“Inaye shi tseya”

OKWAAHENAKONASHA nomalondodho otaku vulu okweeta oshiponga oshinene.

Darwin muAustralia, osha li tashi ilongekidhile iituthi yopethimbo lyomafudho mo 1974 sho ongendjo yokulondodha ya londodha shi na ko nasha nombepo onene yoshikungulu ndjoka ya li tayi ke ya. Ihe Darwin kasha li sha hanagulwa po kombepo onene yoshikungulu uule woomvula 30 lwaampono dha tetekele. Shika osha li ngaa tashi ka ningwa shili pethimbo ndyono? Aakalimo oyendji kaya li ya tala ko oshiponga shoka sha kwata shili miiti sigo ooshono ombepo ondhigu ya tameke okwaakula ko iipeleki yomagumbo nokufaalela omakuma gomagumbo moka aantu ya li ya hukuwala. Ongula yesiku lya landula, oshilando osha li sha hanagulwa po.

MuColombia muNovomba 1985, omwa li ondundu ndjoka ya ndwafuka omulilo. Olumi niikangwa yomeya sho ya hengumuka oya kungulula po ontopo ndjoka ya li ya fumvika aakalimo yomondoolopa yaArmero ye vulithe po 20 000. Mbela kapwa li pwa ningwa elondodho komeho yethimbo? Ondundu oya li ya kakama uule woomwedhi. Ihe molwaashoka aantu oya li yi igilila okukala popepi nondundu ndjoka hayi ndwafuka omulilo, aantu oyendji muArmero kaya li tayi ipula nasha. Aanambelewa oya londodhwa kutya masiku oshiponga oshinene otashi ke ya, ihe inaya ninga po sha lela shi na ko nasha nokulondodha aakwashigwana. Opwa li pwa ningwa omatseyitho moradio opo ya mbilipaleke aakwashigwana. Omambako pongeleka oga li ga longithwa okuladhipika aantu ya kale ya gundjila. Uusiku wesiku ndyoka, opwa li pwa ningwa omatopo gaali omatilithi. Mbela ando ongoye, ando owa thigi po ngaa iiniwe yoye e to fadhuka po? Aantu aashonashona yowala ya ningi oonkambadhala oku shi ninga, ihe koyendji ethimbo olya li lya pwa po.

Olundji aanongononi yomamanya ohaya tengeneke shi li mondjila kutya ekakamo lyevi otali ka ningwa peni. Ihe olundji ihaya vulu okutengeneka lelalela kutya otali ka ningwa uunake. Mo 1999, omakakamo gevi muuyuni auhe oga dhipaga aantu ye thike po 20 000 lwaampono. Oyendji yomwaamboka ya sa oya li taya dhiladhila kutya itashi ke ya ningilwa nando.

Oho inyenge ngiini komalondodho ngoka haga zi kuKalunga?

Ombimbeli oya hokolola nawa okuza nalenale iiningwanima mbyoka tayi ka ndhindhilikitha omasiku gahugunina. Shi na ko nasha naashoka, otayi tu ladhipike tu dhiladhile ‘omasiku gaNoa.’ “Pomasiku ngeyaka ga tetekele eyelu,” aantu oya li yi ipyakidhila niinima yonkalamwenyo yakehe esiku, nonando osha yela kutya oya li tayi ipula kombinga yelongitho lyoonkondo ndyoka lya li lyi indjipala. Shi na ko nasha nelondodho ndyoka Kalunga a gandja okupitila momupiya gwe Noa, “inaye shi tseya, sigo eyelu lye ya nolye ya hanagula po ayehe.” (Mateus 24:37-39) Mbela ando ongoye, ando owa pulakene ngaa kelondodho ndyoka? Mbela osho ho ningi ngashingeyi?

Ongiini ando owa li muSodom popepi nEfuta Lya Sa, pethimbo lyomulumentu Lot, omutekulu gwaAbraham? Oshilongo osha li sha fa oparadisa. Oshilando osha li sha hepuluka. Aantu kaya li ye na iimpwiyu yasha. Pethimbo lyaLot, aantu “ya kala haa li nohaa nu, ya landa, ya halitha, ya tsike noya tungu.” Muulipamwe waantu moka ya li omwa li wo oluhondelo olunene. Mbela ando ongoye, ando owa pulakene ngaa kelondodho sho Lot a popi ta pangula omikalo omiwinayi? Mbela ando owa pulakene ngaa sho e ku lombwele kutya Kalunga okwa tokola okuhanagula po oshilando shaSodom? Nenge ando owe shi tala ko sha fa omashendjo, ngaashi aamati mboka ya li taya ka ninga iitenya yaLot? Mbela ando owa tameke okuya ontuku e to tala konima, ngaashi omukiintu gwaLot? Nonando yalwe kaya li ya tala ko elondodho ndyoka lya kwata miiti, esiku ndyoka Lot a za muSodom, “megulu [omwa] loko omulilo nosulfuri noye ya yono po ayehe.”—Lukas 17:28, 29.

Aantu oyendji nena inaye shi tseya. Ihe iiholelwa mbika oya dhigininwa mOohapu dhaKalunga yi li elondodho kutse, oku tu ladhipika TU KALE TWA TONATA!

[oshimpungu/Ethano pepandja 22]

Mbela opwa li ngaa shili eyelu muuyuni auhe?

Aapataneki oyendji ohaya ti aawe. Ihe Ombimbeli otayi ti eeno.

Jesus Kristus okwe li popya nokwa li e na omwenyo sho lya ningwa, e li tala e li megulu.

[oshimpungu/Ethano pepandja 23]

Mbela Sodom naGomorra oya hanagulilwe po ngaa shili?

Aalafululi oshiningwanima shika otaye shi koleke.

Ondjokonona yomuuyuni otayi shi popi.

Jesus Kristus okwa koleke oshiningwanima shoka, naashoka sha ningwa po otashi popiwa momambo 14 gOmbimbeli ga yoolokathana.