Mbela uuwinayi ou li pondondo ndjoka itaau vulu we okupangelwa?
Okamati okataledhi oka li ka toola oshitopitha melundu shomboma e tashi ka topele noshe ka ningi okaposi noshilema monkalamwenyo yako ayihe. Meme gumwe omuvali okwa li a thigi okanona ke opo ka valwa e ka holeka miiyagaya pooha dhondjila. Omuniilonga ngoka a li a tidhwa miilonga okwa shuna kehala lye lyiilonga hoka a li ha longo nale e ta dhipaga nondjembo kehe gumwe ngoka a mono nopo nduno okwi idhipaga ye mwene. Omukwashigwana gumwe omulumentu a simanekwa okwa li a yi momilalo naanona aashona.
MUPYA MUNENE, oolopota dhiilonga iiwinayi ya tya ngaaka odhi li apuhe methimbo lyetu. Niishewe shinikitha oluhodhi unene, opu na oolopota dhomadhipago gopamihoko nuukulo oombwinayi noonkondo dhi vulithe ndhoka dha hokololwa metetekelo. Oshinyolwa shimwe sha nyolwa komunyanyangidhi gwontumba mo 1995 osha ti: “Ethelemimvo ndika [eti-20] olya li ethelemimvo lyaSatana. Kapwa li pu na nando ethimbo moka aantu ya kala nehalo enene lyokudhipaga aantu ooyakwawo omamiliyona molwuukwashigwana, elongelokalunga nenge molwoondondo ngaashi methimbo lyetu.”
Kakele kaashono, methimbo lyetu aantu otaya nyateke ombepo, taya yono po evi, taya hulitha po oonzo dhalyo notaya dhipaga iinamwenyo yomaludhi ogendji noonkondo noye li poku yi mana po sheke. Mbela aantu otaya vulu ngaa okusinda uuwinayi auhe mbuka nokuninga uuyuni u li ehala li li nawa noli na egameno? Nenge mbela okuninga onkambadhala yoku shi ninga okwa fa okukambadhala okushunitha omeya geyelu noshikombe? Omuprofesoli gumwe ngoka a nyola unene oshindji kombinga yoshipalanyolo shi na ko nasha nuuwinayi okwa ti: “Onda kala ndi na ehalo enene okweeta elunduluko muuyuni noku wu hwepopaleka. Ihe inau hwepopala.” Otashi vulika nangoye osho to dhiladhila.
Mondjila moka uuyuni tau ende otayi vulu okuyelekanithwa nosikepa tayi ende mefuta lyoshikungulu shoka tashi nayipala kehe esiku. Nonando kapu na ngoka a hala okuuka kombinga ndjoka, oonkambadhala adhihe dhokulundulula ondjila inadhi pondola sha. Osikepa otayi ende owala yu uka moshiponga shoshikungulu oshidhipagi nopwaahe na gumwe ngoka ta vulu oku yi thikameka.
Etompelo limwe molwaashoka onkalo ndjika ya nayipala inaashi monika nando onale olyo kutya aantu inaya gwanenena. (Aaroma 3:23) Nonando ongaaka, aantu kuyo yene itashi vulika ya longe uuwinayi u thike mpoka nopwaahe na oluthuwo. Mbela oshi li tashi wapa opo aantu ya pangelwe koshishitwa oshinankondo sha yonuka ihaashi monika? Ngele osho, osho lye, nongiini tatu vulu okwiigamena kusho? Oshitopolwa tashi landula otashi ka yamukula omapulo ngaka.
[Edhina lyomuthaneki gwethano pepandja 3]
© Heldur Netocny/Panos Pictures