Oshike ndi na okuninga ngele ohandi hindwa kosikola?

OTO KA NINGA PO SHIKE?

Dhiladhila konkalo ndjika: Thomas okwa tameke okukala inaa hala we okuya kosikola. Okwe shi tameka pwa pita oomwedhi ndatu sho aanasikola ooyakwawo ya taandeleke omahokololo omawinayi giifundja kombinga ye. Oye mu luku nokuli omadhina. Omathimbo gamwe omunasikola omukwawo oha dhenge mo omambo ge momake ge e ta ningi a fa inee shi ningila owina. Omathimbo gamwe Thomas ohu undulwa kugumwe gwomaanasikola ooyakwawo mboka ye li konima ye, ihe ngele a tala konima, iha mono kutya olye e mu undula. Esiku limwe okwa hindwa momukalo omwiinayi noonkondo, sho a tuminwa etumwalaka tali mu tilitha kointaneta . . .

Ando ongoye wa li Thomas, ando owi inyenge ngiini?

MWENA PO E TO DHILADHILA

Itashi ti kutya ku na sho to vulu okuninga po. Oto vulu okusinda ngoka he ku hindi, itoo longitha oongonyo. Ngiini mbela?

• INO INYENGA MOMUKALO OMWIINAYI. Ombiimbeli otayi ti: “Omugoya ota mana mo ondjahi ye ayihe, ihe omunawino ohi ikwata.” (Omayeletumbulo 29:11) Nonando owa tila, ino shi ulika. Ngele owa kala wa gundjila, mboka haye ku hindi otashi vulika kaaye ku hinde we.

• INO MU SHUNITHILA UUWINAYI. Ombiimbeli otayi ti: “Ngele ku na ngoka te mú ningile uuwinayi, inamu mu shunithila uuwinayi.” (Aaroma 12:17) Okukwatela onkone otaku ka nayipika owala onkalo.

• INO ITULA MUUPYAKADHI. Ombiimbeli otayi ti: “Omuntu onkotoki ota tala oshiponga e ta ka holama, ihe mboka yanathangwa omo taa yi e taa yemata.” (Omayeletumbulo 22:3) Ninga ngaashi to vulu, opo wu yande mboka taya vulu oku ku etela uupyakadhi. Yanda wo okwiitula moonkalo moka to vulu okuhindwa nuupu.

• YAMUKULA NOMBILI. Ombiimbeli otayi ti: “Eyamukulo etalala otali loteke ondjahi, ihe elaka lyoshihanyeko otali tukula ongeyo.” (Omayeletumbulo 15:1) Oto vulu okuninga iiyolitha. Pashiholelwa, ngele owu ulwa kutya owo ondoka noonkondo, oto vulu okwiihunya komapepe, e to ti: “Onda pumbwa okukutha ko nani.”

• ZA PO PUYE. Nora gwomimvo 19 ota ti: “Okumwena ohaku ulike kutya owa koka nowu na oonkondo wu vule ngoka te ku hindi. Ohaku ulike wo kutya owu na eipangelo, uukwatya mboka ngoka te ku hindi kee na.” — 2 Timoteus 2:24.

• KALA WU NA OMUKUMO. Mboka haya hindi, olundji ohaya ponokele mboka kaaye na omukumo naamboka ye shi kutya itaya vulu okuninga po sha. Mepingathano naashika, aantu oyendji mboka haya hindi itaye ke ku hinda, ngele oya mono kutya owu na omukumo.

• SHI LOMBWELA GULWE. Gumwe ngoka a li nale omulongisikola ota ti: “Onda hala okuladhipika ayehe mboka haya hindwa ye shi popye. Oshi li nawa oku shi ninga notashi vulu okukeelela yalwe kaaya hindwe wo.”