Okuuva ko kutya omandhindhiliko otaga ti shike oku li oshinima sha kwata miiti!
“Tango onda li tandi dhiladhila kutya omumwetumati Andreas oku uvite owala omutse. Ihe okwa li kee na ehalo lyiikulya nokwa li e niwe kolwiidhi oludhigu. Uuwehame womutse owa li wa vuka, nonda li tandi ipula. Sho omusamane gwandje e ya kegumbo, otwa fala Andreas kondohotola. Ondohotola oya li ya tala omandhindhiliko noya tumine Andreas nziya koshipangelo. Uupyakadhi kawa li owala uuwehame womutse, ihe owa li wa kwata miiti noonkondo. Andreas okwa li e na eligalala. Okwa li a pangwa nokwa li a kala ishewe nawa nziya.”—Gertrud, meme gumwe omuvali muNdowishi.
OSHIMONIWA shaGertrud otashi vulika sha faathana noshaavali oyendji. Ohaya mono omandhindhiliko tagu ulike kutya okanona kawo otashi vulika take ehama. Nonando hamukithi kehe hagu kala gwa kwata miiti, aavali ihaya vulu okwiipwililikila omandhindhiliko gaashoka tashi ehama aanona yawo. Okutala komandhindhiliko nokukatuka onkatu yi li mondjila otaku vulu okweeta po elunduluko enene. Oku li oshinima sha kwata miiti.
Shika osho shi li ngawo shi na ko nasha niinima yilwe kaayi na ko nasha nuukolele. Oshiholelwa shimwe osho oshiponga she etithwa kekuthikuthi lyomefuta shoka sha ningilwe muDesemba 2004 miitopolwa ya kundukidha Enenefuta lyaIndia. Omahangano gopapangelo momahala gamwe ngaashi Australia naHawaii oga li ga mono ekakamo edhigu lyevi lya ningwa muumbangalantu waSumatra noga li ga mono kutya oshilanduliko otashi vulu okweeta oshiponga. Ihe nonando ongaaka mehala moka kamwa li mu na omahangano ngoka taga vulu okulongithwa okulondodha aantu mboka ya li miitopolwa mbyoka ya li moshiponga. Oshilanduliko, aantu ye vulithe 220 000 oya li ya si.
Omandhindhiliko ngoka ga simana noonkondo
Sho Jesus Kristus a li kombanda yevi, okwa li a longo aapulakeni ye oshiilongomwa shokundhindhilika omandhindhiliko nokukatuka metsokumwe nago. Okwa li ta popi kombinga yasha sha simana noonkondo. Ombiimbeli otayi ti: “Aafarisayi naasadukayi oye ya kuJesus ya hala oku mu makela noye mu indile, e ya talithe oshikumithalonga shokuholola kutya ota longithwa kuKalunga. Jesus okwe ya yamukula a ti: ‘Ethimbo lyongulohi ohamu ti: “Otaku ka kala ombepo ombwanawa, oshoka egulu olya tiligana.” Ongula onene ohamu ti: “Nena otatu ka mona omvula yoshikungulu, oshoka egulu olya tiligana nolya luudha.” Omu shi kundhindhilika oshipala shegulu, ihe omandhidhiliko gomathimbo kamu shi ku ga dhimbulula.’”—Mateus 16:1-3.
Mokutumbula “omandhindhiliko gomathimbo,” Jesus okwa li u ulike kutya aapulakeni ye Aajuda yomethelemumvo lyotango oya li ya tseya kutya ethimbo moka ya li olye endelela. Onkalelo yiinima yOshijuda oya li pokwaadhika koshiponga oshinenenene shoka sha li tashi ke ya guma ayehe. Omasiku gontumba manga Jesus inaa sa, okwa li a popi naalongwa ye kombinga yendhindhiliko lilwe—endhindhiliko lyokukala po kwe. Shoka a popile ethimbo ndyoka osha simana noonkondo kukehe gumwe nena.