Uukriste tawu taandele miigwana oyindji

Aayapostoli oya vulika koshipango shaJesus shokuuvitha onkundana ombwanawa kombanda yevi alihe. Momumvo 47 E.N., aamwatate muAntiokia oya li ya tumu Paulus naBarnabas molweendo lwokuuvitha. Aauvithi mbaka aalaadhi oye ende apuhe muAsia eshona. Oya yi komahala ngaashi Derbe, Listra naIkonium.

Paulus naBarnabas oyu uvithile kehe gumwe, kutya nduno omuyamba nenge ohepele, omugundjuka nenge omukulupe. Aantu oyendji oya taamba ko oshili kombinga yaKristus. Sho Paulus naBarnabas yu uvithile omupangeli gwontuntu yaKipro, Sergius Paulus, omulumentu gumwe ompulile, okwa kambadhala oku ya keelela. Paulus okwa lombwele ompulile a ti: ‘Jehova ote ku geele.’ Mbalambala ompulile oya tsika. Sho omupangeli Sergius e shi mono, okwa ningi omwiitaali.

Paulus naBarnabas oyu uvithile kehe pamwe, momagumbo, pomahala gomalandithilo, moondjila nomoosinagoga. Oya aludha omulumentu a lemana muListra. Aantu mboka ya mono oshikumithalonga shoka, oya li taya dhiladhila kutya Paulus naBarnabas ookalunga, noya kambadhala oku ya galikana. Paulus naBarnabas oye ya keelele ya ti: ‘Galikaneni owala Kalunga. Tse aantu yowala.’ Opo ihe Aajuda yamwe oye ya po e taya ningitha aantu ya pilukile Paulus. Oya dhenge Paulus nomamanya, e taye mu kookololele pondje yoshilando, opo a ka sile hoka. Ihe Paulus okwa li natango e na omwenyo. Aamwatate oye ya nziya ye mu hupithe, noye mu shuna moshilando. Konima yethimbo, Paulus okwa shuna kuAntiokia.

Momumvo 49 E.N., Paulus okwa yi ishewe molweendo lwuutumwa. Konima sho a galukile kaamwatate mboka ye li muAsia eshona, okwa fala onkundana ombwanawa sigo okuEuropa. Okwa yi kuAtena, Efeso, Filippi, Tessalonika nokomahala galwe. Silas, Lukas nomulumentu omugundjuka gwedhina Timoteus oya yi pamwe naye molweendo lwe. Oya longo pamwe mokutota omagongalo noye ga kwathele ga kale ga kola. Paulus okwa kala muKorinto uule womumvo netata, opo a tse omukumo aamwahe. Oku uvitha, okwa longo aantu nokwa nyolele omagongalo ogendji oontumwafo. Okwa li wo ha tungu ootenda. Konima yethimbo, okwa shuna kuAntiokia.

Momumvo 52 E.N., Paulus okwa yi molweendo olutitatu, a tameke muAsia eshona. Okwa yi kuumbangalantu sigo okuFilippi, nopo nduno ta yi kuKorinto. Paulus okwa kala uule womimvo dhontumba muEfeso, ta longo aantu, te ya aludha nota kwathele egongalo. Okwa li wo a gandja iipopiwa yomontaneho esiku kehe posikola. Aantu oyendji oye mu pulakene noya lundulula omikalo dhawo. Hugunina, konima yokuuvitha onkundana ombwanawa miilongo oyindji, okwa yi kuJerusalem.