Openi pu na Oparadisa ndjoka ya popiwa mOmbiimbeli? — ONGULUMAMBO MOINTANETA yiileshomwa yopaMbiimbeli

Aaleshi yoshifo shetu taya pula

Openi pu na Oparadisa ndjoka ya popiwa mOmbiimbeli?

▪ Jesus oku uvanekelele omulumentu ngoka a li pokusa ngoka a li ulike lela kutya okwe mu itaala, a ti: “Oto ka kala pamwe nangame mOparadisa.” (Lukas 23:43) Omulumentu ngoka ota ka kala moparadisa peni? Mbela Oparadisa ndjoka oya li tayi ka kala megulu, okombanda yevi nenge omehala lilwe moka aantu ya tegelela okupangulwa?

Ootatekulululwa oya li nale ya kala mOparadisa. Ombiimbeli otayi tu lombwele tayi ti: “OMUWA Kalunga okwa toto eyana muEden, kuuzilo, nokwa langeke mo omuntu ngoka e mu shiti. . . . Okwa langeke omuntu meyana lyaEden, opo e li longe ye e li keelele.” (Genesis 2:8, 15) Sho oohapu ndhoka dha li dha tolokwa mOshigreka, oshitya “eyana” osha li sha tolokwa paraʹdeisos, hoka kwa za oshitya shOshiingilisa “oparadisa.”

Ngaashi owala aaihokani taya ka gwedhela egumbo lyawo uuna ye na aanona oyendji, osho wo aavali yetu yotango ya li ya tegelelwa ya tamunune mo Oparadisa yi vulithe poshikunino shaEden sho uukwanegumbo waantu tawu koko. Kalunga okwa li e ya lombwele a ti: “Valathaneni, ne mu indjipale nokuudha evi alihe.”—Genesis 1:28.

Elalakano lyOmushiti gwetu olya li aantu ya kale nomwenyo e taya vala aanona mOparadisa huka kombanda yevi. Oya li taya ka kala sigo aluhe moshikunino kombanda yevi moka mwa li itaamu ka kala omayendo. Evi olya li li na okuninga egumbo lyaantu ayehe sigo aluhe. Kapu na omalimbililo kutya iinima oyindji mbyoka ya shitilwa kevi ohayi tu nyanyudha noonkondo. Otwa li twa shitwa tu kale nomwenyo kevi ewanawa.

Mbela elalakano lyaKalunga olya lunduluka? Aawe. Molwaashoka Jehova ote tu shilipaleke ta ti: “Osho wo oohapu dhandje tadhi zi mokana kandje, itadhi galukile kungame owala inaadhi gwanitha ehalo lyandje; otadhi tsakanitha elalakano ndyoka nde dhi li tumine.” (Jesaja 55:11) Oomvula dhi vulithe 3 000 konima yokushitwa kwomuntu, Ombiimbeli oya popi kombinga yaangoka ‘a tholoma evi’ kutya “ine li shita li mbugale,” ihe oli kale “ehala lyokukala aantu.” (Jesaja 45:18) Ehalo lyaKalunga inali lunduluka. Natango evi otali ka ninga oparadisa.

Shihokitha osho kutya omahokololo ogendji gOmbiimbeli kombinga yOparadisa otaga popi owala nkene onkalamwenyo tayi ka kala kombanda yevi. Pashiholelwa, ehunganeko lyaJesaja otali ti: “Otaa ka tunga omagumbo, opo ya kale mo yo yene. Otaa ka tsika omiviinu, opo ya lye iiyimati yadho yo yene.” (Jesaja 65:21) Openi hapu tungwa omagumbo nohapu tsikwa omiviinu? Openi hapu liwa iiyimati? Okombanda yevi owala. Omayeletumbulo 2:21 otaga yelitha taga ti: “Aayuuki otaa kala moshilongo.”

Jesus naye okwa li wo a popi kombinga yoparadisa yokombanda yevi. Uushili owo kutya okwa li u uvaneke kutya opu na mboka taya ka ya moparadisa yomegulu, ihe oohandimwe owala ya hogololwa. (Lukas 12:32) Konima ngele ya si, ohaya yumudhilwa mOparadisa yomegulu e taya kala pamwe naKristus ya pangele Oparadisa yokombanda yevi. (Ehololo 5:10; 14:1-3) Aantu mbaka taya ka pangela megulu otaya ka shilipaleka kutya Oparadisa kombanda yevi otayi pangelwa nawa nopamithikampango dhaKalunga.

Jesus okwa li e shi shi kutya ndika olyo lya li elalakano lyaKalunga li na ko nasha nevi. Kakele kaashono, okwa li megulu naHe sho oshikunino shaEden sha shitwa. Onkalamweno ndjoka twa tegelela moparadisa yokombanda yevi oye egulukila aantu ayehe mboka ye na eitaalo tali longo kunena. (Johannes 3:16) Jesus otu uvanekele aantu mboka ta ti: ‘Otamu ka kala pamwe nangame mOparadisa.’—Lukas 23:43.

[Edhina lyomuthaneki gwethano pepandja 10]