OSHILESWHA 12
Ngele oshidhigu kungoye okukonakona Ombiimbeli, oshike tashi ke ku kwathela?
Okukonakona Ombiimbeli ohaku etele omuntu uuwanawa owundji. Ihe omathimbo gamwe ihashi kala oshipu. Otashi vulika wu ipule ngele oto ka vula ngaa okutsikila okukonakona Ombiimbeli. Omolwashike sha simana okuninga oonkambadhala wu tsikile? Oshike tashi vulu oku ku kwathela wu tsikile, nonando kashi shi oshipu?
1. Omolwashike okukonakona Ombiimbeli kwa simana?
“Oohapu dhaKalunga odhi na omwenyo nodhi na oonkondo dhokulonga sha.” (Aahebeli 4:12) Ombiimbeli oya simana, molwaashoka otayi holola omadhiladhilo gaKalunga nosho wo ohole ye yoku ku hola. Otayi ku kwathele wu mone ontseyo nosho wo uunongo washili netegameno. Shoka sha simanenena, otayi ku kwathele wu ninge kuume kaJehova. Sho to konakona Ombiimbeli, oto etha oonkondo dhayo dhi lundulule onkalamwenyo yoye, e tayi kala yi li hwepo.
2. Omolwashike sha simana okukala wu shi kutya oshili yOmbiimbeli oyi na ongushu?
Oshili yOmbiimbeli oya fa omaliko gongushu. Onkee ano, Ombiimbeli tayi tu ladhipike tu ‘ilandele oshili, ihe inatu yi landitha po.’ (Omayeletumbulo 23:23) Ngele otwa kaleke momadhiladhilo kutya oshili yOmbiimbeli oyi na ongushu, otatu ka ninga ngaashi tatu vulu, opo tu tsikile oku yi konakona, nonando opu na omandangalati. — Lesha Omayeletumbulo 2:4, 5.
3. Ongiini Jehova ta vulu oku ku kwathela wu tsikile okukonakona Ombiimbeli?
Jehova oku li Omushiti omunankondoadhihe noku li Kuume koye. Okwa hala oku ku kwathela wi ilonge oshili kombinga ye. Ota vulu oku ku pa “ehalo noonkondo, opo a tsakanithe elalakano lye ewanawa.” (Lesha Aafilippi 2:13.) Onkee ano, ethimbo kehe wa pumbwa uulaadhi wu konakone Ombiimbeli nenge wu tule miilonga shoka wi ilonga, Jehova ota vulu oku ku kwathela. Ngele owa pumbwa oonkondo wu taaguluke omandangalati nenge wu sinde omapataneko, ota vulu oku dhi ku pa. Kala aluhe ho pula Jehova megalikano e ku kwathele wu tsikile okukonakona Ombiimbeli. — 1 Aatessalonika 5:17.
ILONGA OSHINDJI
Ilonga nkene to vulu okutsikila okukonakona Ombiimbeli, nonando oho kala wi ipyakidhila nenge to patanekwa. Tala wo nkene Jehova ta vulu oku ku kwathela wu tsikile oku yi konakona.
4. Kala wa lenga ekonakonombiimbeli lyoye
Omathimbo gamwe ohatu kala twi ipyakidhila noonkondo notashi vulika tu kale tu wete kutya katu na ethimbo lya gwana lyokukonakona Ombiimbeli. Oshike tashi vulu oku tu kwathela? Lesha Aafilippi 1:10, e tamu kundathana omapulo taga landula:
Sho to tala, “iinima mbyoka yi na oshilonga” unene monkalamwenyo oyini?
Oshike to vulu okuninga, opo wu ulike kutya ekonakonombiimbeli lyoye olya simana?
Ngele owa tula evi meyemele e to gwedha mo omamanya, omamanya itaga ka gwana mo
Ngele owa tula mo omamanya tango, otamu ka kala mu na ehala lyokutula mo evi olindji. Sha faathana, ngele owa kala ho ningi tango “iinima mbyoka yi na oshilonga” unene monkalamwenyo yoye, oto ka vula oku yi mana, e to kala ishewe wu na ethimbo lyokuninga iinima yilwe
Okukonakona Ombiimbeli otaku vulu oku tu kwathela tu tseye Kalunga notu mu longele. Lesha Mateus 5:3, e tamu kundathana epulo tali landula:
Uuwanawa wuni tatu ka mono ngele otu hole okukonakona Ombiimbeli?
5. Pula komeho, nonando oto patanekwa
Omathimbo gamwe, aantu yamwe otashi vulika ye ku teye omukumo sho to konakona Ombiimbeli. Tala koshiholelwa shaFrancesco. Dhana OKAVIDIO, e ta mu kundathana omapulo taga landula.
Ookuume kaFrancesco noyaandjawo oyi inyenge ngiini, sho e ya lombwele shoka ti ilongo?
Okwa mono ondjambi yashike, sho a tsikile okukonakona Ombiimbeli?
Lesha 2 Timoteus 2:24, 25, e tamu kundathana omapulo taga landula:
Aantu yaandjeni nosho wo ookuume koye oye ku uvitile ngiini, sho to konakona Ombiimbeli?
Shi ikolelela koovelise ndhino, oto ki inyenga ngiini ngele opu na gumwe inaa nyanyukwa sho to konakona Ombiimbeli? Omolwashike to tile ngawo?
6. Inekela Jehova e ku kwathele
Sho tatu hedha popepi naJehova, otatu ka kala twa hala oku mu nyanyudha. Ihe otashi vulika tu mone oshidhigu okuninga omalunduluko monkalamwenyo yetu, opo tu kale metsokumwe nehalo lye. Ngele osho wu uvite ngawo, ino teka omukumo. Jehova ote ku kwathele. Dhana OKAVIDIO, e tamu kundathana omapulo taga landula.
Jim okwa ningi omalunduluko geni, opo a nyanyudhe Jehova?
Oshike she ku kumitha kombinga yoshiholelwa she?
Lesha Aahebeli 11:6, e tamu kundathana omapulo taga landula:
Jehova oha ningile shike aantu mboka “taye mu kongo,” ano mboka haya kambadhala ngaashi taya vulu ye mu tseye noye mu nyanyudhe?
Mbela Jehova oha kala u uvite ngiini, sho to ningi oonkambadhala wu konakone Ombiimbeli?
GUMWE OTASHI VULIKA E KU PULE TA TI: “Omolwashike to konakona Ombiimbeli nOonzapo dhaJehova?”
Oto ke mu yamukula ngiini?
OWI ILONGO SHIKE?
Nonando ihashi kala aluhe oshipu, okukonakona Ombiimbeli otaku vulu oku ku kwathela wu kale nonkalamwenyo ombwanawa sigo aluhe. Tsikila okukala wi inekela muJehova, note ke ku pa ondjambi.
Omapulo geendululo
Omolwashike oshili yOmbiimbeli ya simana kungoye?
Ongiini to vulu okuulika kutya owa pititha komeho “iinima mbyoka yi na oshilonga” unene?
Omolwashike wu na okupula Jehova e ku kwathele wu tsikile okukonakona Ombiimbeli?
UUYELELE WA GWEDHWA PO
Tala komikalo ne ndhoka dha kwathela aantu oyendji ya longithe ethimbo lyawo nawa.
“Nkene wu na okulongitha ethimbo lyoye nawa” (Penduka mo!, Febuluali 2014)
Tala nkene Jehova a li a kwathele omukulukadhi gumwe, ngoka omusamane gwe a li kee uvite ko kutya omolwashike omukadhi ta kambadhala okunyanyudha Kalunga.
Jehova ohe tu pe oonkondo tu vule okuhumbata omitenge dhetu (5:05
Tala nkene omulumentu gumwe a mono uuwanawa sho omukulukadhi gwe a tsikile okukonakona.
Omathimbo gamwe Oonzapo dhaJehova ohadhi lundilwa kutya otadhi topola aanegumbo. Ihe mbela shono oshoshili ngaa?