‘Ovo ve na oikala iwa’ otava tambula ko onghundana iwa
“Aveshe ovo va li ve na oikala iwa i na sha nomwenyo waalushe ova ninga ovaitaveli.” — OIL. 13:48, NW.
1, 2. Ovakriste vonale ova li ve linyenga ngahelipi kexunganeko laJesus olo tali ti kutya onghundana iwa otai ka udifilwa ounyuni aushe?
EMBO lOmbibeli lOilonga oli na ehokololo lihokwifa li na sha nanghee Ovakriste vonale va li ve linyenga kexunganeko laJesus olo tali ti kutya onghundana iwa yOuhamba oya li tai ka udifilwa ounyuni aushe. (Mat. 24:14) Ovaudifi ovaladi vomefelemudo lotete ova tulila po Ovakriste aveshe ovo ve va shikula oshihopaenenwa. Ovanhu omayovi, mwa kwatelwa ‘ongudu inene yovapristeri,’ ova li va ninga oshitukulwa sheongalo lomefelemudo lotete omolwokuudifa nouladi kwovahongwa vaJesus muJerusalem. — Oil. 2:41; 4:4; 6:7.
2 Ovatumwa vomefelemudo lotete ova li yo va kwafela ovanhu vahapu va ninge Ovakriste. Pashihopaenenwa, Filippus okwa li a ya kuSamaria oko eengudu dovanhu da li da pwilikina kuye eshi a li ta udifa. (Oil. 8:5-8) Paulus okwa li a ya momalweendo mahapu novalongi pamwe ve lili noku lili, ta udifa onghundana iwa muKipro, moitukulwa yaAsia Linini, muMakedonia, muGreka nosho yo muItalia. Ovajuda nOvagreka vahapu vomoilando omo Paulus a li a udifila ova li va ninga ovaitaveli. (Oil. 14:1; 16:5; 17:4) Titus okwa li ta wanifa po oukalele muKreta. (Tit. 1:5) Petrus okwa li ta udifa muBabilon, naashi a ka shanga onhumwafo yaye yotete lwomo 62-64 O.P., oilonga yokuudifa oya li ya shiivika nawa muPontus, muGalatia, muKappadokia, muAsia nosho yo muBitinia. (1 Pet. 1:1; 5:13) Omafimbo oo kaa li tuu a tunhula! Ovaudifi vomefelemudo lotete ova li ovaladi neenghono nomolwaasho ovatondi vavo va li ve va ula kutya ove li ‘ovapiyaaneki vounyuni aushe.’ — Oil. 17:6; 28:22.
3. Ovaudifi vOuhamba otave shi endifa ngahelipi moilonga yavo yokuudifa, nou udite ngahelipi kombinga yaasho?
3 Momaongalo opaKriste kunena namo omu na ekulo likumwifi. Mbela iho kala wa tuwa omukumo ngeenge to lesha olaporta yokomudo yoilonga yEendombwedi daJehova nokumona nghee tadi shi endife mounyuni aushe? Mbela ino hafa okushiiva kutya ovaudifi vOuhamba ova li va ninga omakonakonombibeli e dule pomamiliyona ahamano momudo woilonga 2007? Kakele kaasho, omuvalu wovakalipo pEdimbuluko lefyo laJesus Kristus omudo wa ya otau ulike kutya ovanhu ve fike lwopomamiliyona omulongo ovo vehe fi Eendombwedi daJehova ova li va ulika ohokwe monghundana iwa eshi va li ve uya poshiningwanima osho sha fimana. Osho otashi ulike kutya ope na natango oilonga ihapu oyo i na okulongwa.
4. Oolyelye tava tambula ko etumwalaka lOuhamba?
4 Ngaashi ashike mefelemudo lotete, ‘aveshe ovo ve na oikala iwa i na sha nomwenyo waalushe’ otava tambula ko onghundana iwa kunena. (Oil. 13:48, NW) Jehova ota nanene ovanhu va tya ngaho kehangano laye. (Lesha Haggai 2:7.) Otwa pumbwa okukala noikala ya tya ngahelipi shi na sha noukalele wopaKriste opo tu kufe ombinga filufilu moilonga oyo yokwoongela ovanamitimadiwa?
Ino kala u na onhondo ngeenge to udifa
5. Jehova okwa hokwa ovanhu voludi lilipi?
5 Ovakriste vomefelemudo lotete ova li ve shii kutya “Kalunga iha tale omunhu kombada. Ndele moshiwana keshe, keshe ou he mu tila ndee ta diinine ouyuki, ote mu wapalele.” (Oil. 10:34, 35) Omunhu oo a hala okukala e na ekwatafano liwa naJehova oku na okukala e na eitavelo tali longo mekuliloyambo laJesus. (Joh. 3:16, 36) Jehova okwa hala “ovanhu [vomaludi aeshe, NW] va xupifwe nova fike meshiivo loshili.” — 1 Tim. 2:3, 4.
6. Ovaudifi vOuhamba ove na okuhenuka okuninga shike, nomolwashike?
6 Ovaudifi vonghundana iwa kave na okutokola ovanhu she likolelela komuhoko wavo, kondodo yavo moulikumwe wovanhu, keholokepo lavo, kelongelokalunga lavo ile komaukwatya avo amwe e lili. Diladila kwaashi: Mbela ino hafa eshi omunhu oo a li e ku udifila tete kombinga yoshili yopamishangwa a li ehe na onhondo naave? Onghee hano, ino ongaonga okuudifila omunhu keshe oo tashi dulika e na ohokwe okupwilikina ketumwalaka lexupifo? — Lesha Mateus 7:12.
7. Omolwashike tuhe na okutokola ovanhu ovo hatu udifile?
7 Jehova okwa nangeka po Jesus e li Omutokoli, onghee hano, itatu dulu okutokola ovanhu. Osho osha yeleka molwaashi fye ohatu tokola ashike ‘ngaashi omesho etu taa tale’ ile ‘ngaashi omatwi etu taa udu,’ ofimbo Jesus e shii osho ovanhu hava kala tava diladila momitima davo. — Jes. 11:1-5; 2 Tim. 4:1.
8, 9. (a) Saulus okwa li omunhu a tya ngahelipi ofimbo ina ninga Omukriste? (b) Oshike hatu dulu okulihonga moshimoniwa shomuyapostoli Paulus?
8 Ovapiya vaJehova ova dja momaputuko a yoolokafana. Oshihopaenenwa shimwe shididilikwedi oshi na sha naSaulus wokuTarsus, oo a ka ninga omuyapostoli Paulus. Saulus oo a li Omufarisai, okwa li ha pataneke neenghono Ovakriste. Okwa li a hepeka Ovakriste molwaashi okwa li a itavela kutya kava li ovalongeli vaJehova vashili. (Gal. 1:13) Pataleko lopanhu, Saulus okwa li a fa ita dulu okuninga Omukriste. Ndele nande ongaho, Jesus okwa li a mona mo oukwatya muwa muSaulus nokwa li e mu hoolola a longe oshilonga she likalekelwa. Oshidjemo, Saulus okwa ka ninga oshilyo oshiladi shomeongalo lopaKriste lomefelemudo lotete.
9 Oshimoniwa shomuyapostoli Paulus otashi tu hongo shike? Moshitukulwa shetu otashi dulika mu na ovanhu ovo inava hala okupwilikina ketumwalaka letu. Nonande otava monika va fa itava dulu okuninga Ovakriste, inatu efa okutomhafana navo. Omafimbo amwe ovo tava monika nokuli va fa vehe na ohokwe ohave linyenge nawa ngeenge twe va udifile. Otu na oshinakuwanifwa shokuudifila ovanhu aveshe ‘nopehe na okweefa.’ — Lesha Oilonga 5:42.
Ovo hava udifa ‘nopehe na okweefa’ otava ka mona omanangeko noupuna
10. Omolwashike tuhe na okwoongaonga okuudifila ovanhu ovo tava monika va fa va tilifa? Hokolola oimoniwa yomoshitukulwa.
10 Eholokepo lomunhu otali dulu oku tu ningifa tu fike pexulifodiladilo la puka. Pashihopaenenwa, Ignacioa okwa li a hovela okukonakona Ombibeli pamwe nEendombwedi daJehova ofimbo a li modolongo moshilongo shimwe shokuAmerika lokOlukadi. Okwa li ha tilika molwaashi okwa li omuhau. Nomolwaasho ovanadolongo ovo va li hava longo oinima noku i landifa kovanadolongo vakwao ova li hava tumu Ignacio a ka pule ko eendjo davo kwaavo va li ihava futu diva. Ndele eshi a ninga exumokomesho mokukonakona Ombibeli nokutula moilonga osho a li te lihongo, okwa ka kala e na omaukwatya mawa. Kape na vali oo he mu longifa a ka pule eendjo, nokwa hafa eshi oshili yOmbibeli nomhepo yaKalunga ya lundulula oukwatya waye. Oku na yo olupandu omolwovaudifi vOuhamba ovo va li inava ulika onhondo eshi va li va ninga eenghendabala okukonakona naye.
11. Omolwashike hatu ningi omalishuneko?
11 Etomheno limwe molwaashi hatu shuna kovanhu ovo twa li twa popya navo kombinga yonghundana iwa omolwaashi eenghalo nosho yo oikala yavo otai dulu okulunduluka. Okudja pefimbo olo twa li twe va talela po, vamwe otashi dulika va kwatwe komukifi wa kwata moiti, va kanife oilonga ile va filwe omuholike wavo. (Lesha Omuudifi 9:11.) Oiningwanima oyo tai ningwa mounyuni otai dulu okulinyengifa ovanhu va diladile sha kwata moiti shi na sha nonakwiiwa yavo. Oiningwanima ya tya ngaho otai dulu okulinyengifa omunhu oo a li nale ehe na ko nasha netumwalaka letu ile he tu pataneke e li tambule ko. Onghee hano, inatu ongaonga nande okuudifila ovanhu onghundana iwa pomhito keshe oyo tai wapalele.
12. Otu na okutala ko ngahelipi ovanhu ovo hatu udifile, nomolwashike?
12 Ovanhu ove na eamo lokutokola ovanhu vakwao she likolelela keholokepo lavo. Ndele mepingafano naasho, Jehova oha tale komaukwatya mawa ovanhu pauhandimwe. (Lesha 1 Samuel 16:7.) Ngeenge tu li moukalele, otu na okukendabala okutala ko ovanhu ngaashi Jehova he va tale ko. Oimoniwa ihapu otai ulike kutya osha fimana okukala tu na etaleko liwa li na sha novanhu aveshe ovo hatu udifile.
13, 14. (a) Omolwashike omukokolindjila umwe a li e na etaleko la puka shi na sha nomukainhu umwe oo a li a shakeneka moukalele? (b) Oshike hatu dulu okulihonga moshimoniwa osho?
13 Ofimbo omukokolindjila wedina Sandra a li e lipyakidila moukalele weumbo neumbo kokanhunhu kamwe oko ke li moKaribia, okwa li a shakena naRuth, oo a li e lipaka momaudano eendanisha. Ruth okwa li a dikwa oshishani lwoikando ivali e li dingi momaudano omoshilongo shavo. Okwa li a ulika ohokwe metumwalaka longhundana iwa olo Sandra a li e mu udifila, nokwa li a ninga elongekido opo va hovele ekonakonombibeli. Sandra okwa hokolola a ti: “Eshi nde uya monduda yaye yokwoomba, onda li nda mona efano linene laRuth e li moikutu yomaudano nosho yo omakopi oo a li a findana. Onda li nda fika pexulifodiladilo la puka kutya ita ka dula okutwikila okukala e na ohokwe molwaashi okwa li a fimana nokwa li e litula mo unene momaudano. Nonda ka kala ihandi mu talele po vali.”
14 Konima yefimbo, Ruth okwa li e uya efiku limwe kokwoongala kOlupale lOuhamba, naashi okwoongala kwa dimbuka okwa li a pula Sandra a ti: “Omolwashike iho uya vali okukonakona naame?” Sandra okwa li e mu pa ombili nova li va ninga elongekido va twikile vali okukonakona. Ruth okwa li a ninga exumokomesho meendelelo, a tulula ko omafano aye eendanisha kekuma ndele ta hovele okukufa ombinga momalipyakidilo aeshe eongalo nokwa li yo e liyapulila Jehova. Sandra okwa li a mona kutya okwa ninga epuko eshi a li a efa po okukonakona naRuth.
15, 16. (a) Omuudifi umwe okwa li a mona oidjemo ilipi eshi a li a udifila omupambele waye? (b) Omolwashike onakudiwa yovapambele vetu ihe na oku tu imba tu va udifile?
15 Ovakriste vahapu ovo va yandja oundombwedi koilyo youkwaneumbo oyo ihe fi ovaitaveli ova mona yo oidjemo iwa, nonande oya li tai monika ya fa itai ka tambula ko onghundana iwa. Pashihopaenenwa, tala koshimoniwa shaJoyce, omukainhu Omukriste wokOilongo yaHangana. Haukwe waye womulumenhu okwa li hai modolongo luhapu okudja eshi a li omunyasha womido omulongo nasha. Joyce okwa ti: “Ovanhu ova li hava ti kutya onghalamwenyo yahaukwe wange kaya li i na eityo lasha, molwaashi okwa li ha landifa oingangamifi, ha vake nokwa li yo ha longo oilonga ii ihapu. Ndele nande ongaho, onda kala handi mu udifile oshili yOmbibeli oule womido 37.” Joyce okwa li a nangekwa noupuna munene omolwokuninga eenghendabala noudiinini a kwafele omupambele waye, eshi xuuninwa haukwe waye a ka hovela okukonakona Ombibeli nEendombwedi daJehova ndele ta ningi omalunduluko manene monghalamwenyo yaye. Efimbo opo la di ko, haukwe waJoyce okwa li a ninginifwa poshoongalele shoshitukulwa muCalifornia, mOilongo yaHangana yaAmerika, mepupi lomido 50. Joyce okwa ti: “Onda li handi kwena kehafo. Onda hafa neenghono eshi nda li inandi mu fya nande ounye!”
16 Otashi dulika ho ongaonga okupopya navamwe vomovapambele voye kombinga yoshili yOmbibeli omolwonakudiwa yavo. Ndele osho ka sha li sha imba Joyce a udifile haukwe waye. Onghee hano, ino ongaonga okuudifila ovanhu molwaashi ka tu shii osho shi li momitima davo notashi dulika va kale va halelela okumona elongelokalunga lashili. — Lesha Omayeletumbulo 3:27.
Oshikwafifo shokukonakona Ombibeli osho hashi pondola
17, 18. (a) Omahokololo okudja mounyuni aushe otaa ulike shike shi na sha nongushu yembo Ombibeli otai hongo lela shike? (b) Oimoniwa tai tungu ilipi wa mona eshi wa longifa embo olo?
17 Omahokololo okudja mounyuni aushe otaa ulike kutya oohandimwe ovo ve na omitima diwa otave linyenge nawa koshikwafifo shokukonakona Ombibeli, embo Ombibeli otai hongo lela shike? Omukokolindjila umwe wedina Penni wokOilongo yaHangana okwa li a hovela omakonakonombibeli mahapu ta longifa embo olo. Avali omomakonakono oo a li a ninga okwa kwatela mo ovanamido ovo va li ovaladi mongeleka yavo. Penni ka li e shii kutya ovanamido ovo otave ke linyenga ngahelipi koshili yopamishangwa oyo i li membo Ombibeli otai hongo. Ndele nande ongaho, okwa ti: “Ova li va tambula ko nehalo liwa osho va li tave lihongo nopehe na okutwa eemhata ile okungwangwana, molwaashi ouyelele oo u li membo olo owa yela, ou li pandunge nou li paunafangwa.”
18 Omuudifi umwe wedina Pat wokuBritania okwa li a hovela okukonakona Ombibeli nomukainhu umwe oo a li onauki a dja koshilongo shimwe shaAsia. Omukainhu oo okwa li a fiya po oshilongo shavo eshi omushamane waye nosho yo ovanamati vaye vali va kwatwa po ombabyona kovakwaita ovanamapove noka li va li e va mona. Onghalamwenyo yaye oya li moshiponga, eumbo laye ola li la xwikwa po nokwa li a kwatwa onghonga kongudu yovanhu. Oinima oyo oya li ye mu ningifa a diladile kutya oshixwepo a fye nokwa li ha kala ta diladila okulidipaa lwoikando. Ndele eshi a li a konakona Ombibeli okwa li a dula okukala e na eteelelo. Pat okwa ti: “Omayelifilo nosho yo omafaneko e li paunafangwa oo e li membo Ombibeli otai hongo okwa li a kuma neenghono omukainhu oo.” Omukainhu oo okwa li a ninga exumokomesho meendelelo, ndele ta ningi omuudifi ina ninginifwa nokwa popya kutya okwa hala oku ka ninginifwa poshoongalele tashi uya. Kashi hafifa tuu okukwafela ovanamitimadiwa va kale ve na eteelelo olo li li momishangwa!
‘Inatu lolokeni okulonga ouwa’
19. Omolwashike oilonga yokuudifa ya endelela neenghono?
19 Kunena, oilonga yetu yokuudifa noyokuninga ovanhu ovahongwa oya endelela neenghono. Omudo keshe, ovanamitimadiwa ohava tambula ko etumwalaka lOuhamba. Ndele nande ongaho, ovanhu vahapu ove li natango momilaulu dopamhepo notava “pungaukile koshidipaelo,” molwaashi “efiku linene laJehova oli li popepi.” — Omayel. 24:11; Sef. 1:14, yelekanifa NW.
20. Keshe umwe womufye oku na okukala a tokola toko okuninga shike?
20 Ohatu dulu okukwafela natango ovanhu ovo tava pungaukile koshidipaelo, ndele opo tu shi ninge, otu na okuhopaenena Ovakriste vomefelemudo lotete ovo va li ‘inava efa okulonga nokuudifa evangeli laKristus Jesus.’ (Oil. 5:42) Ohatu dulu oku va hopaenena mokukala hatu udifa nonande ope na omaupyakadi, mokuyandja elitulemo ‘kounghulungu wetu wokuhonga’ nosho yo mokuudifila ovanhu aveshe nopehe na onhondo. ‘Inatu lolokeni okulonga ouwa,’ molwaashi ngeenge otwa twikile, ohatu ka mona omanangeko noupuna mahapu omolwokuhokiwa kuKalunga. — 2 Tim. 4:2; lesha Ovagalati 6:9.
[Eshangelo lopedu]
a Omadina oo hao ovanhu ovo lelalela.
Oto nyamukula ngahelipi?
• Oolyelye tava tambula ko onghundana iwa?
• Omolwashike tuhe na okutokola ovanhu ovo hatu udifile?
• Oidjemo ilipi ovaudifi vOuhamba tava mono omolwokulongifa embo Ombibeli otai hongo lela shike?
[Efano pepandja 17]
Ovanamitimadiwa omayovi otava tambula ko onghundana iwa yOuhamba