Aagibeon—Oya Li Ya Kongo Ombili
OTAKU tiwa kutya oshilando shoka shi li kondungu yondundu mpoka pombanda oshi li pehala olyo tuu ndyoka pwa li pwa thikama Gibeon shonale, ookilometa omulongo lwaampono kombinga yokuumbangalantu waJerusalem.
Otashi vulika ngoye u shi shi kutya Gibeon osha ningi sha simana mbala konima sho Josua a fala Aaisrael mEvi lyEuvaneko nokwa dhenge Jeriko. Aakanaan yokuGibeon oya mono kutya itaa vulu okupondola Israel, shoka sha yela kutya osha li sha ambidhidhwa kuKalunga. Oye na nduno okuninga ngiini? Aagibeon oyu uvanene ya tume aakalelipo mboka tayi iningi ya fa aapashioni ya za koshilongo shokokule. Onkambadhala ndjika yi na ko nasha nombili oye ende nawa, molwashoka Israel osha ningi ehangano nayo. Sho omakoto gawo ge ya puuyelele, Aagibeon oya ningi oonakupanda iikuni noonakuteka omeya.
Kalunga ka li keehu uvitile ombili aantu mbaka ya li taa kongo ombili. Okwa ambidhidha Josua mokugamena kwe Aagibeon sho ya li ya ponokelwa kaakwaniilwa yatano. Jehova okwa ningi po nokuli oshikumithalonga shokulelepeka uuyelele womutenya molwolugodhi ndoka.—Josua 9:3-27; 10:1-14.
Aafulimevi oya mono omuthima omule, nenge edhiya ele kondundu ndjika, lya hokwa memanya lya kola. Aagibeon oya li taa vulu okuya mo mugo taye endele kiilyatelo nokuteka omeya mondjugo yokohi yevi. Mbela olyo “edhiya lyaGibeon” ndyoka lya tumbulwa mu 2 Samuel 2:13? Aalafululi oya mono wo iikwatelwa yomaviinu mbyoka ya hokwa memanya niilongitho ayihe yokuningila omaviinu. Eeno, otashi monika sha fa Gibeon sha li osentrum yokuningila omaviinu.
Pethimbo lyaDavid otenda, nenge ompungulilo, yaKalunga kashili oya li mpoka. Omukwaniilwa Salomo okwi ile mpoka okuninga omafikiloyambo. Jehova okwi ihololele Salomo mondjodhi nokwe mu uvanekele “omwenyo gwoondunge nogwomayele,” nosho wo uuyamba. (1 Aakwaniilwa 3:4-14; 2 Ondjalulahokololo 1:3) Oshinyolwa pepandja 24-9 moshifo shika otashi ulike kutya ondhikwa yaantu mboka ya kala muGibeon konima oya ka kala mboka ya nyanyukilwa uuthembahenda uunene moshigwana shaKalunga. Ou shi kutya ongiini?
[Edhina lyomuthaneki pepandja 31]
Pictorial Archive (Near Eastern History) Est.