Shoka tashi eta enyanyu muukwanegumbo

Nkene to vulu okuungaunga naavali yakuume koye kopandjokana

Jenny aokwa ti: Meme gwaRyan okwa li a popi shu ukilila kutya ina hokwa ndje. Ihe aavali yandje kaya li wo ya hokwa Ryan. Dhoshili, inandi mona nale aavali yandje tayi ihumbatele nayi nando gumwe i ili. Okutalela po aavali yetu kutya nduno oyandje nenge oye, osha li uupyakadhi uunene kutse.

Ryan okwa ti: Meme kali nando a dhiladhila ngele opu na ngaa ngoka to opalele oyana, onkee ano, okwa li u ulike kutya ina hokwa Jenny okuza ngaa petameko. Aavali yaJenny nayo oya kala aluhe nokupa ndje uusama. Uupyakadhi owo mbuka kutya konima sho pwa holoka oonkalo dha tya ngawo, ngame naJenny otwa kala nokupopila aavali yetu nokwiipa uusama.

EIPUMOMUMWE naavali yakuume koye kopandjokana otashi vulika li kale lya fa oshinima oshiwanawa okuninga omashendjo, ihe monkalamwenyo yakehe esiku kashi shi oshinima shiyolitha. Omukulukadhi Omuindia gwedhina Reena okwa ti: “Uule woomvula mememweno okwa kala nokwiidhopa mondjokana yetu. Olwindji onda kala nokufululukila ondjahi yandje momusamane gwandje molwaashoka kanda li te vulu okufululukila mumeme gwe. Osha li hashi monika aluhe sha fa e na okuhogolola pokati kokukala omusamane omuwanawa nenge okukala omwanamati omuwanawa.”

Omolwashike aavali yamwe hayi idhopo moondjokana dhoyana? Jenny ngoka a popiwa petameko, okwa li e eta po eetopo limwe a ti: “Oshi li oshidhigu kuyo okumona gumwe omugundjuka ngoka kee na owino a kale e na oshinakugwanithwa shokusila oshimpwiyu okamwanamati nenge okamwanakadhona kawo.” Dilip, omusamane gwaReena, okwa ningi eetopo lya gwedhwa po. Okwa ti: “Aavali mboka ya li yi iiyamba nokuputudha okanona kawo otashi vulika ya li yu uvite ya fa ye ekelwahi. Otaya vulu wo okukala ya limbililwa shili kutya oyanamati naakadhona kaye na ontseyo ya gwana okuninga ondjokana yi kale tayi pondola.”

Omathimbo gamwe aaihokani oyo haya pula aavali yawo yi idhope moondjokana dhawo. Pashiholelwa, dhiladhila kaaihokani Michael naLeanne yokuAustralia. Michael okwa popi a ti: “Leanne okwa za muukwanegumbo mboka wu na ekwatathano lyopothingo moka haya kundathana iinima puuyelele nakehe gumwe megumbo. Konima owala sho twa hokana, Leanne okwa li ha pula omayele kutate gwe kombinga yomatokolo ngoka tse naye twa li twa pumbwa okuninga. Tate gwe oku na uunongo owundji, ihe osha li she ehameka ndje sho ha yi kuye peha lyokuya kungame.”

Osha yela kutya, oontamanana naavali yakuume kopandjokana otadhi vulu okweeta uudhigu mondjokana. Mbela nangoye owu li monkalo ya tya ngawo? Owu uvitathane ngaa naavali yakuume koye kopandjokana, nakuume koye kopandjokana oha longele ngaa kumwe naavali yoye? Dhiladhila komashongo ngoka taga vulu okuholoka po naashoka to vulu okuninga po kombinga yago.

ESHONGO LYO-1: Kuume koye kopandjokana otashi vulika a kale a fa e na ekwatathano lya pitilila naavali ye. Omusamane gumwe muSpania gwedhina Luis okwa ti: “Omukulukadhi gwandje okwa li u uvite kutya ngele itatu kala popepi naakuluntu ye, ita ka kala omudhiginini kuyo.” Okwa gwedha po a ti: “Mepingathano naashoka, sho okanona ketu okamati ka valwa, aavali yandje oya li haye ya oku tu talela po konyala esiku kehe, naashoka osha li sha ningitha omukulukadhi gwandje a kale a gwililwa po komaipulo. Shika osha li she etitha oontamanana pokati ketu.”

Shoka sha simana osho kutya: Ombiimbeli oya popya kombinga yelongekidho lyondjokana tayi ti: “Omulumentu oku na okuthiga po he nayina e ta kwatathana nomukadhi, oyo notaa ningi onyama yimwe.” (Genesis 2:24) Okukala “onyama yimwe” okwa kwatela mo oshindji kaashi shi owala okukala pamwe. Paushili, osha hala okutya omusamane nomukulukadhi otaya tameke po uukwanegumbo uupe, mboka tawu ya tango komeho gomaukwanegumbo gaavali yawo. (1 Aakorinto 11:3) Odhoshili, omusamane nomukulukadhi oya pumbwa okukala natango taya simaneke aavali yawo, naashoka olundji osha kwatela mo oku ya sila oshimpwiyu. (Aaefeso 6:2) Mbela ongiini ngele momukalo ngoka kuume koye kopandjokana ha gandja eitulomo kaavali ye ohali ku ningitha wu kale wu uvite wa fa kuuniwe nangoye?

Shoka to vulu okuninga: Tala konkalo neitulomo. Mbela kuume koye kopandjokana oku na ngaa lela ekwatathano unene naavali ye, nenge ongoye owala kuu na ekwatathano ndyoka naavali yoye? Ngele osho shi li ngawo, mbela otashi vulika onakuziwa yuukwanegumbo weni ya guma etaloko lyoye li na ko nasha naashoka? Mbela otashi vulika ho kala wa sa ondumbo?—Omayeletumbulo 14:30; 1 Aakorinto 13:4; Aagalati 5:26.

Otashi pula eikonakono lyashili lyopaumwene mokuyamukula omapulo ga tya ngawo. Ihe osha simana wu shi ninge. Kakele kaashono, ngele oshinima shika shaavali yakuume koye kopandjokana oshi li onzo yoontamanana pokati koye nakuume koye kopandjokana, onkee ano shoka wu na lela osho uupyakadhi womondjokana, ihe kashi shi uupyakadhi woonakuvala yakuume koye kopandjokana.

Omaupyakadhi ogendji mondjokana ohaga holoka molwashoka kapu na ookuume yaali haya tala ko thiluthilu iinima sha faathana. Mbela ito vulu okukala wu na etaloko lyiinima lya fa lyakuume koye kopandjokana? (Aafilippi 2:4; 4:5) Shoka osho omusamane gumwe muMeksiko gwedhina Adrián a li a ningi. “Omukulukadhi gwandje okwa putukila muukwanegumbo wu na enwethomo ewinayi, onkee ano onda kala nokwiiyageka uukuume wopothingo naavali ye. Nolwahugunina onda ka tinda okukala ndi na eendathano nayo, uule woomvula. Shika oshe eta eipumomumwe mondjokana yetu molwaashoka omukulukadhi gwandje natango okwa kala a hala okukala popepi naapambele ye, uunene tuu meme gwe.”

Konima yethimbo, Adrián okwa kala e na etaloko li li pandjele moshinima shoka. Okwa ti: “Nonando ondi shi shi kutya ekwatathano olindji naavali yomukulukadhi gwandje oli na enwethomo ewinayi momaiyuvo gomukulukadhi gwandje, ngele kapu na ekwatathano otashi vulu wo okufala muupyakadhi. Onda li nda ningi ngaashi te vulu opo ndi kale ndi na ekwatathano ewanawa naavali yomukulukadhi gwandje.”b

KAMBADHALA OKUNINGA SHIKA: Ngoye nakuume koye kopandjokana nyoleni shoka mu wete kutya osho mwa pititha komeho shi na ko nasha naavali yakuume koye kopandjokana. Ngele otashi wapa, tameka to ti: “Ngame ondu uvite kutya . . . ” Opo ihe kehe gumwe na gandje ombapila ye kumukwawo. Amuhe otamu vulu okweeta po omadhiladhilo omape mombepo yelongelokumwe kutya otamu ka ninga po shike opo mu ungaunge nomaupyakadhi ngoka kehe gumwe e na.

ESHONGO ETI-2: Aavali yakuume koye kopandjokana aluhe ohaya idhopo mondjokana yoye, nokugandja omayele inaaga pumbiwa. Omukulukadhi gwedhina Nelya a kala muKazakhstan okwa ti: “Oomvula heyali dhotango dhondjokana yetu otwa li twa kala pamwe nuukwanegumbo womusamane gwandje. Omaipumomumwe oga kala nokutsikila nkene tu na okuputudha aanona yetu nosho wo okuteleka kwandje nokwoopaleka. Onda li nda popi nomusamane gwandje nosho wo namememweno kombinga yaashoka, ihe shika oshe eta owala omaipumomumwe!”

Shoka sha simana okuninga: Uuna wa hokana nenge wa hokanwa, ku li we kohi yepangelo lyaavali yoye. Pehala lyaashono Ombiimbeli otayi tumbula kutya “Kristus oye omutse gwomulumentu kehe, omulumentu oye omutse gwomukadhi,” sha hala okutya, omusamane gwe. (1 Aakorinto 11:3) Nonando ongaaka, ngaashi sha tumbulwa metetekelo, omusamane nomukulukadhi ayehe oye na okusimaneka aavali yawo. Dhoshili, Omayeletumbulo 23:22 otage tu lombwele taga ti: “Pulakena ho ngoka e ku vala, ngoye ino dhina nyoko sho a kulupa.” Ihe mbela ongiini ngele aavali yoye nenge aavali yakuume koye kopandjokana inaya hala okutaamba ko oshili kutya omusamane oye omutse gwuukwanegumbo nohaya kambadhala oku mu thiminikila omataloko gawo?

Shoka to vulu okuninga: Mombepo yuukwawo wanankali, kambadhala okuuva ko kutya omolwashike tashi monika sha fa tayi idhopo mo. Ryan ngoka a popiwa petameko, okwa ti: “Poompito dhimwe aavali oya pumbwa okutseya kutya natango oye li ya simana moonkalamwenyo dhaanona yawo.” Eidhopomo lya tya ngawo otashi vulika inaali ningilwa owina notali vulu okukandulwa po mokutula miilonga ekumagidho lyOmbiimbeli ‘okukwathathana nokudhiminathana po oondjo ethimbo kehe, uuna pe na ngoka a ningathana namukwawo.’ (Aakolossa 3:13) Ihe mbela ongiini ngele okwiidhopa kwaavali yakuume koye kopandjokana okwa kwata miiti e taku eta eipumomumwe pokati koye nakuume koye kopandjokana?

Aaihokani yamwe oyi ilonga okutula po omangambeko ga yeleka naavali yawo. Shika itashi ti kutya owu na oku ya tulila po ompango momukalo omwiinayi nenge wu kale to ya ihumbatele nayi.c Olwindji, shoka sha pumbiwa owala osho okuulika okupitila miilonga yoye kutya kuume koye oye te ya tango mokukalamwenyo kwoye. Pashiholelwa, omusamane gwomuJapani gwedhina Masayuki okwa ti: “Nonando aavali yoye otaya popi sha yela mo nkene ya tala ko oshinima, ino tsa kumwe nayo pethimbo mpoka. Dhimbulukwa kutya ngoye opo to tameke uukwanegumbo uupe. Onkee ano, tango mona kutya kuume koye kopandjokana oku uvite ngiini kombinga yomayele ngoka.”

KAMBADHALA OKUNINGA SHIKA: Kundathana nakuume koye kopandjokana kutya omomikalo dhini dhokondandalunde eidhopomo lyaavali hali eta eipumomumwe mondjokana yeni. Mu li pamwe, nyoleni kutya omangambeko geni tamu vulu okutula po nongiini tamu vulu oku ga dhiginina nonando tamu tsikile okuulika esimaneko kaavali yeni.

Omaipumomumwe ogendji naavali yakuume kopandjokana otaga vulu okukandulwa po mokumona kutya oshike tashi ge etitha nokwaaetha omaipumomumwe ngaka ge ete okwaahauvathana pokati koye nakuume koye kopandjokana. Moshinima sha tya ngaaka, Jenny okwa zimina a ti: “Omathimbo gamwe oonkundathana pokati kandje nomusamane gwandje kombinga yaavali yetu ohadhi tu yemateke, nosha li sha yela kutya okupopya kombinga yokwaahagwanenena kwawo otaku vulu oku tu ehameka noonkondo. Ihe lwahugunina otwi ilonga okwaahalongitha we okwaahagwanenena kwaavali yetu okweehamekathana ihe tu kale hatu ungaunga nuupyakadhi wopethimbo mpoka. Oshizemo, otwa hedha pamwe noonkondo tu li omusamane nomukulukadhi.”

[Omanyolo gopevi]

IPULA TO TI . . . 

▪ Aavali yakuume kandje kopandjokana oye na omaukwatya omawanawa geni?

▪ Ongiini tandi vulu okusimaneka aavali yandje nopethimbo opo tuu mpoka otandi gandja eitulomo kukuume kandje kopandjokana?