Ontopolwa 19

Mbela oshi li ngaa mondjila okukondja nayalwe?

MBELA owu shi uumati nuukadhona mbono hawu kambadhala okwiiyulika wa fa wu na oonkondo?— Mbela owa hala okukala wu na ekwatathano nawo? Nenge owa hala okukala nagumwe ngono e na ohenda noku hole ombili?— Omulongi Omunene okwa ti: “Aanelago aakondjeli yombili, oshoka oyo taa ki ithanwa aana yaKalunga.”—Mateus 5:9.

Ihe omathimbo gamwe aantu ohaya ningi iinima mbyoka hayi tu geyitha. Hasho mbela?— Shoka ohashi vulu oku tu ningitha tu ya galulile uuwinayi. Shika osha li sha ningilwa aalongwa yaJesus oshikando shimwe sho ya li taye ende naye yu uka kuJerusalem. Nandi ku lombwele kombinga yasho.

Sho ya li ye ende ko oshinano shontumba, Jesus okwa tumu yamwe yomaalongwa ye komukunda gwaSamaria opo ya ka konge ehala lyokuvululukwa. Ihe aantu yaahoka kaya li ya hala aalongwa ya kale mo, molwaashoka Aasamaria oya li ye na elongelokalunga lyi ili. Kaya li wo ye hole kehe gumwe ngono a yile kuJerusalem a ka longele Kalunga.

Mbela ando ongoye wa li we shi ningilwa, ando owa ningi po shike? Mbela ando owa geye? Nenge mbela ando owa kala wa hala oku ya shunithila uuwinayi?— Shika osho aalongwa mbaka Jakob naJohannes ya li ya hala okuninga. Oya ti kuJesus: “Omuwa, owa hala, tu indile omulilo gu ze megulu, gu ya halakanithe po?” Itashi kumitha sho Jesus e yi ithana Aalumentu yEndundumo lyOmvula. Ihe Jesus okwa li e ya lombwele kutya kashi li mondjila okuungaunga nayalwe momukalo gwa tya ngaaka.—Lukas 9:51-56; Markus 3:17.

Odhoshili kutya aantu omathimbo gamwe otashi vulika ye tu ihumbatele nayi. Aanona yalwe otashi vulika ya kale inaaya hala tu dhane nayo. Otashi vulika nokuli ya tye: “Inatu hala okudhana nangoye.” Ngele oshinima sha tya ngeyi oshe ku ningilwa, mbela otashi ke ku uvitha nayi? Otashi vulika tu kale twa hala oku ya shunithila uuwinayi. Mbela otu na okuninga ngawo?—

Kutha Ombiimbeli yoye e tatu pandja mOmayeletumbulo ontopolwa 24, ovelise 29. Ovelise ndjoka otayi ti: “Ino tya: ‘Ngaashi a ningile ndje, osho tandi ke mu ningila, omuntu otandi mu longele ngaashi i ilongela.’”

Ovelise ndjoka oya hala okutya shike kungoye?— Otayi ti kutya katu na okukambadhala okushunithila yalwe uuwinayi. Katu na okushunithila gulwe uuwinayi. Ihe ongiini ngele opu na gumwe a hala okukondja natse? Otashi vulika a kambadhale e ku geyithe moku ku ula omalaka omawinayi. Otashi vulika a kale te ku yolo noku ku lombwela kutya owa tila. Natu tye nduno ote ku ithana omukatalume. Mbela oto ka ninga po shike? Mbela oto ka kondja naye?—

Natu tale ishewe shoka Ombiimbeli tayi ti. Natu pandje muMateus ontopolwa 5 ovelise 39. Moka Jesus okwa ti: “Inamu shunitha uuwinayi kungoka te mu ningile uuwinayi. Ngele ku na ngoka te ku dhenge olupi kolupanda lwokolulyo, mu etha, a dhenge nolukwawo.” Mbela oto dhiladhila kutya Jesus okwa hala okutya shike? Mbela okwa hala okutya ngele omuntu okwe ku dhenge nongonyo kolupanda lumwe, mu etha e ku dhenge kolukwawo?—

Aawe, Jesus hasho nando a hala okutya ngaaka. Okudhengwa nenkawa inaku fa okudhengwa nongonyo. Ngele omuntu okwe ku dhenge nenkawa okwa fa e ku undula te ku shongo opo mu kondje naye. Omuntu ota vulu oku ku undula nenge oku ku shonga opo mu kondje naye. Omuntu ngoka ta ningi ngawo, okwa hala wu geye. Ngele owa geye nenge we mu shunithile uuwinayi, mbela oshike tashi ka ningwa po?— Otashi vulika u kondje naye.

Ihe Jesus ina hala aalanduli ye ya kale taya kondjo nayalwe. Onkee ano, okwa ti kutya ngele gumwe te tu dhenge katu na oku mu shunithila uuwinayi. Katu na okugeya nokukondja naye. Ihe ngele otwe shi ningi, otatu ku ulika kutya katu ivule naangoka a tameke olugodhi.

Ihe ngele uupyakadhi owa tameke, mbela oto dhiladhila kutya oshinima shini oshiwanawa okuninga?— Okuza po mpoka. Omuntu gumwe otashi vulika e ku undule nenge e ku shonge lwiikando oyindji. Ihe otashi vulika konima yethimbo ite ke shi ninga we. Ngele owa zi po pehala mpoka, itashi ti kutya ngoye ogwowala nenge ku na oonkondo. Ihe otashi ti owu na oonkondo mwaashoka shi li mondjila.

Mbela ngele owe etha wu kondje nagumwe e to mu sindi? Mbela oshike tashi ka ningwa po?— Ngoka wa dhenge otashi vulika a ka galuke nookuume ke. Otashi vulika ye ku ehameke noshiti nenge ye ku tse nombele. Mbela ngashingeyi owu shi uvite ko kutya omolwashike Jesus inaa hala tu kale tatu kondjo?—

Mbela otu na okuninga shike ngele otwa mono aantu yalwe taya kondjo? Mbela otatu ka gama kombinga yagumwe?— Ombiimbeli oye tu lombwela shoka shi li mondjila. Pandja mOmayeletumbulo ontopolwa 26 ovelise 17. Ovelise ndyoka otayi ti: “Ngoka ti idhopo moohapu inaadhi mu pamba, okwa fa ngoka ta kwata ombwa ontokolipo kokutsi.”

Mbela oshike tashi ka ningwa po ngele owa kwata ombwa komakutsi? Otashi ke ehameka ombwa, notayi ke ku lya, hasho mbela? Mpoka ngaa pu thike ombwa ya hala wu yi ethe, opo ngaa pu thike oku yi kwata komakutsi wa dhiginina nopo ngaa pu thike okugeya kwayo. Ihe ngele owe yi etha, otashi vulika yi ku lye. Mbela oto vulu okukala wa thikama mpoka we yi kwata komakutsi sigo aluhe?—

Otatu ka ya muupyakadhi wa tya ngaaka ngele otwa kala nokwiidhopa molugodhi pokati kayalwe. Otashi vulika tu kale kaatu shi kutya olye a tameke olugodhi nenge omolwashike taya kondjele. Omuntu gumwe otashi vulika ta dhengwa, ihe otashi vulika omolwaashoka a yaka po oshinima shamukwawo. Ihe ngele otwe mu kwathele otatu ka kwathela omufuthi. Shoka itashi ka kala shi li mondjila, hasho mbela?

Mbela oto ka ninga po shike ngele owa mono aantu taya kondjo?— Ngele okosikola, otashi vulika wu matuke wu ka lomwele omulongi. Ngele okokule nosikola, otashi vulika wu ki ithane gumwe gwomaavali yoye nenge opolisi. Eeno, nokuli nando yamwe oya kale ya hala okukondja natse, tse otu na okukala aanambili.

Aalongwa yaJesus yashili ohaya kambadhala okuninga ngaashi taya vulu opo ya yande okukondja nayalwe. Momukalo nguka otatu ku ulika kutya otu hole shoka shi li mondjila. Ombiimbeli otayi ti: “Omumati gwOmuwa ita pumbwa okutamanana. Oye oku na okukala omulongi omwaanawa, omwiidhidhimiki, e na olukeno naayehe.”—2 Timoteus 2:24.

Ngashingeyi natu tale komayele omawanawa noonkondo ngoka tage ke tu kwathela tu kale tatu yanda okukondja nayalwe: Aaroma 12:17-21 nosho wo 1 Petrus 3:10,11.

[Ethano pepandja 102]

Mbela Jakob naJohannes oya li ya hala okuninga shike opo ya shunithile Aasamaria uuwinayi?

[Ethano pepandja 104]

Mbela otu na okuninga shike ngele opu na ngoka a hala okukondja natse?

[Ethano pepandja 105]

Ongiini okwiidhopa momalugodhi gayalwe kwa faathana nokukwata ombwa komakutsi? Otashi vulika wu ehamekwe, onkee ano, ino idhopa nando mugo!

[Ethano pepandja 106]

Mbela owu na okuninga po shike ngele owa mono aantu taya kondjo?