegumbo, ina yoolola kutya iilonga yontumba oyi na owala okulongwa kaakiintu. Oshikando shimwe, omulumentu omudhiginini Abraham okwa li a kutha ombinga mokulongekidha iikulya sho a li a talelwa po kaatumwa yaJehova. (Genesis 18:1-8) Ombiimbeli otayi kumagidha tayi ti: “Aalumentu oye na okuhola aakiintu yawo, naanaa ngashika ye hole omalutu gawo yene.” (Aaefeso 5:28) Ngaashi owala omusamane ha kala a hala okuvululukwa po ngele a zimbuka, omukulukadhi naye oha kala wo a hala okufudha po. Omukulukadhi otashi vulika nokuli a kale a vulwa shi vulithe omusamane. (1 Petrus 3:7) Ngele osho ngawo, kashi li tuu shu uka noshi li pahole omusamane a kwathele miilonga yomegumbo!—Aafilippi 2:3, 4.
11. Omomukalo guni Jesus a tulila po oshilyo kehe shuukwanegumbo oshiholelwa oshiwanawa?
11 Jesus oku li oshiholelwa sha dhenga mbanda shokunyanyudha Kalunga nosho wo aalongwa ye. Nonando ka li a hokana, Jesus oku li oshiholelwa oshiwanawa kaasamane naakulukadhi nosho wo kaanona. Okwi ipopi ye mwene a ti: ‘Omuna gwOmuntu ine ya okuyakulwa, ihe okuyakula,’ sha hala okutya, okulongela yalwe. (Mateus 20:28) Iilyo yuukwanegumbo mbyoka hayi holele Jesus ihayi kala tuu ya nyanyukwa!
OMOLWASHIKE UUYOGOKI WA SIMANENENA?
12. Jehova ota pula shike kwaamboka haye mu longele?
12 Ekotampango lilwe lyOmbiimbeli ndyoka tali vulu okukwathela mokusila oshimpwiyu uukwanegumbo otali adhika mAakorinto aatiyali 7:1. Otatu lesha mo taku ti: “Natu iyogeni shaashoka tashi nyateke olutu nenge omwenyo.” Mboka haya vulika koohapu ndhika dha nwethwa mo oya hokiwa kuJehova, ngoka a hala “elongelokalunga lya yela nolya yogoka.” (Jakob 1:27) Uukwanegumbo mboka ohawu mono wo uuwanawa wa gwedhwa po.
13. Omolwashike uuyogoki wa simana mokusila oshimpwiyu uukwanegumbo?
13 Pashiholelwa, Ombiimbeli oye tu shilipaleka kutya opu na omasiku tage ke ya uuna tapu ka kala kaapu na we omikithi nuuwehame. Ethimbo ndyoka ‘kape na nando ogumwe ta ka tya: “Otandi ehama.”’ (Jesaja 33:24; Ehololo 21:4, 5) Ihe manga ethimbo ndyoka inaali thika, iilyo yomaukwanegumbo agehe ohayi ehama ethimbo nethimbo. Nokuli Paulus naTimoteus oya li ya kwatwa kuuwehame. (Aagalati 4:13; 1 Timoteus 5:23) Ihe aatseyinawa yopaunamiti otaya ti kutya omikithi odhindji otadhi vulu okukeelelwa. Ngele omaukwanegumbo oga kala ga yogoka palutu nopambepo, otaga ka henuka omikithi dhimwe ndhoka hadhi vulu okukeelelwa. Natu tale nkene shika tashi vulika.—Yelekanitha Omayeletumbulo 22:3.
14. Omomukalo guni uuyogoki wopamikalo tawu vulu okugamena iilyo yuukwanegumbo komikithi?
14 Uuyogoki wopambepo owa kwatela mo uuyogoki wopamikalo. Ngaashi sha tseyika nawa, Ombiimbeli oyi na omithikampango dha dhenga mbanda notayi pangula okuya momilalo pondje yondjokana tayi ti: “Aaholume . . . aahondeli, omashenge naakali nomashenge . . . kapu na nando ogumwe gwomaantu ya tya ngeyi ta ka ya [muukwaniilwa waKalunga, KB].” (1 Aakorinto 6:9, 10) Okudhiginina omithikampango ndhika osha simanenena kAakriste molwaashoka oye li muuyuni mbuka wa yonuka. Ngele taye shi ningi ohashi nyanyudha Kalunga nohashi gamene wo uukwanegumbo komikithi ndhoka hadhi taandele pamilalo ngaashi o-AIDS, endongo, oshinena nosho tuu.—Omayeletumbulo 7:10-23.
15. Gandja oshiholelwa nkene okwaahe na uuyogoki wopalutu haku eta omikithi ndhoka tadhi vulu okukeelelwa.
15 ‘Okwiiyoga kehe shoka tashi nyateke olutu’ ohashi gamene uukwanegumbo komikithi dhilwe. Omikithi odhindji ohadhi etwa kokwaahe na uuyogoki wopalutu. Oshiholelwa shimwe okuhila omakaya. Oku ga hila ihaku nyateke owala omapunga, oonguwo nompepo, ihe ohaku etele wo aantu omikithi. Aantu omamiliyona ohaya si omumvo kehe omolwokuhila omakaya. Dhiladhila owala kutya, andola aantu mboka omamiliyona oya henukile okuhila omakaya ngoka haga “nyateke olutu,” ando inaya ehama nokusa mbala.
16, 17. (a) Ompango yini ya li ya pewa Aaisraeli kuJehova yi ya gamene komikithi dhimwe? (b) Ongini omaukwanegumbo taga vulu okutula miilonga ekotampango ndyoka li li muDeuteronomium 23:12, 13?
16 Tala ishewe koshiholelwa shilwe. Oomvula 3 500 dha pita, Kalunga okwa pele oshigwana shaIsraeli Ompango ye nkene shi na oku mu longela nankene shi na okwiihumbata monkalamwenyo yakehe siku. Ompango ndjoka oya li ya gamene oshigwana shoka komikithi molwaashoka opwa li oompango dhimwe dha simana kombinga yuuyogoki. Ompango yimwe oya li okufumvika onyata kaayi nyateke omudhingoloko moka aantu haya kala uuna omuntu e ki iwatela kondje yontanda. (Deuteronomium 23:12, 13) Ompango ndjoka yonale otayi longo nokunena. Aantu oyendji kunena ohaye ehama nokusa molwokwaahe yi landula.a
17 Metsokumwe nekotampango lyomompango ndjoka ya li ya pewa Aaisraeli, aapiya yaKalunga ihaya yile kiihwa owala kehe pamwe. Ohaya fumvike oonyata dhawo dhaaha nikile yalwe nokutaandelitha omikithi. Mboka ye li pomahala mpoka kaapu na iihwa oshi li nawa ya tunge uundjugo opo Jehova ‘kaa mone sha tashi sitha ohoni’ momudhingoloko gwawo. (Deuteronomium 23:14, KB) Kutya nduno ohamu longitha okandjugo koludhi luni, oke na okukala ka yela. Ngele okandjugo inaka yogoka, ko inaka siikilwa, oondhi otadhi ke ka uminina e tadhi taandelitha oombuto dhuuvu megumbo nomiikulya nokuli. Natango, uunona naakuluntu oye na okuyoga iikaha yawo ngele ya longitha okandjugo. Ngele itaye shi ningi, otaya ka taandelitha oombakiteli komalutu gawo. Ondohotola yimwe yomuFulaanisa oya ti kutya okwiiyoga kiikaha “oku li natango omukalo gwa dhenga mbanda okukeelela uuvu womepunda, wokupata iifudho nomikithi dhoshipa.”
18, 19. Omaetopo geni ga gandjwa wu kaleke egumbo lyoye lya yela, nonando owu li momudhingoloko moka mu na aantu ya hepa?
18 Odhoshili kutya oshi li oshidhigu okukala wa yogoka ngele owu li momudhingoloko moka mu na aantu ya hepa, unene tuu ngele kapu na ngoka e na ko nasha. Ihe ngele to kambadhala oku shi ninga, otashi ke mu etela uuwanawa oundji. Oshi na ombiliha okulongitha othewa nomeya shi vulithe oku ka landa omiti nokufuta oshipangelo. Okwiiyoga kehe esiku otaku vulu okukwathela mokukeelela omikithi. Aanona aashona nuuhanona owu na okuyogwa kehe esiku, molwaashoka ngele owa kala wa kaka, otawu ku umininwa koondhi shoka tashi vulu oku wu etela omikithi. Ino etha oondhi dhi uminine okanona koye pomeho nenge pomayulu, ngoye ino etha dhi nambele kiikulya, molwaashoka ohadhi taandelitha oombakiteli nomikithi. Okuhiyila shaampoka nako ohaku taandelitha omikithi. Iiyagaya nayi fumvikwe nenge yi fikwe po.
19 Ngele oho kala momudhingoloko ngoka gwa kaka, kambadhala ngaashi to vulu wu kaleke egumbo nomudhingoloko gwalyo gwa yela mokuyuka po omapumba giimuna noonyata dhaanona. Ino pitika aanona ya yile kiihwa momudhingoloko gwegumbo. Okanona okashona nako otaka vulu okulongwa ka kale haka longitha okandjugo nenge ka ye kiihwa nokufumvika oonyata dhako. Ngele oongaku dhoye odha kaka, dhi hula ko manga inoo ya mondunda nenge mongulu. Omeya ngoka hamu longitha oge na wo okukala ga yela. Okwa tengenekwa kutya aantu omamiliyona gaali omumvo kehe ohaya si komikithi ndhoka hadhi etithwa komeya ga kaka nokwaahenuuyogoki.
20. Olye e na oshinakugwanithwa shokukaleka egumbo lya yela?
20 Kehe gumwe muukwanegumbo oku na okuninga oonkambadhala opo egumbo li kale lya yela, kashi na nduno mbudhi kutya omeme, otate, aanona nenge aayenda. Omuvalakadhi gumwe koKenya ngoka e na aanona yahetatu okwa ti: “Aanona yandje ayehe oyi ilonga okuyambidhidha iilonga yomegumbo.” Egumbo lya yela ohali simanekitha uukwanegumbo auhe. Eyeletumbulo lyOshispania otali ti: “Oluhepo italu imbi omuntu a kale omuyogoki.” Opo uukwanegumbo wu gamenwe komikithi, egumbo oli na okukalekwa lya yela kutya nduno olyongulu, okafuleta, olyomiti nenge okambashu.
OHASHI TU LADHIPIKE UUNA TATU PANDULWA
21. Metsokumwe nOmayeletumbulo 31:28, oshike hashi kwathele uukwanegumbo wu kale wu na ombili?
21 Embo lyOmayeletumbulo otali popi kombinga yomukulukadhi omwaanawa tali ti: “Oyanamati otaa thikama e taa tumbula elago lye; omulumentu gwe wo ote mu tanga.” (Omayeletumbulo 31:28) Mbela owi ihula uunake okupandula oshilyo shuukwanegumbo? Atuheni ohatu kala twa hala okupandulwa tashi zi komutima. Ohashi kwathele wo omukulukadhi a tseye kutya omusamane gwe oha pandula iilonga ye yuudhiginini noku mu hole noku na ko nasha naye. (Omayeletumbulo 15:23; 25:11) Oshi li wo nawa omukulukadhi a pandule omusamane gwe omolwokulonga kwe nuudhiginini kiilonga yokukonga omboloto naambyoka ha longo megumbo. Aanona ohaya tuntukwa uuna aavali yawo taye ya pandula omolwiilonga yawo yuudhiginini pegumbo, kosikola nosho wo megongalo lyopaKriste. Osha simana okupandula gumwe nomiinima iishona nokuli. Okutya “tangi” ihaku landwa. Osha fa oshinima oshishona okuninga, ihe ohashi eta ombili oyindji muukwanegumbo.
22. Oshike sha pumbiwa opo uukwanegumbo wu kale wa “kola,” nongiini shika tashi vulu okumonika?
22 Omolwomatompelo ogendji, kashi shi oshipu okusila oshimpwiyu uukwanegumbo. Ihe otatu vulu okupondola. Eyeletumbulo lyOmbiimbeli otali ti: “Egumbo otali tungwa po kowino, nokoondunge tali kala lya kola.” (Omayeletumbulo 24:3) Owino noondunge otayi vulu okulikolwa ngele ayehe muukwanegumbo oya kambadhala okwiilonga ehalo lyaKalunga nokutula miilonga shoka tayi ilongo monkalamwenyo yawo. Otashi eta lela uuwanawa owundji ngele tatu shi ningi.
[Enyolo lyopevi]
a Ehangano lyUundjolowele mUuyuni olya popi membo limwe nkene taku vulu okukeelelwa oshimela shoka hashi dhipaga aanona oyendji lya ti: “Mpoka kaapu na uundjugo, aantu naya yile kiihwa kokule negumbo nonehala mpoka hapu dhanene aanona, nosho wo oometa 10 kokule naampoka hapu tekwa, nokufumvika oonyata dhawo.”
ONGIINI OMAKOTAMPANGO GOMBIIMBELI NGAKA TAGA VULU OKUKWATHELA UUKWANEGUMBO WU SILE OSHIMPWIYU IINIMA YOMEGUMBO?
Oshi li pandunge okukala wa gwanenwa kwaashoka wu na monkalamwenyo.—1 Timoteus 6:7, 8.
Jehova ite ke etha nando aalongeli ye.—Aahebeli 13:5, 6.
Ohole yokuhola yalwe oyo uukwatya wa tongomana wopaKriste.—Mateus 22:39.
Aakriste oye na okukala ya yogoka palutu nopambepo.—2 Aakorinto 7:1.
[Oshimpungu pepandja 45]
OSHI NA UUKOLELE OKULONGITHA OMEYA GA YELA
Ehangano lyUundjolowele mUuyuni ohali gandja omaetopo taga longo kaantu mboka ye li miilongo moka shi li oshidhigu okumona omeya ga yela naamboka kaaye na uundjugo. Otali ti:
“Omeya gokunwa naga ka tekwe nokutulwa miikwatelwa ya yela. Iikwatelwa yomeya nayi kale ya siikilwa nawa noino etha aanona nenge iimuna yi nwe mo. . . . Pinda omeya noshikwatelwa shi na onkogo onde, shoka sha nuninwa owala okupinda omeya. Kutha mo omeya nokuyoga oshikwatelwa shoka esiku kehe.
“Fulukitha omeya gokutelekitha nenge ngoka taga nuwa kaanona.”
[Ethano pepandja 42]
Okusila oshimpwiyu iinima megumbo oshi li oshinakugwanithwa shiilyo ayihe yuukwanegumbo
[Ethano pepandja 47]
Oshi na ombiliha okukaleka iinima ya yela shi vulithe okulanda omiti