Omapulo okuza kaaleshi

Omukriste oku na okutala ko ngiini okuya kuukongo nokuyula oohi?

Ombiimbeli inayi indika okuya kuukongo nokuyula oohi. (Deuteronomium 14:4, 5, 9, 20; Mateus 17:27; Johannes 21:6) Ihe Aakriste mboka haya yi kuukongo nenge haya ka yula oohi oye na okudhiladhila kombinga yomakotampango gopamanyolo gontumba.

Kalunga okwa li a pitike Noowa noyana ya dhipage iinamwenyo nokulya onyama yayo, ihe oya li yi na okuza ombinzi manga inaaye yi lya. (Genesis 9:3, 4) Elombwelo ndika otali ulike kutya omwenyo gwoshinamwenyo ogu na okusimanekwa molwaashoka ogwa za kuKalunga. Onkee ano, Aakriste ihaya dhipaga iinamwenyo omolwuudhano nenge molwokwiinyanyudha owala shoka tashi ulike okwaahasimaneka omwenyo.—Omayeletumbulo 12:10.

Opu na natango oshinima shimwe shoka sha kwatela mo iikala yetu. Osha yela kutya aayapostoli mboka ya li aayuli yoohi oya li haya kala ya nyanyukwa ngele ya yulu oohi odhindji. Ihe nonando ongaaka, kapu na shoka tashi ulike kutya oya li hayi itangele uunongo wawo wokuyula oohi nenge okukala kwawo aakongo aawanawa. Kaya li haya ka yula oohi nenge ya ye kuukongo omolwokuninga ethigathanopo nayalwe nenge opo yu ulike kutya yo aalumentuelela nenge molwokunyanyukilwa okutidha iinamwenyo noku yi dhipaga.—Episalomi 11:5; Aagalati 5:26.

Onkee ano otu na okwiipula kutya: ‘Mbela ngame onda tula po oshiholelwa oshiwanawa mokusimaneka etaloko lyaJehova kombinga yomwenyo? Mbela ohandi kala owala te dhiladhila nokupopya kombinga yokuya kuukongo nenge oku ka yula oohi? Oshike tashi dhana onkandangala onene monkalamwenyo yandje: okuya kuukongo nenge okuyula oohi, nenge okukala omukalele gwaKalunga? Mbela okuya kuukongo nenge okuyula oohi otaku ningi ndje ndi kale ndi na ekwatathano lyopothingo naamboka kaaye shi ooitaali nenge otaku ningitha ndje ndi kale olundji kaandi li pamwe nuukwanegumbo wandje?’—Lukas 6:45.

Yamwe mboka haya yi kuukongo nenge haya ka yula oohi omolwiikulya otashi vulika taya dhiladhila kutya oye na etompelo ewanawa lyokwaahakutha ombinga momaipyakidhilo gopaKriste pethimbo lya tya ngaaka. Ihe otatu ulike kutya otwi itaala Kalunga notwe mu inekela ngele itatu etha nando osha shi pite komeho iinima yopambepo. (Mateus 6:33) Niishewe, Aakriste ohaya vulika koompango adhihe ‘dhaapangeli’ dhi na ko nasha nokuya kuukongo nokuyula oohi, kutya nduno aapangeli otaya tala ngele ohashi ningwa nenge hasho.—Mateus 22:21; Aaroma 13:1.

Otashi vulika yamwe ya pumbwa okulundulula etaloko lyawo shi na ko nasha nokuya kuukongo nokuyula oohi li tse kumwe nolyaJehova. (Aaefeso 4:22-24) Ihe nonando ngaaka, otu na okusimaneka omatokolo gayalwe gopamaiyuvo. Ekumagidho lyomuyapostoli Paulus oli li nawa moshinima shika sho a ti: “Inatu pangulathaneni. Ihe kaleni mu na etokolo, mwaa pundukithe mukweni nenge oku mu undulila muulunde.” (Aaroma 14:13) Ngele otatu ulukilathana ohole yokwaaihola mwene nokusimanekathana, otashi ke eta ombili megongalo notashi ka simanekitha Omushiti gwetu ngoka e li Onzo yomwenyo.—1 Aakorinto 8:13.a

[Enyolo lyopevi]