Ehekeleko kwaamboka taya mono iihuna

SHO aalumentu naakiintu aadhiginini yomethimbo lyonale ya li ya mono iihuna, oya li ya galikana ya mana mo Kalunga e ya wilike. Ihe oya li ya katuka wo oonkatu dha pumbiwa opo ya shonopeke okumona iihuna, ngaashi mokulongitha omikalo dhopandunge okuyanda aathininiki. Pashiholelwa, okwiinekela Jehova taku endele pamwe noonkambadhala dhopaumwene okwa kwathela David i idhidhimikile omaupyakadhi ge. Ongiini kutse nena?

Uuna to mono iihuna, oto vulu okukatuka oonkatu dha pumbiwa okukandula po uupyakadhi woye. Pashiholelwa, ngele to mono kuu na iilonga, iho ningi mbela oonkambadhala okumona iilonga tayi opalele mbyoka tayi ke ku kaleka momwenyo nosho wo uukwanegumbo woye? (1 Timoteus 5:8) Nenge ngele to mono iihuna kuuwehame wopalutu, ito ka konga mbela ekwatho lyopaunamiti tali opalele? Oshi li nawa okutseya kutya Jesus, ngoka e na oonkondo e dhi pewa kuKalunga okwaaludha omikithi dhomaludhi agehe, oku shi kutya ‘aavu oya pumbwa omwaaludhi.’ (Mateus 9:12) Ihe nonando ongaaka, omaupyakadhi goye otashi vulika haaluhe taga ka kuthwa po; otashi vulika u na okutsikila oku gi idhidhimikila uule wethimbo lyontumba.

Omolwashike uupyakadhi mbono itoo u popi naJehova Kalunga megalikano? Pashiholelwa, uuna to kongo iilonga, okwiinekela Kalunga pamwe negalikano otaku tu kwatha tu kondjithe emakelo kehe okutaamba ko iilonga mbyoka tayi tsu ompinge nomakotampango gOmbimbeli. Otatu ka yanda wo ‘okupukithwa mo meitaalo’ kolwiho nenge kohole yokuhola iimaliwa. (1 Timoteus 6:10) Dhoshili, uuna tatu ningi omatokolo ga simana ge na ko nasha niilonga nenge nuukwanegumbo nenge nuukolele, otatu vulu okulandula ekumagidho lyaDavid tali ti: “Omutenge gwoye gu umbila Omuwa! Oye te ku hupitha; oye ite etha omuyuuki, a kale aluhe nokutengukila po.”—Epsalmi 55:23.

Egalikano tali zi komutima otali ka kwathela wo omadhiladhilo getu ga kale ga gundjila opo okumona iihuna kwetu kaaku tu gwililile po. Omukriste gwashili, omuyapostoli Paulus okwa nyola ta ti: “Uuthigona weni u tseyithileni Kalunga momagalikano nomomaindilo pamwe nomahambelelo.” Omomukalo guni omagalikano taga zi komutima taga vulu oku tu hekeleka? “[Ombili] yaKalunga yi vule uunongo auhe, otayi gamene oomwenyo dheni nomadhiladhilo geni muKristus Jesus.” (Aafilippi 4:6, 7) Ombili yaKalunga oyi “vule uunongo auhe.” Onkee ano, otayi vulu oku tu koleka uuna twa dhigupalelwa komaiyuvo ga yemateka. Otayi ka ‘gamena oomwenyo dhetu nomadhiladhilo getu,’ nokungeyi otayi tu kwathele tu yande okwiinyenga neendelelo noshaa li pandunge, hoka taku vulu okwiindjipaleka okumona iihuna kwetu.

Omolwegalikano oshizemo shonkalo yontumba otashi vulu nokuli okukala shi ili. Sho omuyapostoli Paulus a yi mondholongo muRoma, okwa li a pula neifupipiko Aakriste ooyakwawo ye mu galikanene. Omolwashike Paulus e shi pula? Okwe ya nyolele ta ti: “Unene tandi mú kumagidha ihe oku shi ninga, ndi mú peululwe nziya.” (Aaheberi 13:19) Noohapu dhimwe, Paulus okwa tseya kutya okupulakena kwaJehova omagalikano gaa na ezimbuko gooitaali ooyakwawo otaku vulu okuninga po eyooloko shi na ko nasha nuuna a li ta ka mangululwa.—Filemon 22.

Egalikano mbela otali lundulula oshilanduliko shokumona iihuna kwetu? Otali vulu. Ihe otu na okutseya kutya Jehova Kalunga otashi vulika itaa ka yamukula omagalikano getu momukalo ngoka twa hala. Paulus okwa galikana iikando oyindji kombinga ‘yokwega monyama,’ pamwe uupyakadhi wopanyama. Ihe pehala lyokukutha po okumona iihuna, Kalunga okwa lombwele Paulus a ti: “Esilohenda lyandje olye ku gwana; oshoka oonkondo dhandje otadhi gwanene pombanda omuunkundi.”—2 Aakorinto 12:7-9.

Onkee ano okumona iihuna kwetu ihaku nena po nziyanziya. Ihe otatu ka kala tu na ompito okuulika einekelo lyetu kuTate gwomegulu. (Jakob 1:2-4) Kala nuushili kutya nokuli ngele Jehova Kalunga ita kutha po okumona iihuna, ota vulu ‘okulongela ondjila yokuya ontuku, tu wape oku li sinda.’ (1 Aakorinto 10:13) Oshindhindhilikwedhi kutya Jehova ohi ithanwa ‘Kalunga kehekeleko alihe, ngoka te tu hekeleke muudhigu wetu auhe.’ (2 Aakorinto 1:3, 4, KB) Kalunga ota vulu oku tu pa shoka twa pumbwa okwiidhidhimika, notu na etegameno lyomwenyo gwaaluhe.

Oohapu dhaKalunga, Ombimbeli, otayi uvaneke kutya Jehova ota ka “theta po omahodhi momeho gawo, neso kali kala [po] we nenge oluhodhi nenge elilagano, nenge uuwehame kau kala mo we.” (Ehololo 21:3, 4) Mbela oshidhigu noonkondo okwiitaala kutya muuyuni otamu ka kala kaamu na we okumona iihuna? Otashi vulika osho shi li ngawo ngele owi igilila okukala momaupyakadhi. Nonando ongaaka, emanguluko okumanguluka kuumbanda nokiiponga olyo Kalunga u uvaneka, nelalakano lye otali ke shi pondola shili.—Jesaja 55:10, 11.

[Omathano pepandja 9]

Okwaanetegameno otaku ka hula po e tapu ya epepelelo