Nkene to vulu oku shi pondola

NGAASHI owala aavali haa sile oyana oshimpwiyu noya hala ye shi pondole, osho wo naTate yetu gwomeulu he tu sile oshimpwiyu nokwa hala tu shi pondole monkalamwenyo. Opo e tu ulikile kutya oku tu nine olukeno, okwe tu pe omauyelele ogendji kombinga yankene tu na oku shi pondola nonkene tatu vulu okuyanda okwaahe shi pondola. Odhoshili kutya Ombiimbeli otayi shi tumbula sha yela nawa sho tayi popi kombinga yomuntu ngoka ha pulakene komalombwelo gaKalunga, tayi ti: “Ashihe shoka [te] shi longo, otashi eta eyambeko.”—Episalomi 1:3.

Ihe ngele osho shi li ngawo, omolwashike oyendji inaaye shi pondola okukala nonkalamwenyo yi na elago negwaneno? Ngele tatu tala nawa kepisalomi ndika, otatu ka mona eyamukulo notali tu ulikile kutya ongiini natse tatu vulu oku shi pondola.

“Oondunge dhaagoyoki”

Omupisalomi ota londodha kutya oshi li oshiponga ngele tatu landula “oondunge dhaagoyoki.” (Episalomi 1:1) Omugoyoki omunene nenge ‘omwiinayi’ oye Satana Ondiaboli. (Mateus 6:13) Omanyolo otage tu lombwele kutya oye “omupangeli gwuuyuni mbuka” nonokutya “uuyuni auhe ou li mepangelo lyomuhindadhi.” (Johannes 16:11; 1 Johannes 5:19) Onkee ano, itashi kumitha sho omayele ogendji ngoka taga adhika muuyuni tagu ulike omadhiladhilo gomugoyoki ngoka.

Aagoyoki ohaya gandja omayele goludhi luni? Olundji aagoyoki oya dhina Kalunga. (Episalomi 10:13) Oondunge dhawo dhokwiipwililika Kalunga nenge dhoku mu dhina, odhi li apuhe. Uuyuni wonena otau humitha komeho “uuhalu wopantu okuhola mbyoka aantu taye yi tala notaye yi itangele.” (1 Johannes 2:16) Iikundaneki otayi tu hwahwameke tu kale tu na iinima oyindji yopamaliko, tayi ti kutya otu na okwiimonena ashihe shoka twa hala monkalamwenyo yetu. Muuyuni auhe, omahangano ohaga longitha oodola dhaNamibia omabiliyona 3,3 omvula kehe mokuninga omatseyitho tagi itaalitha aantu opo ya lande iilandithomwa yawo, kutya nduno oye yi pumbwa nenge hasho. Omatseyitho ngoka inaga lundulula owala omikalo dhaantu dhokulanda, ihe oga nwetha mo wo etaloko lyuuyuni li na ko nasha noku shi pondola.

Oshizemo, nokuli nonando aantu oyendji oye na iinima mbyoka oomvula dha piti ya li tayi vulu okulandwa kaantu aashona yowala, onkene ngaa ye na natango ehalo enene okukala ye na omaliko ogendji. Otaya dhiladhila kutya ngele ku na iinima mbyoka, ito vulu okukala u uvite elago nenge ito vulu oku shi pondola monkalamwenyo yoye. Omadhiladhilo ga tya ngaaka kage shi goshili noinaga ‘za muTate, ihe ogomuuyuni.’—1 Johannes 2:16.

Omushiti gwetu oku shi nawa shoka tashi tu ningitha tu shi pondole shili. Omayele ge oga yooloka ko ‘koondunge dhaagoyoki.’ Onkee ano okukambadhala okuhokiwa kuKalunga manga tatu ende mondjila ndjoka uuyuni tau ti otayi fala koku shi pondola, okwa faathana nokweenda moondjila mbali dha yoolokathana pethimbo limwe alike. Shoka shi li itaashi vulika nando. Ano itashi kumitha sho Ombiimbeli tayi tu londodha tayi ti: “Inamu faathana nonkalo yuuyuni mbuka.”—Aaroma 12:2.

Ino etha uuyuni u ku nwethe mo

Uuyuni mbuka u li kohi yenwethomo lyaSatana otau kambadhala okukala wa fa u na ko nasha nonkalonawa yetu. Ihe otu na okukala twa kotoka. Dhimbulukwa kutya molwaashoka Satana okwa li i ihole ye mwene, okwa li a pukitha omukiintu gwotango Eva. Konima yaashono Satana okwa li a longitha Eva a nwethe mo Adam a yone wo. Kunena Satana oha longitha wo aantu okutaandelitha oondunge dhe dhuugoyoki.

Pashiholelwa, David ngoka a tumbulwa moshitopolwa sha tetekele, okwa li a tegelelwa a longe oowili dha gwedhwa po noku ye momalweendo ogendji ge na ko nasha nongeshefa. David okwa ti: “Onda li handi yi molweendo ongula onene yOmaandaha nonda li handi galuka kongulohi mEtine.” Ookuume ke, aakwanezimo naaniilonga pamwe naye oya li taya dhiladhila kutya okwiiyamba koludhi ndoka okwa li kwa pumbiwa opo e shi pondole muuyuni, onkee ano oya li ye mu ladhipike taya ti: “Dhiginina iilonga mbyoka omolwuuwanawa wegumbo lyoye.” Oya li ya ti kutya okwa li e na okukala nelandulathano lya tya ngaaka uule owala woomvula oonshona sigo ta kala a tseyika nawa e li omuniilonga dhingi. David okwa yelitha a ti: “Oya li ya mbembeleke ndje kutya shika otashi ka kala shi li nawa kuukwanegumbo wandje molwaashoka otandi ke eta iimaliwa oyindji kegumbo, sha hala okutya, otandi ke shi pondola lela. Nonando kanda li ndi li pamwe nuukwanegumbo wandje, ookuume kandje oya li yi itaalitha ndje kutya onda li handi gandja lela oshindji kuukwanegumbo wandje.” Ngaashi David, oyendji ohaya longo nuudhiginini opo ya vule okupa uukwanegumbo wawo kehe shimwe shoka taya dhiladhila kutya owe shi pumbwa. Ihe mbela okulandula omayele ngaaka otaku fala sigo omoku shi pondola? Uukwanegumbo kehe owa pumbwa naanaa shike?

Manga David a li a ya niilonga, okwa li a mono shoka uukwanegumbo we wa li wa pumbwa. David okwa ti: “Onda li tandi popi mongodhi nokamwandjekadhona Angelica hoka ka li ka pula ndje ka ti: ‘Tate, omolwashike inoo hala okukala pegumbo pamwe natse?’ Osha li shiyemateka noonkondo.” Oohapu ndhoka dhokamwanakadhona odha nkondopaleke ehalo lye okweetha po iilonga ye. David okwa li a tokola okupa uukwanegumbo we shoka wa li wa pumbwa lela, sha hala okutya, okukala pamwe nawo.

Okutula miilonga omayele gaKalunga ohaku eta omupondo

Ongiini to vulu okuyanda omauyelele taga pukitha ngoka ge li apuhe muuyuni mbuka? Omupisalomi ote tu lombwele kutya omuntu ngoka he shi pondola noku uvite elago oye ngoka ‘ha nyanyukilwa okuvulika kompango yOMUWA nohe yi ilongo omutenya nuusiku.’—Episalomi 1:2.

Sho Kalunga a li a langeke po Josua a ninge omuwiliki gwoshigwana shaIsraeli, okwa li e mu lombwele a ti: ‘Embo ndika [Oohapu dhaKalunga] nali kale aluhe tali leshwa.’ Okulesha nokutedhatedha Oohapu dhaKalunga okwa pumbiwa lela, ihe Josua okwa li a pumbwa wo a “vulike kwaayihe ya nyolelwa mo.” Ihe nonando ongaaka, okulesha owala Ombiimbeli itaku ke ku ninga u shi pondole. Ou na okutula miilonga shoka to lesha. Josua okwa li a lombwelwa taku ti: “Nena oto kala omusindani nomunelago.”—Josua 1:8.

Dhiladhila kokanona hoka ka kuutumba komatundji gomuvali omunahole omanga te ka leshele ehokololo lihokitha. Kashi na mbudhi kutya okwe ke li leshela nale iikando yi thike peni, ayehe ohaya kala ye shi nyanyukilwa. Sha faathana, komuntu ngoka e hole Kalunga okulesha Ombiimbeli kehe esiku oku li kunyanyudha, sha hala okutya, oku li ethimbo ewanawa kuye okukala naHe gwomegulu. Mokulandula omayele newiliko lyaJehova, omuntu a tya ngaaka oha kala a ‘fa omuti gwa [tsikwa, OB-1954] mooha dhomatondokelo gomeya hagu imi pethimbo lyu uthwa, nomafo gagwo ihaga ganya. Ashihe shoka te shi longo, otashi eta eyambeko.’—Episalomi 1:3.

Omiti ndhoka tadhi popiwa komupisalomi inadhi mena owala kudho dhene. Odha tsikwa nuukeka pomatondokelo gomeya nohadhi silwa oshimpwiyu kwaangoka e dhi tsika. Komukalo gwa faathana, Tate yetu gwomegulu ohe tu ukitha nokupukulula omadhiladhilo getu okupitila momayele ge ngoka taga adhika mOmanyolo. Oshizemo, otatu ke shi enditha nawa nokwiimika iiyimati yopakalunga.

Ihe “aakolokoshi hasho ye li ngeyi.” Odhoshili kutya otashi vulika ya kale ya fa taye shi enditha nawa uule wethimbo, ihe hugunina oshizemo kuyo otashi ka kala oshiwinayi. “Otaa ka tsakaneka epangulo lyaKalunga.” Niishewe, ‘ondjila yaakaanakalunga otayi kana po.’—Episalomi 1:4-6, yelekanitha OB-1954.

Onkee ano ino etha nando uuyuni u nwethe mo omalalakano nomithikampango dhoye. Nonando ou na oshipewa noto vulu oku shi pondola muuyuni mbuka, kala wa kotoka momukalo moka ho longitha iipewa yoye nenge nkene ho pitike uuyuni u yi longithe. Okulalakanena omaliko kaku na oshilonga notaku ningitha omuntu a ‘ganye.’ Mepingathano naashika, okukala u na ekwatathano ewanawa naKalunga ohaku eta omupondo gwashili nenyanyu.

Nkene to vulu oku shi pondola

Omolwashike omuntu ngele oha landula omayele gaKalunga, kehe shoka ta ningi hashi eta eyambeko nenge hashi shi pondola? Omupisalomi ka li ta popi kombinga yoku shi pondola muuyuni mbuka. Oku shi pondola kwomutilikalunga okwa pambathana nokulonga kwe ehalo lyaKalunga, nehalo lyaKalunga ohali shi pondola aluhe. Natu tale nkene okutula miilonga omakotampango gOmbiimbeli tage ku kwathele u shi pondole.

Muukwanegumbo: Omanyolo otaga kumagidha aasamane ya kale ‘ye hole aakiintu yawo, naanaa ngashika ye hole omalutu gawo yene,’ naakulukadhi Aakriste otaya lombwelwa kutya ‘oye na okusimaneka aalumentu yawo.’ (Aaefeso 5:28, 33) Aavali otaya ladhipikwa opo ya kale paanona yawo, okuyola nayo noku ya longa kutya iinima yini ya simana monkalamwenyo. (Deuteronomium 6:6, 7; Omuuvithi 3:4) Oohapu dhaKalunga otadhi pe wo aavali omayele tadhi ti: “Inamu hinda aana yeni noku ya geyitha.” Ngele omayele ngoka taga tulwa miilonga, otashi ka kala oshipu kaanona ya ‘vulike kaakuluntu yawo’ nosho wo ‘okusimaneka oohe nooyina.’ (Aaefeso 6:1-4) Okulandula omayele ngaka gaKalunga otashi ke eta elago muukwanegumbo.

Ookuume: Aantu oyendji oya hala okukala ye na ookuume. Otu na uukwatya wokukala tu hole yamwe nokukala tu holike kuyamwe. Jesus okwa lombwele aalongwa ye kutya oye na okukala ‘ye holathane.’ (Johannes 13:34, 35) Mokati kawo, otatu adha mo ookuume mboka tatu vulu okukala tu hole notwe yi inekela, nokuli nongele tashi ya piinima mbyoka yopaumwene nonkene tu uvite. (Omayeletumbulo 18:24) Shoka sha simana osho kutya, mokutula miilonga omakotampango gOmbiimbeli otatu ka vula ‘okuhedha kuKalunga’ notatu ki ithanwa nokuli ‘ookuume kaKalunga’ ngaashi Abraham.—Jakob 2:23; 4:8.

Elalakano lyonkalamwenyo: Pehala lyokukala ye li monkalamwenyo kaayi na elalakano lyasha, mboka ye shi pondola lela, onkalamwenyo yawo otayi ti sha noyi na elalakano. Onkalamwenyo yawo inayi kankamena koonkalo ndhoka hadhi lunduluka dhonkalelo ndjika yiinima. Omalalakano gawo otage ye etele enyanyu lyashili notali kalelele, molwaashoka oga kankamena kelalakano lyashili lyonkalamwenyo. Oshike hashi ningitha omuntu a kale e na elalakano monkalamwenyo? ‘Okutila Kalunga nokudhiginina iipango ye, oshoka aantu ayehe osho ye na okuninga.’—Omuuvithi 12:13.

Etegameno: Okukala tu na Kalunga e li Kuume ketu otashi tu pe wo etegameno lyomonakuyiwa. Omuyapostoli Paulus okwa li a ladhipike Aakriste opo “yaa inekele iinima mbyoka tayi hulu po, ihe naa inekele Kalunga.” Nokungeyi otayi “igongelele eliko ndyoka tali ka ninga ekankameno lya kola konakuyiwa. Nena otaa vulu okwiimonena okukalamwenyo kwashili.” (1 Timoteus 6:17-19) Onkalamwenyo ndjika yashili otayi ya masiku sho Uukwaniilwa waKalunga womegulu tau ka eta ishewe Oparadisa kombanda yevi ndika.—Lukas 23:43.

Ngele to tula miilonga omakotampango gOmbiimbeli, shika itashi ti kutya oto ka kala wa manguluka ko komaupyakadhi agehe, ihe oto ka vula okuyanda uudhigu noluhodhi ndoka olundji aagoyoki nenge aakolokoshi hayi iyetele. David ngoka a tumbulwa metetekelo nosho wo aantu omamiliyona ngaashi ye, oya mona kutya osha simanena okutula miilonga omakotampango gOmbiimbeli monkalamwenyo yawo. Sho David a li a mono iilonga mbyoka tayi mu pe ethimbo okukala nuukwanegumbo we, okwa ti: “Onda pandula kekwatathano ewanawa ndyoka ndi na nomukulukadhi gwandje naanona yetu nosho wo uuthembahenda wokulongela Jehova Kalunga ndi li omukuluntugongalo.” Itashi kumitha tuu sho omupisalomi ta popi kombinga yaantu mboka haya pulakene komayele gaKalunga ta ti: “Ashihe shoka taye shi longo, otashi eta eyambeko”!

[Oshimpungu pepandja 6]

OONKATU NTANO DHOKU SHI PONDOLA MONKALAMWENYO

1 Yanda okunwethwa mo komithikampango dhuuyuni mbuka.

Episalomi 1:1; Aaroma 12:2

2 Lesha nokutedhatedha Oohapu dhaKalunga esiku kehe.

Episalomi 1:2, 3

3 Tula miilonga omayele gOmbiimbeli monkalamwenyo yoye.

Josua 1:7-9

4 Ninga kuume kaKalunga.

Jakob 2:23; 4:8

5 Tila Kalunga kashili nokuvulika kiipango ye.

Omuuvithi 12:13

[Omathano pepandja 7]

Mbela oho landula oonkatu ndhoka tadhi fala moku shi pondola monkalamwenyo yoye?