ONTOPOLWA 14
Shoka tashi eta ombili megumbo
1, 2. Jehova okwa hala aanegumbo ya kale ngiini momagumbo?
JEHOVA KALUNGA oye omutotipo gwondjokana. Ombiimbeli otayi ti kutya okwa shiti omukiintu gwotango, Eva, “e te mu eta komulumentu.” Sho Adam e mu mono, okwa li a nyanyukwa noonkondo. Okwa ti: “Ndika esipa lyomomasipa gandje nonyama yomonyama yandje.” (Genesis 2:22, 23) Shika otashi tu ulukile kutya Jehova okwa hala aaihokani ya kale ye na ombili.
2 Shinikitha oluhodhi, aantu oyendji muuyuni kaye na ombili momagumbo gawo. Ombiimbeli oyi na omayele ngoka taga kwathele aanegumbo, ya mone nkene taya vulu okukala ye na ombili. — Lukas 11:28.
KALUNGA OKWA HALA AASAMANE YA KALE YA TYA NGIINI?
3, 4. (a) Omusamane oku na okukala ngiini nomukulukadhi gwe? (b) Omolwashike omusamane nomukulukadhi ye na okukala haya dhiminathana po?
3 Ombiimbeli otayi ti kutya omusamane oku na okukala e hole omukadhi nohe mu simaneke. (Lesha Aaefeso 5:25-29.) Omusamane oku na aluhe okukala hu ulukile omukadhi ohole. Oku na oku mu gamena, noku mu sila oshimpwiyu. Ke na nando oku mu uvitha nayi.
4 Omusamane oku na okwiinyenga ngiini uuna omukadhi a ninga epuko? Ombiimbeli otayi ti: “Holeni aakiintu yeni, ne inamu kala mu na onyanya nayo.” (Aakolossa 3:19) Omusamane oku na okudhimbulukwa kutya naye oha ningi omapuko. Ngele okwa hala Kalunga e mu dhimine po, naye na kale ha dhimine po omukulukadhi gwe. (Mateus 6:12, 14, 15) Ngele omusamane nomukulukadhi ohaya dhiminathana po, otashi ke ya kwathela ya nyanyukilwe ondjokana yawo.
5. Omolwashike omusamane e na okukala ha simaneke omukulukadhi gwe?
5 Jehova okwa hala aasamane ya kale haya simaneke aakulukadhi yawo. Opu na oshinima shimwe sha simana shoka omusamane e na okukala ha ningi. Oku na okukala hi ipula kombinga yoompumbwe dhomukulukadhi gwe. Ngele ihe mu sile nawa oshimpwiyu, Jehova ita ka pulakena komagalikano ge. (1 Petrus 3:7) Mboka ye hole Jehova, oye na ondilo momeho ge. Jehova ina simaneka aalumentu shi vulithe aakiintu.
6. Ombiimbeli oya hala okutya ngiini sho tayi ti omusamane nomukulukadhi oye li “omuntu gumwe”?
6 Jesus okwa popi kutya omusamane nomukulukadhi “kaye li we yaali, aawe, oyo omuntu gumwe.” (Mateus 19:6) Oye na okudhiginina ondjokana yawo nokukala yi inekelathana. (Omayeletumbulo 5:15-21; Aahebeli 13:4) Omusamane nomukulukadhi oye na okwiigwanithila po oompumbwe dhawo dhopamilalo. (1 Aakorinto 7:3-5) Omusamane oku na okukaleka momadhiladhilo kutya “kaku na nando omuntu e tonde olutu lwe mwene, ihe kehe gumwe ohe lu palutha nohe lu sile oshimpwiyu.” Oku na okukala e hole omukadhi, e mu hole tagu pu mo nokukala naye nombili. — Aaefeso 5:29.
KALUNGA OKWA HALA AAKULUKADHI YA KALE YA TYA NGIINI?
7. Omolwashike egumbo kehe lya pumbwa omutse?
7 Egumbo kehe olya pumbwa omutse. Olya pumbwa ngoka e na oku li wilika, opo aanegumbo ya longele kumwe. Aakorinto yotango 11:3 otayi ti: “Kristus oye omutse gwomulumentu kehe, omulumentu oye omutse gwomukadhi, naKalunga oye omutse gwaKristus.”
8. Ongiini omukulukadhi e na okusimaneka omusamane gwe?
8 Kapu na omusamane ihaa ningi omapuko. Nonando ongawo, omukulukadhi oku na okukala ha ambidhidha omatokolo gomusamane gwe. Oku na wo okukala ha longele kumwe naye, opo ya kale ye na ombili megumbo. (1 Petrus 3:1-6) Ombiimbeli otayi ti: ‘Omukiintu kehe oku na okusimaneka omulumentu gwe.’ (Aaefeso 5:33) Omukulukadhi oku na okuninga po shike, ngele omusamane gwe ke shi gweitaalo lye? Oku na oku mu simaneka. Ombiimbeli otayi ti: “Aakiintu, vulikeni kaalumentu yeni, opo aalumentu mboka inaa itaala oohapu dhaKalunga, ya falwe meitaalo komikalo dheni. Itamu pumbwa oku shi ninga noohapu, oshoka oyo otaa ka mona, nkene omikalo dheni dha yogoka nonkene hamu simaneke Kalunga.” (1 Petrus 3:1, 2) Omikalo omiwanawa dhomukulukadhi otadhi vulu okukwathela omusamane gwe u uve ko eitaalo lye noku li simaneke.
9. (a) Omukulukadhi oku na okuninga po shike, uuna kaayu uvitathane nomusamane? (b) Omayele geni ge na ko nasha naakulukadhi taga adhika muTitus 2:4, 5?
9 Omukulukadhi oku na okuninga po shike, uuna kaayu uvitathane nomusamane? Oku na okupopya nesimaneko nkene u uvite. Pashiholelwa, Sara okwa li a popi oshinima shoka Abraham a li inaa panda. Jehova okwa lombwele Abraham ta ti: “Gwanitha shoka Sara te ku lombwele.” (Genesis 21:9-12) Olundji omusamane Omukriste oha ningi omatokolo ge li metsokumwe naashoka Ombiimbeli tayi ti. Onkee ano, omukulukadhi oku na oku mu ambidhidha. (Iilonga 5:29; Aaefeso 5:24) Omukulukadhi omuwanawa oha sile oshimpwiyu aanegumbo lye. (Lesha Titus 2:4, 5.) Oku na wo okukala ha longo nuudhiginini, opo a sile oshimpwiyu omusamane gwe naanona. Iilonga ye yuudhiginini, otayi ke ya ningitha ya kale ye mu hole noye mu simaneka. — Omayeletumbulo 31:10, 28.
Sara okwa tulila po aakiintu oshiholelwa oshiwanawa shini?
10. Ombiimbeli otayi ti ngiini kombinga yetopoko nehengathano?
10 Omathimbo gamwe aaihokani ohaya katuka nziya ya topoke nenge ya hengathane. Ombiimbeli otayi ti kutya “omukiintu ina henga po omulumentu gwe,” ‘nomulumentu ina henga po nando omukadhi.’ (1 Aakorinto 7:10, 11) Opu na oonkalo ndhoka tadhi pitike aaihokani ya topoke. Etokolo ndyoka olya kwata miiti. Mbela uunake taya vulu okuhengathana? Ombiimbeli otayi ti kutya opu na owala etompelo limwe lya simana, ndyoka tali pitike ehengathano. Aaihokani otaya vulu okuhengathana uuna gumwe a yi moluhondelo. — Mateus 19:9.
KALUNGA OKWA HALA AAVALI YA KALE YA TYA NGIINI?
Jesus okwa tulila po kehe gumwe oshiholelwa oshiwanawa
11. Aanona oya pumbwa shike shoka sha simanenena?
11 Aavali kaleni pamwe noyana yeni ethimbo lya gwana ngaashi tashi vulika. Omolwashike mbela? Opo mu ya longe kombinga yaJehova. Elongo ndyoka olya simanenena li vule iinima ayihe. — Deuteronomium 6:4-9.
12. Aavali oye na okuninga shike, opo ya gamene oyana?
12 Uuyuni waSatana otawu ende tawu nayipala noonkondo. Opu na aantu yamwe mboka ya hala okuhepeka aanona pamilalo. Aavali yamwe ohaya mono oshidhigu okupopya ya manguluka noyana kombinga yomilalo. Nonando ongawo, oya pumbwa okulonga nokulondodha oyana kombinga yaantu mboka. Aavali omwa pumbwa okugamena aanona yeni.a — 1 Petrus 5:8.
13. Aavali oye na okulonga oyana ngiini?
13 Aavali oye na oshinakugwanithwa shokulonga oyana nkene ye na okwiihumbata. Ongiini to vulu okulonga aamwoye? Aanona oya pumbwa eputudho, ihe kali na okugandjwa nonyanya. (Jeremia 30:11) Ku na oku li gandja uuna wa geya. Oohapu dhoye kadhi na okukala tadhi “ulula ngegongamwele” nenge tadhi ya geyitha. (Omayeletumbulo 12:18) Kwathela aamwoye yu uve ko kutya omolwashike ye na okuvulika. — Aaefeso 6:4; Aahebeli 12:9-11; tala eyelitho eti-30.
KALUNGA OKWA HALA AANONA YA KALE YA TYA NGIINI?
14, 15. Omolwashike aanona ye na okuvulika kaavali yawo?
14 Jesus okwa li ha vulika aluhe kuHe, nonando pethimbo limwe kasha li oshipu. (Lukas 22:42; Johannes 8:28, 29) Jehova okwa hala wo aanona ya vulike kaavali yawo. — Aaefeso 6:1-3.
15 Omathimbo gamwe ohashi kala oshidhigu kaanona ya vulike kaavali. Uuna taya vulika, otaya nyanyudha Jehova nosho wo aavali yawo.b — Omayeletumbulo 1:8; 6:20; 23:22-25.
Oshike tashi kwathele aagundjuka ya kale aadhiginini kuJehova, uuna taya makelwa ya longe uuwinayi?
16. (a) Satana oha longitha oolye ye ku ningithe wu longe uuwinayi? (b) Omolwashike sha simana wu konge ookuume mboka ye hole Jehova?
16 Satana oha longitha ookuume koye naagundjuka ooyakweni ye ku ningithe wu longe uuwinayi. Oku shi shi kutya ohashi kala oshidhigu okukondjitha omathiminiko ga tya ngaaka. Pashiholelwa, omwanakadhona gwaJakob, Dina, okwa li a panga uukuume naantu kaaye hole Jehova. Shika osha li she mu etele uupyakadhi pamwe noyaandjawo. (Genesis 34:1, 2) Ngele ookuume koye kaye hole Jehova, otaye ke ku ningitha wu longe shoka Jehova e tonde. Shoka otashi ke ku etela iizemo iiwinayi notashi ke ehameka aavali yoye naKalunga. (Omayeletumbulo 17:21, 25) Osha simana wu konge ookuume mboka ye hole Jehova. — 1 Aakorinto 15:33.
SHOKA TASHI ETA OMBILI MEGUMBO
17. Kehe gumwe oku na oshinakugwanithwa shashike megumbo?
17 Uuna tamu landula omayele ngoka ge li mOmbiimbeli megumbo, onkalo otayi ka kala yi li hwepo. Aasamane kaleni mu hole aakulukadhi yeni nomwe ya lenga. Aakulukadhi kaleni hamu simaneke aasamane yeni nohamu vulika kuyo. Holeleni omukulukadhi ngoka a popiwa mOmayeletumbulo 31:10-31. Aavali longeni aanona yeni ya kale ye hole Jehova. (Omayeletumbulo 22:6) Wu li omutse gwegumbo, kala ho wilike aanegumbo yoye momukalo gu li “nawa.” (1 Timoteus 3:4, 5; 5:8) Aanona vulikeni kaavali yeni. (Aakolossa 3:20) Kala wu shi kutya kehe gumwe oha ningi omapuko. Onkee ano, kala omwiifupipiki e to kala ho dhimine po. Ombiimbeli oyi na omayele ga za kuJehova, ngoka taga kwathele kehe gumwe megumbo.
a Oto vulu okumona uuyelele wa gwedhwa po wankene to vulu okugamena aamwoye mOntopolwa 32 yembo Ilonga kOmulongi Omunene, lya nyanyangidhwa kOonzapo dhaJehova.
b Okanona kake na okuvulika kaavali yako, ngele oya hala ka ninge oshinima shoka shi li ompinge nOohapu dhaKalunga. — Iilonga 5:29.