Ombiimbeli otayi vulu oku ku kwathela u mone enyanyu

NONANDO Ombiimbeli kayi shi embo lyuunamiti, otayi popi sha shi na ko nasha noshizemo shopamaiyuvo shoka omuntu ta vulu okukala e na shi na ko nasha nuukolele wopamadhiladhilo nowopalutu, kutya nduno oshiwanawa nenge oshiwinayi. Ombiimbeli otayi ti: “Omutima gwa nyanyukwa otagu eta uundjangandjele, ihe omwenyo gwa nyanyagulwa otagu thipula omasipa.” Otatu lesha ishewe taku ti: “Ngele to tenguka pethimbo lyuudhigu, nena oonkondo dhoye oonshona ngiini!” (Omayeletumbulo 17:22; 24:10) Omaiyuvo getekomukumo ohaga vulu okumana po oonkondo dhetu, moku tu ninga tu kale tu uvite twa nkundipala noitaatu vulu sha, nosho wo kaatu na ehalo lyokuninga omalunduluko nenge lyokukonga ekwatho.

Okuteka omukumo otaku vulu wo okuguma uupambepo womuntu. Aantu mboka ye uvite inaaya gwana olundji ohaya dhiladhila kutya itaya vulu nando okukala nekwatathano ewanawa naKalunga nokulalekwa nuuyamba kuye. Simone, ngoka a tumbulwa moshitopolwa sha tetekele, kapu na omalimbililo kutya okwa li “omuntu ngoka a li a hokiwa kuKalunga.” Ihe ngele tatu tala mOohapu dhaKalunga, Ombiimbeli, otatu mono kutya Kalunga oha tala ko nawa mboka taya kambadhala oku mu nyanyudha.

Kalunga oku na ko nasha natse

Ombiimbeli otayi tu lombwele kutya “OMUWA oku li popepi naamboka ya dhengwa pevi; ota hupitha mbo ya kanitha etegameno.” Kalunga ihe ekelehi “omutima gwi itedhulula,” ihe otu uvaneke kutya ota “talaleke oomwenyo dhaaifupipiki nokuhekeleka omitima dha nyanyagulwa.”—Episalomi 34:18; 51:17; Jesaja 57:15.

Pompito yimwe Omwana gwaKalunga, Jesus, okwa li e wete sha pumbiwa okuyelithila aalongwa ye oshili kutya Kalunga oha mono uuwanawa mboka u li maapiya Ye. Mokulongitha eudhi, okwa li a hokolola kutya Kalunga oha mono enza limwe ngele tali gwile pevi, oshinima shoka aantu oyendji haya tala ko inaashi simana nando. Okwa li wo a tsu omuthindo kutya Kalunga okwa tseya oshinima kehe shi na ko nasha naantu, nokuli omwaalu gwomafufu gokomutse gwawo nago oku gu shi. Jesus okwa hulitha eudhi lye mokutya: “Ano inamu tila: one mu vule omanza ogendji.” (Mateus 10:29-31)a Jesus oku ulike kutya, kutya nduno oohandimwe oyu uvite ngiini shi na ko nasha nayo yene, aantu mboka ye na eitaalo oyo ye na oshilonga momeho gaKalunga. Dhoshili, omuyapostoli Petrus ote tu dhimbulukitha kutya “Kalunga aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.”—Iilonga 10:34, 35.

Kala netaloko li li pandjele

Oohapu dhaKalunga otadhi tu ladhipike tu kale hatu itala ko pandjele. Omuyapostoli Paulus okwa nyola mokunwethwa mo kuKalunga a ti: “Omolwomagano gesilohenda lyaKalunga ngoka nde ga pewa, onda hala oku mú lombwela one amuhe: Inamu idhiladhilila pehala mpoka inaamu adha, ihe dhiladhileni pandjele. Kehe gumwe gwomune ni iyeleke pamuthika gweitaalo ndyoka Kalunga e li mu pa.”—Aaroma 12:3.

Dhoshili, inatu hala tu kale hatu dhiladhila kutya otwa simana unene sigo tatu kwatwa kuuntsa, noinatu hala wo okukala tu na etaloko tali kondjithathana naandyoka nokudhiladhila kutya katu na nando oshilonga. Pehala lyaashono, elalakano lyetu olyo okukala tu na etaloko li li pandjele okwiitala ko tse yene, ndyoka tali dhiladhila oonkondo dhetu nosho wo omangambeko getu. Omukiintu Omukriste okwe shi popi momukalo nguka ta ti: “Ngame kandi shi naanaa omuntu e li nayi, niishewe kandi shi naanaa omuntu e li nawa. Ondi na omaukwatya omawanawa naangoka omawinayi, naashino osho wo kehe gumwe e li.”

Dhoshili, okukala netaloko lyopandjele lya tya ngaaka kashi shi oshipu. Otashi vulika tashi pula oonkambadhala oonene okweetha po etaloko ewinayi noonkondo okwiitala ko mwene ndyoka tashi vulika twa kala nalyo uule woomvula odhindji. Nonando ongaaka, kekwatho lyaKalunga otatu vulu okulundulula uukwatya wetu nosho wo okutala ko kwetu onkalamwenyo. Dhoshili, shoka osho Oohapu dhaKalunga tadhi tu ladhipike tu ninge. Otatu lesha taku ti: “Ihuleni omuntu gweni omukulu ngoka mwe mu landula nale, ngoka hi iyono po ye mwene mokwiifundjaleka nuuhalu we. Omitima dheni nomadhiladhilo geni naga shituluke lela, ga ninge omape. Zaleni omuntu omupe ngoka a shitwa a fa Kalunga nohi iholola ye mwene mokukalamwenyo ku uka nokwa yapuka.”—Aaefeso 4:22-24.

Mokuninga oonkambadhala dhokulundulula ‘omitima nomadhiladhilo getu,’ sha hala okutya, iikala mbyoka tayi pangele omadhiladhilo getu, otatu vulu okulundulula uuntu wetu kaau kale we netaloko ewinayi noonkondo, ihe u kale naandyoka ewanawa. Lena ngoka a tumbulwa moshitopolwa sha tetekele, okwa li a tseya kutya manga ine etha po omadhiladhilo kutya kapu na gumwe ta vulu okukala e mu hole nenge oku mu kwathela, kapu na sha tashi ka lundulula nenge tashi vulu okulundulula omaiyuvo ge ge na ko nasha naye mwene. Mbela omayele geni ge na oshilonga taga adhika mOmbiimbeli ga kwathele Lena, Simone, nayalwe yi ili opo ya ninge omalunduluko ga tya ngaaka?

Omakotampango gOmbiimbeli ngoka tage eta enyanyu

“Uudhigu woye u fala kOMUWA, oye te ku popile.” (Episalomi 55:22) Shotango nosha simanenena, egalikano otali vulu oku tu kwathela tu mone enyanyu lyashili. Simone ota ti: “Ngele ndi uvite nda teka omukumo, ohandi yi kuJehova noku mu pula ekwatho. Inandi kala nando onale monkalo moka nda li ndi uvite inaandi nkondopalekwa nokuwilikwa kuye.” Sho omupisalomi te tu ladhipike tu umbile uudhigu wetu kuJehova, osha yela kutya ote tu dhimbulukitha kutya Jehova ke na ko owala nasha natse ihe okwe tu tala ko wo pauhandimwe twa gwana okukwathelwa nokuyambidhidhwa kuye. Uusiku wOpaasa yomo 33 E.N., aalongwa yaJesus oya li ya nika oluhodhi molwaashoka sha popiwa kuJesus shi na ko nasha nokuza po kwe hoka kwa li ku li popepi. Jesus okwa li e ya ladhipike ya galikane He, nopo nduno okwa li a gwedha ko a ti: “Indileni, e tamu pewa, enyanyu lyeni opo li kale lyu udhilila pombanda.”—Johannes 16:23, 24.

“Okugandja oku na elago ku vule okutaamba.” (Iilonga 20:35) Ngaashi Jesus a longa aantu, okugandja oko oshipatululo shokumona enyanyu lyashili monkalamwenyo. Okutula oshili ndjika yOmbiimbeli miilonga otaku tu kwatha tu ukithe eitulomo lyetu koompumbwe dhayalwe pehala lyoku li ukitha kokwaagwana kwetu. Ngele tatu kwatha yalwe nokumona nkene tayi inyenge nolupandu, otatu kala tu uvite nawa shi na ko nasha natse yene. Lena okwa li i itaala kutya okulombwela aluhe yalwe onkundana ombwanawa yomOmbiimbeli okwe mu kwathela momikalo mbali. Ota ti: “Tango, oku shi ninga otaku pe ndje enyanyu nembilipalelo lyoludhi ndoka lwa popiwa kuJesus. Olutiyali, aantu oyendji ohayi inyenge nawa, shoka tashi kwathele ndje ndi mone enyanyu.” Mokwiigandja tse yene nehalo ewanawa, otatu ka mona uushili wOmayeletumbulo 11:25 (OB-1954) ngoka taga ti: ‘Onakutalaleka aakwawo ota talalekwa wo.’

“Omasiku gomuhepekwa aluhe omawinayi, ihe omwenyo omunyanyukwi aluhe ogu li moshituthi.” (Omayeletumbulo 15:15) Atuheni otu na ehogololo li na ko nasha nankene hatu itala ko tse yene nosho wo oonkalo dhetu. Otatu vulu okukala ngaashi ngoka ha tala ko kehe shimwe nayi noha kala e uvite a hepekwa, nenge otatu vulu okuhogolola okudhiladhila nawa, tu uvite ‘enyanyu momwenyo,’ nokukala twa nyanyukwa twa fa tu li poshituthi. Simone ota ti: “Ohandi kambadhala okukala ndi na etaloko li li nawa ngaashi tashi vulika. Ohandi kala ndi ipyakidhila nekonakono lyopaumwene nosho wo niilonga yomomapya, nohandi dhiginine egalikano. Ohandi kambadhala wo okukala naantu mboka ye na etaloko ewanawa, nohandi kambadhala okuyambidhidha nokukwathela yalwe.” Iikala yomutima ya tya ngaaka otayi eta enyanyu lyashili, nokuli ngaashi Ombiimbeli tayi tu ladhipike tayi ti: “Ne aayuuki, nyanyukweni ne mu imbe ekandanga omolwiilonga yOMUWA. Ne mbo hamu vulika kuye, tanteni.”—Episalomi 32:11.

“Kuume oku na ohole aluhe, nomumwayina okwa valwa, opo a kwathe moluhepo.” (Omayeletumbulo 17:17) Okulombwela omuholike nenge omugandjimayele e shi okwiinekelwa omadhiladhilo getu otaku vulu oku tu kwathela tu ungaunge nomaiyuvo omawinayi noku ga kandula po manga inaage tu gwilila po. Okupopya nayalwe otaku vulu oku tu kwathela tu tale ko iinima netaloko li li pandjele newanawa. Simone ote shi zimine ta ti: “Okupopya nkene wu uvite ohaku kwathele noonkondo. Owa pumbwa okulombwela gumwe nkene wu uvite. Olundji oku shi lombwela gumwe oko owala kwa pumbiwa.” Ngele to shi ningi otashi ke ku kwathela u mone oshili yomayeletumbulo ngoka taga ti: “Oshimpwiyu shomutima gwomuntu [ohashi] mu thindile pohi, ihe oohapu dhuukuume ohadhi gu nyanyudha.”—Omayeletumbulo 12:25.

Shoka to vulu okuninga

Otwa konakona owala gamwe gomomakotampango ogendji omawanawa noge na oshilonga gomOmbiimbeli ngoka taga vulu oku tu kwathela tu pondole omaiyuvo omawinayi notu mone enyanyu lyashili. Ngele ou li gumwe gwomwaamboka taya hepekwa komaiyuvo gokukala wu uvite inoo gwana, otatu ku ladhipike u konakone Oohapu dhaKalunga, Ombiimbeli, wa mana mo. Ilonga okukala u na omaiyuvo ge li paushili noge li nawa shi na ko nasha nangoye mwene nosho wo nekwatathano lyoye naKalunga. Otu na etegameno lyashili kutya kewiliko lyOohapu dhaKalunga, oto ka mona enyanyu lyashili mwaashihe shoka to ningi.

[Enyolo lyopevi]

[Ethano pepandja 7]

Okukala pamakotampango gOmbiimbeli ohaku eta enyanyu