Daniel nokakalata ke koshigongi shoshitopolwa

JESUS okwa li a ganda aawiliki yomalongelokalunga yi ishi uuyuuki mboka ya li ya geya sho ya li ya mono aanona taya tanga Kalunga montaneho. Jesus okwa li e ya pula epulo lye eleka a ti: “Inamu lesha nani nando lumwe, sho taku tiwa: ‘Momakana guunona noguuhanona owa longekidhile mo ehambelelo’?”—Mateus 21:15, 16.

Daniel ngoka e na oomvula hamano gwomegongalo lyOshirusia muNdowishi, otu ulike kutya opu na natango aanona mboka taya tanga Jehova. Ye nayina nomumwayinakadhona oya li ya kala poshigongi shoshitopolwa shOonzapo dhaJehova muDuisburg. Shika osha li oshikando shotango taya kala poshigongi oshinene sha tya ngaaka. Iinima ayihe oya li iipe kuyo: ohotela, aapulakeni oyendji, okukala ya kuutumba ya mwena uule womasiku gatatu, eninginitho nosho wo oshinyandwa. Ihe Daniel okwa li i ihumbata ngiini? Eihumbato lye olya li li shi okuholelwa.

MOmaandaha konima yoshigongi, sho ya li ishewe ye li pegumbo, Daniel okwa penduka ongula onene a ye kosikola yoshikunino. Ihe oshike sha li natango kombaikitha ye? Okakalata hoka ka li ku ulike kutya ye omudhani gwoshigongi. Yina okwa li e mu yelithile a ti: “Oshigongi osha pwa. Nena oto vulu okukutha ko okakalata koye.” Ihe Daniel okwa ti: “Onda hala kehe gumwe a mone mpoka nda li nokutseya shoka ndi ilonga ko.” Onkee ano esiku alihe kosikola okwa li a zala okakalata ke e ku uvitile uuntsa. Sho omulongi gwawo a li e mu pula kombinga yako, okwa li e mu hokololele shoka sha li sha popiwa koshigongi.

Mokuninga ngawo, Daniel okwa landula oshiholelwa shaamati naakadhona omayuvi mboka ya li ya tanga Jehova montaneho omathelemimvo ga piti.