Mbela omaiyuvo goye otage ku hepeke?
LENA okwa kala uule wonkalamwenyo ye oyindji ta hepekwa komaiyuvo omawinayi ge na ko nasha naye mwene. Okwa ti: “Okulongithwa nayi pamilalo uule woomvula pethimbo lyuunona wandje osha li sha shundula ndje noonkondo. Onda li ndi uvite kutya kandi na nandonando oshilonga.” Simone wo oha dhiladhila konima kethimbo lyuugundjuka we e ta ti: “Momutima gwandje onda li ndi uvite kaandi na omaiyuvo nonda li ndi uvite kaandi na we ongushu yasha.” Eyeme enene ndyoka hali etwa komaiyuvo ga tya ngaaka oli li apuhe nena. Ehangano limwe ndyoka hali gandja omayele kaagundjuka okupitila mongodhi otali ti kutya konyala etata lyaamboka haye li dhengele ohaya ti kutya oye na “aluhe omaiyuvo kutya kaye na oshilonga.”
Pakupopya kwaatseyimwenyo yamwe, omaiyuvo gokuuva inoo gwana ohaga holoka po ngele aantu yalwe taye ku uvitha kuu na oshilonga. Onkalo ya tya ngaaka yomadhiladhilo otayi vulu okuholoka po ngele gumwe oha gandagulwa aluhe, ha pewa uusama wa pitilila noha ningwa onyanya, nenge ha ningililwa mo noonkondo. Kutya nduno etompelo olini, iilanduliko ohayi vulu okukala tayi nkundipaleke omuntu nokuyona po nokuli uukwatya womuntu. Ekonakono limwe li na ko nasha nuunamiti opo lya ningilwe omasiku ngano olya mono kutya oohandimwe mboka ye na omaiyuvo omawinayi shi na ko nasha nayo yene oye hole okwaainekela yo yene nosho wo yalwe, nokungeyi ohaya yonagula omakwatathano gawo gopothingo. Olapota yi na ko nasha nekonakono ndyoka otayi ti: “Momukalo gumwe, yo ohaye ‘eta po’ oonkalo ndhoka haya kala ya tila noonkondo.”
Aantu mboka ye uvite ngawo olundji oye li iihakanwa yaashoka Ombiimbeli tayi shi ithana “iimpwiyu.” (Episalomi 94:19) Ohaya kala ye uvite kutya ihaya pondola sha nando. Ngele epuko lyasha tali ningwa, ohayi ipe aluhe uusama kuyo yene. Nonando yalwe otashi vulika haye ya pandula omolwomipondo dhawo, meni lyawo oye uvite ya fa ye li aakotokeli mboka sikulimwe naya ka tulwe pomutenya. Molwaashoka oyi itaala kutya inaya gwana okukala ya nyanyukwa, oyendji oya kwatwa keihumbato lyokwiihanagula po sho ye uvite kutya kaye na oonkondo oku shi opaleka. Lena ngoka a tumbulwa metetekelo, okwa li i ishundula nomolwaashoka a li a kwatwa komukithi ngoka gwe etithwa kokwaalya kwe, nokwa li e shi zimine a ti: “Ondi uvite itaandi vulu okuninga eluduluko lyasha.”
Mboka taya hepekwa ‘kiimpwiyu’ ya tya ngaaka mbela osho ye na okukala ye uvite ngawo onkalamwenyo yawo ayihe? Mbela opu na sha tashi vulu okuningwa okukondjitha omaiyuvo ga tya ngaaka? Ombiimbeli otayi gandja omakotampango nomayele ge na oshilonga ngoka ga kwathela aantu oyendji opo ye shi pondole mekondjo lyawo. Mbela gamwe gomomakotampango ngoka ogeni nongiini ga kwathele mboka taya mono iihuna opo ya mone enyanyu monkalamwenyo yawo? Oshitopolwa tashi landula otashi ke shi kundathana.