Elongelokumwe ohali kwathele uukwanegumbo wu hume komeho pambepo

OMBEPO yelongelokumwe oya simanenena komaukwanegumbo ngoka ga hala oku shi enditha nawa pambepo. Sho Jehova a shiti aaihokani yotango okwa li a tsu omuthindo ompumbwe yelongelokumwe. Eva okwa li e na okulonga e li “omukwathi” gwaAdam. (Gen. 2:18) Ngele omulumentu nomukiintu oya hokana, nena oye na okukwathelathana. (Omuuv. 4:9-12) Opo aavali naanona ya gwanithe po onkandangala ndjoka Jehova e ya pa, oye na wo okulongela kumwe.

Okulongela Kalunga mu li uukwanegumbo

Barry naHeidi oye na aanona yatano. Oye shi mona kutya okulongela kumwe pekonakonombiimbeli lyuukwanegumbo oshe ya kwathe ya hume komeho pambepo. Barry okwe shi yelitha a ti: “Pekonakono lyuukwanegumbo aanona aashona ohandi ya pe iinakugwanithwa ye ya eleka. Omathimbo gamwe ohandi ya pula ya leshe oshitopolwa moshifo sho-Awake!, noku ya pula ya hokolole shoka ya lesha mo. Ohatu ningi wo elongekidho lyaashoka tu na oku ka popya muukalele opo okanona kehe ka vule oku ka tya sha.” Heidi okwa gwedha ko a ti: “Atuhe otu na elandulathano lyomalalakano gopambepo ngoka twa hala okwaadha nohatu ge endulula ethimbo nethimbo pekonakono lyuukwanegumbo opo tu tale ngele otatu ningi ehumokomeho.” Aaihokani mboka oye shi mona wo kutya okutula po oongulohi dhimwe kondandalunde moshiwike kaaya tale o-TV, osha kwathela kehe gumwe muukwanegumbo a mone ethimbo lyokulesha.

Okugongala kwegongalo

Mika naDenise oya putudha oyana yane. Uukwanegumbo wawo owa mona uuwanawa washike mokulongela kumwe? Mike okwa ti: “Nonando omalongekidho getu ihage ende nawa omathimbo gamwe, otwe shi mona kutya elongelokumwe ohali tu kwathele tu thike pokugongala kehe pethimbo.” Denise okwe shi yelitha a ti: “Sho aanona yetu taya koko, kehe gumwe oha pewa oshilonga shoka e na okuninga. Kim okamwanakadhona ketu okwa li haka kwathele mokuteleka nokulongekidha oshitaafula shokulila.” Omwanamati gwawo Michael okwa ti: ‘Etiyali kehe kongulohi otwa li hatu kala nokugongala kwegongalo megumbo lyetu. Onkene otwa li hatu opaleke ondunda nawa nokulongela iipundi pomahala.’ Omwanamati Matthew okwa gwedha ko a ti: “Tate okwa li ha si oshimpwiyu opo e ye kegumbo kuyele esiku ndyoka tu na okugongala opo e tu kwathele twi ilongekidhile okugongala.” Oshe ya etela uuwanawa washike?

Oonkambadhala dhawo odha pondola

Mike okwa hokolola a ti: “Mo 1987 ngame naDenise otwa tameke okulonga tu li aakokolindjila. Pethimbo ndyoka aanona yetu yatatu otu li natango nayo megumbo. Yaali yomuyo oya ningi wo aakokolindjila naayakwawo oya longa miilonga yokutunga omagumbo gaBetel. Shoka she tu etele enyanyu lya gwedhwa po osho kutya uukwanegumbo wetu owa kwathele aantu 40 yi igandjele Jehova nokuninginithwa. Otwa li wo tu na uuthembahenda wokulonga miilonga yokutunga tu li uukwanegumbo nokiilongo yopondje.”

Oonkambadhala adhihe ndhoka dhokulongela kumwe odha pondola shili. Mbela opu na omikalo dhilwe ndhoka wu na okulongitha muukwanegumbo woye opo mu longele kumwe? Ngele uukwanegumbo weni ohawu longele kumwe, otashi ke wu kwathela shili wu hume komeho pambepo.

[Ethano pepandja 29]

Otashi kwathele ayehe ya hume komeho muukalele ngele oyi ilongekidha