Ethimbo lyokuhogolola onakuyiwa ndjoka wa hala

“Kalunga okwa shiti omuntu oshifetha she, e ya shiti omulumentu nomukiintu.”—Genesis 1:27.

OOHAPU ndhoka dha tseyika nawa dhi li petameko lyOmbiimbeli otadhi yelitha shimwe shomiinima ya simanenena mbyoka Kalunga ‘a ningi yo opala pethimbo lye,’ sho a shiti aaihokani yotango ya gwanenena, Adam naEva. (Omuuvithi 3:11) Jehova Kalunga e li Omushiti gwawo, okwe ya lombwele a ti: “Valathaneni, ne mu indjipale nokuudha evi alihe. Li tuleni mepangelo lyeni; pangeleni oohi dhomefuta noondhila dhokegulu niinamwenyo ayihe tayi inyenge kombanda yevi.”—Genesis 1:28.

Kalunga okwa li a tseyithile aaihokani yotango elalakano lye okupitila moohapu ndhoka. Oya li ye na okwiindjipala nokusila oshimpwiyu evi moku li ninga oparadisa ya kale mo noluvalo lwawo. Okukala nomwenyo nokusa kwawo kakwa li kwa nunwa. Pehala lyaashono, Kalunga okwa li e yu uvanekela oshinima oshiwanawa noonkondo. Oya li taya vulu okukala nombili ya gwanenena noya nyanyukwa sigo aluhe ando oya ningile ehogololo li li mondjila nokukala metsokumwe naKalunga.

Oya li ya ningi ehogololo lya puka, shoka sha ningitha aantu kunena ya kale haya kulupa nohaya si. Dhoshili, tatekulululwa Job okwe shi zimine a ti: “Omuntu a valwa komukiintu omasiku ge omafupi nogu udha uupyakadhi.” (Job 14:1) Epuko olya zi peni?

Ombiimbeli otayi yelitha kutya “uulunde owe etwa muuyuni komuntu gumwe, nuulunde we owe etelele eso. Onkee ano eso olya taandele maantu ayehe, oshoka ayehe oya yono.” (Aaroma 5:12) ‘Omuntu gumwe’ ngoka a yonene owina oshipango shaKalunga shoka sha li sha yela, oAdam. (Genesis 2:17) Omolwehogololo lye, Adam okwa li i ikanithile ompito yokukala nomwenyo sigo aluhe moparadisa kombanda yevi. Okwa kanithile wo oluvalo lwe uuthiga wa dhenga mbanda, nokwe lu taandelithile uulunde neso. Mbela shoka ya kanitha onashi ka monike we ngaa?

Ethimbo lyokuninga ishewe iinima iipe

Konima yomayuvimimvo omupisalomi okwa li a nwethwa mo a nyole ta ti: “Aayuuki otaa ka thigulula evi e taa kala mo sigo aluhe.” (Episalomi 37:29) Shi li eshilipaleko kutya shoka Kalunga u uvaneka moshikunino shaEden otashi ka gwanithwa, Oohapu dhe odha hokolola nawa shoka ta ka ninga masiku tadhi ti: “Ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.” Opo nduno Kalunga okwa ti: “Tala, ngashingeyi iinima ayihe otandi yi ningi iipe.”—Ehololo 21:4, 5.

Molwaashoka kehe shimwe oshi na ethimbo lyasho, ohashi ningitha yamwe ya pule kutya ethimbo lyokuninga ishewe iinima iipe otali ke ya uunake opo omauvaneko omawanawa gaKalunga ga ka gwanithwe? Oonzapo dhaJehova ndhoka dha nyanyangidha oshifo shika, odha kala nokutseyithila aantu kutya otu li pethimbo ndyoka Ombiimbeli tayi ithana “omasiku omahugunina” nosho wo kutya ethimbo lyaKalunga okukatuka onkatu ‘okuninga ayihe iipe’ oli li popepi. (2 Timoteus 3:1, OB-1954) Otatu ku ladhipike wu konakone Ombiimbeli nowi ilonge kombinga yiinima iiwanawa mbyoka twa tegamena. Otatu ku ladhipike wo wu taambe ko ehiyo ndika tali ti: “Kongeni Omuwa, manga ta monika, ne mu mu ithane, manga e li popepi.” (Jesaja 55:6) Pehala lyokukala wu na onkalamwenyo ya nunwa, onkalamwenyo yoye netegameno lyoye lyokukala nomwenyo sigo aluhe oli li momake goye mwene.

[Oohapu dha simana pepandja 8]

“Tala, ngashingeyi iinima ayihe otandi yi ningi iipe!”