Aaifupipiki otaa ka thigulula evi
“Ondi inekela kutya uunshitwe otau ka lunduluka nokukala ishewe monkalo ombwanawa. . . . Itashi ningwa esiku tali landula, ihe okonima sho pwa pita ethimbo ele okuza ngashingeyi, sho tapu ka kala egulu epe nevi epe.”—Oohapu ndhoka odha popiwa kuJean-Marie Pelt, omutseyinawa gwomudhingoloko Omufulaanisa.
AANTU oyendji mboka ye uvitithwe nayi konkalo yomudhingoloko noyopankalathano kombanda yevi, otaya ka kala ya nyanyukwa okumona evi tali lundulukile moparadisa ando oshi ningwe. Ihe okukala nehalo ndyoka kashi shi oshinima oshipe. Ombiimbeli oya kala yu uvaneka nalenale kutya kombanda yevi otaku ka kala ishewe Oparadisa. Oohapu dhaJesus ndhoka tadhi ti kutya ‘aaifupipiki otaa ka thigulula evi’ nosho wo kutya “ehalo lyoye nali gwanithwe kombanda yevi wo ngaashi megulu,” odhi li dhimwe dhomoohapu dhomOmanyolo ndhoka dha tseyika kaantu oyendji noonkondo. (Mateus 5:5; 6:10) Ihe nena haantu oyendji yi itaala kutya kombanda yevi otaku ka kala oparadisa moka tamu ka kala aaifupipiki. Oyendji mboka taya ti kutya oye li Aakriste, otaya ti kutya kaku na Oparadisa.
Oshifokundaneki shokoshiwike shaFulanisa La Vie osha yelitha kutya omolwashike okwiitaala moparadisa, kutya nduno oyi li kombanda yevi nenge oyi li megulu, inaashi itaalwa we unene tuu mOngeleka yaKatoolika. Osha ti: “Konima sho elongo li na ko nasha noparadisa lya kala tali dhana onkandangala momalongo gaKatoolika uule woomvula 1 900 lwaampono, olya ka kana mo momahala gaaikaleli, momauvitho gOsoondaha, mookelesesa dhuuteolohi nomootundi dhokwiilonga okatekisa.” Yamwe otaya dhiladhila kutya oshitya Oparadisa kashi shi oshipu okuuviwa ko notashi etitha engwangwano. Aauvithi yamwe inaya hala oku shi longitha owina molwaashoka otashi “gandja omadhiladhilo ogendji noonkondo kombinga yenyanyu lyokombanda yevi.”
Frédéric Lenoir, omutseyi gwonkalo ngoka a tseya nawa omalongelokalunga, okwa ti kutya edhiladhilo lyoparadisa kali li we ngaashi “lya li petameko.” Jean Delumeau, omunandjokonona noku li omunyoli gwomambo ogendji kombinga yoparadisa ota dhiladhila kutya omauvaneko gOmbiimbeli itaga ka gwanithilwa kombanda yevi, ihe opamwe pwi ili. Okwa nyola ta ti: “Kepulo kutya, ‘ongiini shi na ko nasha noparadisa?’ elongo lyopaKriste otali gandja eyamukulo tali ti: Molwaashoka Omuhupithi gwetu okwa yumuka, esiku limwe atuheni otatu ka tsakanena nokunyanyukilwa pamwe sho etegameno lyetu tali ka kala lya gwanithwa.”
Mbela etumwalaka kombinga yoparadisa kombanda yevi otali ti sha ngaa natango? Mbela evi otali ka kala naanaa li li ngiini monakuyiwa? Mbela otali ka lundulukila ngaa kuuwanawa, nenge ongiini? Oshitopolwa tashi landula otashi ka gadja eyamukulo komapulo ngaka.