Omupondo oshike to dhiladhila osho tashi gu etitha?

JESSE LIVERMORE ngoka a li a talika ko kuyamwe e li omunangeshefa dhingi, okwa li a tseyika nawa kutya oha ningi omatokolo gopandunge ge na ko nasha noongeshefa. Oshizemo shaashoka, okwa li i igongelele omaliko ogendji noonkondo. Okwa li ha zala ooshuta dha hondjekeka noha kala megumbo enene ndyoka li na oondunda 29 nokwa li he ende mohautu yondilo onduudhe ndjoka a li ha hingilwa.

Omulumentu gwedhina Davida naye wo okwa li a lalakanene onkalamwenyo ya faathana. Okwa li omupehapresidende nomenindjela onkuluntu yehangano enene lyopangeshefa nokwa li pokuninga gumwe gwomaapresidende yehangano ndyoka. Okwa li e li pokuninga omuyamba nokwa simana. Ihe nando ongaaka, David okwa li a ningi etokolo opo e ethe po iilonga mehangano ndyoka. Okwa ti: “Ondi shi shi kutya kandi na we siku ndi ka mone ondondo yopombanda miilonga ya fa ndjoka nda li ndi na.” Mbela oto dhiladhila kutya David okwa li a ningi epuko?

Oyendji ohaya dhiladhila kutya oku shi pondola okwa kwatela mo uuyamba, okukala u holike nenge wa simanekwa. Ihe mboka ye na iinima yopamaliko otashi vulika ya kale kaaye na ombili noya kale kaaye shi elalakano lyonkalamwenyo kutya olyashike. Shoka osha li shi iwetikile nawa monkalamwenyo yomulumentu Livermore. Nonando okwa li e na omaliko ogendji, okwa li a kala nonkalamwenyo ndjoka yiyemateka, yu udha iiponga noyinikitha oluhodhi. Okwa li a kwatwa kepolimano, okwa li ha hokana ihe oondjokana dhe kadha li hadhi kalelele noka li e na ekwatathano ewanawa naanona ye. Lwahugunina konima sho a li a kanitha iimaliwa ye oyindji, esiku limwe omulumentu nguka Livermore okwa li a kuutumba mondunda yimwe yomanwino mohotela yondilo nokwa li a nika oluhodhi omolwekanitho lye. Okwa li a pula sha shokunwa, nokonima yaashono okwa li a kutha mo okambo ke kiidhimbulukiwanyolwa ke li moshipeko shoshipa e ta nyolele mo omukulukadhi gwe oohapu dhelaleko. Sho a mana okunwa, okwa yi mokandunda kamwe moka mwa li mwa luudha kashona nokwa li i idhipaga.

Nonando opu na omatompelo ogendji ngoka hagi idhipagitha aantu, oshimoniwa shika otashi gandja uushili waashoka Ombiimbeli tayi ti: “Mboka ya hala okuninga aayamba . . . [oya] yono po oomwenyo dhawo niimpwiyu oyindji.”—1 Timoteus 6:9, 10.

Mbela mboka haya ti kutya opo u shi pondole monkalamwenyo ongele owala u na omaliko, ondondo yontumba nenge esimano oya puka mokupopya ngawo? Mbela ngoye ou wete we shi pondola? Omolwashike? Omithikampango dhini ho longitha okuthika pehulithodhiladhilo ndyoka? Oshike hashi nwetha mo etaloko lyoye li na ko nasha noku shi pondola? Oshitopolwa shoka tashi landula ko otashi popi kombinga yomayele ge shi okwiinekelwa ngoka ga kwathela aantu omamiliyona ye shi pondole monkalamwenyo yawo. Natu tale nkene nangoye to vulu oku shi pondola monkalamwenyo yoye.

[Enyolo lyopevi]