Natu ulikeni efimaneko li na sha nokwoongala kwetu kuyapuki
“Ohandi ke va twala komhunda yange iyapuki, ndele handi ke va hafifa mongulu yange yeilikano.” — JESAJA 56:7.
1. Omatomheno opamishangwa elipi tu na oo tae tu ningifa tu kale tu na efimaneko lashili li na sha nokwoongala kwetu?
JEHOVA okwa ongela oshiwana shaye, Ovakriste ovavaekwa nosho yo oovakwao veedi dimwe, ve mu longele ‘komhunda yaye iyapuki.’ Ote va hafifa ‘mongulu yaye yeilikano,’ sha hala okutya, motembeli yaye yopamhepo, oyo i li “ongulu yeilikano yovanhu aveshe.” (Jesaja 56:7; Markus 11:17) Mokwoongela oshiwana shaye opo shi mu longele, Jehova okwa ulika kutya okwa tala ko elongelokalunga lashili li li oshinima shiyapuki, sha koshoka nosha tumbala. Ohatu ulike kutya otu na etaleko la fa laJehova li na sha noinima iyapuki mokukala nefimaneko lashili li na sha nokwoongala kwetu oko haku tu pe omhito yokukonakona Eendjovo daye noku mu longela.
2. Oshike tashi ulike kutya Jehova okwa li a tala ko onhele oyo a li a hoolola omo a kale ta longelwa i li iyapuki, na Jesus okwa li a ulika ngahelipi kutya naye okwa li e na etaleko la fa laJehova?
2 MuIsrael shonale, onhele oyo Jehova a li a hoolola omo a kale ta longelwa okwa li i na okutalwa ko iyapuki. Etwali, naashishe osho sha li mo, mwa kwatelwa oikwatelwa yamo, oya li i na okuvaekwa nokuyapulwa opo “i shiive okukala oiyapukielela.” (Exodus 30:26-29) Oitukulwa ivali yometwali oya li hai ifanwa ‘Ouyapuki’ nosho yo ‘Ouyapukielela.’ (Ovaheberi 9:2, 3) Konima yefimbo, etwali ola ka pingenwa po kotembeli yomuJerusalem. Jerusalem osha li hashi ifanwa ‘oshilando shiyapuki,’ molwaashi osha li ondingandinga yelongelokalunga lashili. (Nehemia 11:1; Mateus 27:53) Pefimbo loukalele waye wokombada yedu, Jesus okwa li a fimaneka elongekido lotembeli. Osho okwe shi ulika eshi kwa li a handukila neenghono ovanhu ovo va li hava longifa oshihale shotembeli nokuhenefimaneko shi li onhele yomalandifilo noku shi longifa shi li ondjila ixupi yokweendela ngeenge tava tavakana muJerusalem. — Markus 11:15, 16.
3. Oshike tashi ulike kutya oyoongalele yOvaisrael oya li iyapuki?
3 Ovaisrael ova li ve na ondjikilile yokwoongala pamwe opo va longele Jehova nova pwilikine kOmhango yaye eshi tai leshwa. Mokuulika kutya okwoongala kwavo okwa li kuyapuki, omafiku amwe oivilo yavo okwa li haa ifanwa oyoongalele iyapuki. (Leviticus 23:2, 3, 36, 37) Poshoongalele shimwe osho sha li sha ningwa pefimbo laEsra naNehemia, Ovalevi ova li va “longa ovanhu omhango.” Molwaashi ‘oshiwana ashishe osha li tashi lili, eshi sha uda eendjovo domhango,’ Ovalevi ova li “va ngungumaneka oshiwana ashishe ndee tava ti: Mweneni! Osheshi efiku eli oliyapuki.” Onghee hano, Ovaisrael ova li va dana Oshivilo shOmatwali osho shomafiku aheyali ‘nehafo linene.’ Pefimbo olo, ‘okwa li kwa leshwa membo lomhango yaKalunga keshe efiku, okudja kefiku lotete fiyo kefiku laxuuninwa. Ndele va dana oshivilo omafiku a-7 ndele mefiku eti-8 okwa li oshoongalele shoshivilo pamalombwelo.’ (Nehemia 8:7-11, 17, 18) Eemhito da tya ngaho oda li shili diyapuki nomolwaasho okwa li tashi pula ovakalipo va pwilikine nefimaneko.
Okwoongala kwetu okuyapuki
4, 5. Oinima ilipi tai ulike kutya okwoongala kwetu okuyapuki?
4 Kunena, Jehova ke na oshilando shiyapuki kombada yedu, osho shi na otembeli ye likalekelwa, oyo ya yapulilwa elongelokalunga lashili. Ndele nande ongaho, katu na okudimbwa kutya okwoongala kwetu ku na sha nelongelokalunga okuyapuki. Ohatu ongala lutatu moshivike, opo tu leshe nokukonakona pamwe Omishangwa. Ngaashi sha li pefimbo laNehemia, ohatu ‘fatululilwa’ Eendjovo daJehova pokwoongala kwetu ‘opo tu kale tu udite ko osho sha leshwa.’ (Nehemia 8:8) Pokwoongala kwetu keshe kweongalo, ohatu hovele nohatu xulifa neilikano; peemhito dihapu dokwoongala ohatu imbi omaimbilo okuhambelela Jehova. (Epsalme 26:12) Okwoongala kweongalo oku li shili oshitukulwa shelongelokalunga letu notu na oku ku fimaneka nokukala hatu pwilikine nelitulemo.
5 Jehova oha nangeke noupuna ovapiya vaye ngeenge va ongala pamwe ve mu longele, va konakone Eendjovo daye nova hafele eendafano tali tungu novaitaveli vakwao. Ohatu dulu okukala noushili kutya Jehova ota ‘yandje enangeko noupuna’ ngeenge twa ongala pamwe. (Epsalme 133:1, 3) Ohatu ka nangekwa noupuna ngeenge otwa kala hatu kala pokwoongala nokupwilikina nelitulemo koinima yopamhepo oyo ye tu longekidilwa. Natango, Jesus okwa ti: “Oku ku na vavali ile vatatu va ongala medina lange, Ame ondi li mokati kavo.” Paulelalela, eendjovo odo oda li da yukifwa kovakulunhuongalo Ovakriste ovo hava ongala pamwe opo va ungaunge nomaupyakadi a kwata moiti oo haa holoka pokati koohandimwe, ndele efinamhango olo otali longo yo shi na sha nokwoongala kwetu kweongalo. (Mateus 18:20) Ngeenge Kristus oha kala mokati kOvakriste okupitila momhepo iyapuki ngeenge va ongala pamwe medina laye, mbela katu na okutala ko okwoongala kwa tya ngaho kuyapuki?
6. Otu na okutala ko ngahelipi eenhele detu dokwoongalela, ile odo hatu longifa okuningila oyoongalele?
6 Oshoshili kutya Jehova iha kala meetembeli da tungwa kovanhu. Ndele nande ongaho, omalupale etu Ouhamba oku li eenhele delongelokalunga lashili. (Oilonga 7:48; 17:24) Oko hatu ongala opo tu konakone Eendjovo daye, oku mu ilikana noku mu imbila omaimbilohambelelo. Ohatu ningi yo sha faafana mOmalupale Oyoongalele. Eenhele omo hatu ningile oyoongalele — ngaashi omalupale aaveshe, eenhele domaulikilo ile oupale vomaudano — ohadi ningi eenhele delongelokalunga dokwoongala kwetu kuyapuki pefimbo opo hatu di longifa. Oshi na okukala shi li wetikile okupitila moikala yetu nosho yo melihumbato letu kutya ohatu fimaneke eemhito dokwoongala da tya ngaho delongelokalunga, kutya nee otaku ningilwa monhele ya tya ngahelipi.
Eenghedi omo hatu dulu okuulika kutya otwa fimaneka okwoongala kwetu
7. Onghedi imwe ilipi omo hatu dulu okuulika kutya otwa fimaneka okwoongala kwetu?
7 Ope na eenghedi dihapu omo hatu dulu okuulika kutya otwa fimaneka okwoongala kwetu. Onghedi imwe omokukufa ombinga mokwiimba omaimbilo Ouhamba. Mahapu omomaimbilo oo oku li monghedi yomailikano noku na okwiimbwa netilofimaneko. Omuyapostoli Paulus okwa tofa eendjovo odo di li mEpsalme 22, tadi ulike kunghee Jesus a li e udite shi na sha nokwiimbila Jehova, tadi ti: “Edina loye onda hala oku li shiivifila ovakwetu nomokati keongalo ohandi ku imbile ehambelelo.” (Ovaheberi 2:12) Onghee hano, otu na okukala omutumba fimbo omunashipundi ina shiivifa eimbilo olo hatu ka imba notu na okukala hatu imbi hatu diladila keendjovo deimbilo olo hatu imbi. Okwiimba kwetu naku kale taku holola omaliudo a fa omupsalme oo a shanga a ti: “Onda hala okutanga Omwene nomutima aushe mongudu yovayuki nomeongalo.” (Epsalme 111:1) Okwiimbila Jehova omaimbilohambelelo oku li etomheno limwe lokukala hatu fiki kuyele pokwoongala nokukala po fiyo okwoongala kwa dimbuka.
8. Oshihopaenenwa shilipi shomOmbibeli tashi ulike kutya otwa pumbwa okupwilikina nelitulemo nosho yo netilofimaneko komailikano oo haa ilikanwa pokwoongala?
8 Oshinima vali shimwe osho hashi ningifa okwoongala kwetu ku kale taku ti sha osho omailikano taa di komutima oo haa ilikanwa ponhele yaaveshe ovo va ongala. Pomhito imwe, Ovakriste vomefelemudo lotete ova li va ongala muJerusalem ndele tava “twala ondaka yavo pombada kuKalunga ngaashi omunhu umwe,” tava ilikana va mana mo. Oshidjemo, ova li va twikila ‘okupopya nouladi eendjovo daKalunga,’ nonande opa li omahepeko. (Oilonga 4:24-31) Mbela opa li vamwe ovo omadiladilo avo a li taa twalwatwalwa ofimbo kwa li taku ilikanwa? Ahowe, aveshe ‘ova li va twala ondaka yavo pombada kuKalunga ngaashi omunhu umwe.’ Ovo hava ilikana ponhele yeongalo pokwoongala kwetu ohava holola omaliudo ovakalipo aveshe. Onghee hano, otwa pumbwa okupwilikina nelitulemo nosho yo netilofimaneko komailikano oo.
9. Ongahelipi hatu dulu okuulika kutya otwa fimaneka okwoongala kwetu kuyapuki okupitila mokudjala kwetu nosho yo melihumbato letu?
9 Natango, ohatu dulu okuulika kutya otwa fimaneka neenghono okwoongala kwetu okupitila monghedi yetu yokudjala. Eholokepo letu, sha hala okutya, omidjalo detu nonghedi omo hatu wapeke omitwe detu, otali dulu okufimanekifa okwoongala kwetu. Omuyapostoli Paulus okwa kumaida Ovakriste vakwao a ti: “Onda hala ovalumenhu va ilikane apeshe va yelula omaoko mayapuki ve he nehandu nove he neenhamanana. Osho yo ovakainhu nava djale oikutu tai wapala eenghedi diwa nokuliwapeka noshishohoni noukoshoki, haneexwiki da vindwa ile noulenga woshingoldo ile noshilanda ile noikutu youkengeli ei tai landwa nondilo, ndelenee onoilonga iwa ei tai wapalele ovakainhu ovo [tave] lihepaulula kutya, vo oonakutilakalunga.” (1 Timoteus 2:8-10) Ngeenge hatu i koyoongalele ya kula oyo hai ningilwa moupale vomaudano, otu na okudjala omidjalo tadi wapalele, nonande oku na oupyu. Natango, ohatu dulu okuulika kutya otwa fimaneka eemhito doyoongalele mokuhenuka okukala hatu li pefimbo lomutumba ile hatu taafina oshigamu. Okudjala monghedi tai wapalele nosho yo okulihumbata nawa pokwoongala kwetu otaku ulike kutya otwa fimaneka Jehova Kalunga, elongelokalunga letu nosho yo ovalongelikalunga vakwetu.
Elihumbato olo tali wapalele ovapiya vaKalunga
10. Omuyapostoli Paulus okwa ulika ngahelipi kutya otwa pumbwa okulihumbata nawa ngeenge tu li pokwoongala kwetu kwopaKriste?
10 MOvakorinto votete, etukulwa 14, omuyapostoli Paulus okwa yandja omayele opandunge e na sha nanghee okwoongala kwopaKriste ku na okuningwa. Okwa xulifa a ti: “Aishe nai ningwe keenghedi diwa nokushikulafana.” (1 Ovakorinto 14:40) Okwoongala kwetu kweongalo oku li oshitukulwa sha fimana shomalipyakidilo etu opaKriste, onghee hano, tu li ovapiya vaJehova otwa pumbwa okulihumbata monghedi tai wapalele.
11, 12. (a) Oshike osho ovadali Ovakriste ve na okuhonga ovana vavo kombinga yokwoongala kwetu? (b) Omonghedi ilipi ounona tava dulu okuulika eitavelo lavo pokwoongala?
11 Ounona ovo unene va pumbwa okuhongwa nghee ve na okulihumbata pokwoongala. Ovadali Ovakriste ove na okuyelifila ovana vavo kutya Olupale lOuhamba nosho yo eenhele omo hamu ningilwa Omakonakono Embo Eongalo kadi fi eenhele dokudanaukila, ndele odi li eenhele omo hatu longele Jehova nokukonakona Eendjovo daye. Ohamba inaendunge Salomo oya shanga ya ti: “Amena omhadi yoye ngenge to i kongulu yaKalunga. Okuuya nokupwilikina ku dule etomenoyambo lomalai.” (Omuudifi 4:17) Moses okwa li a honga Ovaisrael, ovakulunhu “nounona,” va kale hava ongala pamwe. Okwa ti: ‘Ongela oshiwana opo shi shiive okuuda nokulongwa okutila Omwene Kalunga keni nokudiinina shili eendjovo adishe domhango ei. Nounona ava inave i shiiva, ove na okuuda nokulongwa okutila Omwene Kalunga.’ — Deuteronomion 31:12, 13.
12 Sha faafana nokunena, ovanyasha ohave uya kokwoongala pamwe novadali vavo opo va pwilikine nova hongwe. Ngeenge ova kala hava yandje elitulemo ndele tave lihongo omahovelohongo Ombibeli, otava ka dula ‘okuhepaulula nokanya’ eitavelo lavo mokuyandja omatyekosha e li pauxupi. (Ovaroma 10:10) Omunyasha ota dulu okuyandja etyekosha li li pauxupi kepulo olo e udite ko. Potete, otashi dulika a kale ta nyamukula ta lesha, ndele mokweendela ko kwefimbo, ota ka dula okuyandja omatyekosha aye noitya yaye mwene. Osho ohashi tungu ounona nohashi va hafifa. Kaleke kaasho, omanyamukulo a tya ngaho taa di komutima notaa ulike kutya ove na eitavelo ohaa hafifa ovakalipo pokwoongala. Ngeenge ovadali tava yandje omatyekosha pokwoongala, otava tulile po ovana vavo oshihopaenenwa shiwa. Oshiwa okweefa okaana ka kale ke na Ombibeli yako vene, eimbilo lako nosho yo oshileshomwa osho tashi konakonwa, ngeenge otashi shiiva. Ounona ove na okuhongwa va kale hava ungaunga nefimaneko noishangomwa oyo. Oinima aishe oyo otai ka honga ounona va kale ve shii kutya okwoongala kwetu okuyapuki.
13. Otwa hala ovanhu ovo tave uya oshikando shotete pokwoongala kwetu ve tu tale ko ngahelipi?
13 Inatu hala nandenande okwoongala kwetu ku kale kwa faafana naako kweengeleka dOukwakriste. Oilyo yeengeleka odo ihai kala i na ko nasha noilyo ikwao nohai kala i lishii ouyuki, nomeengeleka dimwe ovanhu ohava kala tava ningi omaweelelo va fa ve li peendingosho. Otwa hala okukala hatu ulike ohamu noukaume pokwoongala kwetu pOlupale lOuhamba; ndele katu na okukala hatu ningi omaweelelo twa fa ovanhu ve li peendingosho. Otu na okuulika alushe efimaneko shi na sha nokwoongala kwetu, molwaashi ohatu ongala pamwe opo tu longele Jehova. Otwa hala ovo have uya pokwoongala kwetu okupwilikina kouyelele oo tau yandjwa va mone elihumbato letu liwa nolovana vetu, nova dimine kutya “Kalunga oku li shili mokati [ketu].” — 1 Ovakorinto 14:25.
Okwoongala oku li oshitukulwa shelongelokalunga letu tashi kalele
14, 15. (a) Ongahelipi hatu dulu okuhenuka ‘okweefa ongulu yaKalunga ketu’? (b) Jesaja 66:23 ota wanifwa ngahelipi kunena?
14 Ngaashi sha popiwa nale pehovelo loshitukulwa eshi, Jehova ota ongele oshiwana shaye note shi hafifa ‘mongulu yaye yeilikano,’ otembeli yaye yopamhepo. (Jesaja 56:7) Omulumenhu omudiinini Nehemia okwa li a dimbulukifa Ovajuda vakwao va ulike efimaneko lashili li na sha notembeli moku i yambidida noiniwe yavo. Okwa popya a ti: “Inatu hala okweefa ongulu yaKalunga ketu.” (Nehemia 10:39) Kakele kokuyambidida elongelokalunga lashili noiniwe yetu, otu na okukala twa lenga eshivo laJehova li na sha noku mu longela ‘mongulu yaye yeilikano.’
15 Mokuulika kutya osha fimana okukala hatu i kokwoongala pandjikilile omolwokulongela Jehova, Jesaja okwa xunganeka a ti: “Keshe omwedi mefiku lohani ipe nakeshe oshivike mefiku leshabata, ombelela aishe otai ka ongala koshipala shange okulinyongamena, Omwene ta ti.” (Jesaja 66:23) Exunganeko olo otali wanifwa kunena. Ovakriste ve liyapulila Jehova ohava ongala pamwe oshivike keshe, shi li oshitukulwa shelongelokalunga lavo. Ohava ongala pamwe, pashihopaenenwa, pokwoongala kwopaKriste nosho yo ngeenge tava kufa ombinga moukalele womoipafi. Mbela ou li umwe womwaavo hava ‘ongala pandjikilile koshipala shOmwene oku mu linyongamena’?
16. Omolwashike tu na okukala hatu i pandjikilile kokwoongala kwopaKriste paife?
16 Jesaja 66:23 ota ka wanifwa pauyadi mounyuni mupe oo Jehova a udaneka. Pefimbo olo, “ombelela aishe,” otai ‘ka ongala koshipala shOmwene noku mu linyongamena’ oshivike keshe nomwedi keshe, sha hala okutya, ohatu ka twikila okukala hatu ongala omolwelongelokalunga fiyo alushe. Molwaashi okwoongala pamwe omolwelongelokalunga otaku ka kala oshitukulwa tashi kalelele shomalipyakidilo etu opamhepo monghalelo ipe yoinima, mbela inashi fimana okukala hatu i pandjikilile kokwoongala kwetu kuyapuki paife?
17. Omolwashike twa pumbwa okukala hatu i kokwoongala ‘unene tuu eshi hatu mono efiku laJehova tali ehene popepi’?
17 Eshi exulilo tali ehene popepi, otu na okukala twa tokola toko shi dulife nale okukala hatu i kokwoongala kwopaKriste. Molwaashi otwa fimaneka okwoongala kwetu notwe ku tala ko kuyapuki, katu na okweefa oilonga yokulikongela omboloto, oilonga yokofikola ile eefikola dokonguloshi i tu imbe okukala hatu i kokwoongala pandjikilile. Otwa pumbwa okupamekwa mokweendafana novaitaveli vakwetu. Okwoongala ohaku tu pe omhito tu shiivafane novaitaveli vakwetu notu twaafane omukumo “mohole nomoilonga iwa.” Otwa pumbwa okwoongala pamwe nokutwaafana omukumo ‘unene tuu eshi hatu mono efiku laJehova tali ehene popepi.’ (Ovaheberi 10:24, 25) Onghee hano, natu kale alushe hatu ulike efimano lashili li na sha nokwoongala kwetu kuyapuki mokukala hatu i kokwoongala pandjikilile nosho yo mokudjala nokulihumbata monghedi tai wapalele. Mokukala hatu ningi ngaho, ohatu ulike kutya otu na etaleko la fa laJehova li na sha noinima iyapuki.
[Efano pepandja 28]
Okwoongala kwetu ku na sha nokulongela Jehova okuyapuki, kashi na nee mbudi kutya otaku ningilwa peni
[Efano pepandja 31]
Ovana vetu ohava kala pokwoongala opo va pwilikine nove lihonge
[Efano pepandja 31]
Omapulo eendululo
• Oshike tashi ulike kutya okwoongala kwoshiwana shaJehova oku na okutalika ko kuyapuki?
• Oinima ilipi i na sha nokwoongala kwetu tai ulike kutya okuyapuki?
• Ongahelipi ounona tava dulu okuulika efimaneko shi na sha nokwoongala kwetu kuyapuki?
• Omolwashike tu na okukala hatu i kokwoongala pandjikilile paife?