Onomola 666 kayi shi owala otumbutumbu

“[Kapu na ngoka ta wapa] okulanda nenge okuhalitha. Uunongo u li po mpaka. Oongoka e na oondunge, na yalule omwaalu gwoshilikama, oshoka omwaalu nguka ogwomuntu. Nomwaalu gwasho ogwo omathele gahamano nomilongo hamano nahamano.”—Ehololo 13:17, 18.

IIPALANYOLO owala iishona mOmbimbeli ya pendutha ohokwe onene maantu nosho wo omaipulo ngaashi ehunganeko kombinga yendhindhiliko, nenge edhina lyomeholamo ‘lyoshilikama’—onomola 666. Kotelevisi nokoInternet, nosho wo mookino, momambo nomiifo, endhindhiliko lyoshilikama olya ningi oshikundathanwa shoonkundathana kaadhi na ehulilo.

Yamwe oyi itaala kutya onomola 666 oyo endhindhiliko lyaantikristus gwopaMbimbeli. Yalwe otaya ti kutya otayi ulike olupe lwontumba olundhindhilikwedhi ndoka lu na okukala lu niwe, ngaashi oonsha nenge okutulwa okashina molutu lwoye haki ithanwa omicrochip ke na okode tayi longo kuyo yene ndjoka tayi ndhindhilikitha omuntu e li omupiya gwoshilikama. Yalwe natango oyi itaala kutya onomola 666 oyo endhindhiliko lyuupapa waKatoolika. Mokupingena po oonomola dhOshiroma noondanda molupe lwontumba lwedhinasimaneko lyopambelewa lyomupapa, Vicarius Filii Dei (Omukalelipo gwOmwana gwaKalunga), nomokulundulula kashona oonomola, oye ya sigo oponomola 666. Yalwe oya ti wo kutya onomola oyo tuu ndyoka otayi vulu okuyalulwa okuza medhina lyOshilatina lyomupangeli Omuroma Diocletianus nometoloko lyOshiheberi lyedhina lyomukesari Nero.a

Ihe omafekafeko ngaka nomafatululo ga totwa, oga yooloka ko unene kwaashoka tashi popiwa kOmbimbeli yo yene kombinga yendhindhiliko lyoshilikama ngaashi tatu ke shi mona moshitopolwa tashi landula. Ombimbeli otayi holola kutya mboka ye na endhindhiliko lyoshilikama otaya ka geyelwa kuKalunga sho ta ka hulitha po onkalelo yiinima yongashingeyi. (Ehololo 14:9-11; 19:20) Onkee ano, okuuva ko shoka onomola 666 tayi ti, otashi pula oshindji kaashi shi owala okufatulula otumbutumbu. Lago enene, Jehova Kalunga, ngoka oye mwene ohole nOnzo yuuyelele wopambepo, ina kaleka aapiya ye momilema shi na ko nasha noshinima shika sha simana.—2 Timoteus 3:16; 1 Johannes 1:5; 4:8.

[Enyolo lyopevi]