Uukriste washili otau humu nawa komeho
UUKALELE waJesus Kristus owa tameke ombaadhilila muuyuni methelemumvo lyotango. Etumwalaka lye olya li lya nkondopaleke aantu, lye ya pe uuyelele nolye ya nwetha mo momukalo ngoka gwe ya kumitha. Oyendji yomwaamboka ye mu uvu sho ta popi oya li ya gumwa sha ya muule koohapu dhe.—Mateus 7:28, 29.
Jesus okwa tindi kee na uumbanda okukala nombinga momilandu tadhi thininike dhopamalongelokalunga nosho wo dhopapolotika dhopethimbo ndyono ihe okwa kala ha popiwa naye nuupu kaakwashigwana ayehe. (Mateus 11:25-30) Okwa zimine montaneho kutya oombepo dhuuwinayi otadhi nwetha mo aantu apuhe kombanda yevi noku ulike kutya ye oku na oonkondo e dhi pewa kuKalunga oku dhi pangela. (Mateus 4:2-11, 24; Johannes 14:30) Jesus okwa yelitha nuukeka ekwatathano lyolela ndyoka li li pokati kokumona iihuna nuulunde, noku ulike pahole kutya Uukwaniilwa waKalunga owo tau eta epepelelo tali kalelele. (Markus 2:1-12; Lukas 11:2, 17-23, KB) Okwa kutha po thiluthilu nosigo aluhe oshisiikilitho shomilema shoka sha kala sha siikila ethimbo eleeleka uukwatya washili waHe, mokuhololela edhina lyaHe ayehe mboka ya hala okukala ye na ekwatathano lyopaumwene naYe.—Johannes 17:6, 26.
Onkee ano, itashi kumitha sho nonando pu na omahepeko omanene gopalongelokalunga nogopapolotika, aalongwa yaJesus taya taandeleke neendelelo etumwalaka lye li na oonkondo. Muule owala woomvula 30 lwaampono, omagongalo gopaKriste taga humu nawa komeho oga li ga totwa muAfrika, Asia naEuropa. (Aakolossa 1:23) Oshili ompu ndjoka Jesus a longo oya li ya minikile momitima dhaaifupipiki, aantu mboka ye na omitima omiwanawa mOshinenelongo ashihe shaRoma.—Aaefeso 1:17, 18.
Ihe ongiini aalongwa ayehe mboka aape ya za momaputuko ga tya ngaaka ga yoolokathana pamahupilo, palongo, palaka nopalongelokalunga, ya li taya ka kala pamwe muukumwe washili ye na ‘eitaalo limwe,’ ngaashi omuyapostoli Paulus e li ithana? (Aaefeso 4:5) Oshike sha li tashi ke ya kaleka taya ‘popi shimwe’ opo kaaya topoke? (1 Aakorinto 1:10) Ngele tatu tala kokwaa he na uukumwe kwa kwata miiti hoka ku li mokati kaamboka tayi iti Aakriste nena, otu na okukonakona shoka Jesus a longa.
Mpoka pwa tameka uukumwe wUukriste
Sho Jesus a li mompangu koshipala shaPontius Pilatus, okwa popile mpoka pwa tameka uukumwe wopaKriste. Okwa tile: “Onkee nda valwa nonkee nde ya muuyuni, ndi hokolole oshili. Kehe tuu ngoka gwomoshili oye tu uvu ewi lyandje.” (Johannes 18:37) Onkee ano okutaamba ko omalongo gaJesus pamwe nOohapu adhihe dhaKalunga dha nwethwa mo, Ombimbeli, otaku nwetha mo unene aalongwa yaKristus yashili moku ya hanganitha kumwe.—1 Aakorinto 4:6; 2 Timoteus 3:16, 17.
Dhoshili, aalongwa yaJesus omathimbo gamwe oya li taya ka kala ye na omapulo ga kwata miiti nenge okwaatsakumwe mokati kawo. Opo nduno oshike mbela sha li tashi ke ya kwathela? Jesus okwa yelitha ta ti: “Oye nge te ya, Ombepo yashili, ote mú longo oshili ayihe. Oshoka oye ita popi muye mwene, ota popi shika te shi uvu, note mú hololele mbyoka tayi ke ya.” (Johannes 16:12, 13) Ano ombepo ondjapuki yaKalunga oya li tayi ka kwathela aalongwa yashili yaJesus yu uve ko oshili ngaashi ya li ya hololwa kuKalunga kashona nakashona. Niishewe, ombepo ndjoka oya li tayi ki imika iiyimati, ngaashi ohole, enyanyu nombili, mbyoka ya li wo tayi ka humitha komeho uukumwe mokati kawo.—Iilonga 15:28; Aagalati 5:22.
Jesus ine ethela mo nando ehilathano nenge oontamanana mokati kaalongwa ye, noine ya pa epitikilo okufatulula ooshili dhOmbimbeli taye dhi tsitha kumwe nomikalondjigilile dhopaputuko nenge dhopalongelokalunga dhaamboka ya li taya ka tsakaneka. Pehala lyaashono, ongulohi yahugunina ndjoka a li pamwe nayo, okwa galikana a hwama ta ti: “Haambaka ayeke tandi ya galikanene, aawe, naamboka wo taa itaalithwa ndje okoohapu dhawo, ayehe opo ya kale yamwe, ngaashi ongoye, Tate, u li mungame nangame ndi li mungoye, noyo wo ya kale mutse, uuyuni opo u itaale, ongoye wa tuma ndje.” (Johannes 17:20, 21) Ano uukumwe washili mombepo nomoshili owa kala endhindhiliko tali ndhindhilikitha aalongwa yaKristus okuza ketameko sigo okethimbo lyetu. (Johannes 4:23, 24) Nonando ongaaka, oongeleka dhonena inadhi hangana, ihe odha topoka. Omolwashike mbela?
Molwashike oongeleka dha topoka
Efatululo lyoshili molwashike pu na omalongo ogendji nomikalo dhi ili nodhi ili mokati kaamboka tayi iti Aakriste olyo kutya inaya hala okukakatela komalongo gaJesus. Omunyoli gumwe okwa ti: “Ngaashi methimbo lya piti, Aakriste aape yonena oye hole okukutha mOmbimbeli kehe shimwe shoka she eleka koompumbwe dhawo—notaya dhini kehe shimwe shoka itaashi tsu kumwe nomikalondjigilile dhawo omivalelwa mo dhopalongelokalunga.” Shika osho naanaa shoka Jesus naayapostoli ye ya ti tashi ka ningwa.
Pashiholelwa, omuyapostoli Paulus okwa nwethwa mo a nyolele omutonateli omukwawo Timoteus ta ti: “Ethimbo tali ya, oyo itaa hala we okupulakena omalongo ga kola, ihe otaa ki ikongela aalongi, taa nwitha omakutsi gawo pauhalu wawo yene nomakutsi gawo otaye ga pilamenitha oshili, notaa gama kiifundja.” Mbela Aakriste ayehe oya li taya ka pukithwa? Aawe. Paulus ota tsikile ta ti: “Ihe ngoye kala omwiidhiliki miinima ayihe, humbata uudhigu, longa oshilonga shoye.” (2 Timoteus 4:3-5; Lukas 21:8; Iilonga 20:29, 30; 2 Petrus 2:1-3) Timoteus nAakriste yalwe aadhiginini oya kala pamayele ngoka ga nwethwa mo.
Aakriste yashili oye li natango ya hangana
Ngaashi Timoteus, Aakriste yashili nena oya kotokela iinima ayihe mokutinda omadhiladhilo gopantu nokutaamba ko owala shoka Omanyolo taga ti shi na ko nasha naashoka yi itaala. (Aakolossa 2:8; 1 Johannes 4:1) Mokuholela Aakriste yomethelemumvo lyotango, Oonzapo dhaJehova otadhi longo uukalele wadho miilongo yi vulithe 230, tadhi fala kaantu kehe pamwe etumwalaka lyaJesus lyopetameko, ndyoka li li onkundana ombwanawa yUukwaniilwa. Konakona omikalo ne dha simana moka tadhi holele Jesus dha hangana notadhi longitha Uukriste washili kutya nduno openi dhi li.
Shoka dhi itaala osha kankamena kOohapu dhaKalunga. (Johannes 17:17) Omupristeli gwomuBelgia okwa nyola kombinga yadho a ti: “Oshinima shimwe shoka tatu vulu okwiilonga kudho [kOonzapo dhaJehova] osho ehalo lyadho okuvulika kOohapu dhaKalunga nosho wo uulaadhi wadho okugandja uunzapo kombinga yadho.”
Ohaya kongo epepelelo kUukwaniilwa waKalunga omolwomaupyakadhi guuyuni auhe. (Lukas 8:1, KB) MuBarranquilla, Colombia, Onzapo yimwe oya popi naAntonio, omuyambidhidhi omunene gwongundu yopapolotika. Onzapo inayi kutha ombinga pamwe naye, noinayi popila elongo lyontumba lyopapolotika. Pehala lyaashono, okwa ningi ekonakonombimbeli oshali naAntonio nosho wo naamwayina aakadhona. Nziya Antonio okwa tseya kutya Uukwaniilwa waKalunga owo awike shili etegameno kaapongo yomuColombia nosho wo kuuyuni auhe.
Ohadhi simaneke edhina lyaKalunga. (Mateus 6:9) Sho Oonzapo dhaJehova dha tsakanene oshikando shotango naMaria, Omukatoolika gwanashili a kala muAustralia, okwa pitika Oonzapo dhi mu ulukile edhina lyaKalunga mOmbimbeli. Okwi inyenge ngiini? “Sho nda mono edhina lyaKalunga oshikando shotango mOmbimbeli, onda lili. Onda li nda gumwa noonkondo kontseyo kutya otandi vulu lela okutseya nokulongitha edhina lyaKalunga lyopaumwene.” Maria ota tsikile okukonakona Ombimbeli, nosho oshikando shotango monkalamwenyo ye ta tseya kutya Jehova oku li omuntu nota vulu okutunga ekwatathano tali kalelele naye.
Odha hanganithwa kohole. (Johannes 13:34, 35) Oshinyolwa shimwe moThe Ladysmith-Chemainus Chronicle, moKanada, otashi ti: “Kutya nduno elongelokalunga lyoye olini, nenge ku li melongelokalunga, oto pandula Oonzapo dhaJehova 4 500 ndhoka dha longa uusiku nomutenya oshiwike netata sha piti okutunga Oshinyanga shIigongi shoombinemeta 2 300 moCassidy . . . Shika oshi li endhindhiliko lyUukriste washili molwaashoka oye shi ninga nenyanyu kaapu na oontamanana, ehilathano nenge okukonga esimano.”
Onkee ano konakona uunzapo mboka. Nonando aateologi yUukwakriste, aatumwa yawo naanangeleka yamo otaya tsikile okukambadhala okukeelela eipumomumwe ndyoka li li pokuholoka moongeleka dhawo, Uukriste washili otau humu nawa komeho muuyuni auhe. Dhoshili, Aakriste yashili otaya gwanitha uukalele mboka ya pewa wokuuvitha nokulonga aantu Oohapu dhaKalunga. (Mateus 24:14; 28:19, 20) Ngele ou li mokati kaamboka haya “fudhaganene nohaa takumine” iihuna mbyoka tayi ningwa ngashingeyi notaya piyaganekwa kokwaa na uukumwe hoka ku li momalongelokalunga gopaKriste, otatu ku hiya u imbwange mumwe nOonzapo dhaJehova melongelokalunga lya hangana lyopaKriste mokulongela Kalunga awike kashili, Jehova.—Hesekiel 9:4; Jesaja 2:2-4.