Enda meitavelo, ndele hamokumona!

‘Ohatu ende meitavelo, ndele hamokumona.’ — 2 OVAKORINTO 5:7.

1. Oshike tashi ulike kutya omuyapostoli Paulus okwa li ha ende meitavelo, ndele hamokumona?

OMUDO owa li 55 O.P. Opa li pa pita omido 20 okudja eshi omuhepeki wonale wOvakriste, oo a li a shiivika nedina Saulus, a li a tambula ko Oukriste. Ka li a efa okupita po kwefimbo ku nghundipaleke eitavelo laye muKalunga. Nonande ka li a mona oinima oyo i li meulu nomesho aye okomutwe, okwa li e na eitavelo la pama. Nomolwaasho eshi omuyapostoli Paulus a li ta shangele Ovakriste ovavaekwa, ovo va li ve na eteelelo lomeulu, okwa ti: ‘Ohatu ende meitavelo, ndele hamokumona.’ — 2 Ovakorinto 5:7.

2, 3. (a) Ohatu ulike ngahelipi kutya ohatu ende meitavelo? (b) Okweenda mokumona otashi ti shike?

² Okweenda meitavelo otaku pula elineekelo filufilu mokudula kwaKalunga okuwilika onghalamwenyo yetu. Otu na okukala twa itavela filufilu kutya oku shii nawa osho tashi tu etele ouwa. (Epsalme 119:66) Eshi hatu ningi omatokolo monghalamwenyo nokukatuka metwokumwe nao, ohatu kale ke momadiladilo “oinima yashili oyo tuhe wete.” (Ovaheberi 11:1, The New English Bible) Oyo oya kwatela mo “eulu lipe nedu lipe” olo la udanekwa. (2 Petrus 3:13) Mepingafano naasho, okweenda mokumona otashi ti kutya ohatu lalakanene onghedi yokukalamwenyo oyo tai wilikwa ashike kwaasho hatu mono nomesho okomutwe. Osho osha nyika oshiponga, molwaashi otashi dulu shi tu ningife tu lipwililikile filufilu osho Kalunga a hala tu longe. — Epsalme 81:13; Omuudifi 11:9.

³ Kutya nee ‘otwokangudu,’ tu na eifano lomeulu, ile ‘otweedi dimwe,’ tu na eteelelo lokukala kombada yedu, keshe umwe womufye oku na okukaleka momadiladilo ekumaido olo li na sha nokweenda meitavelo, ndele hamokumona. (Lukas 12:32; Johannes 10:16, OB-1954) Natu taleni nghee okudulika komayele oo a nwefwa mo taku tu amene tuha ninge oihakanwa ‘youwa wopakafimbo woulunde,’ tuha ye momwiyo wokuhola omaliko, nopo tuha dimbwe kutya exulilo longhalelo ei yoinima ola ehena popepi. Ohatu ka konakona yo oshiponga shokweenda mokumona. — Ovaheberi 11:25.

Natu henukeni ‘ouwa wopakafimbo woulunde’

4. Ehoololo lilipi Moses a li a ninga, nomolwashike a li e li ninga?

⁴ Diladila konghalamwenyo oyo Moses, omonamati waAmram, kwa li ta dulu ngeno okuhafela. Molwaashi Moses okwa li a tekulwa mokati koludalo lomouhamba waEgipti shonale, okwa li ta dulu okukala e na eenghonopangelo, oupuna nosho yo enwefemo. Okwa li ta dulu okutomhafana ta ti: ‘Onda hongwa nawa ounongo waEgipti oo wa tumbalekwa neenghono, nondi li omuladi meendjovo nomoilonga. Ngeenge onda kala mombala, ohandi ka dula okulongifa ondodo yange opo ndi etele ouwa ovamwatate Ovaheberi ovo tava fininikwa!’ (Oilonga 7:22) Ponhele yaasho, Moses okwa li a hoolola ‘okuhepekwa pamwe noshiwana shaKalunga.’ Omolwashike mbela? Oshike sha li she mu linyengifa a fiye po omauwa aeshe omuEgipti? Ombibeli otai nyamukula tai ti: “Meitavelo [Moses] okwa fiya po Egipti e he noutile wehandu lohamba, okwe likolelela, osheshi a kala a fa e wete ou e he wetike.” (Ovaheberi 11:24-27) Eitavelo laMoses mondjabi youyuki oyo ya udanekwa kuJehova ola li le mu kwafela a kondjife oulunde nokuhe litula mouwa wao wopakafimbo.

5. Oshihopaenenwa shaMoses otashi tu ladipike ngahelipi?

⁵ Luhapu, nafye ohatu kala twa pumbwa okuninga omatokolo a kwata moiti moinima ngaashi ei: ‘Mbela ondi na okweefa po eenghedindjikilile donhumba odo dihe li lelalela metwokumwe nomafinamhango Ombibeli? Mbela ondi na okukonga oilonga oyo tai futu nawa, ndele otai dulu okuya moshipala okuxuma komesho pamhepo kwange?’ Oshihopaenenwa shaMoses otashi tu ladipike tuha ninge omatokolo oo taa ulike okuheneendunge kwounyuni ou; ponhele yaasho, otu na okukala tu na eitavelo tali longo mounongo oo hau mono kokule ‘waao ehe wetike’ — Jehova Kalunga. Ngaashi Moses, natu hafele oukaume naJehova shi dulife okukala hatu hafele oshinima keshe osho shi li mounyuni ou.

6, 7. (a) Esau okwa ulika ngahelipi kutya okwa li a hoolola okweenda mokumona? (b) Oshihopaenenwa tashi londwele shilipi hatu lihongo monghedi omo Esau a katuka?

⁶ Yelekanifa Moses naEsau, omonamati watatekulululwa Isak. Esau okwa li a hoolola elihafifo lopokafimbo. (Genesis 25:30-34) Molwaashi Esau ‘ka li e na olupandu loinima iyapuki,’ okwa landele po oushiveli waye “okulya kumwe akuke.” (Ovaheberi 12:16, yelekanifa NW.) Okwa li a dopa okumona nghee etokolo laye lokulandifa po oushiveli waye la li tali ka kuma ekwatafano laye naJehova ile nghee la li tali ka kuma oludalo laye. Okwa li a pofipala pamhepo. Esau okwa li e lipwililikila omaudaneko aKalunga e na ondilo, a li e a tala ko ehe na lela ongushu. Okwa li a enda mokumona, ndele hameitavelo.

⁷ Esau oku li oshihopaenenwa kufye tashi londwele kunena. (1 Ovakorinto 10:11) Ngeenge hatu ningi omatokolo, kutya nee okwa kwata moiti ile omanini, katu na okupukifwa komitotolombo dounyuni waSatana, oo hau ti kutya ou na okukala u na osho wa hala paife. Otu na okulipula kutya: ‘Mbela oikala ya fa yaEsau oi liwetikile momatokolo oo handi ningi? Mbela okulalakanena osho nda hala paife otaku i moshipala oinima yopamhepo? Mbela omatokolo ange otaa tula moshiponga oukaume wange naKalunga nosho yo ondjabi yange yomonakwiiwa? Ohandi tulile po vakwetu oshihopaenenwa sha tya ngahelipi?’ Ngeenge omatokolo etu otaa ulike kutya otu na olupandu loinima iyapuki, Jehova ote ke tu nangeka noupuna. — Omayeletumbulo 10:22.

Natu henukeni omwiyo wokuhola oinima yopamaliko

8. Elondwelo lilipi Ovakriste Ovalodikea va li va pewa, nomolwashike lihokwifa kufye?

⁸ Memoniko olo la li la pewa omuyapostoli Johannes pexulilo lefelemudo lotete, omutumbalekwa Jesus Kristus okwa li a yandja etumwalaka keongalo olo la li muLaodikea, muAsia Linini. Ola li etumwalaka tali londwele shi na sha nohole yokuhola omaliko. Nonande ova li va punapala pamaliko, Ovakriste Ovalaodikea ova li va hepa pamhepo. Ponhele yokutwikila nokweenda meitavelo, ova efa oinima yopamaliko i va pofipaleke pamhepo. (Ehololo 3:14-18) Ohole yokuhola omaliko oi na enwefemo la faafana nokunena. Ohai nghundipaleke eitavelo letu nohai tu ningifa tu efe ‘okulotoka nokudiinina mefiyafanepo’ lomwenyo. (Ovaheberi 12:1) Ngeenge inatu lungama, ‘omalihafifo okukalamwenyo’ otaa dulu okuya moshipala oilonga yopamhepo fiyo osheshi ya ‘fifwa oshunguungu.’ — Lukas 8:14.

9. Ongahelipi okuwanenwa nosho yo okukala nolupandu li na sha neendja dopamhepo haku tu amene?

⁹ Oshinima sha fimanenena osho tashi tu amene pamhepo osho okukala twa wanenwa ponhele yokulongifa ounyuni ou pauyadi nokulipunapaleka. (1 Ovakorinto 7:31; 1 Timoteus 6:6-8) Eshi hatu ende meitavelo, ndele hamokumona, ohatu hafele oparadisa yopamhepo yokunena. Eshi hatu lipalula neendja dopamhepo, mbela ihatu linyengifwa tu ‘kuwilile nehafo lokomutima’? (Jesaja 65:13, 14) Natango, ohatu hafele eendafano naavo hava ulike oiimati yomhepo yaKalunga. (Ovagalati 5:22) Inashi fimanenena tuu okumona embilipalelo netulumuko mwaasho Jehova ha yandje pamhepo!

10. Omapulo elipi tu na okulipula?

¹⁰ Omapulo amwe oo tu na okulipula oo aa kutya: ‘Oinima yopamaliko oya fimana shi fike peni monghalamwenyo yange? Mbela ohandi longifa oiniwe yopamaliko shi na sha nomalihafifo ile ohandi i longifa okuxumifa komesho elongelokalunga lashili? Mbela oshike hashi etele nge ehafo linene? Mbela ekonakono lOmbibeli nosho yo eendafano pokwoongala kwopaKriste, ile okudja po momaxuliloshivike handi fiye po oinakuwanifwa yopaKriste? Mbela ohandi litulile po omaxuliloshivike mahapu e na sha nomalihafifo ponhele yokulongifa efimbo la tya ngaho moukalele womomapya nosho yo momalipyakidilo amwe e na sha nelongelokalunga la koshoka?’ Okweenda meitavelo otashi ti okukala twe lipyakidila moilonga yOuhamba, twe lineekela filufilu momaudaneko aJehova. — 1 Ovakorinto 15:58.

Natu kalekeni exulilo momadiladilo

11. Ongahelipi okweenda meitavelo taku tu kwafele tu kaleke exulilo momadiladilo?

¹¹ Okweenda meitavelo ohaku tu kwafele tu henuke omataleko opambelela kutya exulilo oli li kokule neenghono ile kutya itali uya nokuli. Mepingafano naavo ihava itavele sha, ovo hava sheke shi na sha nomaxunganeko Ombibeli, otu wete nghee oiningwanima younyuni tai wanifa osho Eendjovo daKalunga da xunganeka shi na sha nefimbo letu. (2 Petrus 3:3, 4) Pashihopaenenwa, mbela oikala nelihumbato lovanhu itai ulike kutya otu li ‘momafiku axuuninwa’? (2 Timoteus 3:1-5) Nomesho eitavelo, otu wete kutya oiningwanima yopaife younyuni kai fi ashike oiningwanima yomonakudiwa tai liendulula. Ponhele yaasho, oi li “edidiliko lokukala po [kwaKristus] nolefimbo lexulilo longhalelo yoinima.” — Mateus 24:1-14, NW.

12. Eendjovo daJesus odo da shangwa muLukas 21:20, 21 oda li da wanifwa ngahelipi mefelemudo lotete?

¹² Konakona oshiningwanima shomefelemudo lotete Oshivalo sheedula detu doPaife osho sha faafana naasho tashi ka ningwa pefimbo letu. Eshi Jesus Kristus a li kombada yedu, okwa li a londwela ovashikuli vaye a ti: “Ngenge tamu mono Jerusalem sha kondekelwa komatanga ovakwaita, opo nee shiiveni ehanauno laJerusalem ola fika popepi; opo nee ava vomuJudea nava fadukile keemhunda naava ve li moshilando nava dje mo.” (Lukas 21:20, 21) Mokuwanifa exunganeko olo, omatanga ovakwaita Ovaroma oo a li koshi yewiliko laCestius Gallus okwa li a kondeka Jerusalem mo 66 O.P. Ndele omatanga oo okwa li a shuna ombadilila, naasho osha li edidiliko kOvakriste ‘lokufadukila keemhunda,’ nokungaha osha li she va pa omhito va ye onhapo keemhunda odo. Mo 70 O.P, omatanga ovakwaita Ovaroma okwa li a aluka ndele taa ponokele oshilando shaJerusalem nokuhanauna po otembeli yasho. Josephus okwa hokolola kutya, Ovajuda ve dule pemiliyona ova li va fya nosho yo 97 000 ova li va twalwa moukwatwa. Etokolo laKalunga ola li la wanifilwa onghalelo yoinima yOshijuda. Ovo va li va enda meitavelo nova pwilikina kelondwelo laJesus ova li va ya onhapo oshiponga osho.

13, 14. (a) Oiningwanima ilipi tai ka ningwa mafiku? (b) Omolwashike tu na okukala oupafi shi na sha newanifo lomaxunganeko Ombibeli?

¹³ Oshinima sha faafana oshi li pokuningwa mefimbo letu. Eengudu domOiwana yaHangana otadi ka kala da kwatelwa mewanifo letokolo laKalunga. Ngaashi ashike omatanga ovakwaita Ovaroma omefelemudo lotete a li a tulwa po nelalakano okukaleka po o-Pax Romana (Ombili yaRoma), Oiwana yaHangana yokunena oya totwa po nelalakano lokukaleka po ombili. Nonande omatanga ovakwaita Ovaroma okwa li a kendabala okukaleka po eameno mounyuni aushe wopefimbo olo, okwa ka hanauna po Jerusalem. Sha faafana nokunena, omaxunganeko Ombibeli otaa ulike kutya eengudu domatanga ovakwaita dOiwana yaHangana otadi ka tala ko omalongelokalunga e li oshinima tashi piyaaneke nota di ka katuka eenghatu di hanaune po Jerusalem shokunena — Oukwakriste — nosho yo Babilon Shinene ashishe. (Ehololo 17:12-17) Doshili, ouhamba wounyuni aushe womalongelokalunga oipupulu ou li pokuhanaunwa po.

¹⁴ Ehanauno lomalongelokalunga oipupulu otali ka didilikifa ehovelo loudjuu munene. Pexulilo loudjuu munene, omahangano oo taa ka kala a xupa po monghalelo ei yoinima youkolokoshi otaa ka hanaunwa po. (Mateus 24:29, 30; Ehololo 16:14, 16) Okweenda meitavelo ohaku tu kaleke oupafi shi na sha newanifo lomaxunganeko Ombibeli. Inatu pukifwa tu itavele kutya ehangano la totwa kovanhu ngaashi Oiwana yaHangana olo Kalunga ta longifa okweeta ombili yashili neameno. Ngeenge osho ngaho, mbela onghedi yetu yokukalamwenyo kai na okuulika kutya otwa itavela kutya “efiku linene lOmwene oli li popepi”? — Sefanja 1:14.

Okweenda mokumona okwa nyika oshiponga shi fike peni?

15. Nonande ova li va mona omanangeko noupuna aKalunga, Ovaisrael ova li va wila momwiyo ulipi?

¹⁵ Oimoniwa yaIsrael shonale otai ulike kutya osha nyika oshiponga okweefa okweenda mokumona ku nghundipaleke eitavelo lomunhu. Nonande ova li va mona omahandukilo omulongo oo a li a fifa ohoni oikalunga yaEgipti nosho yo okumona exupifo likumwifi pEfuta Litilyana, mokuhadulika, Ovaisrael ova li va ninga onhana yoshingoli nova li ve i ilikana. Ova li va kanifa elididimiko nova li va loloka okuteelela Moses, oo ‘a li a kala ko komhunda.’ (Exodus 32:1-4) Okuhelididimika okwa li kwe ve linyengifa va ilikane oshikalunga osho kwa li tashi dulu okumonika nomesho okomutwe. Okweenda kwavo mokumona okwa li kwa ulika odino yokudina Jehova nokwa li kwa etifa edipao ‘lovalumenhu omayovi atatu’ lwaapo. (Exodus 32:25-29) Kashi nyikifa tuu oluhodi kunena ngeenge omupiya waJehova ta ningi etokolo olo tali ulike kutya ine lineekela Jehova nosho yo okudula kwaye okuwanifa omaudaneko aye!

16. Ovaisrael ova li va kumwa ngahelipi keholokepo lokombada?

¹⁶ Eholokepo lokombada ola li la nwefa mo nai Ovaisrael meenghedi di lili. Okweenda mokumona okwa li kwe va ningifa va kale va tila ovatondi vavo. (Numeri 13:28, 32; Deuteronomion 1:28) Okwe va ningifa va shonge eenghonopangelo daMoses odo a pewa kuKalunga nokungongota shi na sha nonghalamwenyo yavo mombuwa. Okuheneitavelo kwavo okwa li kwe va ningifa va kale va hala okushuna kuEgipti osho sha li mepangelo leendemoni, ponhele yokuyandja elitulemo kEdu lEudaneko. (Numeri 14:1-4; Epsalme 106:24) Jehova ka li tuu a yahamekwa eshi a mona oshiwana shaye tashi ulike okuhenefimaneko shi na sha naye e li Ohamba yavo ihe wetike!

17. Mefimbo laSamuel oshike sha li sha ningifa Ovaisrael va ekeleshi ewiliko laJehova?

¹⁷ Natango, pefimbo lomuprofeti Samuel, oshiwana shiholike shaIsrael osha li sha ya momwiyo wokweenda mokumona. Oshiwana osho okwa li sha hala ohamba oyo tashi dulu okumona. Nonande Jehova okwa li e shi ulikila kutya oye Ohamba yasho, osho kasha li she va wanena opo va ende meitavelo. (1 Samuel 8:4-9) Ova li va katuka paulai mokweekelashi ewiliko laJehova la wanenena, sha hala okutya, va hoolola okukala ngaashi oiwana oyo ya li ye va dingilila, naasho oshe ke va etela okumona oixuna. — 1 Samuel 8:19, 20.

18. Oilihongomwa ilipi hatu dulu okulihonga shi na sha noshiponga shokweenda mokumona?

¹⁸ Tu li ovapiya vaJehova vokunena, otwa lenga ekwatafano liwa olo tu na naye. Otwa halelela okulihonga oilihongomwa iwa yomonakudiwa noku i tula moilonga. (Ovaroma 15:4) Eshi Ovaisrael va li va enda mokumona, ova li va dimbwa kutya Kalunga okwa li te va wilike okupitila muMoses. Ngeenge inatu lungama, nafye ohatu dulu yo okudimbwa kutya Jehova Kalunga nosho yo Moses Omukulunhu, Jesus Kristus, otava wilike eongalo lopaKriste kunena. (Ehololo 1:12-16) Otu na okukala twa lungama tuha kale netaleko lopanhu shi na sha noshitukulwa shehangano laJehova shokombada yedu. Okuninga ngaho otaku dulu oku tu ningifa tu kale nomhepo yokungongota noyokuhafimaneka ovakalelipo vaJehova nosho yo okuhapandula eendja dopamhepo odo hadi yandjwa okupitila ‘momupiya omudiinini nomunaendunge.’ — Mateus 24:45.

Kala wa tokola toko okweenda meitavelo

19, 20. Owa tokola toko okuninga shike, nomolwashike?

¹⁹ Ombibeli otai ti: “Ekondjo letu kali fi okukondjifa ombelela nohonde, ndelenee otu nokulwifa oovene novanaenghono, novapangeli vounyuni ou womilaulu, neemhepo dowii [mevalelwa].” (Ovaefeso 6:12) Omutondi wetu munenenene oSatana Ondiaboli. Elalakano laye olo okuteya po eitavelo letu muJehova. Ota ka longifa oshinima keshe opo e tu efife po etokolotoko letu lokulongela Kalunga. (1 Petrus 5:8) Oshike tashi ke tu amena tuha pukifwe keholokepo lokombada loinima yomonghalelo yaSatana? Enda meitavelo, hamokumona! Elineekelo momaudaneko aJehova otali ke tu kwafela opo ‘oshikepa yeitavelo letu iha teke.’ (1 Timoteus 1:19) Onghee hano, natu kaleni twa tokola toko okweenda meitavelo, twe lineekela filufilu momanangeko noupuna aJehova. Natu twikileni okwiilikana opo tu dule okuya onhapo oinima aishe oyo tai ka ningwa monakwiiwa i li popepi. —  Lukas 21:36.

²⁰ Eshi hatu ende meitavelo, ndele hamokumona, otu na Omuhopaenenwa a denga mbada. Ombibeli otai ti: “[Kristus] okwe mu hepekelwa nokwe mu fiila oshihopaelelwa mu shikule oshikoti shaye.” (1 Petrus 2:21) Oshitukulwa tashi landula otashi ka kundafana nghee hatu dulu okutwikila okweenda ngaashi ye a li a enda.

Oto dimbuluka?

• Owe lihonga shike moshihopaenenwa shaMoses noshaEsau shi na sha nokweenda meitavelo, ndele hamokumona?

• Oshinima sha fimanenena shilipi tashi tu kwafele tu henuke okuhola omaliko?

• Okweenda meitavelo ohaku tu kwafele ngahelipi tu henuke okudiladila kutya exulilo oli li kokule neenghono?

• Omolwashike okweenda mokumona kwa nyika oshiponga?

[Efano pepandja 9]

Moses okwa li a enda meitavelo

[Efano pepandja 10]

Mbela omalihafifo ohaa i luhapu moshipala omalipyakidilo oye opauteokratika?

[Efano pepandja 12]

Okupwilikina kEendjovo daKalunga otaku ku amene ngahelipi?